Kreasyon i revel lasazes Zeova

“Son bann kalite envizib . . . in ganny revele par bann keksoz ki in fer.”—ROM. 1:20.

1. Ki lenfliyans sa bann ki swadizan saz dan sa lemonn in annan lo bokou dimoun ozordi?

DAPRE bann dimoun dan lemonn, en dimoun ki saz oubyen malen, i en dimoun ki annan en kantite konnesans. Me eski zot vreman saz? Zot pa saz ditou. Nou dir sa akoz sa bann swadizan malen, zot pa ni kapab donn dimoun bon gidans ki pou ed zot ganny vre boner dan lavi. Parkont, sa bann ki les sa bann dimoun enfliyans zot, finalman zot “ganny trennen par laroul, e pouse partou par nenport divan lansennyman.”—Efe. 4:14.

2, 3. (a) Akoz ‘selman’ Zeova ki “posed lasazes”? (b) Ki mannyer lasazes Bondye i diferan avek lasazes lemonn?

² Pa sa i vreman diferan konpare avek sa bann ki annan sa vre lasazes, sa lasazes ki sorti kot Zeova! Labib i dir ki ‘selman’ Zeova ki “posed lasazes.” (Rom. 16:27) Napa nanryen ki i pa konnen lo liniver, enkli lafason ki i’n ganny kree e tou son listwar an antye. Bann lalwa dan lanatir ki zonm i depan lo la pour fer resers, tousala Zeova ki’n kree. Alors, tou sort kalite lenvansyon ki imen in envante, pa enpresyonn li ditou. I pa ni menm enterese avek filozofi sa bann ki lemonn i konsider konman bann dimoun pli entelizan. “Lasazes dapre lemonn i en lafoli devan Bondye.”—1 Kor. 3:19.

³ Labib i dir ki Zeova i “donn lasazes” son bann serviter. (Prov. 2:6) Kontrerman avek bann filozofi imen ki pa fer okenn sans, sa lasazes sorti kot Bondye i diferan. Plito, i ed nou pour fer bon desizyon kot nou servi nou konnesans egzakt ek bon konprenezon. (Lir Zak 3:17.) Zapot Pol ti enpresyonnen par lasazes Zeova. I ti ekrir: “Larises Bondye i vreman gran, son konnesans ek son lasazes i vreman profon. Lekel ki kapab eksplik son bann desizyon? Lekel ki kapab konpran son bann plan?” (Rom. 11:33) Vi ki Zeova i sa enn pli saz, nou asire ki son bann lalwa i kapab gid nou pour viv sa pli meyer lavi. Apre tou, napa personn ki pli konnen ki li, kwa ki nou bezwen pour nou ere.—Prov. 3:5, 6.

Zezi i en “zouvriye abil”

4. Nonm en fason ki nou kapab vwar lasazes Zeova.

⁴ Nou kapab vwar lasazes Zeova ansanm avek son bann lezot kalite ki napa son parey, dan son kreasyon. (Lir Romen 1:20.) Tou travay  ki Zeova in fer, depi sa ki pli pti ziska sa ki pli gro, i revel diferan laspe dan son personnalite. Partou kot nou gete, ki swa anler dan lesyel oubyen ater dan later, i annan en kantite levidans ki prouve ki i bezwen annan en Kreater ki pli saz e ki kontan nou. Nou kapab aprann en kantite lo li ler nou egzamin son kreasyon.—Ps. 19:1; Iza. 40:26.

5, 6. (a) Apard Zeova, lekel ankor ki ti enplike dan kreasyon? (b) Ki nou pou egzaminen, e akoz?

⁵ Zeova pa ti tousel ler i “ti kree lesyel ek later.” (Zen. 1:1) Labib i fer resorti ki avan Bondye ti kree bann keksoz ki nou kapab vwar avek nou lizye, i ti kree en endividi ki ti en lespri e ki apre i ti servi konman en lenstriman pour kree ‘tou lezot keksoz.’ I ti sa sel Garson ki Bondye ti kree li tousel, i “premye-ne tou kreasyon,” ki pli tar ti viv lo later konman en imen e ki ti apel Zezi. (Kol. 1:15-17) Parey Zeova, Zezi osi i annan lasazes. Anfet, dan Proverb sapit 8 i ganny idantifye konman lasazes li menm. Sa menm sapit i osi refer avek Zezi konman “zouvriye abil” Bondye.—Prov. 8:12, 22-31.

⁶ Alors, kreasyon ki nou kapab obzerve i revel lasazes Zeova ek Zezi, son Zouvriye Abil. Nou kapab tir bann bon leson avek bann keksoz ki Bondye in kree. Annou egzamin kat keksoz dan kreasyon ki Proverb 30:24-28 i dir ki “natirelman zot saz.” *

Tir en leson avek bann fourmi ki travay dir

7, 8. Ki ou’n aprann lo bann fourmi ki ou vwar enteresan?

⁷ Ler nou egzamin lafason ki zot in ganny kree ek travay ki zot fer, nou kapab tir leson avek bann keksoz dan kreasyon ki “pli pti lo later.” Par egzanp, annou egzamin bann fourmi, ki natirelman zot saz.—Lir Proverb 30:24, 25.

⁸ Serten serser i krwar ki i annan 200,000 fwa plis fourmi ki imen e zot tou zot travay vreman dir ki swa anba later oubyen lo sirfas later. I annan plizyer group bann fourmi e dan laplipar group ou kapab vwar larenn, mal ek travayer. Sak group i aport zot kontribisyon pour pran swen avek bezwen bann fourmi ki dan zot group. I annan en kalite fourmi ki ganny trouve dan Sid Lanmerik ki koup bann fey e nou kapab dir i en zardinyen ki annan talan. Sa  pti zensek i fertiliz later, tir bann plant dan en landrwa e anmenn zot dan en lot, i tay bann plant (fungus) dan zot zarden dan en fason ki plis nouritir i ganny prodwir. Bann serser in dekouver ki sa “zardinyen” byen talante, i fer sa zefor ki neseser pour kapab donn lakantite manze ki bann fourmi dan son group i bezwen. *

9, 10. Konman nou kapab imit bann fourmi ki travay dir?

⁹ Nou kapab aprann keksoz avek bann fourmi. Zot montre nou ki nou bezwen fer en kantite zefor si nou anvi ganny bon rezilta. Labib i dir nou: “Al kot fourmi, ou ki pares, get sa ki i fer e vin saz. Menm si i napa komandan, zofisye oubyen dirizan, i prepar son manze menm pandan lete; i’n anmas son manze menm dan letan rekolt.” (Prov. 6:6-8) Zeova ek son Zouvriye Abil, Zezi, zot tou le de zot travay vreman dir. Zezi ti dir: “Mon Papa i touzour pe travay, e mwan osi mon travay.”—Zan 5:17.

¹⁰ Konman bann ki pe imit Bondye ek Kris, nou osi nou devret travay dir. Nenport ki responsabilite nou annan dan lorganizasyon Bondye, nou tou nou devret “toultan annan bokou keksoz pour fer dan travay Senyer.” (1 Kor. 15:58, NW) Alors, i pou byen ki nou swiv sa konsey ki zapot Pol ti donn bann Kretyen dan lavil Ronm: “Pa fer pares . . . Pouse par Lespri, servi [oubyen “vin lesklav,” NW] Senyer.” (Rom. 12:11) Tou zefor ki nou mete pour fer lavolonte Zeova i pa anven, akoz Labib i asir nou: “Bondye pa enzis pour li oubliy travay ki zot in fer, ni lanmour ki zot in montre pour li.”—Ebr. 6:10.

Ganny proteze kont danze spirityel

11. Nonm serten karakteristik ki en rock badger i annan.

¹¹ Rock badger i en lot parmi bann kreatir ki ase pti ki nou kapab tir serten leson enportan avek. (Lir Proverb 30:26.) I tant pour parey en gro lapen, me son zorey i ron e pti e son lapat osi i pti. Sa pti zannimo i reste dan bann landrwa kot i annan en ta ros. Son lizye ki vwar byen kler i ed li en kantite. Kan i annan bann predater ki pe aprose i tay dan bann trou ek kap ros pour protez son lekor. Pour zot kapab viv, zot in ganny kree dan en fason pour zot reste byen pros ansanm avek kanmarad. Sa i protez zot e koumsa dan letan liver zot kapab sof kanmarad. *

12, 13. Ki leson nou kapab tire avek rock badger?

¹² Ki nou kapab aprann avek sa zannimo? Premyerman, remarke ki i pran bann mezir pour protez li kont nenport latak. Par egzanp, i byen servi son lizye ki kapab vwar byen kler pour detekte bann predater kot pe vini dan lwen, e i reste pros avek bann trou ek kap ros kot i kapab taye pour sov son lavi. Pareyman, nou bezwen vwar byen kler spirityelman pour ki nou detekte bann danze ki’n ganny kanmoufle dan lemonn Satan. Zapot Pyer ti ankouraz bann Kretyen: “Reste vizilan e vey byen. Zot lennmi, dyab pe pas partou konman en lyon ki kriye, pe rode ki i pou devore.” (1 Pyer 5:8) Kan Zezi ti lo later, i ti reste vizilan, i ti vey byen pour vwar si napa okenn keksoz ki Satan ti a kapab fer pour esey fer Li perdi son lentegrite. (Mat. 4:1-11) Pa Zezi in kit en bon legzanp pour son bann disip!

¹³ En fason ki nou kapab reste vizilan, i ler nou byen servi tou sa bann provizyon ki Zeova in donn nou pour protez nou spirityelman. Pour etidye Parol Bondye e asiste tou bann renyon i devret vin bann keksoz ki nou pran tre o serye. (Lik 4:4; Ebr. 10:24, 25) Deplis, zis parey en rock badger i arive sirviv akoz i reste vreman pros avek son bann kanmarad, nou osi nou bezwen reste pros avek nou bann frer ek ser Kretyen pour ki nou ava “kapab ansanm benefisye [avek] lankourazman” kanmarad. (Rom. 1:12) Kan nou fer tou pour sezi byen for sa proteksyon ki Zeova i donn nou, nou montre ki nou dakor avek psalmis David ki ti ekrir: “Zeova i  mon ros, mon lafors e sa Enn ki anmenn delivrans pour mwan. Mon Bondye i mon ros. Mon pou pran refiz dan li.”—Ps. 18:2.

Persevere malgre lopozisyon

14. Menm si zis en sotrel i pa paret enpresyonn nou, ki nou kapab dir lo en trale sotrel?

¹⁴ Nou osi kapab tir leson avek bann sotrel. En sotrel ki mezir apepre 5 santimet longer, i kapab pa enpresyonn nou ditou. Me sirman en trale sotrel i kree en ladmirasyon dan nou. (Lir Proverb 30:27.) Sotrel i renonmen pour zot lapeti enkrwayab, e en trale sotrel ki pa zanmen fatige, i kapab vitman devor tou sa ki’n bon pour rekolte dan en plantasyon. Labib i konpar tapaz ki en trale zensek i fer, enkli sotrel, ler zot pe apros pli pre, avek tapaz ki en saret lager i fer e avek tapaz ki laflanm dife i fer ler i pe brile. (Yoel 2:3, 5) Normalman nou alim dife pour anpes bann sotrel kontinyen vini, me laplipar di tan i pa efikas. Akoz? Parski sa bann sotrel ki’n ganny brile dan dife, zot tenny sa dife, apre larestan sotrel i kontinyen vini. Menm si zot napa en lerwa oubyen dirizan, en trale sotrel i anvole parey en latroup larme ki’n ganny byen organize, zot sirmont preski tou lobstak. *—Yoel 2:25.

15, 16. Ki mannyer bann proklanmater Rwayonm ozordi i parey en trale sotrel?

¹⁵ Profet Yoel ti dir ki travay ki bann serviter Zeova i fer i parey avek sa ki bann sotrel i fer. I ti ekrir: “Zot taye parey bann zonm pwisan. Zot grenp en miray parey bann zonm ki pe al lager. Sakenn i al dan son prop direksyon, e zot pa sanz zot santye. Zot pa bouskil kanmarad. Zot kontinyen ale, parey en zonm kosto dan son semen, e si serten i menm arive tonbe parmi bann lepe, larestan pou kontiny zot semen.”—Yoel 2:7, 8.

¹⁶ Pa sa profesi i byen fer resorti sa ki bann proklanmater Rwayonm Bondye pe fer ozordi! Ni okenn “miray” ki’n ganny fer pour opoz zot pa’n reisi fer  zot aret prese. Plito, zot imit Zezi ki pa ti aret fer lavolonte Bondye menm si en kantite dimoun pa ti kontan li. (Iza. 53:3) I vre, serten Kretyen in “tonbe parmi bann lepe” kan zot ti ganny met a mor dan en fason martirize akoz zot lafwa. Kantmenm sa, sa travay predikasyon in kontinyen e i pe kontinyen annan plis proklanmater. An realite, souvan ler nou ti ganny persekite, sa ti fer li posib pour partaz sa bon nouvel avek dimoun ki pa ti pou’n tann sa mesaz Rwayonm. (Akt 8:1, 4) Dan ou teritwar kot ou ete, eski ou pe persevere parey bann sotrel, menm si dimoun pa ekoute oubyen opoz ou?—Ebr. 10:39.

“Reste atase avek sa ki byen”

17. Akoz lapat lezar i kapab kol lo nenport kwa ki glise?

¹⁷ Gecko i en pti kalite lezar ki gravite napa okenn lefe lo li. (Lir Proverb 30:28.) Anfet, bann syantis i enpresyonnen par abilite sa pti lezar pour grenp miray, menm pour mars anler lo plafon byen listre san ki i tonbe. Ki son sekre? I pa konmsi son lapat i ponp ler pour fer li kole oubyen i annan en kalite lakol. Plito sak lapat i annan en lapo fen e listre avek bann laliny ki en pe pli epe, ki kontyen plizyer milye pti bren ki parey bann pwal. Sak sa bann laliny i annan plizyer santenn bren, e sa bann bren zot long e son bout anler i tant pour kourbe, dan zar laform en sekoup. Sa lafors ki tou sa bann bren i prodwir i ase pour tenir pwa sa lezar ek lezot pwa ankor, menm kan i pe vire tournen lo vit. Fasinen par sa abilite ki sa kalite lezar i annan, bann serser i dir ki bann keksoz artifisyel ki ganny fer avek bi pour imit lafason ki lapat sa kalite lezar i kole, i kapab ganny servi konman en lakol ki vreman pwisan. *

18. Ki mannyer nou kapab fer sir ki nou “reste atase avek sa ki byen”?

¹⁸ Ki nou kapab aprann avek sa lezar? Labib i ankouraz nou: “Deteste sa ki mal e reste atase avek sa ki byen.” (Rom. 12:9) Sa bann move lenfliyans ki partou dan sa lemonn Satan, i kapab fer nou pa reste atase avek bann prensip Bondye. Par egzanp, si nou frekant bann dimoun ki pa oule swiv lalwa Bondye, ki swa kot lekol, dan landrwa travay oubyen atraver serten kalite divertisman ki pa apropriye pour bann Kretyen, sa i kapab diminyen nou determinasyon pour fer sa ki byen. Pa zanmen les sa arive! Labib i donn nou sa lavertisman: “Pa bezwen vin saz dan ou prop lizye.” (Prov. 3:7) Plito, annou swiv sa bon konsey ki Moiz ti donn pep Bondye dan lepase: “Ou devret annan lakrent pour Zeova ou Bondye. Ou devret servi li e reste atase avek li.” (Det. 10:20) Si nou reste atase avek Zeova, nou pou imit Zezi. Labib i dir sa lo li: “Ou kontan lazistis, e ou ay mesanste.”—Ebr. 1:9.

Kreasyon i ansenny nou

19. (a) Ki bann kalite ki Zeova i annan ki ou’n kapab obzerve dan son kreasyon? (b) Ki byenfe nou kapab gannyen si nou annan lasazes Bondye?

¹⁹ Parey nou’n egzaminen, nou kapab vwar bann kalite Zeova dan bann keksoz ki i’n kree, e son kreasyon i ansenny nou bann bon leson. Pli nou analiz son kreasyon, pli nou enpresyonnen par son lasazes. Par egzamin lasazes Zeova, sa pou fer nou vin pli ere la konmela menm e dan lavenir nou pou ganny proteze. (Ekle. 7:12) Wi, personnelman dan nou lavi nou pou vwar ki sa parol dan Proverb 3:13, 18, i vre e sir. Sa proverb i dir: “Ere sa zonm ki’n trouv lasazes, e sa zonm ki’n arive ganny disernman. Pour bann ki pe tyonbo li i en pye dibwa lavi, e bann ki pe reste atase avek li i ganny apele ere.”

[Not anba lo paz]

Eski ou rapel?

Ki bon leson nou tire avek . . .

• fourmi?

• rock badger?

• sotrel?

• lezar?

[Kestyon]

[Portre lo paz 18]

Rock badger i ganny proteze kan i viv pros ansanm avek kanmarad. Eski ou osi ou fer parey?

[Portre lo paz 20]

Parey sotrel, bann proklanmater Rwayonm i demontre perseverans

[Portre lo paz 20]

Zis parey en lezar i reste kole lo en keksoz, pareyman bann Kretyen i bezwen reste atase avek sa ki byen

[Sorti kot]

Stockbyte/​Getty