¿Ima këmantaq chäyan yapë yurikoqkuna?

ESPÏRITUWAN bautizakïpaqmi ‘Santu Espïritupita yuriqui’ nerqan Jesus, ¿ima ninantaraq tsënö nerqan? (Juan 3:5.) Yuriqui neq palabraqa “qallanan” neq cuentam, imanömi sekyapa yaku shamur qallëkuptin “yaku yuriramun” nintsik, tsaq tsënöllam. Bibliachöpis “yuricuyänan” o “yape yuricuyänan” nerqa, rikätsikïkan espïrituwan bautizakoqkuna Diospa wambran tikrarir, yapë yurikushqanöna kayanqantam. Tsëqa, ¿imanötaq Diospa wambran këman chäyan?

Apóstol Pabluqa huk nuna teytannaq y mamannaq wambrata tsurintanö ëllukurkoqpaqnömi parlarqan. Ciëlochö gobernayänampaq yupashqalla nunakunata Dios alistëkanqampaqmi, ‘tsurincunanonam Diosnintsicpaq’ tikrayan nerqan, y tsëqa ‘wamrancunatanonash’ Diospis rikan (Gálatas 4:5; Hebreus 12:7). Tsënö nenqanmi musyatsimantsik santo espïrituwan bautizakoqkuna Diospa wambranna tikrayanqanta. Imanö tsë kanqanta musyanapaqqa, yapë yarpärishun wätayanqan familiapita herenciata chaskita munaq jövenman.

Wambran karqa herenciata chaskinmannam

Puntata nenqantsiknöpis, mana rasumpa wambran karmi herenciata chaskita puëdeqtsu. Pero ¿imaraq kanman wätaqnin nuna shutinchöna mushoq partïdan horqurapuptenqa? Wätayanqan wambralla karpis, kananqa wambran cuenta karnam, wätaqnimpa wambrankunanölla herenciata chaskita puëden.

Tsënöllam pasan yapë yurikoqkunawampis. Puntata parlanqantsiknöpis, tsë joven, wätayanqan familiapita herenciata chaskinampaqqa manam kikinllapitatsu, wätaqnin nunaraqmi partïdata shutinchö horqapunan. Tsënö kaqllam, Diospa gobiernochö huk nuna gobernanampaqqa, yapëraq yurikunan. Tsënö karpis, huk nunaqa manam kikinllapitaqa yapë yurikunmantsu, Diosraqmi pï yapë yurikunampaqpis akran.

Tsë joven, ¿imanöpataq herenciata chaskita puëdenmanna? Wätaqnin nuna shutinchö partïdanta horqapushqa kaptinmi. Wätaqnin nunapa wambranna karpis, manam huknatsu, kanqan wambrallam. Pero partïdanqa wätaqnimpa shutinchönam. Tsë wätaqnin nuna apellïdonta qornin partïdanta  horqurapuptenqa, wambranna karmi, tsëraq yurikushqanö o kawar qallëkaqnöna tikrarin. Kananqa tsë familianam tikrarin y herenciatapis chaskita puëdennam.

Hina tsënöllam, hutsasapa nunakunatapis wambrankuna tikrayänampaq Jehová Dios ëllushqa. Apóstol Pablum kënö qellqarqan akrashqa mayinkunaman: “Ricamantsic pepa wamran cuentatanam. Y Santu Espiritum yanapamantsic Diosta ‘Papällä’ ninapaq. Tse Santu Espiritullam shonquntsiccho cäyitsimantsic [musyatsimantsik] Diospa wamrancunana cashqantsicta” (Romanos 8:15, 16). Tsë cristiänokunata Dios akrashqa kaptinmi, Dios Yayapa ‘tsurincunana cayarqan’ y tsënöpa Diospa familiankunamanna tikrariyarqan (1 Juan 3:1; 2 Corintios 6:18).

Tsënö karpis, manam Diosnintsik akrariptinllatsu hutsasapa këninkunaqa ushakärin (1 Juan 1:8). Pero Pablu nenqannöpis, Jehová pëkunata akraptinmi tsurinkunana tikrariyan. Hinamampis Diospa santo espïritunmi pëkunata musyatsin Cristuwan ciëlochö yachayänampaq kaqta (1 Juan 3:2). Tsëkunata santo espíritu musyatsiptinmi shamoq tiempokunata hukläyapana rikäyan (2 Corintios 1:21, 22). Tsëmi imëka yapë yurikoq cuenta, o yapë qallaq cuentana kayan.

“Saserdoticuna cuentana[m] Diosta y Jesucristuta sirwiyanqa, y waranqa watam Jesucristuwan juntu mandacuyanqa” ninmi Biblianchö Dios akranqan nunakunapaq (Apocalipsis 20:6). Jesucristunömi Diospa Gobiernonchö mandakoq tikrayanqa. Apóstol Pedrum kënö nerqan: “Sieluchomi wiñe cawe erensiantsic quecatsin noqantsic chasquinantsicpaq. Tseqa manam cosascunanotsu ushacanqa, ni mapayar ismonqa” (1 Pedru 1:3, 4). ¡Ima shumaqraq pëkunapaq kanqa!

Tsënö karpis, ¿pikunataraq ciëlopita gobernayanqa yapë yurikushqakuna? nirnin itsa tapukushwanraq. Qateqninchönam tsëta yachakurishun.

[10 kaq päginachö dibüju]

Dios nunakunata tsurinkuna kayänampaq akranqampita, ¿ima nerqantaq Pablu?