Ọwariẹ-yẹ Yọ Oware nọ Ohwo Ọvo Ọ rẹ Salọ kẹ Omariẹ?

OBỌ ono ọwariẹ-yẹ u re no ze? Nọ a tẹ be ta udu họ ahwo awọ inọ a zihe ruọ Ileleikristi nọ a wariẹ yẹ no, otu-iwuhrẹ egagọ jọ a rẹ riobọhọ ẹme Jesu na: “A rẹ wariẹ owhẹ yẹ hrọ.” (Jọn 3:7) Otu-iwuhrẹ yena a rẹ ta ẹme nana wọhọ ẹsenọ o rrọ ọgbahọ, inọ “Jọ a wariẹ owhẹ yẹ!” A be rọ ẹkwoma uwuhrẹ yena ta nọ ẹme obọ ohwo o rrọ re o yoẹme kẹ Jesu jẹ jowọ nọ u fo nọ a rẹ rọ wariẹe yẹ. Oware nọ a be ta na họ ẹme obọ ohwo o rrọ re ọ salọ nọ a wariẹe yẹ. Kọ eriwo yena ọ rọwo kugbe ẹme nọ Jesu ọ ta kẹ Nikodimọs na?

Ohwo ọ tẹ roma totọ se eme Jesu na, ọ rẹ ruẹ nọ orọnikọ Jesu o wuhrẹ nọ ohwo ọ rẹ salọ kẹ omariẹ inọ a wariẹe yẹ hẹ. Fikieme ma jẹ ta ere? Ẹme Griki nọ a fa “wariẹ yẹ” na a sae jẹ fae nọ “ọnọ a yẹ no obọ ehru ze.” * Fikiere, nya lele otofa avivẹ nana, ọwariẹ-yẹ o re no “obọ ehru” koyehọ “odhiwu,” hayo “obọ Ọsẹ” na ze. (Jọn 19:11; Jemis 1:17) Ẹhẹ, obọ Ọghẹnẹ ọwariẹ-yẹ u re no ze.—1 Jọn 3:9.

Ma te roro kpahe ẹme nana, “no obọ ehru ze,” o rẹ bẹ hẹ re ma wo otoriẹ oware nọ ohwo ọvo ọ gbẹ sae salọ nọ a wariẹe yẹ hẹ. Dai roro kpahe epanọ oni  ra o ro yẹ owhẹ. Kọ whẹ omara whọ ta nọ a yẹ owhẹ? Vievie! Ọsẹ ra o ru nọ a ro yẹ owhẹ. Epọvo na re, Ọghẹnẹ, Ọsẹ obọ odhiwu mai ọvo ọ rẹ sae wariẹ omai yẹ. (Jọn 1:13) Fikiere Pita ukọ na ọ ginẹ ta gba inọ: ‘Oghale u te Ọghẹnẹ na gbe Ọsẹ Ọnowo mai Jesu Kristi; fiki ohrọ ulogbo riẹ a rọ wariẹ omai yẹ.’—1 Pita 1:3.

Kọ Ujaje O Rrọ?

Ahwo jọ a rẹ sae nọ inọ, ‘Otẹrọnọ uzẹme o rrọ inọ ohwo ọvo ọ rẹ salọ kẹ omariẹ inọ a wariẹe yẹ hẹ, kọ fikieme Jesu ọ jẹ kẹ ujaje na nọ: “A rẹ wariẹ owhẹ yẹ hrọ”?’ Oyena yọ emamọ onọ. Keme ma te gine rri rie, otẹrọnọ eme Jesu nana ginọ ujaje, kiyọ ọ be ta nọ ma ru oware nọ ẹgba mai o te he. Yọ ọ te sae yare oware utioye mi omai hi. Fikiere, ginọ eme họ otofa ẹme na inọ a rẹ “wariẹ owhẹ yẹ” hrọ?

Whọ tẹ roma totọ se ẹme na evaọ ẹvẹrẹ ọsosuọ nọ a ro kere iei, whọ te ruẹ nọ orọnikọ ọgbahọ hayo ujaje o rrọ họ re a wariẹ ohwo yẹ. Ukpoye, onana u dhesẹ epanọ a rẹ ta uzẹme ẹme. Koyehọ, nọ Jesu ọ ta nọ a rẹ “wariẹ owhẹ yẹ” hrọ, ọ jẹ rọ oyena dhesẹ ugogo uzẹme jọ via, orọnikọ ujaje ọ jẹ kẹ hẹ. Ọ ta nọ: “O roja nọ a re yẹ owhẹ no obọ ehru ze.”—Jọn 3:7, Modern Young’s Literal Translation.

Re ma dhesẹ ohẹriẹ nọ o rrọ ujaje gbe ẹtavia ugogo ẹme, muẹrohọ oriruo jọ. Roro kpahe okpẹwho nọ o wo isukulu buobu. Egọmeti ọ salọ isukulu ọvo jọ evaọ okpẹwho na jẹ ta nọ emotọ-ẹwho na nọ e be rria ugbothabọ ọvo a rẹ rehọ fihọ isukulu na. Ẹdẹjọ, ọmoha jọ nọ ọ rrọ ọmotọ-ẹwho na ha ọ tẹ nyabru ọnọ o wuzou isukulu na jẹ ta kẹe inọ, “Mẹ gwọlọ ruọ isukulu ra.” Ọnọ o wuzou isukulu na ọ tẹ vuẹe nọ, “Re whọ sae ruọ isukulu na, whọ rẹ jọ ọmotọ hrọ.” Whaọ, orọnọ ujaje ọnọ o wuzou isukulu na ọ be kẹ na ha. Orọnikọ uzi ọ kẹ ọmoha na ha inọ “Zihe ruọ ọmotọ!” Ọnọ o wuzou isukulu na ọ ta uzẹme na kẹe ọvo—oware nọ o gwọlọ re ohwo ọ sae ruọ isukulu yena. Ere ọvona, okenọ Jesu ọ ta nọ: “A rẹ wariẹ owhẹ yẹ hrọ,” ọ jẹ rọ ere fodẹ ugogo uzẹme jọ—oware nọ o gwọlọ re ohwo ọ sae “ruọ uvie Ọghẹnẹ.”

Ẹme na—Uvie Ọghẹnẹ—u wo obọ kugbe abọ ọfa jọ ọrọ ọwariẹ-yẹ na. Abọ nọ o kiekpahe onọ na, Eme họ ẹjiroro ọwariẹ-yẹ na? Whọ tẹ riẹ uyo onọ yena u re fi obọ họ kẹ owhẹ wo otoriẹ ogbagba orọ oware nọ u dhesẹ re a wariẹ ohwo yẹ.

[Oruvẹ-obotọ]

[Uwoho nọ o rrọ ẹwẹ-obe avọ 6]

Ẹvẹ ọwariẹ-yẹ o ro tho eyẹ nọ oni o re yẹ ọmọ?