Serten pou rennyen, bokou pou ganny benediksyon

DEPI lepok bann zapot, Bondye in swazir en pti group Kretyen fidel parmi bann imen e adopte zot konman son bann garson. Sa sanzman ki sa bann garson adoptif i eksperyanse i telman konplet ki Parol Bondye i dekrir li konman en nouvo nesans. Bi sa nouvo nesans i pour prepar sa bann serviter Bondye ki’n ne de nouvo pour vin bann lerwa ki pou rennyen dan lesyel. (2 Timote 2:12) Pour zot vin lerwa, zot ganny resisite pour al viv dan lesyel. (Romen 6:3-5) Dan lesyel “zot pou rennyen lo later” ansanm avek Kris.—Revelasyon 5:10; 11:15.

Parkont, Parol Bondye i osi dir ki apard sa bann ki’n ne de nouvo, i annan lezot ki pou ganny lavi eternel. Labib (dan Lekritir Ebre e osi dan Lekritir Grek) i mansyonnen ki Bondye in deside pour sov de group dimoun, en  pti group dimoun ki pou rennyen dan lesyel ek en gran group dimoun ki pou viv lo later. Par egzanp, remark sa ki zapot Zan ti ekrir son bann frer ek ser Kretyen ki ti’n ganny sa nouvo nesans. I ti dir sa lo Zezi: “Limenm, viktim sakrifis ki permet nou ganny pardon nou pese, pa zis pour nou [sa pti group], me osi pour pese lemonn antye [sa gran group].”—1 Zan 2:2.

Pareyman, zapot Pol ti ekrir: “Lemonn antye [sa gran group] ki Bondye in kree pe esper avek pasyans sa moman kan Bondye pou revel son bann garson [sa pti group].” (Romen 8:19-21) Ki mannyer nou devret konpran parol zapot Zan ek Pol? Dan sa fason: Bann ki ne de nouvo pou form parti en gouvernman dan lesyel. Pour ki rezon? Pour anmenn bann benediksyon dirab pour en gran kantite milyon dimoun, bann ki pou viv lo later anba gouvernman Bondye. Pour sa rezon alor, Zezi ti ansenny son disip pour priye: “Ki ou Renny i ganny etabli; Ki ou lavolonte i ganny akonpli lo later parey dan lesyel.”—Matye 6:10, nou ki’n met an italik.

Sa laverite konsernan delivrans sa de group i osi trouve dan Lekritir Ebre. Par egzanp, remarke ki Zeova ti dir Abraam, zanset Zezi: “Atraver ou desandans [sa pti group] tou nasyon lo later [sa gran group] pou sirman ganny beni.” (Zenez 22:18) Wi, se atraver “desandans” Abraam ki tou nasyon pou ganny beni.

Lekel sa “desandans”? Zezi Kri, ansanm avek bann ki’n ganny sa nouvo nesans, bann garson adoptif Bondye. Zapot Pol i eksplike: “Si zot pour Kris, alor zot bann desandans Abraam.” (Galat 3:16, 29) Ki bann benediksyon ki tou pep dan tou nasyon pou gannyen atraver sa “desandans”? Sa privilez pour reganny faver Bondye e rezouir lavi eternel dan paradi lo later. Psalmis David ti predir: “Bann dimoun drwat pou posed later e zot pou reste lo la pour touzour.”—Psonm 37:29; Izai 45:18; Revelasyon 21:1-5.

Sirman, pour rennyen dan lesyel i ganny rezerve pour en pti group me benediksyon ki sa dominasyon pou anmennen setadir lavi eternel lo later e lezot benediksyon pour en kantite dimoun. Fotespere ki ou ek ou fanmir i parmi sa bann ki pou ganny sa bann benediksyon dirab ki Rwayonm Bondye pou anmennen.

[Portre lo paz 12]

En gran kantite dimoun pou ganny beni pour ganny lavi eternel lo later. Eski ou pou parmi zot?