Kanbiọ lẹ sọn Wehiatọ lẹ Dè

Owe-wiwe donù “owe Jaṣali tọn” po “owe awhàn OKLUNỌ tọn” po go. (Jọṣ. 10:13; Osọha 21:14) Ṣigba, owe awe enẹlẹ ma sọawuhia to kandai Biblu tọn lẹ mẹ. Be kandai gbọdo he bu wẹ ehelẹ yin ya?

Mí ma dona wá tadona lọ kọ̀n dọ owe awe ehelẹ yin kinkàn to gbọdo glọ ṣigba wá bu to godo mẹ gba. Wekantọ gbọdo Biblu tọn lẹ dlẹnalọdo kandai sọha kleun devo lẹ. Na nugbo tọn, delẹ to kandai enẹlẹ mẹ sọgan ko lẹzun apadewhe Biblu tọn ṣigba he yin zẹẹmẹ basina po hogbe he mí ma jẹakọ hẹ to egbehe lẹ po. Di apajlẹ, 1 Otannugbo lẹ 29:29 donù “otàn Samuẹli numọtọ lọ tọn,” “otàn Natani yẹwhegán lọ tọn,” po “otàn Gadi numọtọ lọ tọn” po go. Kandai atọ̀n enẹlẹ sọgan yin alọdlẹndo taidi owe he mí wá yọnẹn taidi 1 Samuẹli po 2 Samuẹli po, podọ vlavo owe Whẹdatọ lẹ tọn.

To alọ devo mẹ, wekantọ Biblu tọn lẹ sọgan ko dlẹnalọdo owe devo lẹ he oyín yetọn vlẹ owe Biblu tọn lẹ, ṣigba bo ma yin apadewhe Biblu tọn. Mí sọgan na apajlẹ owe hoho ẹnẹ delẹ tọn: “owe otannugbo ahọlu Juda tọn lẹ tọn,” “owe ahọlu Juda po Islaeli po tọn,” “owe ahọlu Islaeli tọn lẹ tọn,” podọ “owe ahọlu Islaeli po Juda po tọn lẹ.” Dile oyín enẹlẹ tlẹ sọgan vlẹ oyín owe Biblu tọn lẹ taidi 1 Ahọlu lẹ po 2 Ahọlu lẹ po tọn, owe ẹnẹ lọ lẹ ma yin kinkàn to gbọdo glọ, mọjanwẹ yé masọ yin apadewhe kandai Biblu tọn do niyẹn. (1 Ahọ. 14:29; 2 Otan. 16:11; 20:34; 27:7) Kandai whenuho tọn de poun wẹ yé yin to ojlẹ he mẹ yẹwhegán Jẹlemia po Ẹzla po wlan owe Biblu tọn yetọn lẹ.

Na nugbo tọn, wekantọ Biblu tọn delẹ nọ dlẹnalọdo kandai whenuho tọn he tin-to-aimẹ to ojlẹ yetọn mẹ ṣigba bo ma yin gbigbọdo lẹ kavi yihodọ sọn yé mẹ. Ẹsteli 10:2 donù “owe otannugbo ahọlu Media po Pẹlsia po tọn” go. Mọdopolọ, Luku dọ dọ emi “doafọna onú lẹpo ganjiganji sọn dòdó” whẹpo do wlan kandai Wẹndagbe tọn etọn. Nuhe dọ e na ko te wẹ yindọ, e gbeje kandai he tin-to-aimẹ to ojlẹ etọn mẹ lẹ pọ́n nado basi todowhinnu kúnkan he mẹ Jesu wá sọn tọn, dile mí sọgan mọ do to owe Wẹndagbe tọn etọn mẹ. (Luku 1:3; 3:23-38) Dile etlẹ yindọ kandai he Luku gbeje pọ́n lẹ ma yin gbigbọdo, owe Wẹndagbe tọn etọn yin gbigbọdo. Podọ owe Wẹndagbe tọn enẹ gbẹ́ họakuẹ na mí to egbehe.

Na nuhe dù owe awe he go mí donù to kanbiọ he tin to aga mẹ lẹ, yèdọ “owe Jaṣali tọn” po “owe awhàn OKLUNỌ tọn” po, e taidi dọ kandai he tin-to-aimẹ bo ma yin gbigbọdo lẹ wẹ yé yin. Enẹwutu wẹ Jehovah ma do basi hihọ́na yé. Na Biblu dlẹnalọdo owe awe enẹlẹ wutu, weyọnẹntọ Biblu tọn lẹ wá tadona lọ kọ̀n dọ yé yin bladopọ ohó milomilo kavi ohàn awhàn he Islaelivi lẹ po kẹntọ yetọn lẹ po fùn tọn. (2 Sam. 1:17-27) Otanwe Biblu tọn de dọ dọ nuhe owe enẹlẹ bẹhẹn sọgan ko yin bladopọ ohó milomilo po ohàn po tọn he “Islaelivi hohowhenu tọn lẹ jẹakọ hẹ bọ hànsinọ whenẹnu tọn lẹ basi hihọ́na.” Mẹhe Jiwheyẹwhe tlẹ nọ yizan to whedelẹnu taidi yẹwhegán kavi numọtọ lẹ basi kandai he Jehovah ma gbọdo kavi de nado yin apadewhe Owe-wiwe he yin “alenọ . . . na mẹpinplọn, na wọhẹmẹ, na anademẹ” tọn to ojlẹ mítọn mẹ lẹ.—2 Tim. 3:16; 2 Otan. 9:29; 12:15; 13:22.

Nugbo lọ dọ Biblu donù owe delẹ go bọ yé yin kandai he yọ́n-na-yizan lẹ ma dona hẹn mí wá tadona lọ kọ̀n dọ yé yin gbigbọdo gbọn Jiwheyẹwhe dali gba. Ṣigba, Jehovah Jiwheyẹwhe basi hihọ́na kandai he bẹ “ohó Jiwheyẹwhe mítọn tọn” hẹn lẹ podọ kandai ehelẹ “na to ote kakadoi.” (Isa. 40:8) Mọwẹ, nuhe Jehovah de dọ e ni nọ̀ owe Biblu tọn 66 mẹ lẹ wẹ nuhe mí tindo nuhudo etọn pẹpẹ nado “pegan [bo] sọgbe mlẹnmlẹn hlan azọ́n dagbe lẹpo.”—2 Tim. 3:16, 17.