Kubutuka Dyaka​—Nzila ya Kenataka na Lugulusu?

INKI mvutu nge tapesa na ngyufula yai, “Keti nge mebutukaka dyaka?” Bantu mingi ya kesambilaka na ntoto ya mvimba tapesa mvutu na ngolo yonso nde, “Ee!” Bo kekwikilaka nde kubutuka dyaka kele kidimbu ya Bakristu yonso ya kyeleka mpi kele nzila mosi kaka ya kenataka na lugulusu. Bo kendimaka ngindu ya bantwadisi ya mabundu bonso Robert C. Sproul, muntu ya kelongukaka teolozi, yina kusonikaka nde: “Kana muntu mebutuka dyaka ve, . . . yandi kele ve Mukristu.”

Keti nge kele na kati ya bantu yina kekwikilaka nde sambu na kuguluka nge fwete butuka dyaka? Kana yo kele mpidina, ntembe kele ve nde nge kezola kusadisa bantu ya fami ti banduku na nge na kuzwa nzila yina mpi na kuyantika kutambula na nzila yango. Kansi, sambu bo zwa yo, bo fwete bakisa luswaswanu yina kele na kati ya muntu yina mebutuka dyaka ti yina mebutuka dyaka ve. Inki mutindu nge tatendudila bo disongidila ya kubutuka dyaka?

Bantu mingi kekwikilaka nde bangogo ‘kubutuka diaka’ ketubilaka muntu yina mesala lusilu ya masonga ya kusadila Nzambi ti Kristu mpi, nsukansuka, yandi kesobaka mpi kekatukaka na lufwa ya kimpeve sambu na kukuma na luzingu ya kimpeve. Nkutu, diksionere mosi ya mebasika ntama mingi ve ketendula muntu yina mebutuka dyaka bonso “Mukristu yina mesala lusilu ya mpa ya lukwikilu to mekumisa yo ngolo, mingi-mingi na nima ya kusala ngolo mpenza kisalu ya Nzambi bamvula mingi.”​—Merriam-Webster’s Collegiate Dictionary​—Eleventh Edition.

Keti nge tayituka na kulonguka nde Biblia kendimaka ve ntendula yai? Keti nge tazola kuzaba mambu yina Ndinga ya Nzambi kelongaka mpenza na yina metala kubutuka dyaka? Ntembe kele ve nde nge tabaka mambote na kutadila na dikebi disolo yai. Sambu na nki? Sambu kubakisa mbotembote kana kubutuka dyaka ketendula nki tavanda ti bupusi na luzingu mpi na bivuvu na nge ya luzingu kekwisa.

Inki Biblia Kelongaka?

Na Biblia ya mvimba, bangogo ‘kubutuka diaka’ kele kaka na Yoane 3:1-12, yina ketubila disolo mosi ya kebenda dikebi yina kulutaka na kati ya Yezu ti mfumu mosi ya dibundu na Yeruzalemi. Nge takuta disolo yina ya mvimba ya Biblia na lupangu ya kele na disolo yai. Beto kelomba nge na kutanga yo na dikebi yonso.

Na disolo yango, Yezu ketendula mambu mingi ya ketadila “lubutuku ya mpa.” * Nkutu, disolo ya Yezu kesadisa  beto na kupesa mvutu na bangyufula yai tanu ya mfunu:

◼ Inki kele mfunu ya lubutuku ya mpa?

◼ Keti beto mosi lenda baka lukanu ya kubutuka dyaka?

◼ Inki kele lukanu na yo?

◼ Na nsadisa ya nki muntu kebutukaka dyaka?

◼ Inki nsoba yo kenataka na bangwisana?

Bika beto tadila bangyufula yai mosi mosi.

[Noti na nsi ya lutiti]

[Lupangu/​Kifwanisu ya kele na lutiti 4]

“Beno Yonso Fweti Butuka Diaka”

“Kuvandaka na muntu mosi na kimvuka ya Bafarize, zina na yandi Nikodemo. Yandi vandaka mpi mfumu mosi na kati ya bamfumu ya Bayuda. Kilumbu mosi na mpimpa, yandi kwisaka kutala Yesu. Yandi tubilaka yandi nde: ‘Longi, beto zaba nde Nzambi me tindaka nge sambu na kulonga beto; sambu ata muntu mosi ve lenda sala bidimbu mutindu nge ke salaka, kana Nzambi kele na yandi ve.’ Yesu vutulaka nde: ‘Mono ke tubila nge mambu ya kieleka: Ata muntu mosi ve lenda mona Kimfumu ya Nzambi kana yandi me butuka diaka mbala ya zole ve.’ Nikodemo yulaka yandi nde: ‘Nki mutindu muntu lenda butuka diaka kana yandi me kuma mununu? Keti yandi lenda vutuka na divumu ya mama na yandi sambu na kubutuka diaka mbala ya zole?’ Yesu nde: ‘Mono ke tubila nge mambu ya kieleka: Ata muntu mosi ve lenda kota na Kimfumu ya Nzambi kana yandi me butukaka ve na masa ti na mpeve-santu. Muntu ke butaka muntu; mpeve ke butaka mpeve. Kuyituka ve sambu mono me tubila nge nde: “Beno yonso fweti butuka diaka mbala ya zole.” Mupepe ke kwendaka konso ndambu ya yo zola; nge ke waka makelele na yo, kansi nge ke zabaka ve kana yo me katuka wapi, kana yo ke kwenda wapi. Yo kele mpidina na konso muntu yina me butukaka na mpeve-santu.’ Ebuna Nikodemo yulaka yandi nde: ‘Nki mutindu yo lenda vanda mpidina?’ Yesu vutulaka nde: ‘Nge kele longi ya nene ya Israele si; nge zaba mambu yai ve? Mono ke tubila nge mambu ya kieleka: Beto ke tubaka mambu yina ya beto me zabaka, beto ke tubaka mpi mambu yina ya beto ke monaka, kansi beno zola ve kundima nsangu na beto. Beno ke ndima mono ve kana mono ke tubila beno mambu yai ke lutaka awa na nsi-ntoto, ebuna nki mutindu beno ta ndima mono kana mono tubila beno mambu yina ke lutaka na zulu?’”​—Yoane 3:1-12.