Ruta Bana Ba Gago

Joase o Tlogetše Jehofa ka Baka la Bagwera ba Babe

E BE e le nako e thata kua Jerusalema, e lego motse woo tempele ya Modimo e bego e le go wona. Kgoši Ahasia o be a sa tšwa go bolawa. Go thata go akanya ka seo mmago Ahasia, e lego Athalia, a se dirilego ka morago ga moo. O ile a dira gore barwa ba Ahasia—e lego ditlogolo tša gagwe—di bolawe! Na o tseba lebaka?— * E le gore yena e ka ba mmuši go e na le gore go buše yo mongwe wa bona.

Lega go le bjalo, yo mongwe wa ditlogolo tša Athalia, Joase yo monyenyane, o ile a phološwa gomme makgolo’agwe le go tseba o be a sa tsebe ka seo. Na o rata go tseba gore o phološitšwe bjang?— Go ba gona, ngwana yo o be a e-na le rakgadi’agwe yo a bitšwago Josabathe, yo a ilego a uta Joase ka tempeleng ya Modimo. O be a ka kgona go dira se ka gobane e be e le mosadi wa Moperisita yo a Phagamego Joyada. Ka gona, bobedi bja bona ba ile ba kgonthišetša gore Joase o dula a šireletšegile.

Joase o ile a utwa ka tempeleng nywaga e tshelelago. Ke gona moo mo a ilego a rutwa ka Jehofa Modimo le ka melao ya gagwe. Mafelelong, ge Joase a e-ba le nywaga e šupa, Joyada o ile a gata mogato wa go dira Joase kgoši. Na o ka rata go kwa kamoo Joyada a dirilego se ka gona le gore go diragetše’ng ka makgolo wa Joase, Kgošigadi Athalia yo kgopo?—

Joyada ka sephiring o ile a rapa baleta-kgoši ba kgethegilego bao dikgoši tša Jerusalema di bego di e-na le bona ka nako yeo. O ile a ba botša kamoo yena le mosadi wa gagwe ba phološitšego morwa yo e bego e sa le yo monyenyane wa Kgoši Ahasia ka gona. Ke moka Joyada o ile a tliša Joase go baleta-kgoši bao, bao ba ilego ba lemoga gore yo ke yena mmuši yo a swanetšego. Ka gona ba ile ba loga leano.

Joyada o ile a ntšha Joase gomme a mo rweša mphapahlogo. Ge a dira bjalo, batho “ba ôpa maxofsi ba re: A kxoši e phele!” Baleta-kgoši ba ile ba dikanetša Joase e le gore ba mo šireletše. Ke moka, ge Athalia a e-kwa mogoo wa lethabo, a tšwa gore a tlo ba thibela. Eupša ka taelo ya Joyada, baleta-kgoši ba ile ba bolaya Athalia.—2 Dikxoši 11:1-16.

Na o nagana gore Joase o ile a tšwela pele a theetša Joyada le go dira se se lokilego? — O ile a dira bjalo feela ge Joyada a be a sa phela. Joase o ile a ba a kgonthišetša gore batho ba neela tšhelete bakeng sa go lokiša tempele ya Modimo, yeo e bego e hlokomologilwe ke tatagwe, Ahasia le ke rakgolo’agwe Jorama. Eupša anke re boneng gore ke’ng seo se ilego sa direga ka morago ga gore Moperisita yo a Phagamego Joyada a hwe.—2 Dikxoši 12:1-16.

Ka nako yeo Joase o be a e-na le nywaga e 40. Go e na le go tšwela pele a dirišana le bao ba bego ba direla Jehofa, Joase o ile a gwerana le bao ba bego ba rapela medimo ya maaka. Sekaria morwa wa Joyada e be e le moperisita wa Jehofa ka nako yeo. O nagana gore Sekaria o ile a dira’ng ge a e-kwa ka dilo tše mpe tšeo Joase a bego a di dira?—

Sekaria o ile a botša Joase gore: “Xobane Le tloxetše Morêna, ’me le Yêna [o tla] Le tloxêla.” Mantšu ao a ile a befediša Joase moo a ilego a laela gore Sekaria a kgatlwe ka mafsika go fihlela a e-hwa. Akanya feela—Joase o be a phološitšwe go mmolai, eupša bjale yena ka noši o dirile gore Sekaria a bolawe!—2 Koronika 24:1-3, 15-22.

Na o kgona go bona dithuto tšeo re ka ithutago tšona go tšwa pegong ye?— Ee, ga re nyake go swana le Athalia, yoo a bego a e-na le lehloyo e bile e le yo sehlogo. Go e na le moo re swanetše go rata barapedi-gotee le rena gaešita le manaba a rena, bjalo ka ge Jesu a re rutile. (Mateo 5:44; Johane 13:34, 35) Gopola, ge e ba re thoma ka go dira se se lokilego go swana le ge Joase a dirile, re swanetše go tšwela pele re gwerana le bao ba ratago Jehofa le bao ba re kgothaletšago go mo hlankela.

[Mongwalo wa tlase]

Dipotšišo:

○ Joase o ile a phološwa bjang gona go mang?

○ Joase o ile a ba kgoši e swanetšego ka tsela efe gomme o ile a dira se se lokilego bjang?

○ Ke ka baka la’ng Joase a ile a fetoga motho yo mobe, gomme o bolaile mang?

○ Ke dithuto dife tšeo re ithutago tšona kanegelong ye ya Beibele?

[Seswantšho go letlakala 25]

Joase o ile a phološwa