Xilloti Xoossaa Merinau Galatoosona

“Xillo asi . . . merinau . . . hassayettana. . . . A xillotettai merinau de7⁠ees.” —MAZAMURE 112:6, 9.

1. (a) Xoossay xillodan xeelliyoogeeta ufayssiya ayba wodee sinttappe naagii? (b) Ayba oyshi denddii?

XOOSSAY xillo ootti xeelliyo asaa naata ubbaa maalaalissiya wodee sinttappe naagees! Yihoowa loˈˈo eeshshata xeelliyaagan eti darobaa tamaariyoogan merinau ufayttana. Xoossay medhido mereta oosota xeelliyaagan eti darobaa erido payduwan eta wozanay galatan kumana. Hegaa mala ufayssiya wodiyan deˈanau koshshiya waannabay, Mazamure 112y loyttidi qonccissidoogaadan, ‘xillo asa’ gidiyoogaa. SHin geeshshanne xillo gidida Xoossaa, Yihooway nagarancha gidida asaa naata waatidi xillodan xeellana danddayii? Nuuni suure gididabaa oottanau keehippe baaxetiyaaba gidikkokka, balabaa, ubba issi issitoo deexo nagaraa oottoos.—Roome 3:23; Yaaqooba 3:2.

2. Yihooway siiquwan polido maalaalissiya naaˈˈubati aybee?

² Yihooway nagarancha gidida asaa naata xillodan xeellanau oottiyaabaa siiquwan giigissiis. Waatidi? Koyruwan, saluwan deˈiya ba siiqo Naˈay polo asa gididi yelettanaadan a deˈuwaa issi geelaˈee uluwau aattidi maalaalissiyaabaa oottiyoogaana. (Luqaasa 1:30-35) Hegaappe morkketi Yesuusa worin, Yihooway hara keehippe maalaalissiyaabaa oottiis. Xoossay Yesuusa boncho ayyaana mereta oottidi deˈuwau denttiis.—1 PHeexiroosa 3:18.

3. Xoossay ba Naˈau saluwaa deˈuwaa immidoogan ufayttidoy aybissee?

 ³ Ba Naˈay asa gidanaappe kase au baynnabaa immiyoogan Yihooway Yesuusa woytiis—au xayenna deˈuwaa saluwan immiis. (Ibraawe 7:15-17, 28) Yesuusi iita waayiyan ammanettidi genccido gishshau, Yihooway hegaa ufayssan oottiis. Yesuusi hegaadan oottiyoogan, asaa naati Xoossaayyo oottiyoy bantta goˈˈaassa; qassi a keehippe siiqiyoogaappe denddidi gidenna giidi, Seexaanay mootiyo worddo mootuwau bixe zaaruwaa immiyoogan ba Aawaa ufayssiis.—Leemiso 27:11.

4. (a) Yesuusi saluwaa bi simmidi, nuussi ay oottidee? Yihooway shin hegaa waati ekkidee? (b) Yihoowaynne Yesuusi neeyyo oottidobaa waata xeellay?

⁴ Saluwan Yesuusi harabaakka oottiis. I “nu gishshaa Xoossaa sinttan beettanau,” “ba suuttaa” waagaa ekkidi yaa geliis. Saluwan deˈiya nu siiqo aaway Yesuusa alˈˈo imotaa ‘asa ubbaa nagaraa’ atto giissiya yarshsho oottidi ufayssan ekkiis. Yaatiyo gishshau, nuuni ‘geeshsha zoriya wozanay’ deˈiyoogeeta gididi, “de7⁠o Xoossau oottana” danddayoos. Hagee Mazamure 112 doomettan,“GODAA galatite!” giya qofaara mogganaadan gaaso gidees.—Ibraawe 9:12-14, 24; 1 Yohaannisa 2:2.

5. (a) Nuuni Xoossaa xeelan xillo gididi deˈanau ay oottana bessii? (b) Mazamure 111⁠nne Mazamure 112y giigidoy ayba ogiyaanee?

⁵ Nuuni Xoossaa xeelan xillo gididi deˈanau, gukkida Yesuusa suuttan ubbatoo ammanana bessees. Yihooway nuna keehippe siiqiyo gishshau, nuuni a ubba galla galatana koshshees. (Yohaannisa 3:16) Xoossaa Qaalaa aggennan xannaˈanaunne a qofaara moggidi deˈanaukka baaxetana koshshees. Xoossaa xeelan qumˈˈenna zoriya wozanaara deˈanau koyiya ubbau Mazamure 112y loˈˈo zoriyaa oyqqiis. Ha mazamuree Mazamure 111⁠ra gaytotettay deˈiyoogaa. Beni Ibrayisxxe Qaalan xaafettiyo wode, naaˈˈu mazamuretikka, “Asatoo, Yaah galatite!” woy “Haleeluuyaa!” giya qaalan doommoosona; eti huuphiyan huuphiyan 22⁠u maaray deˈiyoogeeta gidishin, ubba maaratikka doommiyoy Ibrayisxxe pitaliyaa maaraadaana. *

Ufayssau Baaso Gidiyaabaa

6. Mazamure 112n qonccida, Xoossaa yayyiya “asi” anjjettidoy ayba ogiyaanee?

⁶“GODAAYYO yayyiyanne a azazuwaa polanau daroppe ufaittiya asi anjjettidaagaa. A naati biittan wolqqaama gidana; suure asatu yeletai anjjettana.” (Mazamure. 112:1, 2) Mazamuraawee koyro “asi” giidi, paydo 2 wurssettan ‘suure asata’ giidi corau laammidoogaa akeeka. Hagee Mazamure 112y daro asay deˈiyo citaa malaatana danddayiyoogaa bessees. Koyro xeetu layttan deˈiya Kiristtaanetuura gayttidaagan, Mazamure 112:9n deˈiya ha qofaa goˈettanaadan kiitettida PHauloosa geeshsha ayyaanay kaalettiis. (2 Qoronttoosa 9:8, 9 nabbaba.) Kiristtoosa kaalliya, ha wodiyan saˈan deˈiyaageeti ufayttana danddayiyoogaa ha mazamuree loyttidi qonccissees!

7. Xoossau oottiyaageeti ayyo bessiya ogiyan yayyana koshshiyoy aybissee? Neeni Xoossaa azazota waatada xeellana koshshii?

⁷Mazamure 112:1n odettidaagaadan, tumu Kiristtaaneti ‘GODAAYYO yayyidi’ aara  hemettiyoogan daro ufayssaa demmoosona. Yihooway azzanenna mala bessiya ogiyan yayyiyoogee, Seexaanaa alamiyaa ayyaanaa eqettanau eta maaddees. Eti Xoossaa Qaalaa xannaˈiyoogaaninne a azazuwaa naagiyoogan ‘daroppe ufayttoosona.’ Hegee Kawotettaa mishiraachuwaa saˈa ubban sabbakanau imettida azazuwaakka gujjees. Eti sinttappe yiya Xoossaa pirddaa gallassaa iita asata akeekissoosona; qassi ubba biittaa asaappe erissiyo ashkkara oottanau baaxetoosona.—Hizqqeela 3:17, 18; Maatiyoosa 28:19, 20.

8. (a) Xoossau aqida asati mishettidi oottiyoogan ha wodiyan waanidi anjjettidonaa? (b) Saˈaa laattiyo hidootay deˈiyoogeeta sinttappe ayba anjjoy naagii?

⁸ He azazota azazettiyo gishshau, ha wodiyan Xoossau oottiyaageetu qooday laappun miilooniyaappe darees. A asay “biittan wolqqaama” gididoogaa kashi gaana danddayiyay oonee? (Yohaannisa 10:16; Ajjuutaa 7:9, 14) Xoossay ba halchuwaa poliyo wode eti keehippe “anjjettana”! Saˈan deˈiyo hidootay deˈiyoogeeti citan, ‘daro waayiyaappe’ attidi “xilloi de7anasaa,” “ooratta sa7aa” gididosona. Armmageedoonappe attiyaageeti guyyeppe keehi “anjjettana.” Hayquwaappe denddiya miilooniyan qoodettiyaageeta eti mokki ekkana. Hegee ayba keehi ufayssiya hidootee! Wurssettan, Xoossaa azazuwan “daroppe ufaittiya” asati polo gidana; qassi “Xoossaa naati ailletettaappe kiyido bonchcho kessaa” kiyidi merinau ufayttana.—2 PHeexiroosa 3:13; Roome 8:21.

Duretettaa Eratettan Goˈettiyoogaa

9, 10. Tumu Kiristtaaneti bantta ayyaanaabaa duretettaa waatidi goˈettidonaa? Eta xillotettay merinau deˈanay ayba ogiyaanee?

⁹“Aqotai duretettai a keettan de7⁠ees; a xillotettaikka merinau de7ana. Suure asassi, keha, xillonne qarettiya asatussi xumaa giddon poo7⁠oi poo7⁠ees.” (Mazamure 112:3, 4) Xoossaayyo oottiyaageetuppe beni wode deˈida amaridaageeti, aquwan dure gidiyoogan erettoosona. Aquwan gidana xayikkonne, Xoossay hara ogiyan tumuppe dure giidoogeeti deˈoosona. Xoossaa xeelan banttana kaushshanau koyiya daroti, Yesuusa  wodiyan deˈidaageetuugaadan hiyyeesatanne harati kariyoogeeta gidana danddayoosona. (Luqaasa 4:18; 7:22; Yohaannisa 7:49) Issi urau deˈiya aqoy daro woy guutta gidikkokka, ayyaanaaban dure gidana danddayees.—Maatiyoosa 6:20; 1 Ximootiyoosa 6:18, 19; Yaaqooba 2:5 nabbaba.

¹⁰ Tiyettida Kiristtaanetinne etaara oottiyaageeti, bantta ayyaana duretettaa bantta xallau goˈettokkona. Hegaadan oottiyoogaappe, eti Seexaanaa xuma alamiyan deˈiya “suure asassi” ‘pooˈuaa pooˈissoosona.’ Eti ayyaana aquwaa, giishin Xoossaa aadhida eratettaanne Xoossaa eraa harati goˈettanaadan maaddiyoogan hegaa oottoosona. Eta morkketi Kawotettaabaa sabbakiyo oosuwaa esissanau baaxetidaba gidikkonne, danddayibookkona. Ubba ha xillotetta oosuwaa ayfee “merinau de7ana.” Paacee deˈishinkka xillo gididi gencciyoogan, Xoossau oottiyaageeti ‘merinau deˈanaagaa’ ammanettana danddayoosona.

11, 12. Xoossaa asati bantta aquwaa goˈettiyo amarida ogeti awugeetee?

¹¹ Xoossaa asati, giishin tiyettidaageetinne “zawai bainna daro” asati bantta aquwaa goˈettiyoogan keha gidiyoogaa bessidosona. Mazamure 112:9y: “I hiyyeesa asaayyo darissidi immiis” yaagees. Tumu Kiristtaaneti ha wodiyan darotoo bantta aquwaappe bantta mala Kiristtaanetuyyoonne ubba maadoy koshshiyo bantta shoorotuyyookka immoosona. Eti bantta aquwaa meretaa daafay gakkiyo wode maaddiyo oosuwaa kaafanaukka goˈettoosona. Yesuusi yootidoogaadan, hegaadan oottiyoogee ufayssaa demissiyaaba.—Oosuwaa 20:35; 2 Qoronttoosa 9:7 nabbaba.

¹² Hegaa bollankka, ha maxeetiyaa hiyyeesa gidida daro asati haasayiyo, 172⁠u doonatun attamanau kiyiya miishshaa qoppa! Qassi ha maxeetee siyennaageetuyyo malaata haasayan, hegaadankka ayfee xeellennaageetuyyo Bireeliyan giigiyoogaakka qoppa.

Kehanne Suure

13. Kehatettan immiyoogan loˈˈo leemiso gidiyaageeti oonee? Nuuni eta leemisuwaa waatidi kaallana danddayiyoo?

¹³“Kehatettan coo tal77⁠iya uraayyo . . . kehabai yaana.” (Mazamure 112:5) Harata maaddanau immiya asati darotoo keha gidennaagaa akeekennan aggakka. Issoti issoti immiyoy banttau deˈiyoogaa bessanaassa woy uufiiddi immoosona. Neeni appe guutta gidiyoogaadan neessi siyettanaadan oottiya urappe woykko neeni a metiyoogaadaaninne ayyo tooho gidiyoogaadan neessi siyettanaadan oottiya urappe maado demmiyoogee ufayssenna. Hegaappe dumma gidida ogiyan, keha urappe maaduwaa demmiyoogee keehi ufayssees. Kehatettan immiyoogan Yihooway waanna leemiso. (Yaaqooba 1:5, 17) Yesuus Kiristtoosi keha gidida ba Aawaa leemisuwaa polo ogiyan qonccissiis. (Marqqoosa 1:40-42) Yaatiyo gishshau, Xoossaa xeelan xillo gidanau, nu shoorotuyyo ayyaana maaduwaa sabbako oosuwan immiyo wode, ufayssaaninne kehatettan immoos.

14. ‘Nu oosuwaa suuretettan oottana’ danddayiyo issi issi ogeti awugeetee?

¹⁴“Ba oosuwaa suuretettan oottiya uraayyo kehabai yaana.” (Mazamure 112:5) Kasetidi odettidoogaadan, ammanettida wozannaama ashkkaray ba Godau deˈiyaabata Yihoowa suure oosuwaara moggiya ogiyan oyqqees. (Luqaasa 12:42-44 nabbaba.) Hagee gubaaˈiyan deexo nagaray oosettiyo wode, gubaaˈiyaa cimati hegaa oyqqiyo ogiyaa xeelliyaagan etau imettiya Geeshsha Maxaafaa kaaletuwan qonccees. Ubba gubaaˈetun, miisooneti deˈiyo keettatuuninne Beeteele keettatun oosettiyaabaa Geeshsha Maxaafan baasettida kaaletuwan oyqqiyo ogiyankka ammanettida wozannaama ashkkaraa suure oosoy qoncciis. Gubaaˈiyaa cimatu xalla gidennan, hara Kiristtaanetikka issoy issuwaara deˈiya gaytotettaaninne ammanennaageetuura deˈiya gaytotettan suure oosuwaa oottana bessees; hegee zalˈˈiyaara gayttidabaakka gujjees.—Mikiyaasa 6:8, 11 nabbaba.

Xilloti Demmiyo Anjjuwaa

15, 16. (a) Alamiyan odettiya iita odoy xilloti waananaadan oottii? (b) Xoossaassi oottiyaageeti aggennan ay oottanau murttidonaa?

¹⁵“Xillo asi audenne kunddenna; merinau i  hassayettana. Iitabaa i siyikkokka dagammenna; aissi giikko, a wozanai yeeqenna; GODAN i ammanettees. A wozanai xala gidiyo gishshau, mulekka i yayyenna; wurssettan ba morkketi xoonettin be7ana.” (Mazamure 112:6-8) Hagaappe kase wodetun, hagaa keena olaa, shabbirssaa, ooratta harggiyaanne xayida harggee wotti yeggidi doommiyoogaa, danuwaa, hiyyeesatettaanne bashshaa kaalettiya ogiyan heeray moorettidoogaa xeelliyaagan odettiya iita odoy ha wodiyaagaadan mule dari erenna. Xoossaa xeelan xillo gididaageetakka he iita odoy hirggissana danddayees; shin eti hidootaa qanxxanaadan oottenna. Hegaappe, eti Xoossay ehiyo ooratta alamee matattidoogaa eriyo gishshau, eta wozanay “yeeqenna” qassi sinttanaabaa ammanettidi xalan naagiyo gishshau ‘yayyokkona.’ Meretaa daafay gakkiyaaba gidikkonne, eti Yihoowa maaduwan ammanettiyo gishshau, he hanotaa xooni kiyana danddayoosona. I xilloti ‘kunddanaadan’ mule paqqadenna; eti genccanaadan maaduwaanne wolqqaa immees.—Piliphphisiyuusa 4:13.

¹⁶ Xoossay xillodan xeelliyoogeeti banttana eqettiyaageetu ixuwaanne eti aassiyo wordduwaakka danddayana koshshiis; shin hagee tumu Kiristtaaneti sabbakennaadan mule diggenna. Hegaappe, Xoossau oottiyaageeti Yihooway etau immido oosuwaa yeeqennaaninne minnidi aggennan oottoosona; he oosoy Kawotettaabaa sabbakiyoonne siyanau koyiya ubbaa erissiyo ashkkara oottiyoogaa. Wurssettay matattiyo wode, xillotu bolli gakkiya yedetay dariyoogee sirissenna. Seexaanaa Dabloosi Googanne Maagooga gididi alame yuushuwan qohuwaa gattiyo wode, hegaa mala ixoy wurssetta xekkaa gakkees. Hegaappe, wurssettan, ‘nu morkketi’ kawushsha xoonuwaa xoonettin beˈana. Yihoowa sunttay muleera geeyin beˈanaagee ayba gita maatee!—Hizqqeela 38:18, 22, 23.

“Bonchchuwan Xoqqu Gees”

17. Yihooway xillo oottidi xeelliyo uri waanidi “bonchchuwan xoqqu” gii?

¹⁷ Dabloosinne a alamee gattiyo ixoy xayin, Yihoowa issippe galatanaagee ayba ufayssiyaabee! Xoossaa xeelan xillo gididi deˈiya ubbay ufayssan merinau Yihoowa galatana. Xillotu ‘kacee bonchuwan xoqqu gaanaagaa’ Yihooway qaalaa gelido gishshau, eti xoonettokkona. (Mazamure 112:9) Yihooway xillo oottidi xeelliyo uri Yihooway ubbaappe xoqqa gidiyoogaa eqettiya morkketi ubbay xoonettiyoogaa beˈiyoogan xoonida uradan xoqqu gaana.

18. Mazamure 112 kuushshan deˈiya qaalati waanidi polettanee?

¹⁸“Iita asi hegaa be7⁠idi yiillotees; achchaa garccidi, coo xayees. Iita asa amoi coo attana.” (Mazamure 112:10) Xoossaa asaa aggennan ixxiya ubbay bantta qanaatiyaaranne ixuwaara ‘coo xayana.’ Eti nu oosoy xayin beˈanau amottiyo amoy sinttappe yaana ‘iita waayiyaa’ wode coo attana.—Maatiyoosa 24:21.

19. Nuuni aybin ammanettana danddayiyoo?

¹⁹ Neeni wolqqaama xoonuwaa wode attiya ufayttiyaageetu giddon deˈanee? Woy Seexaanaa alamee xayanaappe kase neeni sahuwaa woy ceegatettaa gaasuwan hayqqiyaaba gidikko, hayquwaappe denddiya ‘xillotu’ giddon neeni deˈanddee? (Oosuwaa 24:15) Mazamure 112n qonccida xillo ‘asan’ leemisettidaageeti oottiyoogaadan, neeni Yesuusa wozuwaa yarshshuwan ubbatoo ammaniyaabanne Yihoowa kaalliyaaba gidikko, hegaa zaaroy ee giyaagaa gidana danddayees. (Efisoona 5:1, 2 nabbaba.) Yihooway hegaa mala asi ‘hassayettanaadan’ ootteesippe attin, dogettanaadan mule oottenna; xillotu oosuwaakka guuttidi xeellenna. Yihooway eta meri merinau hassayananne siiqana.—Mazamure 112:3, 6, 9.

[Footnotes]

Wotti Dentti Qoppanau Maaddiya Oyshata

• Nu cenggurssaa xoqqu oottidi, “Haleeluuyaa” gaanaadan oottiya gaasoti awugeetee?

• Tumu Kiristtaaneti keehippe ufayttanaadan oottiya ha wodiyan deˈiya dichay aybee?

• Yihooway siiqiyoogeeti ay mala ogiyan immiyaageetee?

[Oyshata]

[Sinttaa 23n deʼiya misiliyaa]

Xoossaa xeelan xillo gididi deˈanau, gukkida Yesuusa suuttan nuuni ammanana koshshees

[Sinttaa 24n deʼiya misiliyaa]

Dosan immiyo imotay daafay gakkidoogeeta maaddanaunne Geeshsha Maxaafan baasettida xuufeta asau gattanau maaddees