Oñeporandúva jepi

Ikatúpa jaʼe ñamanoha ‘og̃uahẽ rupi ñande óra’?

Oĩ heta ogueroviáva jarekoha peteĩ óra ñamano hag̃ua. Upévape ohenói hikuái ‘ñane destíno’. Ambue tapicha katu heʼi: “Mbaʼe piko jajapóta, Ñandejára ñanerenói vove ningo jahamantevaʼerã”. Koʼã hénte heʼi ndaikatuiha jajoko térã ñakambia umi mbaʼe ojehútava ñandéve. Ndépa mbaʼe ere?

Ñapensamína sapyʼaite koʼã mbaʼére: ‘Oiméramo ndaikatuvéima ñakambia ojehútava ñandéve, maʼerãpa ñañemboʼéta Ñandejárape? Maʼerã piko ñañangarekóta ñandejehe? Maʼerãpa ñamoĩta sinturón de segurida jaha jave ñane mbaʼyrúpe? Maʼerã piko ñañatendéta ani hag̃ua jaʼu vevída ñamaneha mboyve?’.

La Biblia heʼi ivaiha ñanderekotarova ha nañañatendéi ñandejehe. Yma Israélpe umi hénte nopensái omanotaha ág̃a hiʼóra og̃uahẽ vovénte. Oñehaʼã guei oñangareko ijehe. Pór ehémplo Ñandejára Léi heʼi chupekuéra orekóramo terrása, omoĩvaʼerãha peteĩ tápia ani hag̃ua oĩ hoʼáva upégui. Oiméramo añete Ñandejára omoĩmbáma ñandéve óra ñamano hag̃ua, maʼerã piko omeʼẽta ko léi? (Deuteronomio 22:8.)

Ha mbaʼépa ikatu jaʼe umi omanóvare oiko jave yvyryrýi, térã torménta vai? Ikatúpa jaʼe “og̃uahẽnte hague chupekuéra hiʼóra”? Nahániri. Rréi Salomón heʼivaʼekue opavavépe ñanderupytyha umi mbaʼe ñahaʼarõʼỹva (Eclesiastés 9:11). Oikóramo jepe peteĩ mbaʼe vai ñaimoʼãʼỹva, ndaikatúi jaʼe haʼeha ñane destíno térã Ñandejára odesidi hague upéva oikotaha ñanderehe.

Upéicharamo jepe oĩ oimoʼãva Salomón oñeʼẽ hague ñane destínore heʼírõ guare: “Ko arapýpe opa mbaʼe hiʼára; opa mbaʼe oikóvape g̃uarã oime hiʼára: Ára oñenase hag̃ua ha ára oñemano hag̃ua” (Eclesiastés 3:​1, 2). Heʼiséparaʼe Salomón oĩmbamaha voi arakaʼépa ñanaséta ha arakaʼépa ñamanóta? Jahechamína.

Ko téystope Salomón oñeʼẽ yvyporakuéra rekovére, mbaʼéichapa ára ha ára jahasa heta mbaʼére. Pór ehémplo káda día oĩ heta onaséva ha omanóva. Avei oĩ ára javyʼaha ha oĩ ára ñañembyasyha. Heʼiháicha la Biblia: ‘Oĩ ára japuka hag̃ua, ha ára ñanerasẽ hag̃ua’. Salomón ohechaukánte “ko arapýpe” jahasaha heta mbaʼe iporã ha ivaívare (Eclesiastés 3:​1-8; 9:​11, 12). Upévare heʼi naiporãiha jajepyʼapyeterei umi mbaʼe ojehúvare ñandéve káda día. Iporãve guei ñanemanduʼa ñande Apoharére (Eclesiastés 12:​1, 13).

Ñandejára oikuaa porãramo jepe mbaʼéichapa jaikove ha ñamano, haʼe ndodesidíri mbaʼépa oikóta ñanderehe ha arakaʼépa ñamanóta. La Biblia heʼi Ñandejára oipotaha ñaneñeʼẽrendu chupe ikatu hag̃uáicha jaikove opa árare. Péro nañandejopýi jajapo hag̃ua upéva. Upéva rangue Iñeʼẽ heʼi: “Pe ijyʼuhéi ha hoyʼuséva, tou ha toyʼu pe jeikove rehegua ýgui” (Apocalipsis 22:17).

Koʼápe heʼi porã jayʼuséramo jayʼuvaʼerãha “jeikove rehegua ýgui”. Upéicharõ ndaikatúi jaʼe ‘el destíno cheovliga’. Umi mbaʼe ñapensáva ha jajapóvare odepende ñasẽ porã térã ñasẽ vaítapa.