O Wutuluka Nki’ekani Kulungisa?

EKUMA Yesu kasadila e mvovo ‘wutwa kwa mwanda’ vava kayika luvubu lwa mwand’avelela? (Yoane 3:⁠5) Avo usadilu nze nona, e mvovo “wutwa” usonganga vo “lubantiku.” Kasikil’owu, lubantiku lwa zula lulenda yikilwa vo “luwutuku lwa zula.” Muna kuma kiaki, e mvovo “wutuluka” i “lubantiku lwampa.” I kuma vo, e nona kia “wutwa” ye “wutuluka” kisonganga vo vesinga kala ye ngwizani yampa kwa Nzambi y’awana bevubwa muna mwand’avelela. E ngwizani yayi aweyi ivangamenanga?

Vava ntumwa Paulu kavova una Nzambi kekubikilanga awana beyala kun’ezulu, wasadila e nona kia zingu ki’esi nzo. Wasoneka kwa Akristu muna lumbu yandi vo ‘bekituka nze wana,’ Nzambi okadila yau ‘nze wan’andi.’ (Ngalatia 4:5; Ayibere 12:⁠7) Muna zaya una nona kia wan’ansansi kilenda sadisila mu bakula diambu disobanga muna zingu ki’awana bevubwanga muna mwand’avelela, tufimpa diaka e nona kia kindende kianzenza kizolele tangila mu sikola yavaulwa mu kuma kia mingutukil’a mbanza.

Diambu Disobanga kwa Wan’ansansi

Muna nona kiaki, e kindende ke kiafwana tangila mu sikola yayina ko, kadi ka mungutukil’a mbanza ko. Yindula vo diambu disobele muna zingu kia kindende kiaki. Yakala dimosi dianzodi wa mungutukil’a mbanza yayina untambwidi yo kunsonekesa muna nkanda mia luyalu nze mwan’andi. Nkia diambu dilenda soba muna zingu kia kindende? Wau katambwilu nze mwana, okala ye nswa wavwa malau mawonso mevewa kwa wan’amingutukil’a mbanza, kumosi y’elau dia tangila muna sikola yayina. Ediadi disoba mvimba zingu kiandi.

E nona kiaki kitoma songanga edi disobanga muna zingu ki’awana bewutulukanga. Tala maka mambu mafwanana muna nona kiaki. Muna nona, e kindende, muna tondwa muna sikola ya mingutukila, kafwete lungisa edi divavwanga, i sia vo kakala nze mungutukil’a mbanza. Kansi, kalendi lungisa e nsiku wau mu luzolo lwa yandi kibeni ko. Diau adimosi, wantu akaka bevewa fulu muna Kintinu kia Nzambi yovo luyalu lw’ezulu, bafwete lungisa e nsiku a  “wutuluka.” Kansi, kabalendi lungisa e nsiku wau mu luzolo lwa yau kibeni ko, kadi Nzambi o wutululanga wantu.

Nki kiasoba e zingu kia kindende? Ese ona wansonekesa muna nkanda mia luyalu nze mwan’andi. Kieleka, diambu diadi ke diasoba mpw’a kindende ko. Vava kalungisa mawonso mavavwanga muna nsiku, e kindende watambula kisi nsi kiampa. Kalukatikisu ko, tulenda vova vo wayantika zingu kiampa yovo wawutuluka. Wakituka se mungutukil’a mbanza, ediadi diamvana elau dia tangila muna sikola yo kala se mwana muna nzo a se diandi diansansi.

Diau adimosi, Yave osolanga buka kia wantu alembi lunga yo kubatambula nze wan’andi. Paulu wa ntumwa, mosi muna buka kia wantu awaya, wasoneka kw’akw’andi akwikidi vo: “Nwatambula kaka mwand’a kiwana, una tukazila vo, Aba, e Tata. O mwanda kibeni osianga umbangi kumosi yo mwand’eto, ovo tu wan’a Nzambi.” (Roma 8:​15, 16) Elo, wau vo okubatambulanga nze wana, Akristu awaya bekitukanga se esi nzo yovo esi kanda dia Nzambi yovo ‘wan’a Nzambi.’​—⁠1 Yoane 3:1; 2 Korinto 6:⁠18.

Kieleka, awana kesolanga Nzambi nze wan’andi, ke besobanga nkal’au ko, kadi bakinu ye usumuki. (1 Yoane 1:⁠8) Kansi, Paulu wasonga vo vava belungisanga mana mevavwanga yo tambulwa nze wana, bevwanga kisi nsi kiampa. Vana vau, mwand’a Nzambi ukubafilanga mukala ye ziku vo kumosi bezinga yo Kristu kun’ezulu. (1 Yoane 3:⁠2) E ziku kiaki kia mwand’avelela kikubafilanga mu zitisa o moyo. (2 Korinto 1:​21, 22) Kieleka, tulenda vova vo bewutulukanga yo yantika zingu kiampa.

Muna kuma kia wan’a Nzambi, Nkand’a Nzambi uvovanga vo: “Bekala kaka se nganga za Nzambi yo Kristu, beyala yandi mun’ezunda dia mvu.” (Lusengomono 20:⁠6) Kumosi yo Kristu, wan’a Nzambi bekala se atinu muna Kintinu kia Nzambi yovo luyalu lw’ezulu. Petelo wa ntumwa wavovesa akw’andi akwikidi vo, betambula “evwa dilembi wolakana, yo safuka” ‘mun’ezulu.’ (1 Petelo 1:​3, 4) Ekwe evwa diantalu!

Kansi, diambu diadi dia luyalu kiuvu kiakaka divaikisanga. Wau vo awana bewutulukanga beyala se atinu kun’ezulu, akinani beyala? E kiuvu kiaki kisinga fimpwa mun’elongi dilanda.

[Foto ina muna lukaya lwa 10]

Paulu adieyi kavova mu kuma kia wan’ansansi?