Kweth Matin Biro Locho, to Ji Mang’eny Noyud Gweth

CHAKRE kinde mag joote, Nyasaye osebedo kayiero kowuok e kind oganda dhano, kwan moro manok mar Jokristo mochung’ motegno kotimogi gibedo yawuote. Lokruok ma jogo mobedo yawuotego kaloe, en lokruok maduong’ ma Wach Nyasaye luongo ni nyuol manyien. Chenro mar nyuol manyien en mar iko jotich Nyasaye ma kamago mondo gibed joloch e polo. (2 Timotheo 2:​12) Mondo gibed joloch, ichierogi e ngima mar polo. (Jo Rumi 6:​3-5) Ka gin e polo kuno, ‘ginibed gi loch e wi piny’ kanyachiel gi Kristo.—Fweny 5:​10; 11:15.

Kata kamano, Wach Nyasaye bende wacho ni jomoko, mopogore gi jogo minyuolo manyien, noyud warruok ma nyaka chieng’. Ei Muma (e Ndiko mag Dho-Hibrania koda mag Dho-Grik mag Jokristo), inyiso ni en  adier ni Nyasaye osebedo ka dwaro reso oganda tieng’ ariyo—kweth moro matin mar jogo mabiro locho ka gin e polo, koda oganda mang’ongo mabiro dak e piny. Ne ane kuom ranyisi gima jaote Johana nondiko ne Jokristo wetene ma ne oyudo nyuol manyien. Ne owachonigi kama kuom Yesu: “En e misango mar richowa; to ok mar richowa [kweth matin] kende to richo mag piny duto bende [oganda mang’ongo].”—1 Johana 2:2.

Jaote Paulo bende nondiko niya: “Chuech duto [oganda mang’ongo] rito, kogeno ahinya, elruok mar yawuot Nyasaye [kweth matin].” (Jo Rumi 8:​19-​21) Ere kaka onego wakaw weche jaote Johana koda Paulo? Onego wakawgi kama: Jogo ma yudo nyuol manyien biro bedo jokanyo ma locho e sirkand polo. En ang’o ma gibiro chopo? Ginikel gweth mochwere ne oganda dhano tara gi tara, ma nodag e piny ka gin e bwo sirkal mar Nyasaye. Kuom mano, Yesu nopuonjo jopuonjrene mondo olam kama: ‘Pinyruodhi mondo obi, gi midwaro mondo otimre e piny kaka e polo.’—Mathayo 6:​10.

Ndiko mag Dho-Hibrania bende wacho adier ni nitie grube ariyo mag oganda dhano ma ibiro resi. Kuom ranyisi, ne ane gima Jehova nowacho ne Ibrahim kwar Yesu, niya: “Kuom kothi [kweth matin] dhoudi duto mag piny [oganda mang’ongo] noyud hawi.” (Chakruok 22:18) Ee, ogendini duto ne dhi yudo gweth kokalo kuom ‘koth’ Ibrahim.

Ng’a gini maloso ‘kodhino’? Yesu Kristo, kanyachiel gi jogo moseyudo nyuol manyien, magin yawuot Nyasaye ema loso kodhino. Jaote Paulo lero niya: “Ka un mag Kristo, eka un koth Ibrahim” madier. (Jo Galatia 3:​16, 29) To gin gweth mage mabiro ne ogendini duto kokalo kuom ‘kodhino’? Gibiro yudo thuolo mar bedo kendo gi winjruok maber gi Nyasaye, kendo giniyud mor ma onge giko e piny mibiro losi mondo obed paradis. Daudi jandik-zaburi nokoro kama: “Jo matir ginicham piny, mi ginidagie nyaka chieng’.”—Zaburi 37:29; Isaiah 45:18; Fweny 21:​1-5.

Kuom adier, loch mar polo en mana mar joma nok, to kata kamano ber ma lojno kelo—ma en ngima mochwere e piny kaachiel gi gweth duto mobiro kelo—imiyo ji mang’eny. Mad in, kaachiel gi joodi ubed achiel kuom jogo mabiro yudo gweth mag ngima mochwere ma Pinyruodh Nyasaye biro kelo.

[Picha manie ite mar 12]

Dhano tara gi tara biro yudo gweth mar ngima mochwere e piny. Be inibed achiel kuomgi?