Yuvu Y’atangi

Nkanda miole miyikwanga muna Nkand’a Nzambi, “nkand’a Yasa” yo nkand’a vita Yave.” (Yos. 10:13; Nta. 21:​14) E nkanda miole miami ke mina ko muna buku dia Nkand’a Nzambi. Nga nkanda miami miavumunwinwa mpe? Nga vila miavila?

Ke vena ziku ko kisonganga vo e nkanda miami miau miole miavumunwinwa ye kana vila miavila. Asoneki a Nkand’a Nzambi bayika mpe nkanda miakaka. Emiaka muna nkanda miami nanga mina muna Nkand’a Nzambi, kansi nanga miasonama mu nkumbu ka zizayakene ko kw’atangi a Nkand’a Nzambi a tandu kiaki. Kasikil’owu, muna 1 Tusansu 29:​29, “lusansu lua Samuele wa moni,” ‘lusansu lua Natani wa ngunza’ ye “lua Ngadi wa moni” luyikwanga mo. E nkanda ntatu miami nanga i miau tuyikilanga o unu vo 1 ye 2 Samuele yovo nkand’a Afundisi.

Vena mpe ye nkanda miakaka mina ye nkumbu zafwanana ye nkumbu za nkanda mina mu Nkand’a Nzambi, kansi ke miasiwa ko muna buku dia Nkand’a Nzambi. Tulenda bong’e nona kia nkanda nyá miankulu nze “nkand’a lusansu lua ntinu mia Yuda,” “nkand’a ntinu mia Yuda yo Isaele,” “nkand’a Ntinu mia Isaele” ye “nkand’atinu a Isaele ye Yuda.” Kana una vo e nkumbu zazi zafwanana ye nkumbu za nkanda mina mu Nkand’a Nzambi mizayakene o unu vo 1 Ntinu ye 2 Ntinu, e nkanda nyá miami ke miavumunwinwa ko ngatu siwa mu buku dia Nkand’a Nzambi. (1 Nti. 14:29; 2 Tus. 16:11; 20:34; 27:⁠7) Nanga nkanda mia lusansu miasadilwanga muna tandu kina Yeremiya wa ngunza yo Ezera basoneka nkanda mina mu Nkand’a Nzambi.

Elo, asoneki akaka a Nkand’a Nzambi bayika yovo tanga e nkanda miakala kuna nz’ankulu, kansi ke miavumunwinwa ko. E sono kia Esete 10:2 kiyikanga “nkand’a tusansu twa ntinu mia Madai ye Parasa.” Diau adimosi, muna soneka e Nsangu zandi, Luka ‘watoma fimpa mawonso tuka kuna ntete.’ Nanga edi kazola vova vo wavavulula muna nkanda miakala muna lumbu yandi vava kasoneka luvila lwa Yesu luna tutanganga muna Nsangu Zambote zina kasoneka. (Luka 1:3; 3:​23-​38) Kana una vo e nkanda mina katanga Luka ke miavumunwinwa ko, e Nsangu Zambote kasoneka zavumunwinwa. E Nsangu zazi zakinu o mfunu kwa yeto.

Avo i nkanda miole miyikilu muna kiuvu, “nkand’a Yasa” yo “nkand’a vita Yave,” nanga miakala kuna nz’ankulu, kansi ke miavumunwinwa ko. Muna kuma kiaki, Yave kamona mfunu wa lunda nkanda miami ko. E kuma kia sia vo e nkanda miole miami miyikwanga muna Nkand’a Nzambi, difilanga akwa ngangu mu vova vo e nkanda miami i nkanda mia nkunga miyikanga vita zanwana Aneyisaele ye mbeni zau. (2 Sam. 1:​17-​27) Nkanda mosi ufimpanga oma ma Nkand’a Nzambi uvovanga vo mana masonama muna nkanda miami nanga “lusansu yovo nkunga mi’ayimbidi muna Isaele yankulu.” Vena mpe ye nkanda miasoneka wantu ana kasadilanga o Nzambi nze angunza yovo amoni ke miavumunwinwa kwa Yave ko ngatu siwa muna buku dia Nkand’a Nzambi una vo i ‘wina yo mfunu muna longa, muna tumba, muna ludika’ wantu mu lumbu yeto.​—⁠2 Tim. 3:16; 2 Tus. 9:29; 12:15; 13:⁠22.

E diambu dia sia vo nkanda miakaka miyikwanga muna Nkand’a Nzambi yo sadilwa se nto ya lusansu, ke difwete kutufila ko mu banza vo miavumunwinwa. Kansi, Yave wa Nzambi walunda nkanda miawonso mina muna “diambu dia Nzambi” edi ‘disikila yakwele mvu.’ (Yes. 40:⁠8) Elo, mana kazola o Yave vo masiwa muna nkanda 66 mina mu Nkand’a Nzambi, i mau tuvwidi o mfunu mu kala ‘akunkuka yo toma kubamena muna salu yawonso yambote.’​—⁠2 Tim. 3:​16, 17.