Aníkena penderesarái Jehovágui

UMI Israelgua apytépe oĩ primera vés ohasavahína rrío mbyte rupi ha ni michĩmi ndahykuéi. Jehová ningo ojoko pe rrío Jordán ha ojapo peteĩ tape isékova ohasa hag̃ua hikuái pe y mbyte rupi. Mbeguekatúpe ohasa hikuái ohóvo ojoapykueripa oike hag̃ua pe yvy oñeprometevaʼekuépe chupekuéra. Ijapytepekuéra oĩ ohechámava voi Jehová ojapórõ guare peichagua mbaʼe hesehapekuéra. Cuarenta áño upe mboyve Jehová oipytyvõmavaʼekue voi umi Israelguápe ohasa hag̃ua pe már Rojo. Upérõ heta isrraelíta heʼíneraʼe avei: “Arakaʼeve ndacheresaraichéne ko Jehová ojapóvagui” (Jos. 3:​13-17).

Péro Jehová oikuaa porã oĩtaha ‘pyaʼe hesaráiva upe haʼe ojapovaʼekuégui’ (Sal. 106:13). Upévare heʼi Josuépe ojagarra hag̃ua 12 ita pe rrío Jordángui ha omoĩ hag̃ua pe primer lugár opytahápe hikuái opytuʼu ha oke hag̃ua. Upe rire Josué heʼi chupekuéra: “Koʼã ita ñanemomanduʼáta upe Ñandejára ojapovaʼekuére” (Jos. 4:​1-8). Upeichaite ningo, umi ita omomanduʼáta chupekuéra upe mbaʼe guasuete Jehová ojapovaʼekuére ha akóinte omombaʼeguasuvaʼerãha chupe.

Iporãpa jaikuaa koʼã mbaʼe oikovaʼekue? Iporãta katuete. Ñande avei nañanderesarairivaʼerã Jehovágui ha akóinte jaservivaʼerã chupe. Heta mbaʼe Jehová heʼivaʼekue umi isrraelítape ningo tuicha ñanepytyvõ koʼág̃a rupi. Pór ehémplo, Moisés heʼivaʼekue: ‘Peñangarekóke ani penderesarái Ñandejáragui. Pejapóke iñeʼẽ ameʼẽva peẽme koʼág̃a’ (Deu. 8:11). Péicha Moisés ohechauka ñanderesaráiramo Jehovágui ikatuha jajapo ivaíva jaikuaa porãramo jepe ndogustaiha chupe. Upévare apóstol Pablo heʼi ani hag̃ua jajapo umi Israelgua ojapo haguéicha. Haʼekuéra ningo naiñeʼẽrendúi Ñandejárape oĩrõ guare pe desiértope (Heb. 4:​8-11).

Ko artíkulope ñahesaʼỹijóta umi Israelgua ohasavaʼekue. Ohechaukáta ñandéve mbaʼérepa ñanemanduʼavaʼerã Jehováre. Jahecháta avei mokõi isrraelíta ojapovaʼekue, ñanepytyvõtava ñanembaʼerechakuaa ha ñandepyʼaguasu hag̃ua jaservívo Jehovápe.

Mbaʼérepa ñanemanduʼavaʼerã Jehováre

Jehová ndahesaráiri umi isrraelítagui oĩrõ guare hikuái Egíptope. La Bíbliape heʼi Ñandejára imanduʼaha ‘iñeʼẽ omeʼẽvaʼekuére Abrahán, Isaac ha Jacóbpe’ (Éxo. 2:​23, 24). Tuicha mbaʼe ningo Jehová ojapovaʼekue onohẽ hag̃ua chupekuéra Egipto poguýgui.

Jehová ombou nueve plága Egíptope ha umi saserdóte oiporúva máhia ndaikatúi ojapo mbaʼeve ojoko hag̃ua upéva. Pe faraón Egiptopegua oñemombaʼeguasueterei ha heta vése oñemoĩ Jehováre, ha ndopoiséi umi isrraelítagui (Éxo. 7:14–10:29). Péro Jehová omboúvo pe última plága, ndaipuʼakavéima ha ojapómante heʼíva chupe (Éxo. 11:​1-10; 12:12). Moisés oisãmbyhy umi isrraelítape osẽ hag̃ua Egíptogui, ha heta oĩ ohóva avei hendivekuéra. Amo tres millones rupi osẽ hikuái (Éxo. 12:​37, 38). Péro upe riremínte faraón ombyasy ojapovaʼekue ha oho mombyry mboyve umi isrraelíta ojeity hapykuerikuéra. Ogueraha ijehérsito ha ikarrokuéra oiporúva jepi gerrarã. Upe aja katu Jehová heʼi Moiséspe ogueraha hag̃ua umi isrraelítape Pihahirótpe. Upe tape ningo oho opa rei pe már Rojo rembeʼýpe ha ijerére katu oĩ heta montáña (Éxo. 14:​1-9).

Upévo faraón oimoʼã Moisés ha iñirũnguéra ndailadoveimaha ha ojepoi hapykuerikuéra ijehérsito reheve. Péro Jehová omoĩ tata ha arai umi Egiptoygua renondépe ojoko hag̃ua chupekuéra.  Upe rire ojapo peteĩ tape isékova pe már Rojo mbyte rupi ohasa hag̃ua umi isrraelíta. Pe y ningo mokõive ládo opyta peteĩ murálla yvatéicha, 15 métro rupi voi ijyvate. Upe riremínte umi egipcio og̃uahẽma ha ohecha mbaʼéichapa ohasa ohóvo hikuái pe rrío mboypýri (Éxo. 13:21; 14:​10-22).

Pe faraón iñarandumírire ohechakuaavaʼerãmoʼã ndaikatuveimaha ojapo mbaʼeve, péro oñemohatã haʼe heʼívapente. Oñemombaʼeguasueterei voi ningo ha upévare ojepoi umi isrraelíta rapykuéri ojagarra hag̃ua chupekuéra. Péro osẽ vai hikuái, ohupyty mboyve umi isrraelítape, Jehová orruedaʼopa ikarrokuéra ha opyta hikuái tapére (Éxo. 14:​23-25; 15:9).

Oñehaʼã aja omyatyrõ hikuái ikarrokuéra, ohasapáma katu y mboypýri umi Israelgua. Upe rire Moisés oipyso ijyva pe már Rojo ári ha Jehová opoi pe y ojokovaʼekuégui. Péicha pe faraón ha ijehérsito ojahogapaite. Upévo katu isãsóma umi isrraelíta! (Éxo. 14:​26-28; Sal. 136:​13-15).

Umi hénte oĩva upérupi ohendu umi mbaʼe oikovaʼekue ha are peve okyhyjepa hikuái (Éxo. 15:​14-16). Cuarenta áño rire, peteĩ kuña hérava Rahab oikóva Jericópe heʼi mokõi Israelguápe: ‘Mayma arupigua okyhyjepa pendehegui, rohendu mbaʼéichapa Ñandejára ombohypa már Rojo pene renonderã pesẽramo guare Egíptogui’ (Jos. 2:​9, 10). Umi ndoservíriva Jehovápe jepe ndahesaráiri haʼe ojapovaʼekuégui. Upéicharõ koʼýte umi Israelgua ndahesarairivaʼerã upévagui!

‘Hesaʼỹicha’ oñangareko hesekuéra

Ohasa rire már Rojo, umi isrraelíta oike pe desiérto de Sinaípe. Upe ‘yvy ojeikoʼỹha ningo tuicha ha oporomongyhyje’. Upépe ndaipóri y ni hiʼupyrã. Péro Jehová ndohejareíri chupekuéra. Upe rire Moisés imanduʼa Jehová ‘ojuhu hague Israélpe yvy ojeikoʼỹháme, yvy perõme. Upémaramo omongaru ha hesaʼỹicha oñangareko hese’ (Deu. 8:15; 32:10). Mbaʼépa ojapo Jehová umi isrraelíta rehehápe?

Omeʼẽ chupekuéra mana. Peteĩ milágro rupive Jehová omeʼẽ chupekuéra hembiʼurã (Éxo. 16:​4, 14, 15, 35). Jehová ‘oguenohẽ  avei chupekuéra y pe itágui’. Ha upe cuarenta áño pukukue pe desiértope, noñembyaíri chuguikuéra ijao ni ndaʼipyrurúi hikuái Jehová oñangareko rupi hesekuéra (Deu. 8:4). Mbaʼéichapa umi isrraelíta ikatu ohechauka omombaʼeha opa mbaʼe Jehová ojapovaʼekue hesehapekuéra? Moisés heʼi chupekuéra: ‘Peñeñangarekóke! Peñehaʼã ani penderesarái peikove aja pukukue ko pehechavaʼekuégui pende resa tee rupi’ (Deu. 4:9). Umi isrraelíta omombaʼe ha ndahesaráirire Jehová omosãso hague chupekuéra, akóinte iñeʼẽrendu ha oñehaʼãvaʼerãmoʼã oservi chupe. Péro mbaʼépa ojapo hikuái?

Hesarái hikuái ha nomombaʼevéi Jehovápe

Moisés heʼi: ‘Nderesarái nde apoharégui ha remboyke Ñandejára nemoingovaʼekuépe’ (Deu. 32:​18, ÑÑB). Umi isrraelíta pyaʼeténte hesarái Jehová ojapovaʼekuégui hesehapekuéra már Rójope, pe desiértope ha ambue hendápe.

Peteĩ jey ningo ojekeha hikuái Moiséspe oimoʼãgui ndaiporimoʼãiha y hoʼuvaʼerã (Núm. 20:​2-5). Ha pe manáre katu heʼi hikuái: “Orembyajúma ko tembiʼu!” (Núm. 21:5). Ndoguerohorýi avei Jehová ojapóva ha omboyke hikuái Moiséspe, ndoipotavéima ni omoakã chupekuéra. Umi isrraelíta heʼi voi: ‘Iporãve vaʼerãmoʼã romanórire Egíptope térã koʼápe voi ko yvy ojeikoʼỹháme. Jaiporavo katu ótro ñande ruvicharã ha jaha jey Egíptope!’ (Núm. 14:​2-4).

Mbaʼéichapa Jehová oñeñandu ohechávo umi Israelgua naiñeʼẽrenduiha chupe? Ojepyʼamongetávo umi isrraelíta ojapovaʼekuére peteĩ salmísta ohai: ‘Mboy vése piko opuʼã hese ha omoñembyasy chupe pe desiértope. Pyʼỹinte oipyʼaraʼã Ñandejárape ha ombopochy Israel Járape. Naimanduʼái hikuái ipo mbarete rehe, oguenohẽvaʼekue chupekuéra ijejopy vaietégui. Ku mbaʼe techapyrãvaicha ojapovaʼekue Egíptope’ (Sal. 78:​40-43). Péicha jahecha umi Israelgua omoñembyasy hague Jehovápe naiñeʼẽrendúigui chupe.

Mokõi isrraelíta ndahesarairivaʼekue Jehovágui

Oĩvaʼekue avei Israélpe ndahesaráiriva Jehovágui. Umíva apytépe Josué ha Caleb. Chupekuéra ningo oñemondo Qadés-barneagui diez kuimbaʼe ndive ohecha hag̃ua ñemihápe pe Tierra Prometida. Péro umi diez ou ijapu ha  omokangy hapichakuérape. Josué ha Caleb katu heʼi umi hentekuérape: ‘Pe yvy ore rohechavaʼekue ningo peteĩ yvy neporãmba jepéva. Ñandejára ipyʼaporãramo ñanendive ñandereraháta pépe ha omeʼẽta ñandéve pe yvy iporãitéva. Aníntekena pepuʼã Jehová rehe’. Umi isrraelíta ohendúvo upéva ojapise hikuái itápe mokõivévape. Upéicharamo jepe haʼekuéra naikangýi ha ojeroviaiterei Jehováre (Núm. 14:​6-10).

Heta áño rire Caleb heʼi Josuépe: ‘Ñandejára rembiguái Moisés chembouvaʼekue Qadés-barneagui amaña ñemi hag̃ua pe yvy rehe. Upéi opa mbaʼe amombeʼuvaʼekue chupe oĩhaichaite. Umi chendive ohovaʼekue katu ou jeývo omokangypa ñande rapichakuérape. Che katu ajapo Ñandejára Jehová heʼi hagueichaite chéve’ (Jos. 14:​6-8). Caleb ha Josué ojerovia rupi Ñandejárare ogueropuʼaka heta mbaʼe. Haʼekuéra oikove aja pukukue heʼi voi imanduʼataha Jehováre.

Koʼã mokõi isrraelíta oagradese ha ohechakuaa Jehová omeʼẽ hague chupekuéra pe yvy oprometevaʼekue. Añetehápe ningo Jehová rupínte oikove hikuái. Josué ohai: ‘Ñandejára omeʼẽvaʼekue umi Israelguápe upe yvy haʼe voi heʼivaʼekue omeʼẽtaha ituvakuéra ypykuépe. Ha opa umi mbaʼe Ñandejára heʼivaʼekue ojapotaha, upeichaite oiko. Opa umi mbaʼe porã Jehová heʼivaʼekue ojapotaha Israelgua rehehápe, haʼe ojapo’ (Jos. 21:​43, 45). Mbaʼéichapa ñande ikatu jajapo Caleb ha Josué ojapo haguéicha?

Jaagradesékena

Peteĩ Ñandejára rembiguái iñeʼẽrendúva oporandu: “Mbaʼéicha piko ikatúta amyengovia Ñandejárape, haʼe ipyʼaporãite haguére chendive?” (Sal. 116:12). Jehová ningo omeʼẽ ñandéve opa mbaʼe jaikove hag̃ua, ñanesãmbyhy jaguata porã hag̃ua hapére ha omeʼẽ ñandéve opa mbaʼe ñaikotevẽva jajesalva hag̃ua. Hetaiterei ningo jadeve chupe! Arakaʼeve voi ndaikatumoʼãi japagapa Ñandejárape. Péro ikatu jaagradese chupe opa mbaʼére.

Nepytyvõpa umi konsého Ñandejára omeʼẽva ani hag̃ua rejapo mbaʼe vai? Revyʼápa Ñandejára neperdona haguére umi mbaʼe  vai rejapovaʼekuére? Umi mbaʼe porã Ñandejára omeʼẽva ñandéve ningo opa ára g̃uarã, ha upévare opa árare jaagradesevaʼerã chupe. Sandra ningo peteĩ mitãkuña orekóva 14 áño ha Ñandejára oipytyvõ rupi chupe ogueropuʼaka heta mbaʼe. Haʼe heʼi: “Ajerure Jehovápe chepytyvõmi hag̃ua. Upe riremínte chemopirĩmba ahechávo mbaʼépa haʼe ojapo cherehehápe. Koʼág̃a aikuaáma mbaʼérepa che ru heʼívami chéve ani hag̃ua cheresarái Proverbios 3:​5, 6-pe heʼívagui. Upépe ningo heʼi: ‘Ejerovia Ñandejárare nde pyʼaite guive, ha ani ndejehe añónte. Eikuaáke haʼe oĩha opárupi, ha omyesakãtaha ndéve nde raperã’. Ajerovia Jehová akóinte chepytyvõtaha ojapoháicha voi koʼág̃a peve”.

Jagueropuʼakáramo opa mbaʼe vai ñanemanduʼañaína Jehováre

La Biblia heʼi mbaʼépa ojapo umi akóinte imanduʼáva Jehováre: ‘Peñehaʼãke aipórõ penembarete hekópe, upéva niko penepytyvõta ha napenekangymoʼãi mbaʼevépe’ (Sant. 1:4). Ñañehaʼãvaʼerã ñambohovái pyʼaguasúpe opa mbaʼe oúva ha jajerovia Jehováre. Jajapóramo upéicha javyʼa ha ñandepyʼaguapýta upe rire. Jahechakuaáta avei umi mbaʼe vai jahasáva katuete opataha (1 Cor. 10:13).

Peteĩ ermáno aréma oservíva Jehovápe ningo hasykatu ha hetáma ohasa asy. Haʼe omombeʼu mbaʼépa oipytyvõ chupe oaguanta hag̃ua: “Apensa umi mbaʼe Jehová ojapótavare ha ndahaʼéi umi che ajaposévare. Upéva chepytyvõ amombaʼe hag̃ua Ñandejárape che pyʼaite guive. Ha ahasa asy jave ndaʼeiʼaína: ‘Jehová maʼerã piko reheja oiko cherehe koʼã mbaʼe! Máke añehaʼãmbaite añemoag̃uive Jehováre ha cheñeʼẽrendu chupe”.

Koʼág̃a rupi heta oĩ oservíva Jehovápe ha ‘omombaʼeguasúva chupe ipyʼaite guive ha Haʼe oipotaháicha’ (Juan 4:​23, 24, BNP). Upéicha oservíva Jehovápe arakaʼeve ndahesaraimoʼãi chugui umi isrraelíta ojapo haguéicha. Péro ñaime haguére isiervokuéra apytépe ndeʼiséi avei arakaʼeve nañanderesaraimoʼãiha Jehovágui. Ñañehaʼãvaʼerã katu Caleb ha Josué ojapo haguéicha ha jaagradese Jehovápe opa mbaʼére. Jehová ningo ñanesãmbyhy hikóni iporã hag̃uáicha ha oñangareko ñanderehe ko ára paha ijetuʼuetévape.

Umi 12 ita Josué omoĩvaʼekue omomanduʼa umi isrraelítape Jehová ojapovaʼekuére. Upéicha avei Jehová oporosalvárõ guare ohechauka ñandéve arakaʼeve ndohejareimoʼãiha hembiguaikuérape. Upévare ñanekyreʼỹkena ha jaʼe pe salmísta heʼi haguéicha: ‘Che chemanduʼa Jehová ojapovaʼekuére, ha mbaʼe hechapyrãva ymaguare rehe. Che akãme ambojere opa mbaʼe ojapovaʼekue, ha ajepyʼamongeta hembiapokuére’ (Sal. 77:​11, 12).

[Nóta oĩva taʼanga ndive páhina 7]

Umi isrraelíta yvýrupi ohovaʼekue pe desiértore

[Roagradese]

Pictorial Archive (Near Eastern History) Est.

[Nóta oĩva taʼanga ndive páhina 8]

Israel opyta aja opytuʼu Qadés-barneape, oñemondo doce kuimbaʼépe omaña ñemi hag̃ua pe Tierra Prometida rehe

[Roagradese]

Pictorial Archive (Near Eastern History) Est.

[Nóta oĩva taʼanga ndive páhina 9]

Heta áño oiko rire pe desiértore, umi isrraelíta oagradesevaʼerãmoʼã pe yvy porã oñemeʼẽvaʼekuére chupekuéra

[Roagradese]

Pictorial Archive (Near Eastern History) Est.

[Nóta oĩva taʼanga ndive páhina 10]

Jagueropuʼakáramo opa mbaʼe oúva ñanepytyvõta ñapensa meme hag̃ua umi mbaʼe Jehová ojapótavare