Umi onase jeýva oisãmbyhýta ojeiko porã hag̃ua ko yvy ape ári
Umi onase jeýva oisãmbyhýta ojeiko porã hag̃ua ko yvy ape ári
YMA umi apóstol tiémpo guive, Ñandejára oiporavo umi yvypóra iñeʼẽrendúvape ha oadopta chupekuéra itaʼýraramo. Upévare la Biblia heʼi onase pyahu jeyha hikuái, ha upéicha ojeprepara chupekuéra oisãmbyhy hag̃ua yvágape (2 Timoteo 2:12). Péro oisãmbyhy hag̃ua upépe, omano ha oñemoingove jey vaʼerã chupekuéra yvágape (Romanos 6:3-5). Upépe oĩta hikuái Jesucristo ykére ha “oguerekopáta ipoguýpe ko yvy” (Revelación 5:10; 11:15).
Péro la Biblia heʼi ndahaʼeiha chupekuérante Ñandejára osalvátava. Oñepyrũ guive opa peve la Biblia omombeʼu Ñandejára osalvataha mokõi grúpope. Peteĩ grúpo michĩvape oisãmbyhy hag̃ua yvágape ha peteĩ aty guasúpe oiko hag̃ua ko yvy ape ári. Apóstol Juan ohaivaʼekue avei: ‘Jesús omanovaʼekue ojeheja rei hag̃ua umi mbovymípe hembiapo vaikue, ha ndahaʼéi chupekuérante, opa yvypórape avei’ (1 Juan 2:2).
Apóstol Pablo heʼivaʼekue avei: ‘Ko múndo [pe aty guasu] ohaʼarõ asy hína umi Ñandejára raʼykuéra ojekuaaukavaʼerãha ára’ (Romanos 8:19-21, BNP). Mbaʼépa omyesakã ñandéve koʼã mokõi apóstol heʼivaʼekue? Umi onase jeýva oisãmbyhytaha yvágape ha oguereko porãtaha ipoguýpe pe aty guasu oikótavape ko yvy ape ári. Upévare Jesús heʼi hemimboʼekuérape ojerure hag̃ua Ñandejárape: “Tou ne rréino, tojejapo ne rembipota yvy ári yvagapeguáicha” (Mateo 6:10, BNP).
Escrituras Hebréaspe ningo oñeñeʼẽ avei koʼã mokõi grúpo Ñandejára osalvátavare. Pór ehémplo Abrahánpe Jehová heʼi: “Opa tetã ko yvy arigua ojehovasáta ne ñemoñare rupi, rejapo haguére haʼevaʼekue ndéve” (Génesis 22:18). Upéicharõ opa tetã oñevendesivaʼerã Abrahán “ñemoñare” rupive.
Ha mávapa hína upe “ñemoñare”? Jesucristo ha opavave onase jeýva, térã umi Ñandejára oadoptavaʼekue itaʼýraramo. Apóstol Pablo heʼi voi: ‘Peẽ Cristo mbaʼéramo, peẽ Abrahán ñemoñare hína’ (Gálatas 3:16, 29). Ha mbaʼéichapa oñevendesíta opa tetãnguérape upe “ñemoñare” rupive? Opavave oĩ porã jeýta Ñandejára ndive ha oikóta opa ára g̃uarã peteĩ hardínpe ko yvy ape ári. Pe Salmísta David heʼi haguéicha: “Hekopotĩvape opytapáne ko yvy, ha upépe haʼekuéra oikóne opa árare” (Salmo 37:29; Isaías 45:18; Revelación 21:1-5).
Saʼíramo jepe oisãmbyhýtava yvágape, hetaiterei oĩta oikóva opa árare ko yvy ape ári. Roipotaite ningo nde ha ne família pehupyty avei umi mbaʼe porãita Ñandejára Rréino omoĩtava.
[Nóta oĩva taʼanga ndive páhina 12]
Hetaiterei oĩta oikóva opa árare ko yvy ape ári. Ñaimétapa avei ijapytepekuéra?