NGAR er sel cheldechedechal el obengkel a Nikodemus, e a Jesus a mileketeklii el kmo ngklou a ultutelel a tekoi el mechell el beches. Ngmilekerang er a lomeketakl er tiang?

Ka momtab er a rolel a Jesus er a lomeketakl er a klungel a ultutelel a tekoi el mechell el beches. Ngdilu el kmo: “A chad a lak le mechell el beches, e ngdiak el sebechel mesa rengedel a Dios.” (Johanes 3:⁠3) Aike el tekoi el “a lak” me a “ngdiak” a ulechotii a klungel a ultutelel a tekoi el mechell el beches. El di ua tia el okesiu: A lsekum a chad a melekoi el kmo, “A lak a didichel a sils, e ngdiak a llomes,” e a belkul a tekingel a kmo ngkmal usbechall a didichel a sils me lebo er ngii a llomes. Me ngdirrek el uaisei, a Jesus a dilu el kmo a chad a kirel el mechell el beches me bo el sebechel el mesa Rengedel a Dios.

Me a loterekeklii a ultutelel tia el tekoi, e a Jesus a dilu el kmo: “Ngkiriu el mechell el beches.” (Johanes 3:7) A doltirakl a tekingel a Jesus, e a chad a kmal kirel el mechell el beches me bo el sebechel el mo “soiseb ra rengedel a Dios.”​—Johanes 3:5.

A Jesus a ulemes er tia el tekoi el mechell el beches el kmal klou a ultutelel me a uchul e a Rekristiano a kirir el mo bleketakl a rengrir er tia el tekoi. El di ua tiang, omomdasu e a Kristiano ngsebechel el di ngii el melilt el mo mechell el beches?

[Siasing er a 4 el llel]

“A lak a didichel a sils, e ngdiak a llomes”