¿Kikinkunatsuraq akrayan yapë yurikuyänampaqqa?

¿PITAQ akran yapë yurikuyänampaq? Kë textochö Jesus “presisanmi yape yuricuyänan” nenqantam wakin religiösokunaqa qateqninkunata yachatsiyan (Juan 3:7). Pero leipuyan “¡Yapë yurikuyë!” nir Jesus mandakïkanqantanömi. Tsëmi, cada nunam Jesusta wiyakur yapë yurikïta ashinan, nir yachatsikuyan. Pëkunapaqqa, kikinkunash akrayan yapë yurikuyänampaq. Pero ¿tsëtatsuraq Jesus yachatserqan Nicodëmuta?

Yapë yurinampaq kikin nuna akranampaq kaqtatsu manam Jesusqa yachatsikorqan, tsëtam ichik maslla yachakorqa musyarintsik. ¿Imanötaq tsëtaqa musyantsik? Griegu idiömapitam traduciyämushqa  ‘yapë yuriquï’ neq palabrakunata, hina ‘rarapita yurikï’ nirpis traduciyanmi (Juan 3:3). * Tsëmi këchö rikanqantsiknöpis, yapë yurikïqa “rarapita”, o “ciëlopita” o “Yayapitam” shamun (Juan 19:11, nota NM; Santiagu 1:17). Tsëqa, kikin Diosmi akran ninanmi (1 Juan 3:9).

Kë llapanta yachakurishqaqa, manam ajatsu yapë yurinan mana kikintsikpita kanqanta musyanan. Igualaratsishun huk wambra yurikonqantawan. ¿Kikin munartsuraq mamampa pachanchö rurakarqan, y tsëpita yurerqan? Manam. Tsënöllam, ciëlochö këkaq Teytantsik Dios Yaya munaptinraq pipis yapë yurikunman (Juan 1:13). Tsëmi apóstol Pedrupis kënö nerqan: “¡Alabashun Teyta Jesucristupa Papänin Dios Yayata! Pemi ancupämarnintsic, mushoq caweyoqta ticraratsimarqontsic” (1 Pedro 1:3).

¿Mandakïkarqantsuraq?

Itsa wakinkunaqa kënö tapukuyanman: “Yapë yurikïpaq kikin nuna mana akrëkaptenqa, ¿imanirtaq ‘presisanmi yape yuricuyänan’ nerqan Jesus?”. Tsëtaqa allim tapukurintsik. Yapë yurikuyänampaq Jesus mandakïkarqa, mana pï ruranantachi mañakïkanman karqan, y Jesusqa manachi mana ruranantsiktanöqa mañamashwantsu. Tsëpenqa, ¿imanöraq musyashwan imapaq parlëkanqantapis?

Qellqayanqan idiömachö parlayanqankunata alli estudiarqa, manam Jesus mandakïkanqantatsu musyarintsik, antis musyatsikïkanqanllatam. Tsëta käyirinapaq o mäkurinapä këta rikärishun. Huk teytannaq y mamannaq wambra, wätayanqan familiata herenciata mañëta munanman. Tsëna wätayanqan familia, ëwë mä musyapakaramï imatash wananki herenciata qoyänaqpaq niyanman. Tsëpitana, “¿Imatataq wanä herenciata chaskinäpaq?” nirnin huk abogädota tapukurinman. Abogädona “Precisanmi wambran kanëki” ninman. Tsënö nerqa, manam mandëkantsu. Manam “¡Wambran kë!” nikantsu. Antis herenciata chaskinanrëkur imatapis ruranampaq kaqllatam abogädoqa nikan. Tsënöllam Jesus nenqampis. Pëqa musyatsikïkarqan, ‘Diospa mandaquininman yëcuyananpaq’ imatapis rurayänampaq kaqllatam.

Yapë yurikïpaq parlarqa, hina Diospa mandakïnimpaqwanmi Jesus parlarqan, ¿imanir? Tsëta alli musyanapaqqa, ¿imapaqtaq yapë yurikuyan? neq tapukïtam contestanantsik. Tsëtam yachakushun qateqninchö.

[Päginapa ura kuchunchö willakï]

[6 kaq päginachö dibüju]

¿Imanirtaq ‘yape yuriquïqa’ wambra yurikonqannölla?