E haafaufaa anaˈe i te Mose rahi
E haafaufaa anaˈe i te Mose rahi
“E faatupu to outou Atua ra o te Fatu i te hoê peropheta na outou, no roto i to outou mau taeae na, mai ia ˈu nei te huru; oia ta outou e faaroo atu.”—OHI. 3:22.
1. Eaha to Iesu Mesia mana i nia i te tuatapaparaa?
A PITI tausani matahiti aˈenei, ua fanauhia mai te hoê tamaroa, e e rave rahi roa melahi i nia i te raˈi tei arue i te Atua, ta te tahi mau tiai mamoe ïa i faaroo atu. (Luka 2:8-14) E 30 matahiti i muri aˈe, ua haamata taua tamarii ra, e taata paari i teie nei, i ta ˈna taviniraa e toru matahiti noa e te afa i te maoro, o tei taui râ i te tuatapaparaa. Teie ta te taata tuatapapa tuiroo no te senekele 19, o Philip Schaff, i parau no taua taata apî ra: “Aita oia i papai i te tahi noa ˈˈe pereota, mea rahi aˈe râ tei papaihia no nia ia ˈna, e ua horoa oia i te mau manaˈo tumu no te mau aˈoraa, oreroraa, aparauraa, buka aivanaa, ohipa rimaî, e himene arueraa rahi aˈe i ta te taatoaraa o te mau taata rahi no tahito ra e no teie tau.” O Iesu Mesia hoi taua taata apî taa ê ra.
2. Eaha ta te aposetolo Ioane i parau no nia ia Iesu e ta ˈNa taviniraa?
2 Ua papai te aposetolo Ioane i te taviniraa a Iesu e ua parau oia ei faaotiraa e: “E rave rahi â ta Iesu peu i rave, ahiri i hope atoa i te papaihia, te manaˈo nei au, e ore e tia i to te ao atoa nei ia farii mai i taua mau buka ra, ahiri i papaihia.” (Ioa. 21:25) Ua ite Ioane e e nehenehe ta ˈna e papai i te tahi noa tuhaa iti o te taatoaraa o ta Iesu i parau e i rave i te roaraa o tera na matahiti ohipa e toru e te afa. E faufaa iti rahi râ to te mau tupuraa rahi ta Ioane i papai i roto i ta ˈna Evanelia.
3. E nafea tatou e maramarama ˈtu â ˈi i te tuhaa a Iesu i roto i te opuaraa a te Atua?
3 Hau atu i na Evanelia faufaa e maha, te horoa ra te tahi atu mau irava bibilia i te tahi mau haamaramaramaraa no nia i to Iesu oraraa o te haapaari i to tatou faaroo. Ei hiˈoraa, i roto i te tahi mau faatiaraa bibilia o te tahi mau tane haapao maitai, tei ora hou ia Iesu, te vai ra te tahi mau tatararaa o te haamaramarama ˈtu â ia tatou i te tuhaa a Iesu i roto i te opuaraa a te Atua. E hiˈo mai tatou vetahi o ratou.
Te tahi mau taata no te Atua o tei faataipe i te Mesia
4, 5. O vai tei faahohoˈa ia Iesu, e mea nafea?
4 Te faahiti ra Ioane e na papai Evanelia ê atu e toru ia Mose, ia Davida, e ia Solomona o tei faahohoˈa ia Iesu mai Tei faatavaihia e te Atua e te Arii no a muri aˈe. Mea nafea to tera mau tavini a te Atua i tahito ra i te horoaraa i te mau faahohoˈaraa no nia ia Iesu, e eaha ta teie mau faatiaraa e haapii maira?
5 Te parau poto noa maira te Bibilia e e peropheta, e arai, e e faaora o Mose. O Iesu atoa. E tiai mamoe e e arii o Davida tei upootia i nia i te mau enemi o Iseraela. O Iesu atoa, e tiai mamoe ïa e e arii upootia. (Ezek. 37:24, 25) A vai taiva ore noa ˈi oia, e faatere paari o Solomona e ua fanaˈo Iseraela i te hau i raro aˈe i ta ˈna faatereraa. (Arii 1, 4:25, 29) Ua hope atoa Iesu i te paari e ua parauhia o ˈna “te Arii no te hau.” (Isa. 9:6) Mea maramarama, te hohoˈa ra ta te Mesia ra o Iesu tuhaa e ta tera mau tane i tahito ra, e tuhaa rahi aˈe râ ta Iesu i roto i te opuaraa a te Atua. Na mua, e faaau tatou ia Iesu e ia Mose, a hiˈo atu ai e nafea taua faaauraa ra e tauturu ai ia tatou ia taa ˈtu â i ta Iesu tuhaa i roto i te opuaraa a te Atua.
Mose—tei na mua ˈtu ia Iesu
6. Mea nafea to te aposetolo Petero faataaraa i te faufaaraa ia faaroo ia Iesu?
6 I muri iti aˈe i te Penetekose 33 T.T., ua faahiti te aposetolo Petero i te hoê parau tohu a Mose, tei tupu i nia ia Iesu Mesia. Te tia ra Petero i mua i te hoê nahoa ati Iuda i roto i te hiero. Ua “maere rahi” te taata i to Petero raua Ioane faaoraraa i te hoê taata ani taoˈa, e pirioi mai te fanauraa mai, e ua horo anaˈe ra e hiˈo i te ohipa i tupu. Ua faataa Petero e maoti te varua moˈa o Iehova e ohipa ra na roto ia Iesu Mesia i tupu ai teie ohipa maere. E ua faahiti atura oia i te mau Papai Hebera: “Ua parau hoi Mose i te feia tupuna ra e, E faatupu to outou Atua ra o te Fatu i te hoê peropheta na outou, no roto i to outou mau taeae na, mai ia ˈu nei te huru; oia ta outou e faaroo atu i te mau parau atoa ta ˈna e parau mai ia outou na.”—Ohi. 3:11, 22, 23; a taio i te Deuteronomi 18:15, 18, 19.
7. No te aha e taa ˈi i te feia e faaroo ra ia Petero ta ˈna i parau no nia i te hoê peropheta rahi aˈe ia Mose?
7 Ua ite paha te feia e faaroo ra ia Petero i tera mau parau a Mose. Ei ati Iuda, mea haafaufaa roa na ratou ia Mose. (Deut. 34:10) I tiai ru na ratou ia haere mai te hoê peropheta rahi aˈe ia Mose. E ere taua peropheta ra i te hoê Mesia noa, tei faatavaihia e te Atua mai ia Mose, o te Mesia râ, “te Mesia oia te here” maitihia a Iehova.—Luka 23:35; Heb. 11:26.
Tuearaa i rotopu ia Iesu e ia Mose
8. Eaha te tahi mau tuearaa i rotopu i te oraraa o Mose e to Iesu?
8 I roto i te tahi mau tuhaa, ua hohoˈa te oraraa i te fenua o Iesu e to Mose. Ei hiˈoraa, ei aiû, ua ora ˈtu raua e piti atoa i te pohe i te rima o te hoê faatere haavî. (Exo. 1:22–2:10; Mat. 2:7-14) Hau atu â, ‘ua tiihia’ raua e piti atoa “i Aiphiti.” Ua parau te peropheta Hosea e: “I vai tamarii noa na Iseraela i aroha ˈtu ai au ia ˈna; e ua tii au i tau tamaiti i Aiphiti.” (Hos. 11:1) Te haamanaˈo ra ta Hosea mau parau i te tau i arataihia ˈi te nunaa Iseraela e Mose, ta te Atua i faatoroa, i rapaeau ia Aiphiti. (Exo. 4:22, 23; 12:29-37) Aita râ ta Hosea mau parau e faahiti noa ra i te hoê tupuraa i tahito ra, no a muri aˈe atoa râ. E parau tohu ta ˈna mau parau o tei tupu i to Iosepha raua Maria faarueraa ia Aiphiti e o Iesu i muri aˈe i te poheraa o te arii Heroda.—Mat. 2:15, 19-23.
9. (a) Eaha te tahi mau semeio ta Mose e ta Iesu i faatupu? (b) A faahiti i te tahi atu â tuearaa i rotopu ia Iesu e ia Mose. (A hiˈo i te tumu parau tarenihia “Tuearaa hau i rotopu ia Iesu e ia Mose,” i te api 25.)
9 Ua faatupu Mose e Iesu atoa i te mau semeio, e haapapuraa ïa e i turu na Iehova ia raua. Ia au i te Bibilia, o Mose te taata matamua tei faatupu i te mau semeio. (Exo. 4:1-9) Ei hiˈoraa, ua faatupu Mose i te mau semeio no nia i te pape i to ˈna faaueraa ia riro te pape o te Nil e te mau pape hopuna ei toto, i te taa-ê-raa te miti Uteute, e te taheraa mai te pape mai roto mai i te mato i roto i te medebara. (Exo. 7:19-21; 14:21; 17:5-7) Ua faatupu atoa Iesu i te semeio no nia i te pape. Ta ˈna semeio matamua roa, o te tauiraa ïa i te pape ei uaina i te hoê oroa faaipoiporaa. (Ioa. 2:1-11) I muri aˈe, ua tamǎrû oia i te miti arepurepu no Galilea. E i te hoê mahana, ua haere atoa oia na nia i te miti! (Mat. 8:23-27; 14:23-25) Te vai ra te tahi atu â tuearaa i rotopu ia Mose e te Mose Rahi ra o Iesu, i roto i te tumu parau tarenihia i te api 25.
A haafaufaa i te Mesia ei peropheta
10. Eaha te hoê peropheta mau, e no te aha e peropheta mai tera ˈi te huru o Mose?
10 Te hoê peropheta no te rahiraa, o te hoê ïa taata o te faaite atea i te tau no a muri aˈe, hoê noa râ tuhaa teie o ta ˈna hopoia. E auvaha faaurua te hoê peropheta mau no Iehova, e faaite haere hoi oia i te mau “peu [aore ra ohipa] taa ê a te Atua.” (Ohi. 2:11, 16, 17) Ei hiˈoraa, e nehenehe oia e faaite atea i te mau mea e tupu a muri aˈe, e faaite i te tahi mau tuhaa o te opuaraa a Iehova, aore ra e faaite haere i te mau haavaraa a te Atua. E peropheta mai tera te huru o Mose. Ua faaite atea oia i na ati ahuru taitahi tei tairi ia Aiphiti. Ua faaite oia i te faufaa o te Ture i Sinai. E ua haapii oia i te nunaa i te hinaaro o te Atua. E haere mai râ te hoê peropheta tei rahi aˈe ia Mose.
11. Mea nafea to Iesu haaraa ei peropheta tei rahi aˈe ia Mose?
11 I muri aˈe, i te senekele matamua H.T.T., ua haa o Zekaria ei peropheta i to ˈna faaiteraa i te opuaraa a te Atua no ta ˈna tamaiti ra o Ioane. (Luka 1:76) Ua riro mai tera tamaiti o Ioane Bapetizo, o tei faaite i te haereraa mai o te peropheta tiai-maoro-hia tei rahi aˈe ia Mose—o Iesu Mesia. (Ioa. 1:23-36) Ei peropheta, ua tohu Iesu e rave rahi mea. Ei hiˈoraa, ua faahiti oia i to ˈna iho poheraa, ua faaite atea e nafea oia e pohe ai, ihea oia e pohe ai, e na vai e haapohe ia ˈna. (Mat. 20:17-19) I te maere o te feia e faaroo ra ia ˈna, ua tohu atoa Iesu i te haamouraa o Ierusalema e to ˈna hiero. (Mar. 13:1, 2) Ua tae roa mai ta ˈna mau parau tohu i to tatou nei tau.—Mat. 24:3-41.
12. (a) Mea nafea to Iesu haamauraa i te niu no te hoê ohipa pororaa i te fenua taatoa? (b) No te aha tatou e pee ai i te hiˈoraa o Iesu i teie mahana?
12 Hau atu â i te haaraa ei peropheta, e taata poro e e orometua haapii o Iesu. Ua poro oia i te parau apî maitai o te Basileia o te Atua, e aita hoê i paraparau aˈenei ma te taiâ ore mai ia ˈna. (Luka 4:16-21, 43) Ei orometua haapii, aita hoê i faito ia ˈna. “Aita roa e taata e au te parau i ta tera aˈera taata,” te parau ïa a vetahi i faaroo ia ˈna. (Ioa. 7:46) E itoito rahi to Iesu i roto i ta ˈna mau tutavaraa i te haaparare i te parau apî maitai, e ua faatupu oia i roto i ta ˈna mau pǐpǐ i te hoê â itoito rahi no te Basileia. No reira, ua haamau oia i te niu no te hoê ohipa pororaa e haapiiraa i te fenua taatoa, o te tamau noa nei. (Mat. 28:18-20; Ohi. 5:42) I te matahiti i mairi aˈenei, fatata e hitu mirioni pǐpǐ a te Mesia tei rave fatata 1 500 000 000 hora i roto i te pororaa i te parau apî maitai o te Basileia e te haapiiraa i te pue parau mau bibilia i te feia e hinaaro ra. Te apiti rahi ra anei oe i taua ohipa ra?
13. Na te aha e tauturu ia tatou ia vai “ara”?
13 Ua faatupu iho â Iehova i te parau tohu e horoa mai i te hoê peropheta mai ia Mose. Eaha ïa te faahopearaa i nia ia oe? Ua rahi atu â anei to oe tiaturi i te tupuraa o te mau parau tohu faaurua tei taaihia i to tatou oraraa no a muri aˈe e fatata roa maira? E tauturu iho â te feruriruriraa i te hiˈoraa o te Mose Rahi ia tatou ia vai ‘ara e ia haapao maitai’ no nia i ta te Atua e fatata i te rave.—Tes. 1, 5:2, 6.
A haafaufaa i te Mesia ei arai
14. Mea nafea Mose i riro ai ei arai i rotopu ia Iseraela e te Atua?
14 Mai ia Mose, e arai Iesu. Ua faaohipa Iehova ia Mose i to ˈna haamauraa i te faufaa o te Ture e o Iseraela. Mai te peu e e auraro te mau tamarii a Iakoba i te mau ture a te Atua, e riro noa ïa ratou ei taoˈa here rahi, ei amuiraa, na te Atua. (Exo. 19:3-8) Ua mana noa taua faufaa ra mai 1513 H.T.T. e tae atu i te senekele matamua T.T.
15. E nafea e arai hau ê ai Iesu?
15 I 33 T.T., ua faaau Iehova i te hoê faufaa maitai aˈe e te hoê Iseraela apî, ‘te Iseraela o te Atua,’ tei riro ei amuiraa o te mau Kerisetiano faatavaihia i te ao nei. (Gal. 6:16) E ture papaihia e te Atua i nia i te pǎpǎ to roto i te faufaa o Mose te arai, ua hau aˈe râ te faufaa o Iesu te arai. Ua papaihia te mau ture o taua faufaa ra e te Atua i nia i te aau o te taata. (A taio i te Timoteo 1, 2:5; Hebera 8:10.) No reira, i teie nei o ‘te Iseraela o te Atua’ te taoˈa here rahi a te Atua, ‘te nunaa o te faahotu mai i te huero’ no te Basileia Mesia. (Mat. 21:43) E feia tufaa te mau melo o taua nunaa pae varua ra i taua faufaa apî ra. E ere râ o ratou noa te faufaahia i te reira. Mea rahi roa, te feia atoa e taoto ra i roto i te pohe, te fanaˈo i te mau haamaitairaa mure ore maoti taua faufaa hau ê ra.
A haafaufaa i te Mesia ei faaora
16. (a) Mea nafea to Iehova faaohiparaa ia Mose no te faaora ia Iseraela? (b) Ia au i te Exodo 14:13, o vai te Tumu o te faaoraraa?
16 I to ratou po hopea hou te Revaraa, te fifi rahi ra vetahi mau tamarii a Iseraela. Ua fatata roa te melahi a te Atua i te na rotopu i te fenua o Aiphiti, e haapohe i te mau matahiapo atoa. Ua parau Iehova ia Mose e e faaorahia te mau matahiapo o Iseraela mai te peu e e rave te mau Iseraela i te toto o te fanauˈa mamoe o te Pasa a parai atu ai i nia i te mau teˈa e te mau pou uputa. (Exo. 12:1-13, 21-23) O te ohipa ïa i tupu. I muri aˈe, o te nunaa taatoa te fifi rahi ra. Ua mau ratou i rotopu i te miti Uteute e te mau pereoo tamaˈi aˈuaˈu a to Aiphiti. Ua horoa â Iehova i te faaoraraa na roto ia Mose, o tei faataa ê semeio i taua miti ra.—Exo. 14:13, 21.
17, 18. E nafea e faaora rahi aˈe ai Iesu ia Mose?
17 E ohipa faaoraraa rahi te reira i tera ra tau, e faaoraraa rahi atu â râ ta Iehova i faatupu na roto ia Iesu. O Iesu te ravea i faatiamâhia ˈi te feia faaroo i te tîtî a te hara. (Roma 5:12, 18) E e ‘faaoraraa mure ore’ tera. (Heb. 9:11, 12) “O Iehova te faaora” te auraa o te iˈoa o Iesu. Aita noa Iesu, to tatou Faaora, e faaora ra ia tatou i ta tatou mau hara tahito, te horoa atoa ra râ i te ravea e fanaˈo ai tatou i te hoê oraraa maitai aˈe no a muri aˈe. Ma te faatiamâ ia ratou i te tîtî a te hara, te faaora ra Iesu i ta ˈna mau pǐpǐ i te riri o te Atua e te tuu ra ia ratou i roto i te hoê taairaa î i te here e o Iehova.—Mat. 1:21.
18 I roto i te faatiamâraa i te hara ta Iesu e horoa ra, e ô atoa mai i te taime i faataahia te tiamâraa i te mau faahopearaa ino roa o te reira—te maˈi e te pohe atoa. No te faahohoˈa i te auraa o te reira, a hiˈo na i te ohipa i tupu i to Iesu haereraa ˈtu i te fare o te tahi taata o Iaeiro te iˈoa, ua pohe hoi ta ˈna tamahine 12 matahiti. Ua parau tamahanahana Iesu ia Iaeiro e: “Eiaha e mǎtaˈu, e faaroo noa mai, e ora ïa oia.” (Luka 8:41, 42, 49, 50) Mai ta ˈna iho â i parau, ua tia mai te potii mai te pohe mai! Eaha paha ïa to ˈna na metua i te oaoa e, e ere anei? Eaha atoa paha ïa tatou i te oaoa rahi ia ‘faaroo te feia atoa i roto i te apoo ra i to Iesu reo e ia haere mai i rapae’ i te tia-faahou-raa. (Ioa. 5:28, 29) E Faaora iho â o Iesu, to tatou Faaora!—A taio i te Ohipa 5:31; Tito 1:4; Apo. 7:10.
19, 20. (a) Eaha te faahopearaa i nia ia tatou ia feruriruri tatou i te tuhaa a Iesu ei Mose Rahi? (b) Eaha ta to muri nei tumu parau e faataa mai?
19 Te iteraa e e nehenehe tatou e tauturu i te taata ia faufaahia i te mau ohipa faaora a Iesu, e turai ïa ia tatou ia apiti i te ohipa pororaa e haapiiraa. (Isa. 61:1-3) Hau atu â, ia feruriruri tatou i te tuhaa a Iesu ei Mose Rahi, e tiaturi atu â tatou e e faaora oia i ta ˈna mau pǐpǐ ia haere mai oia e faatupu i ta ˈna haavaraa i nia i te feia iino.—Mat. 25:31-34, 41, 46; Apo. 7:9, 14.
20 Oia, o Iesu te Mose Rahi. Mea rahi te ohipa faahiahia ta ˈna i rave aita roa ˈtu i tia ia Mose ia rave. E ohipa ta Iesu mau parau ei peropheta e ta ˈna mau ohipa ei arai i nia i te fetii taata taatoa. E faaora Iesu i te huitaata e au ia fanaˈo i te taraehara eiaha no te tahi noa taime, e a muri noa ˈtu râ. Mea rahi atu â râ te haapiiraa no nia ia Iesu ta te mau tane taiva ore no tahito ra e horoa mai. E faataa mai to muri nei tumu parau mea nafea oia i te riroraa ei Davida Rahi e ei Solomona Rahi.
E nehenehe anei ta oe e faataa?
E nafea Iesu e rahi aˈe ai ia Mose ei
• peropheta?
• arai?
• faaora?
[Uiraa haapiiraa]
[Tumu parau tarenihia/Hohoˈa i te api 25]
Tuearaa hau i rotopu ia Iesu e ia Mose
◻ O raua e piti tei faarue i te mau tiaraa teitei no te tavini ia Iehova e i to ˈna nunaa.—Kor. 2, 8:9; Phil. 2:5-8; Heb. 11:24-26.
◻ O raua e piti tei tavini ei faatavaihia, aore ra “Mesia.”—Mar. 14:61, 62; Ioa. 4:25, 26; Heb. 11:26.
◻ O raua e piti tei tia ˈtu ma te iˈoa o Iehova.—Exo. 3:13-16; Ioa. 5:43; 17:4, 6, 26.
◻ O raua e piti tei faaite i te haehaa.—Num. 12:3; Mat. 11:28-30.
◻ O raua e piti tei faatamaa i te mau nahoa taata.—Exo. 16:12; Ioa. 6:48-51.
◻ O raua e piti tei haa ei haava e ei horoa ture.—Exo. 18:13; Mal. 4:4; Ioa. 5:22, 23; 15:10.
◻ O raua e piti tei horoahia ˈtu te tiaauraa i nia i te fare o te Atua.—Num. 12:7; Heb. 3:2-6.
◻ O raua e piti tei parauhia ei ite haapao maitai no Iehova.—Heb. 11:24-29; 12:1; Apo. 1:5.
◻ I muri aˈe i te poheraa o Mose e o Iesu, ua haamoe te Atua i to raua tino.—Deut. 34:5, 6; Luka 24:1-3; Ohi. 2:31; Kor. 1, 15:50; Iuda 9.