Luyalu ya Bantu Fyoti Sambu na Mambote ya Bantu Mingi

BANDA na ntangu ya bantumwa, Nzambi keponaka ntalu mosi ya fyoti ya Bakristu ya kwikama na kati ya bantu, mpi yandi kekumisaka bo bana na yandi. Nsoba yina kesalamaka na luzingu ya bantu yina Nzambi kekumisaka bana na yandi kesalamaka na mambu yonso mpenza, yo yina Ndinga ya Nzambi ketubila yo bonso lubutuku ya mpa. Lukanu ya lubutuku ya mpa kele ya kubongisa bansadi ya mutindu yai ya Nzambi ya kebutuka dyaka na kukuma bamfumu na zulu. (2 Timoteo 2:12) Sambu na kukuma bamfumu, bo kefutumukaka sambu na kwenda kuzinga na zulu. (Roma 6:3-5) Na zulu, ‘bo ta yala nsi-ntoto’ kumosi ti Kristu.​—Kusonga 5:10; 11:15.

Kansi, Ndinga ya Nzambi ketubaka mpi nde katula bantu yina kebutuka dyaka, kele ti bantu yankaka yina tabaka lugulusu ya mvula na mvula. Biblia (na Masonuku ya Kiebreo mpi na Masonuku ya Kigreki ya Bukristu) ketubaka nde  Nzambi mebakaka lukanu ya kugulusa bimvuka zole ya bantu​—kimvuka mosi ya fyoti ya bamfumu yina tazinga na zulu mpi kimvuka mosi ya nene ya bantu yina tazinga na ntoto. Mu mbandu, tala mambu yina ntumwa Yoane kusonikilaka bampangi na yandi Bakristu yina kubakaka lubutuku ya mpa. Yandi tubaka sambu na Yezu nde: “Yandi muntu me fwaka sambu na kukatula masumu na beto. Yo kele sambu na masumu na beto [kimvuka ya fyoti] kaka ve, kansi sambu na masumu ya bantu yonso [kimvuka ya nene].”​—1 Yoane 2:2.

Mutindu mosi, ntumwa Polo kusonikaka nde: “Sambu kivuvu ya ngolo ya lugangu [kimvuka ya nene] kele na kuvingila nzayikusu ya bana ya Nzambi [kimvuka ya fyoti].” (Roma 8:19-21, NW) Inki mutindu beto fwete bakisa bangogo yai ya ntumwa Yoane ti ntumwa Polo? Beto fwete bakisa yo mutindu yai: Bantu yina mebutuka dyaka tavanda na kati ya bantu yina tayala na luyalu ya zulu. Sambu na nki lukanu? Sambu na kupesa mambote ya kimakulu na bamilio ya bantu yina tazinga na ntoto na nsi ya luyalu ya Nzambi. Yo yina, Yezu kulongaka balongoki na yandi na kusamba nde: “Bika Kimfumu na nge kukwisa. Bika luzolo na nge kusalama awa na ntoto bonso na zulu.”​—Matayo 6:10.

Masonuku ya Kiebreo kele mpi ti kyeleka ya mutindu mosi ya ketadila lugulusu ya bo kepesa na bimvuka zole. Mu mbandu, tala mambu yina Yehowa kutubilaka Abrahami, nkaka ya Yezu: “Na nzila ya nkuna [kimvuka ya fyoti] na nge, ya kyeleka, bantu ya makanda yonso ya ntoto [kimvuka ya nene] tabaka lusakumunu, sambu nge lemfukilaka mono.” (Kuyantika 22:18, NW) Ya kyeleka, bantu ya makanda yonso lendaka kubaka balusakumunu na nzila ya “nkuna” ya Abrahami.

Nani kele “nkuna” yina? Yezu Kristu, ti bantu yina kebaka lubutuku ya mpa, bayina Nzambi mekumisaka bana na yandi. Ntumwa Polo ketendula nde: “Kana beno kele bantu ya Kristo, beno kele bantu [to, nkuna] ya dikanda ya Abrahami.” (Galatia 3:16, 29) Inki balusakumunu bantu ya makanda yonso tabaka na nsadisa ya “nkuna”? Dibaku ya kundimama na Nzambi mpi ya kubaka luzingu ya kukonda nsuka na paladisu ya ntoto. Muyimbi-bankunga Davidi kubikulaka nde: “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.”​—Nkunga 37:29; Yezaya 45:18; Kusonga 21:1-5.

Ya kyeleka, luyalu ya zulu kele kaka sambu na bantu fyoti, kansi bantu mingi tabaka mambote ya luyalu ya zulu, disongidila luzingu ya mvula na mvula na ntoto mpi balusakumunu yonso yina yo tanata. Bika nde nge ti dibuta na nge kuvanda na kati ya bantu yina tabaka balusakumunu ya mvula na mvula yina kimfumu ya Nzambi tanata.

[Kifwanisu ya kele na lutiti 12]

Bamilio mingi ya bantu tabaka luzingu ya mvula na mvula na ntoto. Keti nge tavanda na kati na bo?