БУТ мануша гиндон, кай «ӷлавно, сости сытярэн и христиански веры» када Троица. Кодэла, ко патян андэ Троица, ԥэнэн, кай о Дад, Шаво и о Свынто духо када трин разни личности, но вмести вонэ ек Дэл. Католическо рашай Джоно О’Конноро ԥэндя: «Амэ ӷанас, кай када бари тайна и амэнди инке на дино ла тэ полас». Васо кадя ԥарэс тэ полас, со када Троица?

Пала ек причина пистромэ андэ «Иллюстрированно библейско словарё». Котэ ԥэнэнпэ: «Кадэлэсти на сытярэл и Библия, важ кода кай никай андэр латэ на росԥэнэнпэ пала Троица» (The Illustrated Bible Dictionary). Но всаек, кодэла, ко патян андэ Троица вся и время старыинпэ тэ виарақэн стихоря андэ Библия, кай тэ доԥэнэн пала Троица. Вонэ дажэ парувэн дэсавэ стихоря.

Ек библейско стихо, саво часто полэн нэправильно, када Иоанна 1:1. Андо Синодально переводо во пистромэ кадя: «Спэрва сас Алав, и Алав сас лэ Дэвлэстэ [ӷреческо тон тео́н], и о Алав сас о Дэл [тео́с]». Андэ кадэва стихо пистромэ дуй формы кай о ӷреческо алав тео́с («дэл»). Англа алав тео́н пистромэ алав тон, кай тердёл определённо артиклё, важ када алав тео́н пистромэ каринг о Всемоӷущё Дэл. Англа алав тео́с нинай артиклё. Сас када ошыбка, кай лэс промэклэ?

И Евангелия лэ Иоанностар сас пистромэ пэ шыб койна, када общеӷреческо шыб. Андэр латэ сас точни правила, ка́й трэбуй тэ стон определённо артиклё. Сар ԥэндя ек библеисто Арчибальдо Робертсоно, если англа подлежащё и именной частью сказуемого (када, кала сказуемо андэ предложэния сыквэл существительно или прилагательно), тердён артикли, тоди кадэла алава андэ предложэния «еқэндар андэ вся, одинакови, и моӷут тэ парувэн ек еқэс». Кай тэ доԥэнэн када во призындярэл о стихо анда Матфея 13:38. Котэ пистромэ: «Мал [ӷреческо о агро́с] када люма [ӷреческо о ко́смос]». Англа алава «мал» и «люма» тердён артикли о. Кадэла правила андэ грамматика сыкавэн, кай и мал и люма када ек.

Но со, если англа подлежащё тердёл апределённо артиклё, ай англа сказуемо на тердёл, сар андэ Иоанна 1:1? О Джеймсо Хьюетто шол сама пэ кадэва стихо и ԥэнэн: «Андэ кацави предложения о подлежаще и сказуемо най еқэндар и машкар лэндэ на стоса знако равно или инке варисар па аврятэ лэн тэ сыстос».

Кай тэ сыстой када о Хьюетто призындярэл о стихо анда 1 Иоанна 1:5: «О Дэл исин вудуд». Катэ андэ ӷреческо шыб «Дэл» када о тео́с, то есть теос и о определённо артиклё о. Но англа алав фос («вудуд») нинай артиклё. О Хьюетто ԥэнэн пала када: «Пала Дэл всегда можно тэ ԥэнас, кай Во када вудуд, но най вся и время о вудуд када Дэл». Кадяжэ и андэ Иоанна 4:24 («О Дэл исин Духо») и 1 Иоанна 4:16 («О Дэл исин любовь»). Андэ кадэла стихоря англа подлежащё «Дэл» тердёл определённо артиклё, ай англа сказуеми «На дицол» и «Любовь» и артикли нинай. Катэ подлежащё и именная часть сказуемого на парувэн ек еқэс. Важ када, если тэ пэрэԥэнас па аврятэ кадэла стихоря «О Духо исин Дэл» и «Любовь исин Дэл» на сыкавэла кодэва жэ гиндо.

Бут библейски переводчикоря и учони, савэ розлэнпэ андэ древнеӷреческо шыб, гиндон, кай андэ 1 Иоанна 1:1 ԥэнэнпэ пала кода, саво «Алав», ай най ко во. О переводчико Уильямо Баркли ԥэнэн: «Важ кода кай [о апостоло Иоанно] на стодя каринг о алав теос определённо артиклё, када тоди сыкавэл, саво «о Алав». О апостоло Иоанно на ԥэнэнас, кай о Иисусо и о Дэл када ек». Пала када жэ ԥэндя и о учоно Джейсон Бедун: «Если англа ӷреческо алав теос на тердёл артиклё, сар например андэ Иоанна 1:1, о мануш сразу полэл, кай и дума жал пала «дэл» в общем». Андэ русско шыб исин артиклё чи най англа алав теос сыкавэл бари буква (Дэл) или цыкнёры (дэл). Тоди о учоно ԥэнэн: «Андэ Иоанна 1:1 о Алав када най Всемоӷущё Дэл, ай о «дэл» в общем, или кодэва, ко шолпэ по Дэл». Ек учоно, Джозефо Тайеро, саво терэлас «Американско стандартно переводо», росԥэндя кадэва стихо кадя: «Логос [или Алав] шоласпэ по Дэл, но на сас Дэл».

Па чачимастэ о вопросо, ко када Дэл «фартэ гарадо лэ манушэндар»? О Иисусо кадя на гиндояс. Кала во мангэласпэ каринг о Дэл, во сыкадя сави разница лэндэ лэ Дэвлэса: «Кай тэ авэл вечно жызня, трэбуй тэ уӷанэн тут, еқэ чачунэ Дэвлэс, и лэ Иисусос Христос, савэс ту бишалдян» (Иоанна 17:3). Если амэ патяс лэ Иисусостирэ алавэнди и полас кадэва библейско чачимос, саво драго дицол, тоди ласа тэ диқас по Иисусо, сар пэ кодэва, ко во па чачимастэ. Кай во када лэ Дэвлэско Шаво. Ай лэ Иеговас амэ лэса тэ полас, сар «еқэ чачунэ Дэвлэс».