Ku Pepwa Sinca—Kana ki Nto ye lu Kona ku Iketela?

KI MAÑI ya tahisanga kuli mutu a pepwe sinca? Bakutazi ba bañwi ha ba susuezanga bateelezi ba bona kuli ba be Bakreste ba ba pepilwe sinca, ba kutelanga ku bulela manzwi a Jesu, a li: “Mu swanezi ku pepwa sinca.” (Joani 3:7) Bakutazi ba ba cwalo ba itusisanga manzwi a, ku ba sina taelo, mi se ba bulelanga luli kikuli: “Mu pepwe sinca!” Kacwalo ba kutazanga kuli ku itingile feela ku mulumeli ufi ni ufi ku utwa manzwi a Jesu ni ku nga mihato ye tokwahala kuli a pepwe sinca. Se ba talusanga batu ba ba na ni mubonelo wo cwalo kikuli, ku pepwa sinca ki taba ya kona ku iketela mutu. Kono kana mubonelo wo cwalo wa lumelelana ni zeo Jesu naa bulelezi Nekudema?

Manzwi a Jesu haa baliwa ka tokomelo, a bonisa kuli Jesu naa si ka luta kuli mutu wa kona ku iketela ku pepwa sinca kamba ku sa pepwa sinca. Ki kabakalañi ha lu bulela cwalo? Pulelo ya Sigerike ye tolokilwe kuli ku “pepwa sinca” hape i kona ku tolokiwa kuli “u swanela ku pepwa ku zwa kwahalimu.” * Kacwalo, ku  likana ni toloko ye ñwi yeo, ku pepwa sinca, ku zwa “kwahalimu”—ili ku talusa kuli “ku zwa ku Ndate.” (Joani 19:11; Jakobo 1:17) Kaniti, ku tahiswa ki Mulimu.—1 Joani 3:9.

Haiba lu hupula kuli pulelo ya ku pepwa sinca mwa puo ya makalelo i kona ku talusa ku pepwa “ku zwa kwahalimu,” ha ku na ku lu bela taata ku utwisisa libaka mutu haa sa koni ku tahisa kuli a pepwe sinca. Ha mu nahane feela ka za ku pepwa kwa mina ku zwa mwa mba ya bashemi ba mina. Kana ne mu iketezi isali mina bañi kuli mu pepwe? Kutokwa! Ne mu pepilwe kakuli bo ndataa mina ki bona ba ne ba tahisize kuli mu pepwe. Ka ku swana, lu kona ku pepwa sinca haiba feela Mulimu, yena Ndataa luna wa kwa lihalimu, a tahisa kuli lu pepwe sinca. (Joani 1:13) Kacwalo, muapositola Pitrosi u bulela ka swanelo kuli: ‘Ku lumbwe Mulimu, Ndatahe Mulenaa luna Jesu Kreste, kakuli mwa butuna bwa sishemo sa hae u lu pepile la bubeli.’—1 Pitrosi 1:3.

Kana ki Taelo?

Ba bañwi ba kana ba kakanya kuli: ‘Haiba ki niti kuli ha ku na mutu ya kona ku iketela kuli a pepwe sinca, ki kabakalañi Jesu ha naa laezi kuli: “Mu swanezi ku pepwa sinca”?’ Yeo ki puzo ya butokwa. Kakuli haiba manzwi a Jesu ki taelo luli, fohe u zibe u lu laela ku eza nto ye lu sa koni. Taba ye cwalo ha i utwahali. Kono cwale manzwi a kuli mu swanezi ku “pepwa sinca” a swanelwa ku utwisiswa cwañi?

Ku nyakisisa hande pulelo yeo mwa puo ya yona ya makalelo ku bonisa kuli ne i si ka bulelwa ka mukwa wa mo i felwanga taelo. Kono pulelo yeo i bulezwi ka mukwa wa ku fa feela litaba. Ka mubulelelo o muñwi, Jesu ha naa bulezi kuli mu swanezi ku “pepwa sinca,” naa talusa feela mo i inezi taba, naa sa fi taelo. Naa bulezi kuli: “Ku butokwa kuli mu pepwe ku zwa kwahalimu.”—Joani 3:7, Modern Young’s Literal Translation.

Kuli lu bone shutano ye mwahalaa taelo ni ku talusa feela taba mo i inezi, mu nahane ka za swanisezo ye. Mu nahane za ndiala ya amuhela sanda sa lubasi ku zwa kwa lubasi lo lu mu utile. Ka zazi le liñwi, lubasi lu bulelela ndiala yo kuli a batisise ze tokwahala kuli ba mu siyele sanda. Ndiala yo cwale u buza caziba wa mulao kuli: “Ni kona ku ezañi kuli ni amuhele kabelo ya ka ya sanda sa lubasi?” Caziba yo u mu bulelela kuli: “U swanela ku ba mwanaa bona.” Kaniti, manzwi a caziba yo haki taelo. Haa laeli ndiala yo kuli: “U be mwanaa bona!” Caziba yo u talusa feela se si tokwahala kuli ndiala yo a amuhele sanda. Ka ku swana, Jesu ha naa ize: “Mu swanezi ku pepwa sinca,” naa talusa feela buniti bwa taba—nto ye tokwahala kuli mutu a “kene mwa mubuso wa Mulimu.”

Pulelo ya mafelelezo yeo ya kuli Mubuso wa Mulimu, i lumelelana hape ni kalulo ye ñwi ya ku pepwa sinca. I ama puzo ya kuli: Mulelo wa ku pepwa sinca ki ufi? Ku ziba kalabo kwa puzo ye, ku kona ku lu tusa ku utwisisa ka ku nepahala se ku talusa ku pepwa sinca.

[Litaluso za kwatasi]

[Siswaniso se si fa likepe 6]

Ku pepwa sinca ni ku pepwa luli mwa mba ya bashemi ku swana cwañi?