Diyutay ang Magmando, Daghan ang Makapahimulos

SUKAD pa sa panahon sa mga apostoles, ang Diyos nagpili na gikan sa katawhan ug gamayng grupo sa matinumanong mga Kristohanon, nga nagsagop kanila ingong mga anak. Dako kaayo ang kausaban nga mahitabo niining sinagop nga mga anak mao nga ang Pulong sa Diyos naghubit niini ingong pagkahimugso pag-usab. Ang katuyoan niini mao ang pag-andam kanila sa pagmando sa langit. (2 Timoteo 2:12) Aron mahimong mga magmamando, sila pagabanhawon gikan sa kamatayon ngadto sa langitnong kinabuhi. (Roma 6:3-5) “Sila magamando ingong mga hari ibabaw sa yuta” uban ni Kristo sa langit.—Pinadayag 5:10; 11:15.

Apan ang Pulong sa Diyos nag-ingon usab nga dili lang kadtong nahimong born again ang makabaton ug dumalayon nga kaluwasan kondili aduna pay uban. Ang Bibliya (diha  sa Hebreohanong Kasulatan ug sa Kristohanon Gregong Kasulatan) nag-ingon nga katuyoan sa Diyos ang pagluwas ug duha ka grupo sa mga tawo—usa ka gamayng grupo sa mga magmamando nga magkinabuhi sa langit ug usa ka dakong grupo sa mga tawo nga magpuyo dinhi sa yuta. Pananglitan, matikdi ang gisulat ni apostol Juan ngadto sa iyang mga isigkamagtutuo nga nahimugso pag-usab. Siya miingon bahin kang Jesus: “Siya usa ka halad pasig-uli alang sa atong mga sala, apan dili lamang sa atoa [ang gamayng grupo] kondili usab nianang sa tibuok kalibotan [ang dakong grupo].”—1 Juan 2:2.

Si apostol Pablo usab misulat: “Ang maikagong pagpaabot sa kalalangan [ang dakong grupo] nagahulat sa pagpadayag sa mga anak sa Diyos [ang gamayng grupo].” (Roma 8:19-21) Sa unsang paagi nato sabton ang giingon ni apostol Juan ug apostol Pablo? Nga kadtong mahimong born again may luna sa gobyerno sa langit. Sa unsang katuyoan? Aron makabaton ug dumalayong kaayohan ang milyon-milyong tawo nga sakop sa gobyerno sa Diyos nga magpuyo dinhi sa yuta. Busa gitudloan ni Jesus ang iyang mga tinun-an sa pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:10.

Ang Hebreohanong Kasulatan usab naghisgot bahin sa kaluwasan niining duha ka grupo. Pananglitan, matikdi kon unsay giingon ni Jehova kang Abraham nga katigulangan ni Jesus: “Pinaagi sa imong binhi [ang gamayng grupo] ang tanang nasod sa yuta [ang dakong grupo] tinong magapanalangin sa ilang kaugalingon.” (Genesis 22:18) Busa mapanalanginan ang mga tawo pinaagi sa “binhi” ni Abraham.

Kinsa ang maong “binhi”? Kini nagtumong kang Jesu-Kristo uban sa sinagop sa Diyos nga mga anak nga gipahimugso pag-usab. Si apostol Pablo miingon: “Kon kamo iya ni Kristo, kamo sa pagkatinuod binhi ni Abraham.” (Galacia 3:16, 29) Unsang mga panalangin ang mabatonan sa mga tawo sa tanang nasod tungod sa maong “binhi”? Sila makapribilehiyo nga mahimong inuyonan sa Diyos ug makatagamtam sa kinabuhing walay kataposan sa paraisong yuta. Ang salmistang si David mitagna: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:29; Isaias 45:18; Pinadayag 21:1-5.

Busa, bisan pag diyutay lamang ang may paglaom nga magmando sa langit, daghan ang nakabatog paglaom nga mabuhi sa walay kataposan dinhi sa yuta tungod sa maong pagmando. Hinaot nga ikaw ug ang imong pamilya mahilakip niadtong makabatog walay kataposang kaayohan pinaagi sa Gingharian sa Diyos.

[Hulagway sa panid 12]

Minilyon ang makabatog kinabuhing walay kataposan dinhi sa yuta. Usa ka ba kanila?