Vatican e Leka ho Etsa Hore Lebitso la Molimo le se ke la Sebelisoa

SEHLOPHA se phahameng se busang Kerekeng e K’hatholike se leka ho etsa hore lebitso la Molimo le se ke la sebelisoa litšebeletsong tsa kereke ea habo sona. Selemong se fetileng, Phutheho ea Vatican ea ho Rapela Molimo le ho Fana ka Melao e Tsamaisang Litšebeletso Tsa Kereke e ile ea ntša litaelo tse eang libokeng tsa babishopo ba K’hatholike tse neng li tšoeroe lefatšeng ka bophara mabapi le taba ena. Khato eo e ne e nkiloe ka “taelo” ea mopapa.

Tokomane ena e ngotsoeng ka la 29 June, 2008, e nyatsa ka matla taba ea hore ho sa tsotellehe litaelo tse thibelang seo, “lilemong tsa morao tjena ho na le mokhoa o khukhunetseng ka kerekeng oa ho bitsa lebitso la Molimo oa Iseraele, le tsejoang e le tetragrammaton e halalelang, e ngoloang ka litlhaku tse ’nè tsa Seheberu e le יהוה, YHWH.” Tokomane eo e bolela hore lebitso la Molimo le ’nile la fetoleloa ka litsela tse sa tšoaneng e le “Yahweh,” “Yahwè,” “Jahweh,” “Jahwè,” “Jave,” “Yehovah” le a mang a joalo. * Leha ho le joalo, tokomane ena ea Vatican e re ho tsosolosoe mokhoa o tloaelehileng oa K’hatholike. Ha e le hantle, seo se bolela hore Litlhaku Tse ’Nè Tsa Seheberu Tse Emelang Lebitso la Molimo li nkeloe sebaka ke “Morena.” Ho feta moo, lebitso la Molimo, e leng “YHWH, ha lea lokela ho sebelisoa kapa ho bitsoa” litšebeletsong tsa Kereke e K’hatholike, lifeleng tsa eona le lithapelong tsa eona.

E le ho tšehetsa taba ena, tokomane ena ea Vatican e bua ka “mokhoa o tloaelehileng” oa K’hatholike. E bontša hore esita le phetolelo ea Septuagint ea Mangolo a Seheberu, e ngotsoeng pele ho mehla ea Bokreste, kamehla e ne e fetolela lebitso la Molimo e le Kyʹri·os, e bolelang “Morena” ka Segerike. Ka hona, e tsitlella hore “esita le Bakreste ba pele ha ho mohla ba neng ba bitsa litlhaku tse ’nè tsa Seheberu tse emelang lebitso la Molimo.” Leha ho le joalo, ba bolelang sena ba iphapanyetsa bopaki bo hlakileng tabeng ena. Libuka tsa boholo-holo tsa Septuagint li na le lebitso la Molimo יהוה, eseng Kyʹri·os. Balateli ba Kreste ba lekholong la pele la lilemo ba ne ba tseba lebitso la Molimo ebile ba ne ba le bitsa. Jesu ka boeena o ile a re ha a rapela Ntate oa hae: “Ke ba tsebisitse lebitso la hao.” (Johanne 17:26) Hape thapelong ea hae ea mohlala e tsebahalang, Jesu o ile a re ruta hore ha re rapela re re: “Ntat’a rōna ea maholimong, lebitso la hao le ke le halaletsoe.”—Matheu 6:9.

Mokreste e mong le e mong o lokela ho labalabela hore lebitso la Molimo le halaletsoe. Boiteko ba Vatican ba ho etsa hore lebitso la Molimo le se ke la hlola le sebelisoa ke ntho e hlomphollang Jehova, ea ileng a re: “Lena ke lebitso la ka kamehla eohle; meloko eohle e tlang e tla ipiletsa ho ’na ka lebitso lena.”—Exoda 3:15, The Jerusalem Bible.

[Mongolo o botlaaseng ba leqephe]

[Ntlha e Qolotsoeng e leqepheng la 30]

“Lena ke lebitso la ka kamehla eohle.”—Exoda 3:15, JB

[Setšoantšo se leqepheng la 30]

Sekhechana sa “Septuagint” sa lekholong la pele la lilemo C.E. Lebitso la Molimo, le emeloang ke litlhaku tse ’nè tsa Seheberu, leo hangata le ngoloang e le YHWH, ke lona le etselitsoeng selika-likoe

[Tlhaloso ea Moo Setšoantšo se Nkiloeng Teng]

Courtesy of the Egypt Exploration Society