Ababelenga Ino Magazini Balepusha Ukuti

Bushe Ifitucitikila Fyalilembelwa Libela?

Abantu bamo batila inshita yesu iya kufwa yalitantikilwa libela. Bambi nabo batila Lesa umwine alitubikila bonse inshita ya kufwa. Te apo peka iyo, balanda no kuti tapaba ico twingacita pa fintu fikalamba ifitucitikila mu bumi. Bushe na imwe e fyo mwaishiba?

Nalimo kuti cawama ukuti muipushe aya mepusho: ‘Nga ca kuti cine cine tapaba ico twingacita pa kuti ifintu fimo filatucitikila mu bumi, nga ca kuti na Lesa alitantikila libela ifitucitikila, ninshi mulandu nshi tupepela kuli Lesa? Kabili nga ca kuti ifitucitikila fyalilembelwa libela, mulandu nshi tuicingilila ku fintu ifingi muno calo? Mulandu nshi kwabela ifipatala na badokota? Kabili mulandu nshi tunwena umuti nga twalwala?’

Baibolo tailanda ukuti tufwile ukuilekelesha iyo. Amafunde ya mu Baibolo tayaebele abena Israele ukuti ifyalebacitikila fyonse fyalitantikilwe libela, lelo yatile balingile ukuicingilila. Abena Israele babebele ukuti balingile ukukuula icibumba iciipi ukushinguluka mu mbali ya mitenge yabo iyali iyabatama. Balecita ifi pa kuti umuntu nangu umo epona ukufuma pa mutenge. Nomba, batini Lesa nga alitantikila libela ukuti umuntu akapona pa mutenge no kufwa, cinshi engabikilako ifunde lya kumucingilila ukuti epona?—Amalango 22:8.

Nomba nga balya abafwa ku masanso yabako pamo nga ifinkukuma, utulumba nelyo ifintu fimbi ifyo bashakwata na maka ya kuicingililako? Bushe kuti twatila ubushiku bwabo ubwa kufwilapo bwalitantikilwe libela? Awe, pantu Imfumu Solomone iyalembeleko Baibolo yatile “inshita ya macushi ne nshita ya fintu fyabula ukwenekela ifikila fye umuntu uuli onse.” (Lukala Milandu 9:11) Kanshi icacitika nangu catupapusha sana ica kuti catuponya na pa musao, te kutila ninshi calilembelwe ukuti e fyo cikaba iyo.

Nomba bamo bamona kwati aya mashiwi yalapinkana na yo Solomone abalilepo ukulanda aya kuti: “Icintu conse calikwata inshita ya ciko, kwaba ne nshita ku mulandu onse mwi samba lya muulu, kwaliba inshita ya kufyalwa ne nshita ya kufwa.” (Lukala Milandu 3:1, 2) Lelo bushe cine cine Solomone aloseshe mu kuti ifintu ifitucitikila fyalitantikilwa libela? Lekeni tumfwikishe bwino bwino umwalola aya mashiwi.

Solomone talepilibula ukuti inshita ya kufyalwa nelyo iya kufwa fyonse fyalitantikilwa libela. Ico alelandapo ca kuti ukufyalwa no kufwa, nga filya fine ne fintu fimbi mu bumi fyaba, e ko fyaba kabili tafipwa. Na cine ifitucitikila fingi, fimo ifisuma fimbi na fyo fibi. Solomone atile, “Kwaba . . . inshita ya kuloosha ne nshita ya kusansamuka.” Atulanga ukuti ifya musango yu filacitika cila nshita mu bumi, kabili ifyabipa ifyo tushishiba na lintu fyalacitika, fyaliseeka mu mikalile yesu, pano pene ‘pe samba lya muulu.’ (Lukala Milandu 3:1-8; 9:11, 12) Amashiwi alandile pa kulekelesha ya kuti tatufwile ukupoosa amano yonse ku fya mu calo ifyo tucita cila bushiku ica kuti twalaba na kuli Kabumba wesu.—Lukala Milandu 12:1, 13.

Nangu ca kuti Kabumba wesu alishiba bwino bwino ifyo ubumi ne mfwa fyaba, tatantikila libela ifikatucitikila ku ntanshi. Baibolo itusambilisha ukutila Lesa alitupeela bonse ishuko lya kuti tukekale umuyayaya. Nomba, Lesa tatupatikisha ukuti tusale umweo wa muyayaya. Lelo Icebo ca kwe citila: “Onse uulefwaya anwepo amenshi ya mweo aya bupe fye.”—Ukusokolola 22:17.

Cine cine, fwe bene tufwile ukufwaisha ‘ukunwapo amenshi ya mweo.’ Kanshi ifikatucitikila ku ntanshi tafyalembelwa libela iyo. Ifyo tucita ino nshita ne fyo tutontonkanyapo, fyalikuma sana ifyo ubumi bwesu bukaba ku ntanshi.