MANADA gente el ta mira con el Trinidad como “el importante doctrina del Cristiano religion.” Asegun na ese enseñanza, el Tata, Anak y el sagrao espiritu amo tres persona na un Dios. Si Cardinal John O’Connor ya habla acerca na Trinidad: “Sabe kita que un bien grande misterio este que gendeh kita puede entende.” Porque bien dificil entende con el Trinidad?

El The Illustrated Bible Dictionary ya dale un razon. Acerca con el Trinidad, este publicacion ya admiti: “Gendeh este un doctrina que base na Biblia ciendo nuay texto el ta explica acerca con ese.” Cay el Trinidad ‘gendeh un doctrina que base na Biblia,’ el maga gente quien ta enseña con ese ta cambia con el cosa ta habla el Biblia para hace sale que dol ta suporta este con el diila enseñanza.

El un ejemplo del texto na Biblia que ya usa na gendeh justo manera amo el Juan 1:1. Na El Nuevo Testamento na Chavacano, ese versiculo ta habla: “Na principio amo el Palabra. El palabra talli junto con Dios [Griego, ton the·onʹ] y el Palabra amo el Dios [the·osʹ].” Este versiculo ta contene dos forma del Griego palabra the·osʹ (dios). El primero amo despues del palabra ton (el), un forma del Griego definite article y na este situacion el palabra the·onʹ ta refiri con el Dios Todopoderoso. Pero na ika-dos, el palabra the·osʹ nuay definite article. Ya ulvida lang ba pone con el definite article ton?

Ya escribi con el Evangelio de Juan na Koine o comon Griego que tiene maga especifico ley acerca na usada del definite article. El un Bible scholar que si A. T. Robertson ya habla que si el subject y predicate tiene maga article, “este dos ta refiri na un especifico cosa, ta trata como uno, igual y puede hace baliscat.” Como ejemplo, ya considera si Robertson con el Mateo 13:38 que ta habla: “El simentera [Griego, ho a·grosʹ] amo el mundo [Griego, ho koʹsmos].” El grammar de este ta hace kanaton entende que el mundo amo tambien el simentera.

Pero, paquemodo si el subject lang el tiene definite article pero el predicate nuay, igual na Juan 1:1? Cuando ya menciona le con ese versiculo como un ejemplo, el un scholar que si James Allen Hewett ya habla: “Na ansina construida de maga palabra, el subject y predicate diferente, gendeh igual, gendeh uno.”

Para ilustra, ya usa si Hewett con el 1 San Juan 1:5 que na New World Translation ta habla: “El Dios claridad.” Na Griego, el “Dios” amo ho the·os’ poreso tiene este definite article. Pero, nuay article antes el palabra phos para na “claridad.” Si Hewett ya habla: “El un persona . . . puede habla acerca con Dios que ele claridad; pero, gendeh puede habla que el claridad amo el Dios.” El maga semejante ejemplo puede incuntra na Juan 4:24, “el Dios Espiritu” y na 1 San Juan 4:16, “el Dios amor.” Na este maga versiculo, el subject tiene definite article pero el predicate, “Espiritu” y “amor,” nuay. Poreso, gendeh puede hace baliscat con el subject y predicate. Gendeh puede habla que “el Espiritu Dios” o “el amor Dios.”

Manada Griego scholar y translator de Biblia el ya habla que el Juan 1:1 gendeh ta hace claro si quien “el Palabra” sino si cosa clase le de persona. El un translator de Biblia que si William Barclay ya habla: “Cay [si apostol Juan] nuay pone definite article antes el theos, ya queda este un detalle . . . Nuay habla si Juan que el Palabra igual con Dios. Nuay le habla que Dios si Jesus.” El un scholar que si Jason David BeDuhn ya habla tambien: “Na Griego, si gendeh tu pone article antes el theos na un sentence igual na Juan 1:1c, hay pensa el maga quien ta le que este ‘un dios.’ . . . El palabra theos diferente na ho theos, igual si paquemodo diferente el ‘un dios’ na ‘Dios.’” Si BeDuhn ya omenta: “Na Juan 1:1, el Palabra gendeh amo el solamente Dios sino un dios o un espiritu igual con Dios.” O asegun con Joseph Henry Thayer, uno del maga scholar quien ya hace con el American Standard Version: “El Logos [o Palabra] amo un espiritu igual con Dios y gendeh el Dios mismo.”

El Dios ba “un bien grande misterio”? Gendeh para con Jesus. Na de suyu rezo para con el de suyu Tata, ya hace claro si Jesus con el diferencia entre con ele y con el de suyu Tata cuando ya habla le: “Este amo el Vida hasta para cuando: Que ay conoce sila con Uste, el unico y deverasan Dios, y que ay conoce tamen sila con Jesus, el Cristo, con quien Uste ya imvia.” (Juan 17:3) Si ta creé kita con Jesus y ta entende con el simple enseñanza na Biblia, hay mira kita con ele como el Anak del Dios. Hay adora tambien kita con Jehova como “el unico y deverasan Dios.”