Tskʼupil kʼoptaik sbatel osil Dios li buchʼutik tukʼike

«Li bochʼo tucʼ yoʼntone te oy o scʼoplal. [...] Mu snaʼ xlaj o li slequil yoʼntone.» (SAL. 112:6, 9)

1. 1) ¿Kʼusi ti toj kʼupil xa noʼox sba tstaik li buchʼutik lek tukʼ ch-ilatik yuʼun Diose? 2) ¿Kʼusi chichʼ jakʼel?

 ¡TOJ kʼupil xa noʼox sba kʼusi tstaik li buchʼutik lek tukʼ ch-ilatik yuʼun Diose! Ta sbatel osil xuʼ jech ta skʼupil kʼoptabeik li yan sba yutsil stalelaltak Jeovae. Ti kʼalal chojtikinbeik batel mas li kʼusitik spasojane, jaʼ me chtijbat-o yoʼontonik ta skʼupil kʼoptael ta sjunul yoʼontonik. Li Salmo 112 chalbe lek smelolal ti toj tsots skʼoplal li tukʼilal ta sventa li alakʼ sba kuxlejal ta jelavele. Akʼo mi jech, xi chichʼ jakʼele: ¿kʼuxi ti tukʼ jtalelaltik chil Jeova ti tukʼ xchiʼuk chʼul stalelal stuke, ti jpas mulilutik li voʼotike? Jnaʼojtik lek ti akʼo mi jpastik persa spasel li kʼusi tukʼe, jech-o ta jpastik li kʼusi chopole, bateltike toj echʼ noʼox chopolik (Rom. 3:23; Sant. 3:2).

2. ¿Kʼusi chib skʼelobil juʼelal la spas Jeova ta skoj ti skʼanojutike?

² Ta skoj ti skʼanojutik li Jeovae, oy kʼusi yakʼoj sventa tukʼ xchapaj taje. ¿Kʼuxi la xchapan? Ta baʼyele, ta skʼelobil sjuʼelal Jeova la sjelubtasbe li xkuxlejal xNichʼon ti skʼanoj tajeke, te laj yakʼ ta yalajeb jun tojol tseb sventa xvokʼ kʼuchaʼal jun tukʼil krixchano (Luc. 1:30-35). Laj xtoke la spas yan sba yutsil skʼelobil juʼelal li Jeovae, jaʼo ti kʼalal la xchaʼkuxes li Jesús ti laj ta milel ta yajkontratake, laj yakʼbe jun yan sba yutsil xkuxlejal ti mu xvinaj ta kʼelele (1 Ped. 3:18).

3. ¿Kʼu yuʼun xmuyubaj tajek Jeova ti la stojbe svokol xNichʼon kʼalal laj yakʼbe li xkuxlejal ta vinajele?

 ³ Li Jeovae la stojbe svokol Jesús, laj yakʼbe li kʼusi muʼyuk toʼox yuʼun ti kʼalal skʼan toʼox xtal ta Balumile: laj yakʼbe xkuxlejal ta vinajel ti mu snaʼ xlaje (Heb. 7:15-17, 28). Taje xmuyubaj tajek laj yakʼbe, yuʼun li xNichʼone lek tukʼ yoʼonton la yakʼ sba akʼo mi tsots laj yil svokol. Ta skoj ti tukʼ laj yakʼ sba ta stojolal Dios li Jesuse, toj lek laj yakʼ ta ilel mi melel li kʼusi xchibal kʼoptaoj Satanase, taje jaʼ la ti mi jaʼ noʼox chtun ta stojolal Dios li jun krixchano ti mi lek oye xchiʼuk ti muʼyuk la skʼanoj ta melel li Diose (Pro. 27:11).

4. 1) ¿Kʼusi la spas Jesús ta jventatik ti kʼalal sut muyel ta vinajele, xchiʼuk kʼu yelan laj yil li Jeovae? 2) ¿Kʼu yelan chavaʼi ti kʼalal cha nop ta sventa ti kʼusi spasoj Jeova xchiʼuk Jesús ta atojolale?

⁴ Oy to kʼusi la spas kʼalal te xaʼox oy ta vinajel li Jesuse. «Jaʼ te [kʼopoj] cuʼuntic ta stojol Dios sventa chiscoltautic», yuʼun la smanutik ta «xchʼichʼal stuc». Jech li jkʼanvanej Totil kuʼuntik ta vinajel eke, lek laj yil li alakʼ sba matanal laj yakʼ Jesús «ta milbil matanal sventa la stojbutic jmulti[ke]». Koliyal taje, xuʼ me sak jol koʼontontik «chlic tuncutic yuʼun li cuxul Diose». Ta melel, jaʼ me srasonal kuʼuntik sventa jech xkaltik ek li kʼusi chal ta slikeb Salmo 112: «Ichʼbiluc ta mucʼ li Diose» (Heb. 9:12-14, 24; 1 Juan 2:2).

5. 1) ¿Kʼusi skʼan jpastik sventa tukʼutik-o ta stojolal li Diose? 2) ¿Kʼuxi chlik li Salmo 111 xchiʼuk 112? (Kʼelo xtok li tsʼib ta yok vune.)

⁵ Sventa tukʼutik-o ta stojolal Diose skʼan me xkakʼ-o xchʼunel koʼontontik ti la smal xchʼichʼel Jesuse. Skʼan me skotoluk kʼakʼal jtojbetik ta vokol Jeova ta skoj ti skʼanojutik tajeke (Juan 3:16). Skʼan xkakʼ ta koʼontontik xchanel li Vivlia xtoke xchiʼuk xkakʼ ta jkuxlejaltik ti bu kʼalal xuʼ kuʼuntik li chanubtasel chakʼe. Li Salmo 112 chakʼbutik lek tojobtasel ta jventatik li buchʼutik oy ta koʼontontik ti sakuk-o lek jol koʼontontik ta stojolal Diose. Ta melel, li salmo liʼe xchiʼuk li Salmo 111 tstsʼakubtas sbaik. Xi chlik xchibal li salmo taje: «Ichʼbiluc ta mucʼ li Diose» o «¡Aleluya!». a

Oy kʼusi xuʼ xi jmuyubaj-o

6. ¿Kʼusi bendisional tsta «li bochʼo» chichʼ albel skʼoplal ta Salmo 112?

⁶ «Xcuxet noʼox yoʼnton li bochʼo chichʼ ta mucʼ Mucʼul Diose, ti jaʼ muiben o xaʼay snopbel li smantaltaque. Lec chbat li xnichʼnabtaque, xchiʼuc oy lec stsatsalic; ta xʼacʼbat slequilal yutsilalic li smomnichʼnabtac bochʼo tucʼ yoʼntonique.» (Sal. 112:1, 2.) Kakʼtik venta ti baʼyel chalbe skʼoplal jun vinik li jtsʼibajom yuʼun Salmoe, pe ta mas tsʼakale oy xa jayvoʼ chalbe skʼoplal kʼalal xi chal li ta slajebal versikulo 2: li «bochʼo tucʼ yoʼntonique». Taje jaʼ chakʼ kiltik ti chalbe skʼoplal jtsop krixchanoetik li Salmo 112. Taje toj yan sba yutsil ta aʼyel ti akʼbat snaʼ yuʼun Dios li jtakbol Pablo ti jaʼ la skʼoplal yajtsʼaklom Cristo ta baʼyel siglo li kʼusi chal Salmo 112:9 (kʼelo 2 Corintios 9:8, 9). ¡Toj lek chalbe skʼoplal ti kʼuyelan xuʼ sta smuyubajelik li yajtsʼaklom Cristo li avi kʼakʼale!

7. ¿Kʼu yuʼun skʼan jlekil xiʼtatik li Diose, xchiʼuk kʼusi skʼan oyuk ta koʼontontik ta sventa li smantaltak Diose?

 ⁷ Jech kʼuchaʼal chal Salmo 112:1 xmuyubajik noʼox li melel yajtsʼaklomtak Cristoe, yuʼun «chichʼ[ik] ta mucʼ [o chiʼtaik li] Mucʼul Diose». Li slekil xiʼtael ti mu skʼan spasik li kʼusi chopol chile, jaʼ chkoltaatik-o sventa stsal yuʼunik li kʼusi tskʼan sbalumil Satanase. «Jaʼ muiben o xaʼay[ik]» xchanbel li sKʼop Diose xchiʼuk ti chchʼunbeik li smantaltake, jech kʼuchaʼal xcholel li lekil aʼyej ta sventa li Ajvalilal yuʼun Dios ta spʼejel Balumile. Jech xtok chakʼik persa ta spasel ta yajtsʼaklom Cristo li krixchanoetik ta skotol lumetike xchiʼuk tspʼijubtasik li buchʼutik chopolik ti poʼot xa xnopaj talel li chapanel yuʼun Diose (Eze. 3:17, 18; Mat. 28:19, 20).

8. 1) ¿Kʼusi matanal staojik avi kʼakʼal li buchʼutik oy tajek ta yoʼontonik li smantaltak Diose? 2) ¿Kʼusitik bendisional tskʼupinik li buchʼutik smalaoj chkuxiik ta Balumile?

⁸ Koliyal ti chchʼunik li mantaletik taje, li yajtuneltak Diose oy xa mas ta vukub miyon ta spʼejel Balumil. ¿Buchʼu van xuʼ chal ti mu meleluk ti «oy lec stsatsalic» ta balumil li epal krixchanoetik taje? (Juan 10:16; Apo. 7:9, 14, Ch.) ¡Xchiʼuk mas to me ep bendisionetik tstaik kʼalal mi kʼot ta pasel li kʼusi tskʼan Diose! Ta skotolik li buchʼutik smalaojik li kuxlejal ta Balumile ta me xichʼik chabiel li ta «tsots svocolique» xchiʼuk jaʼ chkʼotik li ta «achʼ banamil» «ti bu puru tucʼ xa cʼusitic te oye». Li epal krixchanoetik ti kuxul chkomik li ta Armagedone «ta xʼacʼbat slequilal yutsilalic», mas to ti kʼalal chilik chchaʼkuxi tal li buchʼutik chamike. ¡Yan sba yutsil li kʼusi smalaojike! Vaʼun li buchʼutik «jaʼ muiben o xaʼay snopbel li smantalta[k]» Diose ta me staik li tukʼilale xchiʼuk tskʼupinik sbatel osil li «slequilal yutsilal ti [«skolebal», NM] xnichʼnabtac ti Diose» (2 Ped. 3:13; Rom. 8:21, Ch).

Pʼijuk kʼuyelan jtunestik li kʼulejale

9, 10. ¿Kʼuxi stunesoj skʼulejalik ta mantal li melel yajtsʼaklomtak Cristoe, xchiʼuk kʼuxi «mu xlaj o» skʼoplal li stukʼilalike?

⁹ «Ta xʼayin ep scʼulejal te ta sna, xchiʼuc  mu xlaj o li slequil yoʼntone. Xojoban ta stojol li yantic ti tucʼ yoʼntonique, yuʼun lec chcʼuxubinvan; oy slequil yoʼnton xchiʼuc tucʼ yoʼnton.» (Sal. 112:3, 4.) Jlom yajtuneltak Dios ta skʼakʼalil Vivliae jkʼulej echʼik. Akʼo mi jech, skotol li buchʼu lek chʼambil yuʼun Diose xuʼ me sta skʼulejal ek, akʼo mi muʼyuk kʼusi mas x-ayan yuʼunik. Jech onoʼox, li buchʼutik bikʼit chakʼ sbaik ta stojolal Diose jaʼ ep ti abol noʼox sbaike, taje xuʼ van jaʼ xichʼik-o pʼajel, jech kʼuchaʼal la spasik ta skʼakʼalil Jesuse (Luc. 4:18; 7:22; Juan 7:49). Akʼo mi jkʼulejutik o mi abol noʼox jbatik ta takʼin, jkotoltik xuʼ oy kuʼuntik li melel kʼulejale: li kʼulejal ta mantale (Mat. 6:20; 1 Tim. 6:18, 19; kʼelo Santiago 2:5).

¹⁰ Li yajtsʼaklomtak Cristo ti tʼujbil chbatik ta vinajele xchiʼuk li yan chijetike muʼyuk tskʼej sventa stukik li skʼulejalik ta mantale. Moʼoj, yuʼun yakal chojobajik li ta sbalumil Satanase, ta «xojoba[jik] ta stojol li yantic ti tucʼ yoʼntonique». ¿Kʼu yelan? Jaʼo kʼalal chalbeik batel li krixchanoetik li kʼulejal ta mantal ti chakʼ pʼijilale xchiʼuk li yojtikinel Diose. Akʼo mi tsots chakʼ yipalik li kajkontratik sventa tspajes yaʼiik li yalbel batel skʼoplal Ajvalilal yuʼun Diose muʼyuk chkʼot ta pasel yuʼunik, yuʼun li kʼusi lek chkʼot ta pasel yuʼunik li yajtuneltak Diose «mu xlaj o» skʼoplal. Mi jech-o chanavik ta tukʼilal li yajtuneltak Dios akʼo mi ep vokoliletik ta snuptanike, snaʼojik me ta melel ti chkuxiik sbatel osile, jech, «mu xlaj o» skʼoplalik.

11, 12. ¿Kʼuxi tstunes kʼusitik oy yuʼunik li yajtuneltak Diose?

¹¹ Li yajtuneltak Diose —li buchʼutik tʼujbil chbatik ta vinajel xchiʼuk li «epal cristianoeti[ke]»— lek snaʼ xakʼik li kʼusitik oy yuʼunike. Li Salmo 112:9 xi chale: «Tspuc cʼusitic oy yuʼun, chacʼbe meʼonetic». Li melel yajtuneltak Diose tskoltaik ta kʼusitik chtun yuʼunik li yermanotakike xchiʼuk li slakʼnaik ti skʼanik koltaele. Jech xtok tstunes li kʼusitik oy yuʼunik sventa tskoltaik li buchʼutik chil svokol ta nojelal ta voʼ, ta nikel o ta yan kʼusitik. Chmuyubajik-o xtok taje, jech kʼuchaʼal laj yal Jesuse (kʼelo Hechos 20:35 xchiʼuk 2 Corintios 9:7).

¹² Jnoptik noʼox ti kʼu to yepal chlaj takʼin sventa chichʼ pukel li revista liʼe, ti chlokʼ ta 172 kʼopetike, ep li buchʼutik jech ta xkʼopojik taje muʼyuk lek stakʼinik. Mu me jchʼay ta joltik xtok ti ep ta chop ta senya kʼop chichʼ lokʼesel sventa stabeik sbalil li buchʼu pakʼchikinetike xchiʼuk chichʼ lokʼesel ta braile kʼop sventa li maʼsatetike.

Oy slekil yoʼontonik xchiʼuk tukʼik

13. ¿Buchʼutik ti xuʼ lek jchanbetik stalelal ti oy slekil yoʼontone xchiʼuk ti lek snaʼ xakʼ kʼusi oy yuʼune?

¹³ «Li bochʼo lec yoʼntonique chcʼuxubinvanic, chacʼ ta qʼuexel cʼusi oy yuʼunic.» (Sal. 112:5.) Ta melel, kakʼojtik lek venta li buchʼu chakʼike mu jaʼuk ta xtijbat-o yoʼonton li slekil yoʼontonike o li xkʼuxul yoʼontonike. Kʼalal chakʼ kʼusi oy yuʼunik junantike, jaʼ noʼox sventa chakʼ ta ilel ti oy yuʼunike, junantik xtoke ta stiʼemal sjol chakʼik. Ta melel, mu kʼupiluk sba ti tskoltautik li buchʼu spʼajojutike, ti chkakʼtik venta ti jaʼ noʼox ta jsabetik sjole o ti j-akʼ vokolilutik noʼox chile. Pe ¡jun yutsil ti kʼalal ta slekil yoʼonton tskoltautik li jun krixchanoe! Jaʼ toj lek xuʼ jchanbetik stalelal li Jeovae, yuʼun li stuke ta muyubajel onoʼox chakʼbutik xchiʼuk ta slekil yoʼonton (1 Tim. 1:11; Sant. 1:5, 17). Li Jesucristoe jaʼ jech tajek laj yakʼ ta ilel ti kʼuyelan stalelal sTote (Mar. 1:40-42). Mi ta jkʼantik ti tukʼ chilutik li Dios eke, skʼan me ta muyubajel xkakʼtik xchiʼuk ta sjunul koʼontontik, mas to me jech skʼan jpastik li ta chol mantal sventa ta jkoltatik ta mantal li krixchanoetike.

14. ¿Kʼuxi xuʼ «lec tucʼ [jventaintik] scotol li cʼusitic oy [kuʼuntike]»?

¹⁴ «Lec tucʼ tsventain scotol li cʼusitic oy yuʼune.» (Sal. 112:5.) Jech onoʼox kʼuchaʼal albile, li jchabi na ti tukʼ yoʼontone jaʼ tspas li tukʼil mantaletik yuʼun Jeova kʼalal chchabi li kʼusi oy yuʼun Yajval nae (kʼelo Lucas 12:42-44, NM). Taje jaʼ te chvinaj li ta beiltaseletik ta Vivlia ch-akʼbatik li moletike, yuʼun bateltike jaʼ tskʼelbeik skʼoplal li tsatsal muliletik chkʼot ta pasel ta tsobobbaile. Ti tukʼ snaʼ x-abtej li j-abtele jaʼ te chvinaj li ta mantaletik ta Vivlia chakʼ sventa lekuk li tsobobbaile, li snail misioneroetike xchiʼuk li Beteletike. Ta melel, maʼuk noʼox skʼan jech spasik li moletike, yuʼun jkotoltik skʼan oyuk jtukʼiltik xkiltik li kermanotaktike xchiʼuk li buchʼutik  maʼuk yajtsʼaklomtak Cristoe; li beiltaseletik taj xtoke te me tsakal skʼoplal li kʼusitik ta sventa takʼine (kʼelo Miqueas 6:8, 11).

Bendisionetik sventa li buchʼutik tukʼike

15, 16. 1) ¿Kʼuxi tstsal yuʼunik chopol aʼyej li buchʼutik tukʼike? 2) ¿Kʼusi jpʼel ta yoʼonton tspasik li yajtuneltak Diose?

¹⁵ «Jaʼ yuʼ un me jutuc mu xyal o ta lum. Li bochʼo tucʼ yoʼntone te oy o scʼoplal. Mu xiʼ cʼalal me oy chopol loʼil chtal ta stojole, yuʼun batsʼi jun yoʼnton o; xchʼunoj o ti jaʼ chcoltaat yuʼun li Mucʼul Diose. Jʼechʼel lec nacal o li yoʼntone, me jutuc muʼyuc ta xiʼ; snaʼoj ti tsalbil onoʼox chcom li yajcontrae.» (Sal. 112:6-8.) Ti kʼu sjalil echʼem tal xkuxlejal li krixchanoetike muʼyuk bu jech xkaʼitik-o li chopol aʼyejetike. Nopajtik noʼox chkaʼitik li aʼyejetik sventa pas kʼop, mukʼta j-akʼ xiʼel, achʼ chameletik, chameletik ti chchaʼlik tale, povreal, ti yantik xa sok batel li Balumile, li majbail xchiʼuk milbaile. Li buchʼutik tukʼ ta stojolal Jeovae ta onoʼox me xil svokolik ek li ta chopol aʼyejetik taje, pe maʼuk me ti mu xa snaʼ kʼusi tspasik ta skoj xiʼele. «Yuʼun batsʼi jun yoʼnton o» xchiʼuk «me jutuc muʼyuc ta xiʼ». Jun yoʼonton smalaojik li kʼusi chtal ta mas tsʼakale, yuʼun snaʼojik ti nopol xa skʼan xtal li achʼ balumil yuʼun Diose. Ta skoj ti spatoj yoʼontonik ta stojolal Jeovae lek snaʼoj kʼusi tspasik kʼalal oy kʼusi tsots tsnuptanike, mu jechikuk kʼuchaʼal li yantike. Li Jeovae «mu [x]yal o ta lum» yuʼun, moʼoj, yuʼun tskolta xchiʼuk chakʼbe stsatsal yoʼonton sventa xkuch batel yuʼun li vokoliletike (Fili. 4:13).

¹⁶ Li tukʼil krixchanoetik xtoke chilik pʼajel xchiʼuk tsabat smulik yuʼun li yajkontratakike, akʼo mi jech, mi jaʼuk onoʼox bu chmak-o yeik li yajtsʼaklomtak Cristoe. Moʼoj, yuʼun li yajtuneltak Diose yakʼoj ta yoʼontonik spasbel li yabtel Jeova akʼbil sbainike: li yalbel batel skʼoplal li lekil aʼyej sventa Ajvalilal yuʼun Diose xchiʼuk li spasel batel ta yajtsʼaklom Cristo li krixchanoetik ti lek chaʼiik mantale. Ta melel, mas to me tstsatsaj tal li vokolil kʼalal yakal xnopaj tal li slajeb kʼusitik liʼe, yuʼun jaʼ to me chlaj skʼoplal ti kʼalal tsaʼvan ta kʼop ta spʼejel Balumil li Gog ta Magog, jaʼ xkaltik, li Diabloe. Vaʼun, ta me jnaʼtik o chkiltik «ti tsalbil onoʼox chcom li [kajkontrataktike]» xchiʼuk ta me xkiltik ti kʼuyelan toj kʼexlal sba chlajike. ¡Toj yan sba yutsil chkiltik ti kʼuyelan chakʼ ta chʼultajesel ta jyalel sbi li Jeovae! (Eze. 38:18, 22, 23.)

«Lec ichʼbil ta mucʼ»

17. ¿Kʼu yelan lek «ichʼbil ta mucʼ» chkʼot skotol li buchʼu tukʼike?

¹⁷ ¡Toj echʼ noʼox xi jmuyubaj ti jmoj chkichʼtik ta mukʼ Jeovae, ti muʼyuk xa tskontrainutik li Diablo xchiʼuk sbalumile! Li muyubajel taje jaʼ me li smoton tstaik sventa sbatel osil li buchʼutik tukʼ-o oyik ta stojolal Diose. Muʼyuk me ti kʼexlal xa sba chlajik ta tsalele, yuʼun li Jeovae yaloj ti «lec ichʼbil ta mucʼ» chkʼotik li buchʼutik tukʼike (Sal. 112:9). Ta skoj ti ta muyubajel tajek oyike, ta xalik echʼel ti tsal xa yuʼun Jeova li buchʼutik skontrainojik mukʼul pas mantal yuʼune.

18. ¿Kʼuxi chkʼot ta pasel li kʼusi chal ta slajeb Salmo 112?

¹⁸ «Li bochʼo chopol yoʼntone toj chopol chcʼot yoʼnton ti cʼalal chile; ta xcʼux ye yuʼun tsalbil chcʼot o. Li cʼusi oy ta yoʼntone chlaj scʼoplal o.» (Sal. 112:10.) Liʼ ta jelavel jutuke «tsalbil chcʼot o» li buchʼutik tskontrainbeik steklumal Diose. Li yitʼixal yoʼontonike, li stiʼemal yoʼontonike xchiʼuk ti tskʼan tajek chakʼbeik slajeb li kabteltike te me chlaj-o skʼoplal li ta «tsots vocole» (Mat. 24:21).

19. ¿Kʼusi ti jpatoj-o lek koʼontontike?

¹⁹ ¿Mi kuxul van cha kom sventa cha kʼel ti kʼu yelan labal sba chkuch yuʼun Jeova taje? O mi la laj ta chamel o ta skoj malubel ti kʼalal skʼan toʼox xkʼot li slajeb kʼusitik liʼe, ¿mi te van kapal akʼoplal ek xchiʼuk li buchʼutik tukʼik ti chchaʼkuxiike? (Hech. 24:15.) Jaʼ me jech mi chavakʼ-o xchʼunel avoʼonton ti laj yakʼ sba ta milel ta jtojolaltik li Jesuse xchiʼuk mi cha chanbe stalelal li Jeovae, jech kʼuchaʼal tspas li krixchanoetik ti te albil skʼoplalik ta stojolal «li bochʼo» tukʼ xi ch-albat skʼoplal ta Salmo 112 (kʼelo Efesios 5:1, 2). Li Jeovae jaʼ me chakʼ ti «te oy o scʼoplal» li yajtuneltak xchiʼuk ti te me oy-o skʼoplal li kʼusitik tukʼ spasojike. Te me oy-o ta sjol xchiʼuk skʼananoj-o me sbatel osil (Sal. 112:3, 6, 9).

[Tsʼib ta yok vun]

Sjakʼobiltak sventa chichʼ nopel

• ¿Kʼusitik srasonal oy kuʼuntik sventa «¡Aleluya!» xi jchi?

• ¿Kʼusitik ti chmuyubajik-o li melel yajtsʼaklomtak Cristo avi kʼakʼale?

• ¿Kʼu yelan skʼan jtalelaltik sventa skʼanutik li Jeovae?

[Sjakʼobiltak sventa xchanobil]

[Lokʼol ta pajina 25]

Sventa tukʼutik-o ta stojolal Diose skʼan me xkakʼ xchʼunel koʼontontik ti la smal xchʼichʼel Jesuse

[Lokʼol ta pajina 26]

Kʼalal ta sjunul koʼontontik chkakʼtike jaʼ me jech ta jkoltatik li buchʼutik chil svokolike, chi jkoltavan li ta spasel xchiʼuk ta spukel vunetik ti chalbe skʼoplal Vivliae