Pagin “Born Again”—Personal ba nga Desisyon?

HIN-O an nagpapahinabo han pagin born again? Kon gin-aaghat han iba nga ministro an ira mamarati nga magin born again nga Kristiano, ira ginkukotar an ginsiring ni Jesus: ‘Kinahanglan ig-anak kamo tikang ha igbaw [‘ig-anak utro,’ NW].’ (Juan 3:7) Ira ginagamit ini nga mga pulong sugad nga sugo, nga baga hin nagpapasabot nga “Magin born again!” Hito nga paagi, ira igintututdo nga an pagsunod kan Jesus ngan an pagtuman han ginkikinahanglan basi maeksperyensyahan an bag-o nga katawo nadepende ha tagsa nga tumuroo. Uyon hito nga pangatadongan, an pagin born again personal nga desisyon. Kondi, uyon ba ito ha ginsiring ni Jesus kan Nikodemo?

Kon babasahon hin maopay an ginsiring ni Jesus, ipinapakita hito nga waray niya igtutdo nga an usa an magbubuot kon karuyag niya magin born again o diri. Kay ano nga masisiring naton ito? An Griego nga pulong nga ginhubad nga “igin-anak utro” mahimo liwat ighubad nga “sadang ig-anak tikang ha igbaw.”  Salit uyon hito, an bag-o nga katawo, “tikang ha igbaw”—karuyag sidngon, “tikang ha langit,” o “tikang ha Amay.” (Juan 19:11; Jakobo 1:17) Oo, an Dios an nagpapahinabo hito.—1 Juan 3:9.

Kon aton huhunahunaon an mga pulong nga “tikang ha igbaw,” diri makuri sabton kon kay ano nga an usa diri makakapahinabo han iya pagin born again. Hunahunaa an imo katawo sugad nga bata. Ikaw ba an nagbuot nga ipanganak ka? Syempre diri! Naipanganak ka tungod kay ginpahinabo ito han imo amay. Ha pariho nga paagi, maieksperyensyahan naton an bag-o nga katawo kon pahihinaboon ito han Dios, an aton langitnon nga Amay. (Juan 1:13) Tungod hito, hi apostol Pedro husto nga nagsiring: “Pagdayawon an Dios ngan Amay han aton Ginoo Jesu-Kristo, nga tungod ha iya daku nga kalooy ipinanganak liwat [‘bag-o nga natawo,’ NW] kita.”—1 Pedro 1:3.

Sugo ba Ito?

An iba bangin magpakiana, “Kon tinuod nga diri mapapahinabo han usa nga magin born again ha iya kalugaringon la, kay ano nga nagsugo hi Jesus: ‘Kinahanglan kamo ig-anak utro’ (NW)?” Husto la nga ipakiana ito. Aw, kon sugo ini, nagsusugo hi Jesus ha pagbuhat hin diri naton maaakos. Baga hin diri makatadunganon ito. Salit, paonan-o sadang sabton an mga pulong nga kinahanglan kamo ‘ig-anak utro’?

Kon uusisahon ini nga mga pulong ha orihinal nga yinaknan, masasantop naton nga diri ito sugo. Lugod, nagsusumat la ito. Ha iba nga pagkayakan, han nagsiring hi Jesus nga kinahanglan kamo ‘ig-anak utro’ nagsusumat la hiya, diri nagsusugo. Hiya nagsiring: “Kinahanglan nga ig-anak kamo tikang ha igbaw.”—Juan 3:7.

Ha pag-ilustrar, handurawa an usa nga syudad nga may damu nga eskwelahan. Usa hito an esklusibo para ha nitibo nga mga estudyante tikang ha lugar nga hirayo hito nga syudad. Usa ka adlaw, may diri-nitibo nga batan-on nga nakiistorya ha prinsipal, “Karuyag ko umiskwela ha iyo eskwelahan.” An prinsipal binaton, “Basi ka makaeskwela dinhi, kinahanglan ka magin nitibo.” Syempre, diri sugo an ginsiring han prinsipal ngan diri hiya nagsusugo ha estudyante, “Magin nitibo ka!” Iginsusumat la han prinsipal an kwalipikasyon basi makaenrol. Ha pariho nga paagi, han hi Jesus nagsiring: ‘Kinahanglan kamo ig-anak utro,’ o magin born again, iya la iginsusumat an kwalipikasyon basi an usa “makasulod ha ginhadian han Dios.”

Iton ultimo nga mga pulong—an Ginhadian han Dios—may koneksyon ha usa pa nga bahin han bag-o nga katawo. May kalabotan ito ha pakiana, Ano an katuyoan hito? An paghibaro han baton hini importante basi husto nga hisabtan an kahulogan han pagin born again.

[Retrato ha pahina 6]

Ano an kaparihoan han pagin “born again” ha katawo sugad nga bata?