Ikpelaior Ia Zua a Averen sha Ikyev i Mtemtor u Iorov Kpuaa

HII sha ayange a mbaapostoli la je, Aôndo ngu tsuan asande a Mbakristu mba jighjigh ken uumace ér ve lu ônov nav. Mgem u ônov mba Aôndo mban ka u vesen, je yô, Mkaanem ma Aôndo yila mgem ve la ér ka m-mar u he. Awashima u m-mar u he ne yô, ka u wan mbatomov mba Aôndo mba i mar ve hegh la agoyol sha er vea za tema tor sha Tartor u sha la yô. (2 Timoteu 2:​12) Kpa cii man ve tema tor yô, gba u a nder ve shin ku, a na ve uma u za lun sha. (Mbaromanu 6: ​3-5) Ken Tartor u sha la, “vea tema tor sha tar” a Kristu imôngo.​—⁠Mpase 5:10; 11:⁠15.

Nahan kpa, Mkaanem ma Aôndo shi kaa ér uumace mbagenev mba i mar ve hegh ga la kpa, vea zua a injar i uma u tsôron. Ruamabera u ken Zwa Heberu man u ken Zwa Grika pase ér Aôndo wa ishima u yiman iniongoior  i hiar, ka nongo u kiriki ú mba vea za teman tor sha man nongo u vesen u mba vea lu shin tar sha ikyev i Tartor la. U tesen ikyav yô, nenge kwagh u apostoli Yohane yange nger hen mbananjighjigh a na imôngo, mba i mar ve hegh la. A ôr kwagh u Yesu a kaa ér: “Ka Un je A lu iwom i asorabo ase ye, man ka a ase [nongo u kiriki la] tseegh ga, kpa ka a tar cii [nongo u vesen la] je.”​—⁠1 Yohane 2:⁠2.

Apostoli Paulu kpa nger ér: “Akaa a i gbe a sha won cii [nongo u vesen la] nga veren ashe keghen mpase u á va pase ônov mba Aôndo [nongo u kiriki la] ken igbar la tsung je.” (Mbaromanu 8:​19-21) Se kav inja i mkaanem ma apostoli Yohane man apostoli Paulu ne nena? Se kav inja i ma sha gbenda ne: Mbara mba i mar ve hegh la vea tema tor ken gomoti u sha la. Vea za tema tor sha ci u nyi? Sha u vea va averen a tsôron sha ci u ior umiliôn imôngo mba vea lu sha tar, mba gomoti u Aôndo una hemen la. Ka nahan ve, Yesu yange tese mbahenen nav u eren msen nahan, ér: ‘Tartor Wou u̱ va, i̱ er ishima You shin tar kpaa vough er i eren i Sha nahan’ ye.​—⁠Mateu 6:⁠10.

Ruamabera u ken Zwa Heberu kpa ôr kwagh u myom u iniongo i ihiar ne. Ikyav i tesen yô, nenge kwagh u yange Aôndo ôr a Aberaham, un u Yesu due ken tsombor na la, ér: “Akuraior a sha won cii [nongo u vesen la] aa zua a iveren ken tsombor wou [nongo u kiriki la].” (Genese 22:18) Kwagh ne tese ér mimi je, lu u akuraior a sha tar cii aa zua a iveren ken “tsombor” u Aberaham.

Ka unô ve lu “tsombor” laa? Ka Yesu Kristu vea mba i mar ve hegh, Aôndo a lumun ve ve hingir ônov nav la. Apostoli Paulu pase ér: “Aluer ne mba kwagh u Kristu yô, ne mba tsombor u Aberaham je.” (Mbagalatia 3:​16, 29) Ka averen a nyi nahan akuraior a sha tar cii aa zua mi ken “tsombor” u Aberaham nee? Akuraior aa zua a ian i civirigh i mba Aôndo a lumun ve yô, shi vea lu uma gbem sha won ken paradiso sha tar. Orpasalmi Davidi tsengaôron ér: “Mbaperapera vea ya dyako u tar, vea lu ken u gbem.”​—⁠Pasalmi 37:29; Yesaia 45:18; Mpase 21:​1-5.

Mimi je, ian i teman tor sha la ngi sha ci u iorov kpuaa, kpa ikpelaior ia gema a zua a averen sha ikyev i mtemtor ve la, inja na yô vea lu uma gbem sha won shin tar shi uma u tsôron u a na ve la una va ve a akaa a dedoo agen kpaa. Yô, nôngo sha er we man tsombor wou ne lu ken mbara mba vea zua a averen a tsôron a Tartor u Aôndo u a va a mi la yô.

[Foto u sha peeji 12]

Ior umiliôn imôngo vea zua a uma u tsôron sha tar. We u fatyô u lun môm ken a ve kpa?