HETA hénte heʼi “pe Trinidad iñimportantetereiha kristianokuérape g̃uarã”. Trinidad ningo heʼise Túva, Taʼýra ha espíritu sánto peteĩnteha ha mbohapyvéva haʼeha peteĩ Ñandejára. Pe Cardenal John OʼConnor heʼi ko mbaʼére: “Pe Trinidad ningo ijetuʼueterei ha arakaʼeve nañantendemoʼãi”. Mbaʼérepa hasyete oñentende hag̃ua ko mbaʼe?

Pe Diccionario crítico de Teología ohechauka mbaʼérepa. Upéva heʼi: “La Biblia noñeʼẽi Trinidad rehe mamove hendápe”. Upéicha rupi oĩ heta oñehaʼãmbaitéva otopa téysto ikatúva oiporu karẽ ohechauka hag̃ua pe Trinidad añeteha.

Peteĩ téysto ojeporu vaíva jepi ningo Juan 1:1. Pe biblia Jesucristo Marandu Porã heʼi: “Iñepyrũmbýpe upe Ñeʼẽ oĩmavaʼekue ha pe Ñeʼẽ oĩ Ñandejára ndive ha pe Ñeʼẽ Ñandejára voi”. Ko téystope dos vése ojeporu pe ñeʼẽ griégo theós ojetradusíva “ñandejára”. Pe primérope ojehai ton theón, ha griégope oñemoĩvo pe palávra ton oñeñeʼẽhína Ñandejára ipuʼakapávare. Pe segúndope noñemoĩvéima pe palávra ton, ojehaíntema theós. Oime piko hesaráinteraʼe umi ohaíva ha upévare nomoĩmbái?

Juan ningo ohaivaʼekue ikuatiañeʼẽ umi hénte oñeʼẽhaichaite (griégo koiné). Pe mboʼehára Archibald Thomas Robertson heʼi “griégope ojehaiha japilla hag̃uáicha mbaʼe rehépa oñeñeʼẽ ha idiferéntepa ojuehegui”.  Ko karai imanduʼa Mateo 13:​38-re, [ÑÑB] heʼihápe: “Pe kokue ningo hína ko múndo”. Griégope kokue ojehai ho agrós ha múndo katu ho kósmos. Mokõive hendápe ojeporu pe palávra ho ha upéicha ñantende ko téystope kokue ha múndo heʼiseha peteĩ mbaʼénte.

Péro mbaʼéichapa ñantendevaʼerã Juan 1:1 heʼíva? Pe mboʼehára James Allen Hewett heʼi ko téystore: “Jepe Juan 1:​1-pe ojeporu dos vése pe ñeʼẽ ‘ñandejára’, idiferénte pe ojehai lája ha upéicha jahecha mokõivéva idiferenteha ojuehegui, ha ni mbaʼeveichavérõ ndaikatúi jaʼe mokõivéva peteĩnteha”.

Ñantendeve hag̃ua ko mbaʼe Hewett imanduʼa 1 Juan 1:​5-re, [JMP] heʼihápe: ‘Ñandejára ningo pe lús’. Griégo ñeʼẽme ko téystope ‘Ñandejára’ ojehai ho theós, péro ‘lús’ ojehai fos ha noñemoĩri henondépe pe palávra ho. Mbaʼépa ohechauka upéva? Dón Hewett heʼi: “Ikatúramo jepe jaʼe ‘Ñandejára ningo pe lús’, ndaikatúi jaʼe ‘pe lús haʼe Ñandejára’. Mokõivéva idiferénte ojuehegui”. Ambue ehémplo jatopa Juan 4:​24-pe [BNP]: “Ñandejára niko espíritu”, ha 1 Juan 4:​16-pe: ‘Ñandejára hína mborayhu’. Griégope ndaikatúi jaʼe ‘espíritu niko Ñandejára’, ha ‘mborayhu hína Ñandejára’. Péicha jahecha idiferenteha ojuehegui.

Heta mboʼehára ha traduktór heʼi Juan 1:1 nomombeʼuiha ñandéve mávapa “pe Ñeʼẽ”; ohechaukánte guei mbaʼeichaguápa. Pe lívro Comentario al Nuevo Testamento ohaivaʼekue William Barclay heʼi: “Umi ñeʼẽ oiporuvaʼekue apóstol Juan ohechauka porãiterei mbaʼépa la ontendekaséva ñandéve. Juan ndeʼirihína Jesús haʼeha Ñandejára, heʼi guei Jesús haʼeha Ñandejaraichagua”. Upéicha avei pe mboʼehára Jason David BeDuhn heʼi: “Griégope oñemoĩ jave pe ñeʼẽ theós umi oleéva ontende oñeñeʼẽha ‘peteĩ ñandejárare’. Oñemoĩvo ho theós katu oñeñeʼẽ Ñandejára ipuʼakapávare”. BeDuhn heʼive: “Juan 1:​1-pe ‘pe Ñeʼẽ’ ndahaʼéi Ñandejára ipuʼakapáva; haʼe guei peteĩ Ñandejaraichagua”. Joseph Henry Trayer, oipytyvõvaʼekue ojetradusi hag̃ua pe biblia American Standard Version heʼi avei: “Pe Ñeʼẽ ningo Ñandejaraichagua, ndahaʼéi Ñandejára Ipuʼakapáva”.

Ikatúpa jaʼe upéicharõ avave ndaikatumoʼãiha oikuaa Ñandejárape? Jesús ndeʼiriete upéva. Peteĩ jey haʼe oñemboʼe itúvape ha ohechauka mokõivéva idiferenteha ojuehegui. Jesús heʼi: “Ha upe jeikove opaʼỹva niko kóva: Tandekuaa ndéve [Ñandejára] añete ha peteĩetéva, ha Jesucrístope, upe nde rembouvaʼekue” (Juan 17:3). Ñantendéramo koʼã mbaʼe hesakã porãta ñandéve jarrespetavaʼerãha Jesúspe haʼégui Ñandejára raʼy. Haʼe ningo hína Ñandejaraichagua. Avei jaadoráta Jehovápe añoite, haʼégui ‘Ñandejára añete ha peteĩetéva’.