Mechell el Beches—Tiang Rael el Mo er a Osobel?
KE MEKERANG a omonger er a ker el kmo, “Kau ke mla mechell el beches?” A rebetok el leko te Kristiano el ngar er a beluulechad el rokir a ulterekokl el mo onger el kmo, “Choi!” Te oumerang el kmo a demechell el beches a olengchelir a remera el Kristiano e di ta el rael el mo er a osobel. Te kongei er a uldesuel a ta er a mengeteklel a klechelid el Robert C. Sproul a ngklel, el milluches el kmo: “A lsekum a chad a diak lemechell el beches, . . . e ngii a diak el Kristiano.”
Kau ke ta er tirke el oumerang el kmo a demechell el beches e kede mo merael er sel rael el mo er a osobel? A leuaisei, e ngulterekokl el soam el mo ngosuterir a rechedam me a resechelim el mo medengelii tia el rael me bo lorael er ngii. Engdi a bo loruul el uaisei, e ngkirir el mo medengelii a klekakerous er a delongelel a chad el mla mechell el beches me ngike el kuk diak. Me ngmekerang a omosaod er a belkul tia el tekoi el kmo mechell el beches el mo er tir?
A rebetok a oumerang el kmo tia el tekoi el “mechell el beches” a melekoi el kirel a chad el mla rullii a mesisiich el telbilel el mo mesiou er a Dios me a Kristus, e mla mo er ngii a ungil el delongelel el obengkel a Dios e dikea el ulekoad er a klereng. Nguaisei, a ta el dictionary a mesaod er a belkul a chad el mla mechell el beches el kmo “ng Kristiano el mla omekbeches me a lechub e ngsmisichii sel telbilel a klaumerang er ngii er a uriul er a bo lolechesuar a mengasireng el blekeradel er a klereng.”—Merriam-Webster’s Collegiate Dictionary—Eleventh Edition.
Kau ngmo mechas a rengum a bo modengei el kmo a Biblia a diak el kengei er seikid el omesodel a tekoi? Ngsoam el mo medengelii a mera el osisecheklel a Biblia el kirel a tekoi el mechell el beches? Ke ulterekokl el mo ngmai a klungiolem a bo el blak a rengum el merriter er tia el suobel e le a obo modengelii a mera el omesodel a tekoi el mechell el beches, e ngar er ngii a bo lerellii er a klengar er kau er a chelechang me a ngar er a medam el klebesei.
Ngerang a Osisecheklel a Biblia?
Ngar er a Biblia, e sel tekoi el “mechell el beches” a debetik er ngii el ngar er a Johanes 3:1-12, el mesaod er a cheldechedechal a Jesus me a ta er a mengeteklel a klechelid el ngar er a Jerusalem. Ngsebechem el menguiu er tia el cheldecheduch el ngar er sel baks el ngar er a 7 el llel. Aki melisiich er kau el mo menguiu er ngii.
Ngar er sel cheldecheduch, e a Jesus a mesaod a bebil el telengtengil a tekoi el “mlechell el beches.” a Nguaisei, a tekingel a Jesus a ngosukid el mo sebeched el onger aika el edei el meklou a ultutelel el ker.
◼ Ngua ngera klungel a ultutelel a tekoi el mechell el beches?
◼ Ngsebeched el di kid el melilt el mo mechell el beches?
◼ Ngerang a moktek er ngii?
Me bo dosaod a derta er aika el ker.
[Footnote]
a A tekoi el “mlechell el beches” a dirrek el debetik er ngii el ngar er a 1 Petrus 1:3, 23. Tia el tekoi a mlengai er a osisiu el tekoi er a Grik, el gen·naʹo.
[Baks/Siasing er a 7 el llel]
“Ngkiriu el Mechell el Beches”
“Ngmlarngii a tal chad erar Farisee, el Nikodemus a ngklel, el ta rar melekingir ar Chijudea. Ngiil chad a mlora Jesus ra klebesei e dilu el kmo, ‘Sensei, a ki medengei el kmo, kau a sensei el mlara Dios el mei; ele ngdiak a chad el sebechel meruul a ua ikel moruul longasireng lolangch, a lak el Dios chobengkel.’ Ma Jesus a ulenger er ngii el kmo, ‘Ak kmal meral dmu er kau el kmo, a chad a lak le mechell el beches, e ngdiak el sebechel mesa rengedel a Dios.’ Ma Nikodemus a dilu er ngii el kmo, ‘Ngmekera e sebechel mechell a chad a le chudelang? Ngsebechel lmuut el soiseb ra delel a delal e mechell?’ Ma Jesus a ulenger el kmo, ‘Ak kmal meral dmu er kau el kmo, a chad a lak le mechell ra ralm ma Reng, e ngdiak el sebechel soiseb ra rengedel a Dios. Ngikel mlechell ra tech a tech, e a mlechell ra Reng a reng. Lak le mechas a rengum er sel kdillii er kau el kmo, “Ngkiriu el mechell el beches.” A eolt a meloko el mor sel soal, me korrenges ra rrekel, e diak modengei el kmo ngmlarker el mei e morker; tirikel rokui el mlechell ra Reng a uaisei.’ Ma Nikodemus a dilu er ngii el kmo, ‘Tia ngmekera e mo sebechel?’ Ma Jesus a ulenger er ngii el kmo, ‘Ke sensei ra Israel, e diak modengelii choua tial tekoi? Ak kmal meral dmu er kau el kmo, a ki melekoi a ikel ki modengei, e olecholt a ikel ki mules; e kemiu a diak mtichiir chochotam. A lak bo moumerang a tekoi ra belulechad el kdu er kemiu, e ko mekera e oumerang a bo kdu er kemiu a tekoi ra eanged?’”—Johanes 3:1-12.