Pagmidbid sa Saro na Orog Kisa ki Moises
Pagmidbid sa Saro na Orog Kisa ki Moises
“Si Jehova Dios masugo para sa saindo hale sa saindong mga tugang nin sarong propeta na siring sa sako. Dapat kamong maghinanyog sa saiya.”—GIBO 3:22.
1. Paano naimpluwensiahan ni Jesu-Cristo an kasaysayan nin katawohan?
DUWANG ribong taon na an nakaagi, an pagkamundag nin sarong omboy na lalaki nagin dahelan na an sarong kaburunyogan nin mga anghel sa langit mag-omaw sa Dios, asin ini nadangog nin nagkapirang pastor. (Luc. 2:8-14) Pakalihis nin 30 taon, an aking iyan, na adulto na, pinonan an ministeryo na naglawig sana nin tolo may kabangang taon, alagad ta binago kaiyan an kasaysayan nin katawohan. An bantog na istoryador kan ika-19 siglo na si Philip Schaff napahiro na magsabi dapit sa hoben na lalaking ini: “Nungka siang nagsurat nin ano man, pero, kun ikokomparar sa gabos na bantog na tawo kan suanoy asin sa presenteng mga panahon, napahiro nia an mas dakol na tawo na gumibo nin mas dakol na sermon, pahayag, libro, gibo nin arte (art), asin awit nin pag-omaw saka magkaigwa nin mga pag-orolay dapit sa saiya.” Siempre, an pambihirang hoben na lalaking iyan iyo si Jesu-Cristo.
2. Ano an sinabi ni apostol Juan manongod ki Jesus asin sa ministeryo Nia?
2 Si apostol Juan nagsurat nin salaysay dapit sa ministeryo ni Jesus asin nagsabi bilang kongklusyon: “Igwa, sa katunayan, nin dakol pang ibang bagay na ginibo man ni Jesus, na, kun an mga iyan isinurat sa bilog na detalye, paghona ko sana, an kinaban mismo dai magkakaigo na bugtakan kan mga rolyo na isinurat.” (Juan 21:25) Aram ni Juan na an ikakasurat nia sadit sanang kabtang kan gabos na sinabi asin ginibo ni Jesus durante kan makasaysayan na tolo may kabangang taon na idto. Pero, mahalagang marhay an makasaysayan na mga pangyayari na isinaysay ni Juan sa Ebanghelyo nia.
3. Paano niato mapapararom an satong pakasabot dapit sa papel ni Jesus sa katuyohan nin Dios?
3 Apuera sa apat na mahalagang pagkasaysay kan Ebanghelyo, an ibang kabtang kan Biblia nagtatao nin nakakapakosog sa pagtubod na mga detalye manongod sa buhay ni Jesus. Halimbawa, an mga pagkasaysay kan Biblia dapit sa nagkapirang maimbod na tawo na nabuhay bago si Jesus igwa nin impormasyon na makakapararom kan pakasabot niato dapit sa papel ni Jesus sa katuyohan nin Dios. Pag-olayan niato an nagkapira sa mga ini.
Mga Lingkod nin Dios na Patienot na Nagrepresentar sa Cristo
4, 5. Sairisay an patienot na nagrepresentar ki Jesus, asin sa anong mga paagi?
4 Si Juan asin an tolong iba pang kagsurat kan Ebanghelyo nagsambit na si Moises, David, asin Salomon mga tawo na patienot na nagrepresentar ki Jesus bilang Linahidan nin Dios asin nombradong magin Hade. Paano patienot na ipinaheling kan suanoy na mga lingkod na iyan nin Dios an magigin papel ni Jesus, asin ano an manonodan niato sa mga pagkasaysay na ini?
5 Sa halipot, sinasabi sa sato kan Biblia na si Moises nagin propeta, parapangoltanan, asin paraligtas. Si Jesus iyo man. Si David nagin pastor asin hade na nakadaog sa mga kaiwal kan Israel. Si Jesus man pastor asin nandadaog na hade. (Ezeq. 37:24, 25) Kan si Salomon maimbod pa, sia nagin madonong na namamahala, asin an Israel nagkaigwa nin katoninongan durante kan paghade nia. (1 Ha. 4:25, 29) Si Jesus man may nangongorog nanggad na kadonongan asin inaapod na “Prinsipe nin Katoninongan.” (Isa. 9:6) Malinaw nanggad, an papel ni Cristo Jesus kapareho kan mas naenot na mga tawong iyan, pero nakakalabi sa gabos an kabtang ni Jesus sa katuyohan nin Dios. Enot, ikomparar niato si Jesus ki Moises asin helingon niato kun paanong an siring na pagkomparar makakatabang sa sato na mas lubos na pahalagahan an papel ni Jesus sa katuyohan nin Dios.
Si Moises—Patienot na Nagrepresentar ki Jesus
6. Paano ipinaliwanag ni apostol Pedro na kaipuhan na maghinanyog ki Jesus?
6 Dai nahaloy pakatapos kan Pentecostes 33 C.E., kinotar ni apostol Pedro an sarong hula ni Moises na naotob ki Jesu-Cristo. Si Pedro kaidto nakatindog sa atubangan nin sarong kadaklan nin parasamba na nasa templo. An mga tawo ‘nagngaralas nin labi-labi’ kan paomayan ni Pedro asin ni Juan an parapakilimos na pilay poon sa pagkamundag, asin sinda gabos nagdaralagan tanganing helingon an nangyari. Ipinaliwanag ni Pedro na an makangangalas na gibong ini resulta kan banal na espiritu ni Jehova na naghihiro paagi ki Jesu-Cristo. Dangan, sia nagkotar sa Hebreong Kasuratan asin nagsabi: “Sa katunayan, si Moises nagsabi, ‘Si Jehova Dios masugo para sa saindo hale sa saindong mga tugang nin sarong propeta na siring sa sako. Dapat kamong maghinanyog sa saiya oyon sa gabos na bagay na sinasabi nia sa saindo.’”—Gibo 3:11, 22, 23; basahon an Deuteronomio 18:15, 18, 19.
7. Taano ta masasabotan kan mga nagdadangog ki Pedro an mga tataramon nia manongod sa propeta na orog kisa ki Moises?
7 An mga tataramon na iyan ni Moises posibleng marhay na pamilyar sa mga nagdadangog ki Pedro. Bilang mga Judio, igwa sinda nin halangkaw na pagpahalaga ki Moises. (Deut. 34:10) Hinahalat nanggad ninda an pagdatong nin propeta na orog kisa ki Moises. An propetang iyan magigin bako sanang sarong mesiyas, na sarong linahidan nin Dios arog ki Moises, kundi an Mesiyas, “an Cristo nin Dios, an Saro na Pinili” ni Jehova.—Luc. 23:35; Heb. 11:26.
Mga Pagkakaagid ni Jesus Asin ni Moises
8. Ano an nagkapirang pagkakaagid kan buhay ni Moises asin ni Jesus?
8 Sa nagkapirang bagay, an daganon na buhay ni Jesus kapareho kan buhay ni Moises. Halimbawa, kan omboy pa si Moises sagkod si Jesus, sinda nakadulag sa kagadanan sa mga kamot nin maringis na namamahala. (Ex. 1:22–2:10; Mat. 2:7-14) Dugang pa, sinda parehong ‘inapod hale sa Egipto.’ Si propeta Oseas nagsabi: “Kan aki pa an Israel, namotan ko sia kaidto, asin hale sa Egipto inapod ko an sakong aki.” (Os. 11:1) An sinambit kan mga tataramon ni Oseas iyo an panahon kan an nasyon nin Israel ilinuwas sa Egipto paagi ki Moises, an namomoon kaiyan na ninombrahan nin Dios. (Ex. 4:22, 23; 12:29-37) Minsan siring, an mga tataramon ni Oseas nanonongod bako sanang sa sarong nakaaging pangyayari kundi sa saro man na mangyayari pa sa ngapit. An mga tataramon nia sarong hula na naotob kan si Jose asin si Maria magbalik hale sa Egipto kaiba si Jesus pagkagadan ni Hadeng Herodes.—Mat. 2:15, 19-23.
9. (a) Anong mga milagro an ginibo ni Moises asin ni Jesus? (b) Sambiton an iba pang pagkakaagid ni Jesus asin ni Moises. ( Helingon an kahon na “Iba Pang Paagi na si Jesus Arog ni Moises,” sa pahina 26.)
9 Si Moises asin si Jesus parehong naggibo nin mga milagro, na sa siring ipinapaheling na sinuportaran sinda ni Jehova. Sa katunayan, si Moises an enot na tawo segun sa rekord na naggibo nin mga milagro. (Ex. 4:1-9) Halimbawa, si Moises naggibo nin mga milagro may koneksion sa tubig na paagi sa pagboot nia nagin dugo an katubigan kan Nilo asin kan magahong mga danaw-danaw kaiyan, nabanga an Dagat na Pula, asin nagsulwak an tubig hale sa dakulang gapo sa desierto. (Ex. 7:19-21; 14:21; 17:5-7) Si Jesus naggibo man nin mga milagro may koneksion sa tubig. An pinakaenot na milagro nia iyo na ginibo nia na magin arak an tubig sa punsion sa kasal. (Juan 2:1-11) Pakalihis kaiyan, pinakalma nia an maalon na Dagat nin Galilea. Asin sa sarong pangyayari, sia naglakaw pa ngani sa ibabaw nin tubig! (Mat. 8:23-27; 14:23-25) An nagkapirang iba pang pagkakaagid ni Moises asin kan Saro na Orog Kisa ki Moises, si Jesus, maheheling sa kahon sa pahina 26.
Midbidon si Cristo Bilang Propeta
10. Ano an tunay na propeta, asin taano ta si Moises siring kaiyan?
10 Iniisip nin kadaklan na tawo na an propeta saro na naghuhula dapit sa ngapit, alagad iyan kabtang sana kan paninimbagan nin sarong propeta. An tunay na propeta saro na pinasabngan na representante ni Jehova sa pagtaram, saro na nagbabalangibog kan “makangangalas na mga bagay nin Dios.” (Gibo 2:11, 16, 17) Kabilang sa iba pang bagay, puedeng kaiba sa paghula nia an pagpaisi kan mga mangyayari sa ngapit, paghayag kan mga aspekto kan katuyohan ni Jehova, o pagbalangibog kan mga paghokom nin Dios. Siring kaiyan na propeta si Moises. Ihinula nia an lambang saro sa Sampulong Damat na nangyari sa Egipto. Ipinahayag nia an tipan nin Ley sa Sinai. Asin tinokdoan nia an nasyon sa kabotan nin Dios. Pero, sa kahurihurihi maabot an propeta na orog kisa ki Moises.
11. Paano inotob ni Jesus an papel nin propeta na orog kisa ki Moises?
11 Pakalihis nin panahon, kan enot na siglo, si Zacarias nag-akto bilang propeta kan ihayag nia an katuyohan nin Dios mapadapit sa saiyang aki, si Juan. (Luc. 1:76) An aking iyan nagin si Juan na Bautisador, na nagpaisi kan pag-abot kan haloy nang hinahalat na propeta na orog kisa ki Moises—si Jesu-Cristo. (Juan 1:23-36) Bilang propeta, si Jesus naghula nin dakol na bagay. Halimbawa, nagtaram sia manongod sa kagadanan nia mismo, na ihinuhula kun paano sia gagadanon, kun saen sia gagadanon, asin kun sairisay an magadan sa saiya. (Mat. 20:17-19) Nagngalas an mga naghihinanyog ki Jesus kan ihula man nia an paglaglag sa Jerusalem kaiba an templo kaiyan. (Mar. 13:1, 2) Sakop kan mga hula nia an sato mismong panahon.—Mat. 24:3-41.
12. (a) Paano pinonan ni Jesus an lakop sa kinaban na paghuhulit? (b) Taano ta sinusunod niato ngonyan an halimbawa ni Jesus?
12 Apuera sa pagigin propeta, si Jesus nagin parahulit asin paratokdo. Ihinulit nia an maogmang bareta kan Kahadean nin Dios, asin mayo nin siisay man na nagtaram na may orog na kapusoan kisa sa saiya. (Luc. 4:16-21, 43) Bilang paratokdo, sia mayo nin kapantay. “Mayo pa nin ibang tawo na nagtaram nin arog kaini,” an sabi nin nagkapira na nakadangog sa saiya. (Juan 7:46) Si Jesus nagin maigot sa paghihingoa nia na palakopon an maogmang bareta, asin minotibar nia an mga parasunod nia paagi sa iyo man sanang kaigotan para sa Kahadean. Sa siring, pinonan nia an lakop sa kinaban na paghuhulit asin pagtotokdo na nagpapadagos pa ngonyan. (Mat. 28:18-20; Gibo 5:42) Kan nakaaging taon, labing pitong milyon na parasunod ni Cristo an naggamit nin mga 1,500,000,000 na oras sa paghuhulit kan maogmang bareta kan Kahadean asin sa pagtotokdo sa mga interesado dapit sa mga katotoohan sa Biblia. Igwa daw kamo nin makahulogan na pakikikabtang sa gibohon na iyan?
13. Ano an matabang sa sato na “magpuka”?
13 Daing duda na inotob ni Jehova an hula na magsugo nin propeta na arog ki Moises. Ano an epekto sa saindo kan kaaraman na iyan? Nadudugangan daw kaiyan an pagsarig nindo sa kaotoban kan ipinasabong na mga hula na may koneksion sa satong haranihon nang ngapit? Iyo, an paghorophorop dapit sa halimbawa kan Saro na Orog Kisa ki Moises nagtatabang sa sato na ‘magpuka asin magdanay na toltol an pag-iisip’ dapit sa madali nang gibohon nin Dios.—1 Tes. 5:2, 6.
Pahalagahan si Cristo Bilang Parapangoltanan
14. Paano nagin parapangoltanan si Moises sa pag-oltanan kan mga Israelita asin nin Dios?
14 Arog ni Moises, si Jesus nagin parapangoltanan. An sarong parapangoltanan nagseserbing garo tulay sa pag-oltanan nin duwang lado. Si Moises an nagin parapangoltanan kan tipan nin Ley sa pag-oltanan ni Jehova asin kan mga Israelita. Kun kinuyog kan mga aki ni Jacob an mga ley nin Dios, sinda magdadanay na espesyal na sadiri nin Dios, an kongregasyon nia. (Ex. 19:3-8) An tipan na iyan nagdanay na may epekto poon kan 1513 B.C.E. sagkod kan enot na siglo C.E.
15. Paanong si Jesus sarong parapangoltanan na nakakalabi sa gabos?
15 Kan 33 C.E., guminibo si Jehova nin mas marahay na tipan sa bagong Israel, an “Israel nin Dios,” na nagin pambilog na kinaban na kongregasyon na binibilog nin linahidan na mga Kristiano. (Gal. 6:16) Mantang an tipan na si Moises an nagin parapangoltanan may kaibang mga ley na isinurat nin Dios sa gapo, nakakalabi sa gabos an tipan na si Jesus an nagin parapangoltanan. An mga ley kaiyan garo isinurat nin Dios sa puso nin mga tawo. (Basahon an 1 Timoteo 2:5; Hebreo 8:10.) Huli kaini, an “Israel nin Dios” iyo na an espesyal na sadiri nin Dios, “sarong nasyon na nagluluwas nin mga bunga” kan Mesiyanikong Kahadean. (Mat. 21:43) An mga miembro kan espirituwal na nasyon na iyan kabtang kan bagong tipan na iyan. Pero, bako sana sinda an makikinabang dian. Dai mabilang na kaburunyogan, pati an dakol na sa presente torog sa kagadanan, an mag-aako nin daing katapusan na mga bendisyon huli sa tipan na iyan na nakakalabi sa gabos.
Igalang si Cristo Bilang Paraligtas
16. (a) Sa anong mga paagi ginamit ni Jehova si Moises tanganing iligtas an Israel? (b) Segun sa Exodo 14:13, siisay an Gikanan nin kaligtasan?
16 Kan huring banggi ninda bago an lagdoan na pagharale, nameligro nanggad an nagkapira sa mga aki ni Israel. Dai na mahahaloy, maagi sa daga nin Egipto an anghel nin Dios tanganing gadanon an gabos na panganay. Sinabihan ni Jehova si Moises na maliligtas an mga panganay kan Israel kun kukuanon kan mga Israelita an dugo kan kordero kan Paskua asin iwiwirik iyan sa itaas kan pinto asin sa mga harigi kaiyan. (Ex. 12:1-13, 21-23) Iyan nanggad an nangyari. Dai nahaloy, nameligro nin grabe an bilog na nasyon. Sinda nalaom sa pag-oltanan kan Dagat na Pula asin kan naglalapag na mga karuwahe de guerra kan mga Egipcio. Ilinigtas giraray sinda ni Jehova paagi ki Moises, na milagrosong binanga an katubigan kan dagat na iyan.—Ex. 14:13, 21.
17, 18. Sa anong mga paagi na si Jesus paraligtas na orog kisa ki Moises?
17 Minsan ngani dakula an mga gibong iyan nin pagliligtas, orog nanggad na dakula an pagliligtas na ginibo ni Jehova paagi ki Jesus. Si Jesus an paagi tanganing an mga makinuyog mapatalingkas sa kaoripnan sa kasalan. (Roma 5:12, 18) Asin an kaligtasan na iyan “daing katapusan na kaligtasan.” (Heb. 9:11, 12) An ngaran na Jesus nangangahulogan na “Si Jehova an Kaligtasan.” Bilang Paraligtas niato, dai sana kita iliniligtas ni Jesus sa nakaaging mga kasalan niato kundi binubuksan man nia an dalan tanganing magkamit kita nin mas marahay na ngapit. Paagi sa pagpatalingkas ni Jesus sa sainda sa kaoripnan sa kasalan, iliniligtas nia an saiyang mga parasunod sa grabeng kaanggotan nin Dios asin dinadara nia sinda sa may pagkamoot na relasyon ki Jehova.—Mat. 1:21.
18 Pag-abot kan itinalaan na panahon, magigin kaiba sa itinatao ni Jesus na katalingkasan sa kasalan an katalingkasan sa mamondong mga epekto kaiyan—an helang asin kagadanan pa ngani. Tanganing maimahinar an magigin kahulogan kaiyan, isip-isipa an nangyari kan si Jesus magduman sa harong nin sarong lalaki na an ngaran Jairo, na nagadanan nin 12 anyos na aking babae. Sinierto giraray ni Jesus ki Jairo: “Dai ka matakot, magtubod ka sana, asin sia maliligtas.” (Luc. 8:41, 42, 49, 50) Kaoyon kan mga tataramon nia, an daragita nabuhay liwat! Naiimahinar daw nindo an kagayagayahan kan mga magurang nia? Kun siring, igwa kamo nin ideya dapit sa nakakalabing marhay na kagayagayahan na mapapasato kun ‘an gabos na nasa mga lolobngan na girumdoman makadangog na kan tingog ni Jesus asin magruluwas na’ sa pagkabuhay liwat. (Juan 5:28, 29) Totoo nanggad, si Jesus an Paraligtas niato!—Basahon an Gibo 5:31; Tito 1:4; Kap. 7:10.
19, 20. (a) Ano an epekto sa sato kan paghorophorop sa papel ni Jesus bilang an Saro na Orog Kisa ki Moises? (b) Ano an pag-oolayan sa sunod na artikulo?
19 Huling aram niato na puede kitang makatabang sa mga tawo na makinabang sa nagliligtas na mga gibo ni Jesus, napapahiro kita na makikabtang sa paghuhulit asin pagtotokdo. (Isa. 61:1-3) Dugang pa, an paghorophorop sa papel ni Jesus bilang an Saro na Orog Kisa ki Moises nakakapakosog sa pagsarig niato na ililigtas nia an mga parasunod nia kun mag-abot na sia tanganing hokoman an mga maraot.—Mat. 25:31-34, 41, 46; Kap. 7:9, 14.
20 Iyo, si Jesus an Saro na Orog Kisa ki Moises. Naggibo sia nin dakol na makangangalas na bagay na nungkang magigibo ni Moises. May epekto sa bilog na pamilya nin tawo an mga tataramon ni Jesus bilang propeta asin an mga ginibo nia bilang parapangoltanan. Bilang Paraligtas, an itinatao ni Jesus bakong temporaryo kundi daing sagkod na kaligtasan para sa mababalukat na katawohan. Pero, dakol pa an manonodan manongod ki Jesus paagi sa maimbod na mga tawo kan suanoy. Pag-oolayan sa sunod na artikulo kun paanong sia an Saro na Orog Kisa ki David asin an Saro na Orog Kisa ki Salomon.
Ikakapaliwanag daw Nindo?
Paanong si Jesus orog kisa ki Moises bilang
• propeta?
• parapangoltanan?
• paraligtas?
[Mga Hapot Para sa Pag-adal]
[Kahon/Ritrato sa pahina 26]
Iba Pang Paagi na si Jesus Arog ni Moises
□ Parehong binayaan an halangkaw na mga katongdan tanganing paglingkodan si Jehova asin an banwaan nia.—2 Cor. 8:9; Fil. 2:5-8; Heb. 11:24-26.
□ Parehong naglingkod bilang mga linahidan, o ‘cristo.’—Mar. 14:61, 62; Juan 4:25, 26; Heb. 11:26.
□ Parehong nagrepresentar sa ngaran ni Jehova.—Ex. 3:13-16; Juan 5:43; 17:4, 6, 26.
□ Parehong nagpaheling nin kahoyoan.—Bil. 12:3; Mat. 11:28-30.
□ Parehong nagpakakan sa mga kadaklan.—Ex. 16:12; Juan 6:48-51.
□ Parehong naglingkod bilang hokom asin paratao nin ley.—Ex. 18:13; Mal. 4:4; Juan 5:22, 23; 15:10.
□ Parehong pinagkatiwalaan nin pagkapayo sa kamag-anakan nin Dios.—Bil. 12:7; Heb. 3:2-6.
□ Parehong ilinadawan bilang maimbod na mga saksi ni Jehova.—Heb. 11:24-29; 12:1; Kap. 1:5.
□ Pagkagadan ni Moises asin kan tawong si Jesus, itinago nin Dios an hawak ninda.—Deut. 34:5, 6; Luc. 24:1-3; Gibo 2:31; 1 Cor. 15:50; Jud. 9.