Kubutulwa Monka—Dyo Dishinda dya Lupandilo?

LELO ukalondolola namani kino kipangujo kya amba: “Lelo wi mubutulwe monka?” Batōtyi bavule kujokoloka ntanda balondololanga na bukomo bonso amba, “I amo!” Bakulupile amba kubutulwa monka i kiyukeno kya Bene Kidishitu bonso ba bine kadi dyo dishinda dimo kete dya lupandilo. Betabije mulangwe wa bendeji ba bipwilo pamo bwa Robert C. Sproul, mufundi wa teoloji, waandikile amba: “Shi muntu kabutwilwepo monka, . . . nankyo kadipo Mwine Kidishitu.”

Le nobe ubadilwa mu boba bakulupile amba kubutulwa monka i dishinda dya lupandilo? Shi i amo, nabya usakilanga kukwasha babutule ne balunda nobe basokole dino dishinda ne kushilula kunangila’mo. Pa kusaka babwanye’byo, bafwaninwe kuyuka dibajinji kwishila kudi pa muntu mubutulwe monka ne yewa wampikwa kubutulwa monka. Le ukebashintulwila namani buluji bwa kubutulwa monka?

Bantu bavule betabije amba bishima “kubutulwa monka” bifunkila pa muntu utyipa kwingidija Leza ne Kidishitu, ne pa kino, washinta kakidipo mufwe ku mushipiditu ino ke mūmi ku mushipiditu. Na bubine, dibuku dimo dishintulula bishima dya panopano dishintulula kubutulwa monka kwa muntu bu “Mwine Kidishitu walamunwa dipya ne kutonga kwitabija nakampata pa kupwa kuyuka bivule bya mu kipwilo.”—Merriam-Webster’s Collegiate Dictionary—Eleventh Edition.

Lelo ukatulumuka pa kuyuka amba Bible ketabijepo ino nshintulwilo? Le usaka kuyuka bine bifundija Kinenwa kya Leza pa mwanda utala kubutulwa monka? Usa kumwena mu kubandaula na katentekeji uno mwanda. Mwanda waka? Mwanda kwivwanija mushintulwila kubutulwa monka kukashinta būmi bobe ne byobya byotengele kumeso.

I Bika Bifundija Bible?

Kifuko kimo kete mu Bible yense kitelelwe’po bishima “kubutulwa monka” i enka mu Yoano 3:1-12, mulombola mīsambo mikatampe yēsambile Yesu na mwendeji umo wa kipwilo mu Yelusalema. Tala ino nsekununi mu kapango kadi mu kino kishinte iselelwe monka moikadile mu Bible. Tubakukankamika utange’yo na katentekeji.

Mu ino nsekununi, Yesu unena ukoma myanda palapala itala pa ‘kubutulwa kupya.’ * Kunena na  bubine, mīsambo ya Yesu itukwasha tulondolole ku bino bipangujo bikatampe bitano:

◼ Mwanda waka kubutulwa kupya kudi na mvubu?

◼ Le i batwe bene ba kutonga kubutulwa kupya?

◼ Lelo kudi na kitungo’ka?

◼ Le kulongekanga namani?

◼ Lelo kushintanga namani kipwano kya muntu ubutulwa kupya?

Tubandaulei bino bipangujo kimo ne kimo.

[Kunshi kwa dyani]

[Kapango/Kifwatulo pa paje 4]

“Poso Bidi Ubutulwe Kupya”

“Nanshi kadi, kwadi muntu mukwabo wa ku baFadiseo, mukatampe wakulela baYudea, ne dijina dyandi i Nikodema. Ye waīle kudi Yesu bufuku kamunena’mba: Abe Mufundiji! tubayūka nanshi abewa udi mufundiji utambile kwa Leza, ke-muntu kekudipo nansha umo uyūkile kulonga biyūkeno pamo na byōlonga abe’bi, poso Leza udi nandi. Penepo kūmvwana kudi Yesu wamulondolola’mba: I binebine byo nakunena’mba: Shi muntu kabutwilwepo ne kokwa kūlu, nankyo kakebumonepo bulopwe bwa Leza, mhm. Kwivwana Nikodema wamutentulula’mba: Lelo muntu ke mununu ayūke namani kadi kubutulwa monka? akatwele kadi munda mwa inandi dikwabo akabutulwe’ni? Yesu amba: I binebine byo nakunena’mba: Shi muntu kabutwilwepo ku mema ne ku Mushipiditu, nabya kakatwelapo mu bulopwe bwa Leza, ehe. Kyokya kyakubutwilwa ku bumwita i bumwita, ino kyokya kyakubutwilwa ku Mushipiditu i mushipiditu. Kokitendela byo nakunena’mba, poso bidi ubutulwe kupya. Ino luvula lupukumanga konso ko lusakile alo lwine, wilwivwana’nka diwi dyalo, nanshi kuyūkilepo ko lufunduka ne ko lwenda, i enka nabya ne bonso bakubutulwa ne aye Mushipiditu. Ebiya kwivwana padi Nikodema wamulondolola’mba: Lelo abyo bīne bikalongwa namani? Yesu wamutentulula’mba: Lelo aku kadi, abe wi mufundiji wa bene Isalela ne kuyūkapo bino mpika? I binebine byo nakunena’mba: Kyo twayūka kyo kyonka kyo twisamba, kadi kyo twamona nakyo e kyo tusapula, ino bānwe ne kwitabija mwanda wetu mpika. Lelo byo nēsamba nenu byapanopanshi bānwe ne kwitabija mpika, shi nēsambe nenu byakūlu, ino mukebītabija namani?”—Yoano 3:1-12.