Naaˈˈantto Yelettiyoogaa—Atotetta Ogee?
Naaˈˈantto Yelettiyoogaa—Atotetta Ogee?
“NAAˈˈANTTO yelettadii?” yaagiya oyshaa woygada zaaruutee? Ammanays giya, alame yuushuwan deˈiya miilooniyan qoodettiya asay he oyshaa “Ee!” giidi sirennan zaarees. Naaˈˈantto yelettiyoogee tumu Kiristtaanetussi malaata; qassi atotettaa demmiyo ogee hegaa xalla giidi ammanoosona. Eti “issi asi naaˈˈantto yelettana xayikko, . . . he uri Kiristtaane gidenna” yaagidi xaafida, haymaanootiyaa erancha gidida Robert C. Ispprola mala haymaanootiyaa kaalettiyaageetu qofaara maayettoosona.
Naaˈˈantto yelettiyoogee atotettaa demmanaadan oottees gaada ammanay? Hegaadaana gidikko, ne dabbotinne ne laggeti he ogiyaa demmidi an hemettanaadan neeni eta maaddanau koyanaagee qoncce. Gidikkokka, eti hegaadan oottanaadan, naaˈˈantto yelettida uraanne naaˈˈantto yelettibeenna uraa giddon deˈiya dummatettaa shaakkidi erana koshshees. Naaˈˈantto yelettiyoogaa giyoogee woygiyoogaakko etau waata qonccissuutee?
Daroti “naaˈˈantto yelettiyoogee” Xoossaunne Kiristtoosau oottanau issi uri wozanappe geppiyoogaa malaatees; qassi hegaappe denddidaagan, he uri ayyaana hanotan hayqqidoogaappe deˈuwau laamettees giidi ammanoosona.
Geeshsha Maxaafay hegaa mala ammanuwaa kaafennaagaa neeni eriyo wode garamettaneeshsha? Naaˈˈantto yelettiyoogaa xeelliyaagan Xoossaa Qaalay tumuppe woygiyaakko eranau koyay? Ha allaalliyaa loyttada akeekiyoogan neeni goˈettanaagee erettidaagaa. Aybissi? Naaˈˈantto yelettiyoogaa giyoogee woygiyoogaakko loyttidi eriyoogee, ne deˈuwaaranne neeni sinttappe naagiyoobaara gayttidaba gidiyo gishshataassa.
Geeshsha Maxaafay Ay Tamaarissii?
Geeshsha Maxaafan “naa77antto yelettiyoogaa” giya qaalay deˈiyoy Yohaannisa 3:1-12na. Ha sohuwan Yesuusi Yerusalaamen haymaanootiyaa kaalettiya issi bitaniyaara haasayido garamissiya haasayay qoncciis. Geeshsha Maxaafan deˈiya ha kumetta xiqisiyaa kaallidi deˈiya saaxiniyan beˈana danddayaasa. Neeni hegaa akeekan nabbabanaadan minttettoos.
He taarikiyan, Yesuusi naaˈˈantto yelettiyoogaa giya qaalaa dumma dumma geluwaa qonccissiis. Yesuusi haasayidobay kaallidi deˈiya keehippe goˈˈiya oyshata zaaranaadan maaddees:
◼ Naaˈˈantto yelettiyoogee ay keena koshshiyaabee?
◼ Naaˈˈantto yelettiyoogee nu dooruwan baasettidabee?
◼ Hegaa halchoy aybee?
◼ Issi asi waanidi naaˈˈantto yelettana danddayii?
Ha oyshata huuphiyan huuphiyan beˈoos.
[Sinttaa 4n diya misiliyaa]
“Intte Naa77antto Yelettanau Bessees”
“Parisaawetu baggan Aihudatuyyo halaqa gidiya Niqoodimoosa giyo issi bitanee de7ees. Niqoodimoosi qammi Yesuusakko yiidi, ‘Tamaarissiyaagoo, neeni Xoossai kiittido tamaarissiyaagaa gidiyoogaa nuuni eroos; aissi giikko, Xoossai aara de7iyo asappe attin, ha neeni oottiyo wolqqaama malaatata oottanau danddayiya asi baawa’ yaagiis. Yaagin Yesuusi zaaridi, ‘Taani neeyyo tumaa odais; ooninne naa77antto yelettana xayikko, Xoossaa kawotettaa be7anau danddayenna’ yaagiis. Niqoodimoosi, ‘Cima asi waanidi naa77antto yelettanau danddayii? Ba aayee uluwaa simmi gelidi, naa77anttuwaa yelettanau asi danddayii?’ yaagiis. Yesuusi zaaridi, ‘Taani neeyyo tumaa odais; ooninne haattaappenne Geeshsha Ayyaanaappe yelettana xayikko, Xoossaa kawotettaa gelanau danddayenna. Asappe yelettidaagee asa; Ayyaanaappe yelettidaagee ayyaana; “Intte naa77antto yelettanau bessees” gaada taani intteyyo odido gishshau, neeni garamettoppa. Carkkoi ba koyidosaa carkkees. Neeni a kooshinchchaa siyaasa; shin i auppe yiyaakko woi au biyaakko, neeni erakka. Ayyaanaappe yelettida ubbai hegaa mala’ yaagiis. Yaagin Niqoodimoosi, ‘Hagee waanidi hananau danddayii?’ yaagidi oichchiis. Yesuusi zaaridi [hagaadan giis:] ‘Neeni Israa7eelata tamaarissiyaagaa gidaidda hagaa erikkii? Taani neeyyo tumaa odais; nuuni eriyoogaa haasayoosinne be7idoogaa markkattoos; shin nuuni markkattiyoogaa intte ekkekketa. Taani intteyyo sa7aabaa yootin, intte ammanennaageeta gidikko, saluwaabaa yootin waani ammanuuteetii?’”—Yohaannisa 3:1-12.