M-Mar u he la Gem or Nena?

ER NAN ve Yesu yange ôr kwagh ter ishember i ‘mar or sha jijingi’ la zum u lu ôron kwagh u batisema u sha icighan jijingi laa? (Yohane 3:⁠5) Ishember i “mar” la tese ‘mhii’ u kwagh. Nahan ishember i ‘mar hegh’ la ngi ôron kwagh u “mhii u he.” Sha nahan yô, ishember i sha injakwagh i “mar” man i ‘mar hegh’ la cii tese ér mba a er ve batisema sha icighan jijingi la vea ya ikyar vea Aôndo sha gbenda u he. Ka sha gbenda u nyi nahan ve mban ve ye ikyar a Aôndoo?

Shighe u apostoli Paulu lu tesen gbenda u Aôndo a lu tsuan ior sha u ve za tema tor sha Tartor la, a tese ikyav sha kwagh u hen tsombor. A nger Mbakristu mba sha ayange na la ér vea hingir mba ‘i lumun ve ve lu ônov la,’ nahan Aôndo una er a ve “er ka ônov” nahan. (Mbagalatia 4:5; Mbaheberu 12:⁠7) Hide shi hen ase sha ikyav i gumor u a lu marnya ga, kpa a soo u zan makeranta u i ver sha ci u mbayevmakeranta mba ve lu marnya la, tsô u mase kaven inja i ikyav i Paulu a tese sha kwagh u or u i lumun nan ér nana lu wan u Aôndo shighe u i er nan batisema sha icighan jijingi kera yô.

Mgem u Mba Aôndo a Lumun Ér Ve Lu Ônov Nav La

Ken injakwagh la, gumor la fatyô u nyôron makeranta la ga sha ci u ngu marnya ga. Kpa gema tôô ase wer iyange igen yô, kwagh kôr gema kposo. Orgen hen tsombor u hen ijiir i makeranta la, ngohol gumor ne hingir wan na u sha tindi je. Kwagh ne una bende a gumor ne nena? Er a hingir marnya hegen yô, una fatyô u lun a ian i eren kwagh er agumaior agen a a lu marnya la kpa a lu a mi nahan, kua ian i nyôron makeranta la kpaa. Er i lumun wan ne ér ngu marnya yô, una fatyô u eren hanma kwagh u marnya ve eren yô.

Ikyav ne tese kwagh u vesen u ka a er or u i mar nan hegh yô. Nenge ase er injakwagh ne i zough sha kwagh u mba i lumun ér ve lu ônov mba Aôndo la vough yô. Cii man i tôô gumor la makeranta yô, saa una hingir marnya. Kpa, aluer ngu marnya ga yô, una kôr cio ga. Nahan kape uumace mbagenev kpa vea tema tor ken Tartor u Aôndo shin gomoti u Aôndo a ver sha la je la, nahan kpa saa a mar ve hegh keng ve vea kôr cio ye. Ve tseegh yô, vea fatyô ga sha ci u ka Aôndo a ne or m-mar u he ne ye.

Kanyi yange i na ve mlu u gumor ne gemaa? Mlu na yange gema zum u i lumun un  sha tindi hingir marnya la. Nahan cii kpa, kwagh ne gema un hingir orgen kposo ga. Kpa mba lumun un ér ngu wan u or u hen tar la yô, á hingir u lun sha iaven i he. Nahan hingir inja er i na un mhii u he yô, shin se fatyô u kaan ser i mar un hegh. A hingir wan u i ne un ian i nyôron makeranta shi lun ken tsombor u or u a lumun un ér a lu wan na la.

Er injakwagh i wan ne i tese nahan, kape Yehova kpa a gem mlu u asande a ior kpuaa ken uumace mba ve yen sha ishigh nagh je la. A lumun ve, ve hingir ônov nav mba sha tindi u un iyol na a ver yô. Apostoli Paulu, u a lu môm ken asande a ior mba shonov ne, yange nger mbananjighjigh a na imôngo ér: “Ne ngohol jijingi u mlu u wan, ka sha mi je se yer ser Aba, Tere, ye. Ka Jijingi iyol Na A lu eren shiada vea jijingi wase imôngo er, se mba ônov mba Aôndo ye.” (Mbaromanu 8:​15, 16) Sha kpôô yô, Aôndo lumun Mbakristu mban sha tindi ve hingir “ônov [nav].”​​—⁠1 Yohane 3:1; 2 Mbakorinte 6:​18.

Shin er Aôndo lumun uumace mbagenev ér ve lu ônov nav sha tindi nahan kpa, kwagh la yange gema ve ve hingir kwagh ugen kposo ga, gadia ve lu ken myen her. (1 Yohane 1:⁠8) Nahan cii kpa, Paulu seer tan iwanger sha kwagh ne ér, yange mba lumun ve u lun ônov sha tindi yô, ve hingir u lun sha iaven i he. Sha shighe shon môm la je, jijingi u Aôndo iv ken ve, nahan ve na jighjigh taveraa ér vea hemen sha vea Kristu. (1 Yohane 3:⁠2) Er icighan jijingi wase ve u lun a jighjigh u nan a akpelan shio yô, ve hingir u lun a mnenge ugen kposo sha kwagh u uma. (2 Mbakorinte 1:​21, 22) Kwagh ne tese ér mimi je, ve hii uma u he shin se fatyô u kaan ser i mar ve hegh.

Bibilo ôr kwagh sha kwagh u mba i lumun ve sha tindi ve lu ônov mba Aôndo la ér: “Vea gema vea lu upristi mba Aôndo man mba Kristu kpaa, vea tema tor a Na imôngo sha anyom dubu la.” (Mpase 20:⁠6) Ônov mba Aôndo mban vea tema tor a Kristu imôngo ken Tartor u Aôndo shin gomoti u Aôndo a ver sha la. Apostoli Peteru yange ôr a mbananjighjigh a na imôngo ér vea ya “dyako u hôôn ga, u fisee kpaa ga, u usen tsô kpaa ga,” inja na yô, ka “u i koso un Sha sha ci” ve je la (1 Peteru 1:​3, 4) Kwagh ne ka dyako u injaa kpen kpen!

Nahan cii kpa, kwagh u mtemtor ne due a mpin ugen. Aluer ka u mba i mar ve hegh la vea tema tor sha yô, vea tema tor sha unô? Se nenge sha mpin ne ken ngeren u a dondo ne.

[Foto u sha peeji 10]

Paulu yange ôr ér nyi sha kwagh u mlumun u Aôndo a lumun ve ve lu ônov laa?