Vaticanoqa, runas Diospa sutinta mana uqharinankuta munanchu

CATÓLICA religionta kamachiqkunaqa, Diospa sutin misaspi uqharikunanta mana munankuchu. Chayrayku qayna wata Papa Benedicto nisqa, tukuy sacerdotesman juk cartata apachikunanta kamachisqa.

Chay cartaqa, 2008 watapi junio killamanta 29 pʼunchayninpi qillqakurqa, chay cartaniqtataq sacerdotesman jinata nisqanku: “Israel llaqtap Diosninpa sutinta kay pasaq wataspi sapa misapi uqharichkasqaykichikta yachayku, mana uqharinaykichikta ñawpaqta kamachiptiykupis. Kay sutiqa Santo tetragrammaton nisqa sutiwan riqsikun, hebreo qallupi tawa letrasllawan, nisunman YHWH (יהוה) letrasllawan qillqakusqanrayku”. Chantapis wakinkuna Diospa sutinta “Yahweh”, “Yahwè”, “Jahweh”, “Jahwè”, “Jave”, “Yehovah” ima nisqaman tikrachillasqankutataq nisqanku. * Kay cartawanqa, católica religionta kamachiqkunaqa, misaspi Diospa sutinpa cuentanmanta “Señor” nisqa rimaylla uqharikunanta munanku, imaynatachus ñawpaqta misaspi uqharikuq ajinata. Chantapis misasta ruwachkaptinku, mañakuchkaptinku, Diosman takichkaptinku ima, Diospa sutin (YHWH) “mana uqharikunanta” kamachillasqankutaq.

Imaraykuchus chayta kamachisqankuta sutʼinchanankupaqqa, “unaymantapacha católica iglesiapi ajinatapuni” ruwakusqanta nisqanku. Chantapis kay Septuaginta nisqamanta Hebreo Qillqakunapi, niraq cristianos rikhurichkaptinku, Diospa sutinpa cuentanmanta Kýrios nisqa rimay, nisunman “Señor” nisqa rimay churakusqantaña nisqanku. Chayrayku “ñawpaqmantapacha cristianos [...] Diospa sutinta tetragrammaton nisqata ni jaykʼaq uqharisqankuta” nillasqankutaq. Chaywanpis kay Septuaginta nisqamanta unay qillqakunapi, Diospa sutinqa YHWH (יהוה) letraswan rikhurin, manataq Kýrios rimaywanchu. Kaytaq, ñawpa cristianos, Diospa sutinta riqsisqankuta, uqharisqankutataq rikuchiwanchik. Jesuspis, Tatanmanta mañakuchkaspa jinata nirqa: “Paykunaman sutiykita rejsicherqani”, nispa (Juan 17:26). Chantá mañakuyta yachachichkaspapis jinata nirqa: “Janaj pachapi kashaj Tatayku, sutiyki jatunchasqa kachun”, nispa (Mateo 6:9).

Chiqamanta nisunman, Vaticano nisqa, Diospa sutin mana uqharikunanta munasqanqa, Jehová Diosta mana jatunchasqanta. Mana chaymanjinataq chiqa cristianosqa, Diospa sutin jatunchasqa kananta munanku, imaraykuchus Jehová nirqa: “Kay suteyqa wiñaypaj kay sutiwantaj rejsisqa kasaj wiñaypa wiñaynintimpaj”, nispa (Éxodo 3:15).

[Sutʼinchaynin]

[30 paginapi sutʼinchaynin]

“Kay suteyqa wiñaypaj.” (Éxodo 3:15)

[30 paginapi dibujo/foto]

Ñawpaq kaq siglomanta Septuaginta nisqamanta juk chhikan qillqapiqa, Diospa sutin hebreo qallupi tawa letrasllawan (YHWH) qillqasqa rikhurin

[Maymantachus foto urqhukusqan]

Por gentileza de Egypt Exploration Society