Jehová rembiapokuére jahechakuaa haʼe iñaranduha

‘Ndaikatúiramo jepe jahecha Ñandejárape, ñañandu ha jahechakuaa hembiapokuére mbaʼéichapa Haʼe.’ (ROM. 1:​20, JMP.)

1. Mbaʼépa oiko umi oñemoarandu guaʼúvape ohendúvare?

 KOʼÁG̃A rupi pyʼỹi ojeʼe ñanearanduvaʼerãha. Heta oĩ heʼíva peteĩ oikuaáva heta mbaʼe iñaranduha. Péro ñande jaikuaaséramo maʼerãpa jaikove jaha reíta umi oñemoarandu guaʼúva rendápe. Umi ohendúva chupekuéra ningo ‘ágotyo ha pégotyo ojerotyryry oimeraẽichagua ñemboʼepy rapykuéri’ (Efe. 4:​14, JMP).

2, 3. a) Mbaʼérepa jaʼekuaa ‘Jehová añoite iñaranduha’? b) Mbaʼérepa ikatu jaʼe Ñandejára arandu ndojoguaieteha yvypóra arandúpe?

² Ajépa ndojoguaiete hikuái umi Jehovápe oservívape! Umívape ningo Jehová omboʼe iñarandu hag̃ua. La Bíbliape voi heʼi: ‘Jehová añoite iñarandu’ (Rom. 16:​27, JMP). Haʼe oikuaapaite arakaʼépa ha mbaʼéichapa ojejapovaʼekue opa mbaʼe ko univérsope. Ha haʼe voi omoĩ mbaʼéichapa ombaʼapovaʼerã opa mbaʼe, ha yvyporakuéra oñehaʼã oikuaa koʼã mbaʼe. Upévare Jehová nomombaʼéi yvyporakuéra rembiapokue ni umi mbaʼe heʼíva ohechauka hag̃ua iñaranduha. La Bíbliape heʼi voi: ‘Arandu ko yvy arigua niko vyroreiete Ñandejárape g̃uarã’ (1 Cor. 3:19).

³ La Bíbliape heʼi Jehová ‘voi omeʼẽha arandu’ isiervokuérape (Pro. 2:​6, ÑÑB). Ha ndojoguaiete umi yvypóra arandúpe. Ñandejára arandu ningo ndojavýi, ñanepytyvõ guei ñapensa raẽ hag̃ua jajapovaʼerãre. Jehová oikuaa avei mbaʼépa ñaikotevẽ ha mbaʼéichapa ñanepytyvõta (jaleemína Santiago 3:17). Apóstol Pablo omombaʼetereígui Jehová arandu ohai: ‘Ipypukuete ningo ko Ñandejára mbaʼeta, arandu ha mbaʼekuaa oguerekóva! Ndaikatúi jaikuaapa hembipota, térã jaikuaapa pe hape’ (Rom. 11:​33, JMP). Upeichaite, Jehová ningo pe iñaranduvéva. Upévare jaguerovia Iñeʼẽ añoite ikatuha ñanepytyvõ jaiko porã ha javyʼa hag̃ua. Haʼe ningo ñande Apohare ha oikuaa porã mbaʼépa ñaikotevẽ javyʼa hag̃ua (Pro. 3:​5, 6).

Jesús ningo pe ‘pytyvõhára’

4. Mbaʼéichapa ikatu jahechakuaa Jehová iñaranduha?

⁴ Jehová rembiapokuére jahechakuaáta mbaʼeichaitépa Haʼe iñarandu ha ndaiporiha hasaharã (jaleemína Romanos 1:20). Umi Ñandejára rembiapokue michĩmíva ha umi tuichaicháva ohechaukahína mbaʼeichaguápa haʼe. Ñamañáramo yvágare térã ko yvýre jatopáta hetaiterei mbaʼe ohechaukáva mbaʼeichaitépa Jehová iñarandu ha ñanderayhu. Hetaiterei mbaʼe ningo ikatu ñanemboʼe umi hembiapokue (Sal. 19:1; Isa. 40:26).

5, 6. a) Mávapa oipytyvõ Jehovápe ojapo hag̃ua “opa mbaʼe”? b) Mbaʼépa jahecháta ko artíkulope, ha maʼerãpa?

⁵ Jehová noĩrivaʼekue haʼeño ‘ojapórõ guare yvága ha yvy’ (Gén. 1:1). La Bíbliape heʼi Ñandejára ojapo mboyve ko univérso, ojapo hague peteĩ ánhel ikatu hag̃uáicha oipytyvõ chupe ojapo hag̃ua “opa mbaʼe”. Upéva hína Jesús, “itaʼýra  ypykue” ha peteĩetéva. Ha upe rire Jesús ouvaʼekue oiko ko yvy ape ári (Col. 1:​15-17). Haʼe ningo iñarandu avei Itúvaicha. Ha Proverbios kapítulo 8-pe heʼi Jesús rehe ‘haʼeha arandu’ ha ‘pytyvõhára’ (Pro. 8:​12, 22-31).

⁶ Opa mbaʼe oĩva yvágape ha yvýpe ohechauka mbaʼeichaitépa Jehová ha Jesús iñarandu. Heta mbaʼe ñanemboʼéta ñamañáramo haʼekuéra ojapovaʼekuére. Jahechamína cuatro umíva apytégui, Proverbios 30:​24-28-pe ojeʼe umi mymba ‘iñaranduha ijehegui voi’. a

Mbaʼéichapa ñambaʼapo kyreʼỹ vaʼerã

7, 8. Mbaʼépa remombaʼeve umi tahýi ojapóvare?

⁷ Umi mymba michĩvéva jepe heta mbaʼe ikatu ñanemboʼe jahecháramo mbaʼéichapa hikuái ha mbaʼépa ojapo. Pór ehémplo, ñapensamíntena mbaʼeichaitépa ikyreʼỹ umi tahýi (jaleemína Proverbios 30:​24, 25).

⁸ Hetaiterei tahýi ningo opytuʼuʼỹre ombaʼapo haitýpe ha okápe. Peteĩ tahýi raitýpe ningo katuete oĩ pe rréinava, oĩ avei máchova ha umi ombaʼapóva, ha enterove oñopytyvõ ohupyty hag̃ua hemikotevẽ. Ñapensamínte pór ehémplo pe ysau rehe, haʼe ikatupyryeterei oikytĩ hag̃ua yvyra rogue. Umi ysau ningo oavona pe yvy, oikytĩ umi yvyra rogue ha ogueraha haitýpe hembiʼurã. Umi ostudiáva koʼã tahýire heʼi umi ysau oñopytyvõha ombyaty hag̃ua hembiʼurã oikotevẽtavante haitýpe. b

9, 10. Mbaʼépa ñanemboʼe umi tahýi?

⁹ Umi tahýi ningo heta mbaʼe ikatu ñanemboʼe. Pór ehémplo, ñanemboʼe ñambaʼapo kyreʼỹramo osẽ porãtaha ñandéve opa mbaʼe. La Bíbliape heʼi ñandéve: ‘Emaʼẽna pe tahýire, nde neateʼỹva, emaña hapekuérare ha nearandúta. Oguerekoʼỹre mburuvicha, oisãmbyhýva térã omoakãva chupekuéra, ára haku aja opreparáma hembiʼurã ha kóga oñemonoʼõha árape omonoʼõhína hembiʼurã’ (Pro. 6:​6-8, ÑÑB). Jesús heʼi: “Che Ru ningo koʼág̃a peve ombaʼapohína, ha che avei”. Ko téystope ohechauka Jehová ha Jesús ombaʼapo kyreʼỹha (Juan 5:17).

¹⁰ Ñande ñañehaʼãvaʼerã avei ñambaʼapo kyreʼỹ Jehová ha Jesús ojapoháicha. Tahaʼe haʼéva ñane rresponsavilida Jehová organisasiónpe, oñehaʼãrõ ñandehegui ‘ñambaʼapo kyreʼỹ Ñandejárape g̃uarã’ (1 Cor. 15:58). Upévare iporãta jajapóramo apóstol Pablo heʼivaʼekue umi kristiáno Romayguápe: ‘Ani peneateʼỹ, peñehaʼãkena  ha pembaʼapo kyreʼỹ Ñandejárape g̃uarã’ (Rom. 12:11). Opa mbaʼe jajapóva Jehovápe g̃uarã, ndajajaporeimoʼãi. Ñandejára Ñeʼẽme heʼi voi: ‘Ñandejára niko hekojojahína ha ndahesaraimoʼãi umi pejapovaʼekuégui ha mborayhu pehechaukavaʼekuégui héra rehehápe’ (Heb. 6:10).

Ñañangarekókena ani hag̃ua ñañemomombyry Jehovágui

11. Mbaʼeichagua mymbápa umi damán?

¹¹ Peteĩ mymba hérava damán ningo ñanemboʼe avei heta mbaʼe (jaleemína Proverbios 30:26). Upe mymbaʼi ningo ojogua peteĩ apereʼápe, hetyma mbyky ha inambi apuʼaʼi. Avei ohecha porãiterei. Ha oiko umi itakuáre, okañy pyaʼe hag̃uáme umi mymba ojukasévagui chupe. Umi damán ningo oiko oñondivepa, upéicha oñangareko ojuehe hikuái ha oñombyaku roʼy tiémpope. c

12, 13. Mbaʼe mbaʼépa ñanemboʼe pe damán?

¹² Mbaʼépa ñanemboʼe pe damán? Primero, upe mymbaʼi nosẽi umi ojukaséva chupe raperãme. Haʼe ningo ohecha porãiterei rupi mombyry guive ohecháma umi omoñuhãsévape chupe ha umi itakua ypy rupínte voi oiko okañy pyaʼe hag̃ua. Upéicha avei ñande jaikuaa porã vaʼerã Ñandejára Ñeʼẽ heʼíva jahechakuaa hag̃ua umi ñuhã Satanás omoĩva. Upévare, apóstol Pablo heʼivaʼekue: ‘Peneakãguapy ha peñeñangarekókena, Satanás pe ijaʼeʼỹva penderehe ojere rupi ku leõ pochýicha oheka mávapepa omokõta’ (1 Ped. 5:​8, JMP). Ha Jesús oĩrõ guare ko yvy ape ári, akóinte oñeñangarekovaʼekue ani hag̃ua hoʼa Satanás ñuhãme (Mat. 4:​1-11). Upéicha haʼe peteĩ ehémplo iporãva ñandéve g̃uarã.

¹³ Ñande ñañeñangareko hag̃ua jahejavaʼerã Jehová ñanepytyvõ. Upearã akóinte jastudiavaʼerã la Biblia ha jaha meme rreunionhápe (Luc. 4:4; Heb. 10:​24, 25). Avei, umi damán oikoháicha oñondivepa, ñande ñañemoag̃uivaʼerã ermanokuérare ikatu hag̃uáicha ‘ñañomokyreʼỹ’ (Rom. 1:​12, BNP). Péicha jajapóramo, ikatúta jaʼe  David heʼi haguéicha: ‘Jehová, nde reñangareko cherehe, ne rendápe ag̃uahẽ akañy hag̃ua, nde reime che jerére, nde upe cherenohẽva jejopy vaígui. Ne rendápe ag̃uahẽramo nde chepytyvõ’ (Sal. 18:3 [18:​2, NM]).

Ani jaheja mbaʼeve ñandejoko

14. Mbaʼéichapa ñañeñandúta jahecháramo peteĩ tuku aty?

¹⁴ Heta mbaʼe avei ikatu ñanemboʼe umi tuku guasu. Peteĩ tuku ipukúva cinco centímetro rupi nañanemongyhyjemoʼãi, péro hetaiterei oúramo jakyhyjéta katuete (jaleemína Proverbios 30:27). Peteĩ tuku aty ikatu sapyʼaitépe ohundipa peteĩ kogaty neporãva. La Bíbliape oñeʼẽ peteĩ vícho atýre ha upéva apytépe oĩ avei umi tuku guasu. Heʼi voi hyapu hatãha peteĩ kárro de gérraicha térã peteĩ kapiʼity okáivaicha (Joel 2:​3, 5). Heta mbaʼéma ojejapo ojejoko hag̃ua umi tukúpe, sapyʼánte ojehapy umi kogaty upearã, péro ndojejokói voi chupekuéra. Mbaʼérepa? Hetaiterei tuku guasu hoʼa rupi upe tatápe ha omboguepa, upéicha heta ojesalva ha osegi hape. Umi tuku guasu ningo ndorekói mburuvicha ni omoakãva chupekuéra. Ha peteĩ ehérsitoicha oho hikuái ha mbaʼeve voi ndojokói chupekuéra (Joel 2:25). d

15, 16. Mbaʼépepa ojojogua umi marandu porã omombeʼúva ha umi tuku guasu ojapóva?

¹⁵ Proféta Joel ombojoja Ñandejára siervokuéra rembiapo umi tuku guasu ojapóvare. Haʼe ohai: ‘Oñanijoavaʼerã hikuái ñorairõhára ipyʼaguasu ha ikatupyrývaicha, murálla ári ojapyhara, henonderã gotyo oho opiaʼỹ rehe mamove. Oñomyañaʼỹre ojuapykuéri oho, ojejokoséramo jepe chupekuéra ohasa, osẽʼỹre ojohapépe oho’ (Joel 2:​7, 8).

 ¹⁶ Ajépa oikuaaite mbaʼérepa ombojojáta umi marandu porã omombeʼúvape! Oñemoĩva guive ko tembiapóre katuete osẽ vai, ndojokói voi chupekuéra. Ñandejára siervokuéra ningo omoirũ Jesúspe ha ojapo meme Ñandejára rembipota oĩramo jepe ndochaʼéiva hesekuéra (Isa. 53:3). Ha oĩ avei ojejukáva ojapo haguére Ñandejára rembipota. Upéicharõ jepe osegi la predikasión ha hetave rei oĩ ojedesidíva oservi Ñandejárape ha ojapo avei ko tembiapo. Ha heta vése ojepersegi rupi chupekuéra oĩ ohendúva pe marandu porã (Hech. 8:​1, 4). Ha ndépa repredika kyreʼỹ avei oĩramo jepe nanerenduséiva ha oñemoĩva nderehe? (Heb. 10:39.)

“Peñemboja iporãvare”

17. Mbaʼéicha rupípa oguata pe ambereʼi umi técho isỹivévare jepe?

¹⁷ Heta mbaʼe ikatu avei ñanemboʼe pe ambereʼi, haʼe ningo oguata parére ha téchore entéro (jaleemína Proverbios 30:28). Péro, mbaʼéicha piko ojapo upéva? Pe ambereʼi ningo ipo avevoʼi ha hagueʼipa, haʼete iñapovõva ha oja oimeraẽ mbaʼére. Péicha ipuʼaka ijehe ha chugui ipohyivévare jepe, tahaʼe oguata jave peteĩ técho de vídriore. Umi sientífiko ningo omombaʼeterei upéva ha heʼi voi la ikatúramo ojapóne hag̃ua hikuái peteĩ pegaménto oja mbaretéva pe ambereʼi popytéicha. e

18. Mbaʼépa jajapovaʼerã ñañemboja hag̃ua iporãvare?

¹⁸ Mbaʼépa ñanemboʼe pe ambereʼi? La Bíbliape ningo heʼi: ‘Penembojeguaruvaʼerã umi mbaʼe ivaíva ha peñemboja iporãvare’ (Rom. 12:9). Ko múndo oĩva Satanás poguýpe ikatu ñandegueraha vai ha ndajajapovéi Jehová heʼíva. Pór ehémplo, júnta vai eskuélape, ñambaʼapohápe térã vyʼarã ikatu ñanemokangy ha ndajaservisevéi Jehovápe. Aníkena jaheja oiko ñanderehe upéicha, la Bíbliape heʼi voi ñandéve: “Aníkena reimoʼã nearanduetereiha” (Pro. 3:7). Jajapókena Moisés heʼivaʼekue umi Israelguápe: ‘Pemombaʼe Jehová pende Járape, chupe añónte pemombaʼeguasuvaʼerã ha hesénte peñembojavaʼerã’ (Deu. 10:​20, ÑÑB). Ñañembojáramo Jehováre jajapotañaína Jesús ojapo haguéicha. Hese ojeʼe voi: ‘Ohayhuvaʼekue iporãva ha ndaijaʼéi ivaívare’ (Heb. 1:9).

Mbaʼépa ñanemboʼe Jehová rembiapokue

19. a) Mbaʼépa nde rehechakuaa Jehováre remañávo hembiapokuére? b) Mbaʼéichapa ñanepytyvõ Jehová arandu?

¹⁹ Jehová rembiapokuére ningo jahechakuaa mbaʼéichapa haʼe, ha ñanemboʼe avei heta mbaʼe porã. Ñañehaʼãramo jaikuaave hembiapokue ñamombaʼevéta mbaʼeichaitépa iñarandu ñande Apohare. Upéva ñanepytyvõta javyʼave hag̃ua koʼág̃ama voi ha tenonderãme hetave mbaʼépe ñanepytyvõta. Upévare ñahendúkena Jehová heʼíva ñandéve, haʼe ningo pe iñaranduvéva (Ecl. 7:12). Upéicha jajapóramo, jahechakuaáta añeteha heʼíva Proverbios 3:​13, 18-pe: ‘Ovyʼavaʼerã arandu ojuhúva ha iñakãporãva. Iñarandúva oikovéta ha ovyʼáta’.

[Nóta]

Nemanduʼápa koʼã mbaʼére?

Mbaʼépa ñanemboʼe...

• ... pe ysau?

• ... pe damán?

• ... umi tuku guasu?

• ... pe ambereʼi?

[Porandu ñahesaʼỹijóva]

[Nóta oĩva taʼanga ndive páhina 16]

Ñandépa ñambaʼapo kyreʼỹ avei pe ysaúicha?

[Nóta oĩva taʼanga ndive páhina 17]

Pe damán ningo oñemoag̃ui iñirũnguérare, ñandépa jajapo avei upéicha?

[Nóta oĩva taʼanga ndive páhina 18]

Umi tuku guasúpe ndojejokoiháicha, ñandéve avave nañandejokói japredika kyreʼỹ hag̃ua

[Nóta oĩva taʼanga ndive páhina 18]

Pe ambereʼi ojaháicha oimeraẽ mbaʼére, ñande ñañembojavaʼerã iporãvare

[Roagradese]

Stockbyte/Getty Images