E arue te feia parau-tia i te Atua e a muri noa ˈtu
E arue te feia parau-tia i te Atua e a muri noa ˈtu
“E manaˈo-tamau-hia te feia parau-tia . . . E tia ta ˈna parau-tia i te vai-maite-raa.”—SAL. 112:6, 9.
1. (a) Eaha te tau oaoa no a muri aˈe e tiai mai ra i te mau taata atoa ta te Atua e faataata parau-tia? (b) Eaha te uiraa e hiti ra?
AUÊ ïa tau no a muri aˈe faahiahia e tiai mai ra i te mau taata atoa ta te Atua e faataata parau-tia e! E oaoa ratou i te ite atu â i te mau huru maitatai nehenehe o Iehova e a muri noa ˈtu. E î to ratou aau i te arueraa a ite roa ˈi ratou i ta te Atua mau ohipa poieteraa. Hoê o te mau titauraa faufaa roa no te fanaˈo i taua tau no a muri aˈe hanahana ra, o te “parau-tia” ïa i haamahitihitihia i roto i te Salamo 112. E nafea râ te Atua moˈa e te parau-tia ra o Iehova e faataata parau-tia ˈi i te mau taata hara? Noa ˈtu e te tutava ra tatou i te haa no te rave i te mea tia, e hape iho â tatou, e hape rahi i te tahi mau taime.—Roma 3:23; Iak. 3:2.
2. Eaha na semeio e piti ta Iehova i faatupu ma te here?
2 Ma te here, ua horoa Iehova i te hoê ravea tia roa. Mea nafea ïa? Na mua, ma te faatupu i te semeio e tahiti ê i te ora o ta ˈna Tamaiti here i te raˈi i roto i te opu o te hoê paretenia ia nehenehe oia e fanauhia ei taata tia roa. (Luka 1:30-35) E i muri aˈe i to te mau enemi o Iesu haapoheraa ia ˈna, ua faatupu Iehova i te tahi atu â semeio faahiahia. Ua faahoˈi mai te Atua ia Iesu i te ora ei varua hanahana.—Pet. 1, 3:18.
3. No te aha te Atua i oaoa ˈi i te haamaitai i ta ˈna Tamaiti i te oraraa i te raˈi?
3 Ua haamaitai Iehova ia Iesu i te tahi mea ta ta ˈna Tamaiti i ore i fanaˈo i to ˈna oraraa hou a riro ai ei taata—te oraraa pohe ore i nia i te raˈi. (Heb. 7:15-17, 28) Ua oaoa Iehova i te na reiraraa no te mea ua vai taiva ore noa Iesu i roto i te mau tamataraa ino mau. Ua horoa ïa Iesu na to ˈna Metua i te pahonoraa maitai roa ˈˈe, oia ma te hope roa, i ta Satani haavare e e tavini te taata i te Atua ma te mau manaˈo turai miimii eiaha râ ma te here fati ore.—Mas. 27:11.
4. (a) I to ˈna hoˈiraa i nia i te raˈi, eaha ta Iesu i rave no tatou, e ua aha Iehova? (b) Eaha to oe huru i mua i ta Iehova raua Iesu i rave no oe?
4 Mea rahi roa ta Iesu i rave i nia i te raˈi. Ua ‘faaite oia ia ˈna i mua i te aro o te Atua no tatou’ e te faufaa o ‘to ˈna iho toto.’ Ua farii to tatou Metua î i te here i te raˈi ma te hamani maitai i ta Iesu pûpûraa taoˈa rahi ei “taraehara i ta tatou nei hara.” No reira, ma te ‘aau tamâhia,’ e nehenehe tatou e “haamori i te Atua ora ra.” E tumu mau â ta tatou no te haavevo i te mau parau faaomuaraa o te Salamo 112, “E haamaitai [aore ra arue] ia Iehova”!—Heb. 9:12-14, 24; Ioa. 1, 2:2.
5. (a) E mea tia ia aha tatou ia tapea i te hoê tiaraa tia i mua i te Atua? (b) Mea nafea te Salamo 111 e te 112 i te faanahoraahia i roto i te reo Hebera tumu?
5 Ia faataata parau-tia te Atua ia tatou, e mea tia ia faaohipa noa tatou i te faaroo i to Iesu toto i haamaniihia. E mea tia ia haamauruuru tatou ia Iehova i te mau mahana atoa no te here-roa-raa mai. (Ioa. 3:16) E mea tia atoa ia tamau tatou i te haapii i te Parau a te Atua e i te faaitoito hua noa i te ora ia au i to te reira poroi. E aˈoraa maitai roa to roto i te Salamo 112 no te taata atoa e hinaaro e tapea noa i te hoê manaˈo haava mâ i mua i te Atua. E tuati teie salamo e te Salamo 111. I roto i te reo Hebera tumu, e omua mai na Salamo e piti atoa ra e te mau parau “E arue ia Ia!” aore ra “Halelu Ia” e ua apitihia mai e e 22 reni, e e haamata te reni taitahi e te hoê o na reta e 22 o te piapa Hebera. a
Te hoê niu no te oaoa
6. Mea nafea te haamaitairaahia te “taata” e mǎtaˈu ra i te Atua o te Salamo 112?
6 “E ao to te taata i mǎtaˈu ia Iehova ra: tei riro roa to ˈna aau i ta ˈna parau. E mana hoi to ˈna huaai i te fenua nei; e maitai hoi te tamarii a te feia parau-tia ra.” (Sal. 112:1, 2) A tapao na e te faahiti ra na mua te fatu salamo i te hoê “taata” e i muri iho te taui ra oia ei parau otini “feia parau-tia” i te tuhaa hopea o te irava 2. Te horoa ra te reira i te manaˈo e te faahiti ra te Salamo 112 i te hoê pǔpǔ o e rave rahi taata. Ei patururaa i teie manaˈo, ua faaurua te aposetolo Paulo ia faaohipa i te Salamo 112:9 no te mau Kerisetiano i te senekele matamua. (A taio i te Korinetia 2, 9:8, 9.) Te faataa maitai ra teie salamo e nafea te mau pǐpǐ a te Mesia i te fenua nei i teie mahana e nehenehe ai e oaoa!
7. No te aha e mea tia ˈi ia mǎtaˈu faatura te mau tavini a te Atua ia ˈna, e eaha to oe huru i mua i ta te Atua mau faaueraa?
7 Mai tei faaitehia i roto i te Salamo 112:1, e oaoa rahi teie mau Kerisetiano mau a haere ai ratou ma te “mǎtaˈu ia Iehova.” Na teie mǎtaˈu faatura eiaha e faainoino ia ˈna e tauturu ra ia ratou ia patoi i te feruriraa o te ao a Satani. “E riro roa” ratou i te haapii i te Parau a te Atua e i te faaroo i ta ˈna mau faaueraa, tae noa ˈtu te faaueraa e faaite haere i te evanelia i te fenua atoa nei. Te tutava ra ratou i te faariro i te taata o te mau fenua atoa ei pǐpǐ a faaara ˈi i te paieti ore no te taeraa mai o te mahana haavaraa a te Atua.—Ezek. 3:17, 18; Mat. 28:19, 20.
8. (a) Mea nafea te nunaa paieti o te Atua i teie mahana i te haamaitairaahia no to ratou itoito rahi? (b) Eaha te mau haamaitairaa no a muri aˈe e tiai mai ra i te feia e tiaturiraa to ratou i te fenua nei?
8 No te mea te faaroo ra ratou i teie mau faaueraa, fatata e hitu mirioni tavini a te Atua i teie mahana i te fenua nei. O vai te nehenehe e patoi e “e mana” to ˈna nunaa “i te fenua nei”? (Ioa. 10:16; Apo. 7:9, 14) E auê ïa ratou i te ‘haamaitaihia’ a faatupu ai te Atua i ta ˈna opuaraa! Ei pǔpǔ, e paruruhia te feia e tiaturiraa to ratou i te fenua nei i te “ati rahi” e piri mai ra no te riro mai ei “fenua apî” i reira ‘e vai mau ai te parau-tia.’ I muri aˈe, ‘e haamaitai-roa-hia ˈtu â’ te mau taata e ora ˈtu i Aramagedo. Ua ineine ratou i te farii e mirioni taata e tia faahou mai. Auê ïa tiairaa oaoa e! I te pae hopea, e haere te feia “tei riro roa” i ta te Atua mau faaueraa i te tia-roa-raa e e fanaˈo e a muri noa ˈtu i “te tiamâ maitai o te tamarii a te Atua.”—Pet. 2, 3:13; Roma 8:21.
Faaohiparaa ma te paari i te taoˈa
9, 10. Mea nafea te mau Kerisetiano mau i te faaohiparaa i ta ratou mau taoˈa pae varua, e e nafea ta ratou parau-tia e tia ˈi i te vai-maite-raa?
9 “E atuatu tei to ˈna fare e te taoˈahia; e tia hoi ta ˈna parau-tia i te vai-maite-raa. Ei te pouri nei e hiti mai ai te maramarama i te feia parau-tia; e te hamani maitai, e te aroha, e te piˈo ore.” (Sal. 112:3, 4) I te mau tau bibilia, ua matauhia vetahi mau tavini a te Atua no ta ratou mau faufaa materia. E i roto i te tahi atu auraa, e taoˈahia iho â te mau taata ta te Atua e farii ra, noa ˈtu e e ere i roto i te hoê auraa pae materia. Mea veve e mea hiˈo-ino-hia paha te rahiraa o te mau taata e maiti ra i te faahaehaa ia ratou i te aro o te Atua, mai i to Iesu tau. (Luka 4:18; 7:22; Ioa. 7:49) Teie râ, noa ˈtu e mea rahi aore ra mea iti te taoˈa materia a te hoê, e nehenehe oia e taoˈahia i te pae varua.—Mat. 6:20; Tim. 1, 6:18, 19; a taio i te Iakobo 2:5.
10 Eita te mau Kerisetiano faatavaihia, e to ratou mau hoa, e tapea na ratou iho i ta ratou mau taoˈa pae varua. Te ‘faahiti ra’ râ ratou i roto i te ao pouri a Satani “i te maramarama i te feia parau-tia.” Te na reira ra ratou ma te tauturu ia vetahi ê ia fanaˈo i te mau taoˈa rahi pae varua o to te Atua paari e te ite ia ˈna. Ua tutava te mau taata patoi i te tapea i te pororaa i te Basileia aita râ i manuïa. “E tia” râ te hotu a teie ohipa parau-tia i “te vai-maite-raa.” Ma te tapea noa i te hoê haerea parau-tia, e nehenehe te mau tavini a te Atua e fanaˈo i te haapapuraa e ora e a muri noa ˈtu, ‘e tia i te vai-maite-raa.’
11, 12. Eaha vetahi mau ravea ta te nunaa o te Atua e faaohipa ra i ta ratou mau taoˈa materia?
11 Ua haapapu te nunaa o te Atua, te pǔpǔ o te tavini faatavaihia e te “feia rahi roa,” e mea pipiri ore ratou i te mau taoˈa materia. Te na ô ra te Salamo 112:9: “Ua opere noa oia, e ua horoa hua na tei veve ra.” E pinepine te mau Kerisetiano mau i teie mahana i te horoa i te mau ô materia na te mau hoa Kerisetiano e oia atoa na te mau taata-tupu e fifi ra. Te faaohipa atoa ra ratou i te mau faufaa materia no te paturu i te mau ohipa tauturu i te tau ati. Mai ta Iesu iho â i faaite, tera te tumu o te oaoa rahi.—A taio i te Ohipa 20:35; Korinetia 2, 9:7.
12 Hau atu â, a manaˈo na i te haamâuˈaraa no te nenei i teie vea i roto 172 reo, e rave rahi e paraparauhia ra e te mau taata huru veve. A manaˈo atoa na e te vai ra teie vea i roto i te mau reo aparaa rima rau na te tariˈa turi, oia atoa i roto i te papai Braille na te matapo.
Hamani maitai e te tia
13. O vai na hiˈoraa maitai roa ˈˈe o te horoaraa ma te hamani maitai, e e nafea ia pee i to raua hiˈoraa?
13 “E hamani maitai to te taata maitai, e horoa ta ˈna ia tipeehia mai.” (Sal. 112:5) Ua ite paha oe e eita te taata o te tauturu ia vetahi ê e hamani maitai noa. Te horoa ra vetahi no te faaite e mea rahi aˈe ta ratou i ta te tahi atu aore ra ma te amuamu. Mea au ore ia tauturu mai te hoê taata o te faahaehaa ia oe aore ra o te hiˈo ia oe ei hopoia. Mea haumǎrû mau râ ia fanaˈo i te tauturu a te hoê taata hamani maitai! E hiˈoraa faahiahia Iehova ei Ihotaata horoa hamani maitai e te oaoa. (Tim. 1, 1:11; Iak. 1:5, 17) Ua faaite Iesu Mesia ma te tia roa i te hiˈoraa o to ˈna Metua hamani maitai. (Mar. 1:40-42) No reira, ia faataata parau-tia te Atua ia tatou, e horoa maitai tatou e ma te hamani maitai, i roto iho â râ i te taviniraa ia tauturu tatou i to tatou mau taata-tupu i te pae varua.
14. Eaha vetahi mau ravea e nehenehe ai tatou ‘e rave i ta tatou mau ohipa ma te haapao’?
14 “E rave oia i ta ˈna mau peu [“ohipa,” MN] atoa ma te haapao.” (Sal. 112:5) Mai tei faaite-atea-hia, te haapao ra te tiaau haavare ore i te mau taoˈa a te Fatu ia au i ta Iehova haapao, aore ra parau-tia. (A taio i te Luka 12:42-44.) Te itehia ra te reira i roto i te aratairaa bibilia e horoahia ra i te mau matahiapo, o te titauhia ia haapao maite i te mau hara rahi i roto i te amuiraa. Te ite-papu-atoa-hia ra te huru raveraa o te mau ohipa i roto i te aratairaa bibilia ta te pǔpǔ o te tavini e horoa ra e nafea te mau amuiraa, fare mitionare, e te mau Betela atoa ia ohipa. E titauhia te parau-tia eiaha noa i te mau matahiapo, i te tahi atu mau Kerisetiano atoa râ ia haa ratou i nia i te tahi i te tahi e i nia i te feia tiaturi ore, tae noa ˈtu i te pae imiraa faufaa.—A taio i te Mika 6:8, 11.
Haamaitairaa no te feia parau-tia
15, 16. (a) Eaha te faahopearaa o te mau parau peapea a te ao i nia i te feia parau-tia? (b) Ua faaoti papu te mau tavini a te Atua e tamau noa i te rave i te aha?
15 “E ore roa oia e arori; e manaˈo-tamau-hia te feia parau-tia, e a muri noa ˈtu: e ore roa oia e mǎtaˈu i te roo ino ra: ua mau to ˈna aau i te tiaturiraa ia Iehova. No te mea ua itoito tana aau e ore oia e mǎtaˈu, e ite noa ˈtu oia i te hiˈaraa o to ˈna mau enemi.” (Sal. 112:6-8) Aita i ite-roa-hia aˈenei i roto i te tuatapaparaa e rave rahi roa parau peapea, tae noa ˈtu te mau tamaˈi, te totoaraa, te mau maˈi apî e te fa-faahou-raa mai o te mau maˈi tahito, te ohipa ino, te veve, e te viivii faaino. Eita te mau taata ta te Atua e faataata parau-tia ra e nehenehe e ape i te mau faahopearaa o teie mau parau peapea, aita râ ratou e mǎtaˈu ra i te tau no a muri aˈe. E ‘mau e e itoito’ râ to ratou aau a hiˈo ai ratou i te tau no a muri aˈe ma te tiaturi, ma te ite e te piri mai ra te ao apî parau-tia a te Atua. Ia tairi te ati, e faaruru maitai aˈe ratou i te tupuraa no te mea te turui ra ratou i nia ia Iehova no te paturu mai. Eita roa ˈtu oia e vaiiho i to ˈna feia parau-tia ia “arori”—e tauturu oia e e faaetaeta ˈtu no te faaoromai.—Sal. 29:11.
16 Te faaoromai atoa ra te feia parau-tia a te Atua i te riri e te haavare ta te mau taata patoi e haaparare ra, eita roa ˈtu râ te reira e tapea i te mau Kerisetiano mau eiaha ia poro. E tamau râ te mau tavini a te Atua i te mau maite e te itoito i roto i te ohipa ta Iehova i horoa na ratou—e faaite haere i te evanelia o te Basileia e e faariro i te taata atoa o te farii mai ei pǐpǐ. Aita e feaaraa, e farerei te feia parau-tia i te patoiraa e maraa ra a piri roa mai ai te hopea. E raea teie riri i to ˈna faito hopea i roto i te aroraa na te ao atoa nei a Satani te Diabolo, ia ohipa mai oia ei Goga no Magoga. E i te pae hopea, ‘e ite noa ˈtu tatou i te hiˈaraa o to tatou mau enemi’ a pau roa ˈi ratou ma te haama. Auê ïa ohipa faahiahia ia ite i te haamaitai-roa-raa o te iˈoa o Iehova!—Ezek. 38:18, 22, 23.
‘Faateiteihia ma te tura’
17. E nafea te taata parau-tia ‘e faateiteihia ˈi ma te tura’?
17 Mea oaoa mau â ia arue ia Iehova ma te auhoê, ma te patoi-ore-hia e te Diabolo e ta ˈna ao! E arue te taata atoa o te tapea noa i te hoê tiaraa parau-tia i mua i te Atua ma te oaoa ia Iehova e a muri noa ˈtu. Eita ratou e pau no te mea te fafau atoa ra Iehova e ‘e faateiteihia ma te tura te tara’ o to ˈna taata parau-tia. (Sal. 112:9) E umere te taata parau-tia o Iehova ma te upootia i te iteraa i te pau o te mau enemi atoa o te mana arii o Iehova.
18. E nafea te mau parau hopea o te Salamo 112 e tupu ai?
18 “E ite te paieti ore ma te oto, e auau to ˈna niho, e mou atura: te tiaturiraa o te paieti ore ra, e mou ïa.” (Sal. 112:10) Ua fatata te taata atoa o te tamau i te patoi i te nunaa o te Atua i te “mou” i roto i to ratou nounou e riri. E mou to ratou hinaaro e ite i te hopea o ta tatou ohipa e o ratou i te “ati rahi” e piri mai ra.—Mat. 24:21.
19. Eaha ta tatou e nehenehe e tiaturi?
19 To rotopu anei oe i te mau taata oaoa e ora ˈtu o tera upootiaraa rahi? Aore ra ia pohe oe no te maˈi aore ra no te ruhiruhiaraa hou te hopea o te ao a Satani, to rotopu anei oe i “te feia parau-tia” e tia faahou mai? (Ohi. 24:15) E nehenehe e pahono e, mai te peu e e tamau oe i te faaohipa i te faaroo i te tusia taraehara o Iesu, mai te mau taata e faahohoˈahia ra e te “taata” parau-tia o te Salamo 112. (A taio i te Ephesia 5:1, 2.) E ara Iehova ia “manaˈo-tamau-hia” teie mau taata e ta ratou mau ohipa parau-tia atoa. E haamanaˈohia e e herehia ratou e Iehova e a muri noa ˈtu e a tau a hiti noa ˈtu.—Sal. 112:3, 6, 9.
[Nota i raro i te api]
a Te itehia ra te tuatiraa o teie na salamo e piti i roto i to raua huru faanahoraahia e te mea atoa e vai ra i roto. Te pee ra te “taata” mǎtaˈu i te Atua o te Salamo 112 i te mau huru maitatai o te Atua e faateiteihia ra i roto i te Salamo 111, mai te nehenehe e itehia ia faaauhia te Salamo 111:3, 4 e te Salamo 112:3, 4.
Uiraa ei feruriruriraa
• Eaha vetahi mau tumu e umere ai tatou “Halelu Ia”?
• Eaha te tupuraa o teie tau e faaoaoa roa ra i te mau Kerisetiano mau?
• Teihea huru taata horoa ta Iehova e here?
[Uiraa haapiiraa]
[Hohoˈa i te api 25]
Ia faataata parau-tia te Atua ia tatou, e mea tia ia faaohipa tatou i te faaroo i to Iesu toto i haamaniihia
[Hohoˈa i te api 26]
E nehenehe te mau ô aau tae e paturu i te ohipa tauturu e te parareraa o te mau papai bibilia