Fɔmɔ Hee Lɛ—Mɛni Ebaatsu?

MƐNI hewɔ beni Yesu wieɔ mumɔ krɔŋkrɔŋ lɛ baptisimɔ lɛ he lɛ, ekɛ wiemɔ ni ji ‘ajɛ mumɔ mli afɔ’ tsu nii lɛ? (Yohane 3:5) Kɛ́ akɛ wiemɔ ni ji “afɔ” tsu nii akɛ mfonirifeemɔŋ wiemɔ lɛ, nɔ ni etsɔɔ ji “shishijee.” No hewɔ lɛ, nɔ ni wiemɔ ni ji “fɔmɔ hee” lɛ tsɔɔ ji “shishijee hee.” No hewɔ lɛ, mfonirifeemɔŋ wiemɔi ni ji “afɔ” kɛ “fɔmɔ hee” lɛ maa nɔ mi akɛ mɛi ni akɛ mumɔ krɔŋkrɔŋ ebaptisi amɛ lɛ baaje shishi amɛná amɛ kɛ Nyɔŋmɔ teŋ wekukpãa hee. Mɛɛ gbɛ nɔ wekukpãa mli tsakemɔ kpele nɛɛ baa mli?

Bɔfo Paulo kɛ weku shihilɛ mli nifeemɔ ko fee nɔkwɛmɔnɔ ni ekɛtsɔɔ bɔ ni feɔ ni Nyɔŋmɔ saa adesai etoɔ kɛha nɔyeli yɛ ŋwɛi lɛ mli. Eŋma eha Kristofoi ni hi shi yɛ egbii lɛ amli lɛ akɛ amɛná “bitsɔmɔ hegbɛ,” ni no hewɔ lɛ Nyɔŋmɔ baahiɛ amɛ “tamɔ ebii.” (Galatabii 4:5; Hebribii 12:7) Bɔni afee ni wɔna bɔ ni nɔkwɛmɔnɔ ni kɔɔ bitsɔmɔ he lɛ yeɔ ebuaa wɔ koni wɔnu nɔ̃ tsakemɔ ni baa kɛ́ akɛ mumɔ krɔŋkrɔŋ lɛ baptisi mɔ aŋkro ko lɛ shishi lɛ, ha wɔsusu nɔkwɛmɔnɔ ni kɔɔ oblanyo ko ni miitao ni ahe lɛ yɛ skul ni maŋ pɔtɛɛ ko mlibii pɛ afee aha lɛ he ekoŋŋ wɔkwɛ.

Bitsɔmɔ ni kɛ Tsakemɔ Baa

Yɛ nɔkwɛmɔnɔ lɛ mli lɛ, anyɛɛɛ ahe oblanyo lɛ awo skul lɛ mli, ejaakɛ ejeee maŋ ni afee skul lɛ aha amɛ lɛ mlinyo. Agbɛnɛ ŋɔɔ lɛ akɛ gbi ko lɛ tsakemɔ wulu ko ba. Tsɛ ko ni jɛ nakai maŋ lɛ mli lɛ ŋɔ oblanyo lɛ akɛ ebi yɛ mla naa. Te enɛ baasa oblanyo lɛ he eha tɛŋŋ? Ojogbaŋŋ, akɛni aŋɔ lɛ akɛ bi hewɔ lɛ, agbɛnɛ ebaanyɛ ená hegbɛi ni oblahii kɛ oblayei krokomɛi ni jɛ maŋ lɛ mli lɛ yɔɔ lɛ nɔŋŋ eko, ni eyɛ hegbɛ akɛ eyaa skul lɛ eko. Ŋɔ ni aŋɔ lɛ akɛ bi lɛ etsake hegbɛi ni eyɔɔ lɛ kwraa.

Enɛ feɔ nɔ ni baa mɛi ni afɔɔ amɛ ehee lɛ anɔ yɛ gbɛ ni sa kadimɔ waa nɔ lɛ he mfoniri. Susumɔ nibii komɛi ni je amɛhe yɛ nɔkwɛmɔnɔ nɛɛ kɛ fɔmɔ hee lɛ mli lɛ ahe okwɛ. Kɛ́ abaahe oblanyo ni yɔɔ nɔkwɛmɔnɔ lɛ mli lɛ awo skul lɛ mli lɛ, ja eshɛ taomɔ nɔ lɛ he dã, no ji akɛ esa akɛ efee maŋ ni afee skul lɛ aha amɛ lɛ mlinyo. Shi kɛ́ ka oblanyo lɛ kome kulɛ, enyɛŋ eshɛ taomɔ nɔ lɛ he. Nakai nɔŋŋ hu abaaha adesai komɛi gbɛfaŋnɔ yɛ Nyɔŋmɔ Maŋtsɛyeli loo ŋwɛi nɔyeli lɛ mli, shi ja amɛshɛ taomɔ nɔ kɛha emlibotemɔ, ni ji ‘fɔmɔ ekoŋŋ’ lɛ he dã. Shi kɛ́ ka amɛ kome too kulɛ, amɛnyɛŋ amɛshɛ taomɔ nɔ lɛ he, ejaakɛ fɔmɔ hee lɛ damɔ Nyɔŋmɔ nɔ.

 Mɛni ha oblanyo lɛ shihilɛ tsake? Mla naa nifeemɔ ni ha aŋɔ lɛ akɛ bi lɛ. Eji anɔkwale akɛ, nakai nifeemɔ lɛ tsakeee oblanyo lɛ su. Beni aŋɔ lɛ akɛ bi lɛ sɛɛ lɛ, etsakeee etsɔɔɔ oblanyo kroko. Fɛɛ sɛɛ lɛ, beni atsu mla naa taomɔ nii kɛha bitsɔmɔ lɛ fɛɛ he nii agbe naa lɛ, oblanyo lɛ ná hegbɛ hee. Yɛ anɔkwale mli lɛ, ená shishijee hee, kɛ́ wɔɔkɛɛ lɛ afɔ lɛ ehee. Ebatsɔ bi, ni enɛ ha ená hegbɛ akɛ eya skul lɛ, ni etsɔ tsɛ ni ŋɔ lɛ akɛ ebi lɛ weku lɛ mlinyo.

Nakai nɔŋŋ hu, Yehowa tsake adesai ni yeee emuu akuu ko ashihilɛ kɛtsɔ mla naa nifeemɔ ko ni etsu he nii koni eŋɔ amɛ akɛ ebii lɛ nɔ. Bɔfo Paulo ni ji kuu nɛɛ mlinyo lɛ ŋma eha enanemɛi Kristofoi lɛ akɛ: “Nyɛná biiatsɔmɔ mumɔ, mɔ mli ni wɔblɔɔ yɛ akɛ: Aba, ataa! lɛ. Lɛ Mumɔ lɛ diɛŋtsɛ kɛ wɔmumɔ lɛ yeɔ odase akɛ Nyɔŋmɔ bii ji wɔ.” (Romabii 8:15, 16) Hɛɛ, kɛtsɔ biiatsɔmɔ nifeemɔ lɛ nɔ lɛ, nakai Kristofoi lɛ tsɔmɔ Nyɔŋmɔ weku lɛ mlibii, loo “Nyɔŋmɔ bii.”—1 Yohane 3:1; 2 Korintobii 6:18.

Yɛ anɔkwale mli lɛ, ŋɔ ni Nyɔŋmɔ ŋɔ amɛ akɛ ebii lɛ tsakeee amɛsui, ejaakɛ amɛtee nɔ amɛfee mɛi ni yeee emuu. (1 Yohane 1:8) Fɛɛ sɛɛ lɛ, taakɛ Paulo tsɔɔ mli lɛ, beni atsu mla naa taomɔ nii kɛha biiatsɔmɔ lɛ he nii agbe naa lɛ, amɛná hegbɛ hee. Yɛ nakai beaŋ nɔŋŋ lɛ, Nyɔŋmɔ mumɔ lɛ ha mɛi ni aŋɔ amɛ akɛ bii lɛ ná nɔmimaa yɛ amɛtsuiiaŋ akɛ amɛkɛ Kristo baahi shi yɛ ŋwɛi. (1 Yohane 3:2) Nɔmimaa ni yiŋkɔshikɔshifeemɔ bɛ mli nɛɛ ni mumɔ krɔŋkrɔŋ lɛ eha amɛná lɛ haa amɛkwɛɔ nii yɛ gbɛ hee kwraa nɔ. (2 Korintobii 1:21, 22) Hɛɛ, amɛnáa shishijee hee—kɛ́ wɔɔkɛɛ lɛ afɔɔ amɛ ehee.

Beni Biblia lɛ wieɔ mɛi ni Nyɔŋmɔ eŋɔ amɛ akɛ ebii lɛ ahe lɛ, ekɛɛ akɛ: “Amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.” (Kpojiemɔ 20:6) Mɛi ni Nyɔŋmɔ eŋɔ amɛ akɛ ebii lɛ kɛ Kristo baaná gbɛfaŋnɔ akɛ maŋtsɛmɛi yɛ Nyɔŋmɔ Maŋtsɛyeli, loo ŋwɛi nɔyeli lɛ mli. Bɔfo Petro kɛɛ enanemɛi Kristofoi lɛ akɛ, amɛbaaná “gboshinii ni fiteee ni he bɛ kpa ko ni ekwaaa, ni aŋɔto yɛ ŋwɛi aha” amɛ lɛ. (1 Petro 1:3, 4) Gboshinii ni nɔ bɛ nɛ lɛɛlɛŋ!

Shi sane ni kɔɔ nɔyeli nɛɛ he lɛ teɔ sanebimɔ kroko shi. Kɛ́ mɛi ni afɔ amɛ ekoŋŋ lɛ baaye nɔ akɛ maŋtsɛmɛi yɛ ŋwɛi lɛ, namɛi anɔ amɛbaaye? Abaagbala sanebimɔ nɛɛ mli yɛ sane ni nyiɛ sɛɛ lɛ mli.—w09 04/01-E.

[Mfoniri ni yɔɔ baafa 10]

Mɛni Paulo wie yɛ biiatsɔmɔ he?