Ua Fesili Mai le ʻAufaitau

Po ua Uma Ona Tuupōina lo Tatou Iʻuga?

O loo fai mai nisi tagata ua uma ona tuupōina lo tatou iʻuga. Ua faapea mai nisi e filifili e le Atua le taimi e tatou te feoti ai. E lē gata i lenā, ua latou faapea mai e lē toe iai se mea e mafai ona tatou fai i mea e tutupu i le olaga auā ua uma ona tuupōina. Po o lou taofi lenā e faatatau i lea mataupu?

E te ono fesili ifo iā te oe lava e faapea: ‘Pe afai e moni e lē mafai ona tatou suia lo tatou iʻuga ona o lea ua tuupōina e le Atua, aiseā la e faalaeiauina ai i tatou ia tatalo? Pe afai foʻi ua tuupōina lo tatou iʻuga, aiseā la e tatou te mananaʻo ai e puipui i tatou? Aiseā e manaʻomia ai fua ona fusi le fusipaʻu pe a alu i se taavale? Pe afai o le tulaga lenā, aiseā la e lē tatau ai ona ave le taavale pe a onā?

E lē o manatu māmā le Tusi Paia i lenei manatu tuulafoaʻi, o le lē ano lea o se tasi i lona saogalemu. Nai lo le faapea mai o mea uma ua tuupōina lo latou iʻuga, na faatonuina i le Tusi Paia tagata Isaraelu ia manatu mamafa mo le saogalemu. O se faataʻitaʻiga, na faatonuina i latou ia fai se puipui e siʻo ai luga o taualuga mafolafola o o latou fale. O le fuafuaga, ina ia puipuia ai se tasi neʻi paʻū ifo mai le taualuga. Aiseā la na avatu ai e le Atua lenā faatonuga, pe ana faapea ua tuupōina se tagata e paʻū mai i luga o le fale ma oti ai?—Teuteronome 22:8.

Ae faapefea i latou na maliliu i mala faalenatura, ma isi mea mataʻutia na tutupu e lē mafai ona latou taofia? Po ua uma ona tuupōina le aso e latou te maliliu ai? E leai, o loo faamautinoa mai e le tupu o Solomona “o le tausaga ma le mea e tupu ai e oo iā te i [tatou] uma.” (Failauga 9:11) O lea la, e tusa lava pe tulaga ese ma mataʻutia mea o loo tutupu, e lē faapea ai o ni mea ua uma ona tuupōina.

Peitaʻi, ua manatu nisi ua feteenaʻi lenei faamatalaga ma le mea na taʻua muamua e Solomona e faapea: “O le mea ma lona tausaga i mea uma, ma ona lava pō i mea uma lava i lalo o le lagi; o ona pō e fanau mai ai, ma ona pō e oti ai.” (Failauga 3:1, 2) Ae pe sa ioeina e Solomona le manatu e lē mafai ona taofia mea ua tuupōina? Seʻi o tatou iloiloina le uiga moni o na upu.

E lē o faapea mai Solomona ua tuupōina le taimi e fananau mai ai ma le taimi e feoti ai. Peitaʻi, na uiga atu lana faamatalaga o le taimi e fanau ma oti ai, o se faasologa e faifai pea, e pei lava o le tele o mea masani o le olaga. E mautinoa e iai taimi e lelei ai ma taimi faalēlelei o le olaga. Ua taʻua e Solomona e faapea, “O ona pō e tagi ai, ma ona pō e ʻataʻata ai.” Ua taʻua e Solomona o na faasologa faifai pea ma mala e tutupu faafuaseʻi, o ni mea masani o le olaga “i mea uma lava i lalo o le lagi.” (Failauga 3:1-8; 9:11, 12) O lea la, i ana upu faaiʻu, na ia taʻua ai ia aua neʻi o tatou pisi tele i mea masani o le olaga ae galo ai Lē na faia i tatou.—Failauga 12:1, 13.

E ui lava ua malamalama lelei Lē na faia i tatou i le ola ma le oti, ae e na te lē aumai faamalosi se iʻuga mo i tatou. O loo aʻoaʻo i le Tusi Paia e faapea e tuuina mai e le Atua le faamoemoe o le ola e faavavau mo i tatou uma lava. Ae e lē o faamalosia e le Atua i tatou ina ia talia lenā faamoemoe. Nai lo lea, o loo taʻua i lana Afioga e faapea: “[O] so o se tasi e manaʻo i ai, ia ave fua le vai o le ola.”—Faaaliga 22:17.

Ioe, e tatau ona tatou mananaʻo e “ave . . . le vai o le ola.” O le mea lenā e iloa ai e lē o tuupōina lo tatou lumanaʻi. E faalagolago lo tatou lumanaʻi i a tatou lava faaiʻuga e fai, o o tatou uiga faapea ma a tatou gaoioiga.