Go Tsalwa Sesha—Go Botlhokwa go le Kana Kang?

FA Jesu a ne a tlotla le Nikodemo, o ne a gatelela gore go tsalwa sesha kgotsa go tsalwa gape go botlhokwa thata. O ne a dira seo jang?

Ela tlhoko kafa Jesu a gatelelang botlhokwa jwa go tsalwa sesha ka gone fa a tlotla le Nikodemo. O ne a re: “Fa motho a sa tsalwe gape, ga a ka ke a bona bogosi jwa Modimo.” (Johane 3:3) Mafoko a a reng “fa” le “ga a ka ke” a gatelela botlhokwa jwa go tsalwa sesha. Ka sekai: Fa motho a re, “Fa letsatsi le sa tlhabe ga go ka ke ga nna le lesedi,” o raya gore letsatsi le botlhokwa gore go nne le lesedi. Ka tsela e e tshwanang, Jesu o ne a re go botlhokwa gore motho a tsalwe gape gore a bone Bogosi jwa Modimo.

La bofelo Jesu o ne a tlosa dipelaelo dipe tse di neng di ka nna teng ka kgang eno, ka gore: “Lo tshwanetse go tsalwa gape.” (Johane 3:7) Go bonala sentle gore go ya ka Jesu go tsalwa gape ke selo se se tlhokegang—se se tshwanetseng—gore motho a ‘tsene mo bogosing jwa Modimo.’—Johane 3:5.

E re ka Jesu a ne a tsaya go tsalwa sesha e le selo sa botlhokwa thata jaana, Bakeresete ba tshwanetse go tlhomamisa gore ba tlhaloganya kgang eno sentle. Ka sekai, a o akanya gore Mokeresete a ka itlhophela go tsalwa gape?

[Mafoko a a mo go tsebe 5]

“Fa letsatsi le sa tlhabe ga go ka ke ga nna le lesedi”