NGTECHANG a uchul tia el tekoi el mechell el beches? A rebebil el mengeteklel a klechelid sel lolisechakl er tirke el orrenges er tir el mo mechell el beches el Kristiano, e te ousbech aika el tekingel a Jesus el kmo: “Ngkiriu el mechell el beches.” (Johanes 3:⁠7) A choua itirke el chad a ousbech aika el tekoi el ua llach el melekoi el kmo, “Ngkiriu el mo mechell el beches!” Me te olisechakl el kmo ngkirel a derta el chad el mo olengesenges er a Jesus e meruul aike el kirel me bo el sebechel el mechell el beches. Me a belkul a tekingir a kmo, a derta el chad a di tir el melilt el mo mechell el beches me a lechub e ngdiak. Engdi a choua itia el osisechakl ngoltirakl a tekingel a Jesus el mo er a Nikodemus?

A dekerekikl el menguiu er a tekingel a Jesus e ngdimlak lolisechakl el kmo a chad a sebechel el di ngii el melilt el mo mechell el beches me a lechub e ngdiak. Ngera me kede melekoi el uaisei? A tekoi er a Grik el mloiuid el “mechell el beches” a dirrek el sebechel el moiuid  el kmo “ngkirir el mechell er a bab.” a Me a doltirakl er a kuk ta er a oidel, e a tekoi el mechell el beches a mla er a bab el mei​—el ‘ngarbab el ngara Chedam’ el mei. (Johanes 19:11; Jakobus 1:17) Nguaisei, a Dios a melilt er tirke el mo mechell el beches.​—1 Johanes 3:⁠9.

A lsekum e kede melatk el kirel sel tekoi el “mechell er a bab,” e ngngosukid el mo medengei el kmo a chad a diak el sebechel el di ngii el mo uchul a cherellel. Ka di momdasu er a cherellem. Ngkau a millilt a blekeradel el mlo uchul a cherellem? Ngdiak! A demam a mlo uchul e ke mlechell. Me ngdirrek el uaisei el kirel a tekoi el mechell el beches, a Dios el Demad el ngar er a eanged a mle uchul e kede mlechell el beches. (Johanes 1:13) Sei a uchul me a apostol el Petrus a milluches el kmo: “Le modanges a Dios el Demal a Rubak er kid el Jesus Kristus! E ngobdois el klechubechub er ngii a uchul me ngmilechellid el beches.”​—1 Petrus 1:3.

Ngllach el Kired el Meruul er Ngii?

A rebebil a mo melatk el kmo, “A lsekum e ngdiak a chad el sebechel el di ngii el melilt el mo mechell el beches, e ngera uchul me a Jesus a milellach el kmo: “Ngkiriu el mechell el beches?” Tiang a klou a ultutelel el ker. E le lsekum a Jesus a milellach el uaisei, e ngua lorrimel er kid el mo meruul er a tekoi el diak el sebeched el rullii. E tiang a diak el melemalt. Me a leuaisei, e ngera belkul aike el tekoi el kmo ‘ngkiriu el mechell el beches?’

A tekoi er a Grik el kirel sel tekingel a Jesus a diak lollach el kmo ngkirir a rebek el chad el mo oltirakl er ngii. A Jesus a bai di ulemeklatk el melekoi el kmo ‘ngkiriu el mechell er a bab.’​—Johanes 3:7, Modern Young’s Literal Translation.

Me a domekesiu er tiang, e ka molatk er tia el olechotel. Ngar er ngii a betok el skuul er a chelsel a ta el mats. E a ta er ngii a skuul el di mo er tirke el chad er sel beluu el kiei el ngar er a cheroid er tia el mats. A ta er a klebesei, e a buik er a ngodech el beluu a mlo er a merreder er sel skuul, e melekoi el kmo, “Ngsoak el mei er a skuul er tiang.” Ngika el merreder a dmu er ngii el kmo, “Ngkirem el mo chad er tia el beluu me bo el sebechem el mei er tia el skuul.” Me aika el tekingel ngika el merreder a diak lollach er ngika el buik el kmo, “Bom chad er tia el beluu!” E ngbai di mesaod el kmo​—ngdi rechad er tia el beluu a sebechir el mo er sel skuul. Me nguaisei, a belkul a tekingel a Jesus a kmo​—tirke el rredemelel a mo “soiseb ra rengedel a Dios” a ‘kirir el mechell el beches.’

Sel ulebongel el tekoi​—el Rengedel a Dios—​a ngar er ngii a delongelel el mo er a ta er a telengtengil tia el tekoi el mechell el beches. Ngomekdubech er a ker el kmo, Ngerang a moktek er ngii? A bo dodengelii a nger el kirel tia el ker a mo meskid a melemalt el klemedengei el kirel a tekoi el mechell el beches.

[Footnote]

[Siasing er a 5 el llel]

Ngera klaisisiu er a delongelel a tekoi el mechell el beches me a kuk di cherellel a ngalek?