Oyuk sbalil xkiltik li yabtel Jesús, Li Bankilal Moisese
Oyuk sbalil xkiltik li yabtel Jesús, li Bankilal Moisese
«Li Mucʼul Dios cuʼuntique ta to xacʼ locʼuc jun jʼalcʼop te ta atojolic, jech chac cʼu chaʼal la stʼujun li vuʼune. Xavichʼbeic me ta mucʼ li cʼusi chayalboxuque.» (HECH. 3:22)
1. ¿Bu to kʼalal kʼotem skʼoplal li Jesucristoe?
OY XA van ta chaʼmil jabil vokʼ jun neneʼ ti toj tsots skʼoplale, yuʼun ti kʼalal vokʼe la stijbe yoʼonton epal anjeletik ta smuyubtael Jeova, ti laj yaʼi jchabi chijetik li muyubtael taje (Luc. 2:8-14). Kʼalal echʼ 30 jabile chʼi li neneʼ taje, pas ta vinik. Vaʼun lik spas yabtel ti kʼajomal noʼox jalij oxib jabil xchiʼuk oʼlole, ti jaʼ la sjelbe ta jyalel sloʼil xkuxlejal li krixchanoetike. Li Philip Schaff ti jaʼ jun ojtikinbil j-al-loʼil ta siglo 19, xi laj yalbe skʼoplale: «Akʼo mi muʼyuk la stsʼiba jcholuk tsʼib, mas to ep kʼusi la spas ta skotol li pʼijil viniketike, yuʼun la stij oʼontonal ta yalel mantaletik, orasionetik, kʼusitik skʼan nabel skʼoplal, yichʼoj tsʼibael epal livroetik, kʼusitik sventa pʼijilal xchiʼuk kʼejojetik sventa kʼupil kʼoptael». Li krixchano chkalbetik skʼoplal ti stuk xa noʼox jeche jaʼ li Jesucristoe.
2. ¿Kʼusi laj yal jtakbol Juan ta sventa Jesús xchiʼuk ta sventa li chol mantal la spase?
2 Jun li loʼil ti laj yichʼ tsʼibael ta sventa li chol mantal la spas Jesuse jaʼ li kʼusi chal ta s-Evanjelio Juan ti xi tstsuts sloʼile: «Oy to cʼusitic yan ep la spas li Jesuse. Ti xquechetuc laj yichʼ tsʼibael ta vun scotole, ta jnop ti mu xlaj ochuc ta banamil yepal vunetic ti jechuque» (Juan 21:25). Jech, li jtakbol Juane snaʼoj ti mu stakʼ tsʼibabil xkom skotol li kʼusi laj yal xchiʼuk la spas Jesús li oxib jabil xchiʼuk oʼlol ti toj tsots skʼoplale. Akʼo mi jech, li kʼusi echʼ ta xkuxlejal ti te chal ta s-Evanjelioe toj echʼ xa noʼox ep sbalil.
3. ¿Kʼuxi xuʼ xkaʼibetik lek smelolal li kʼusi yabtel Jesús sventa xkʼot ta pasel li kʼusi tskʼan tspas Diose?
3 Maʼuk noʼox li chanib Evanjelioetik chalbutik skʼoplal Jesuse, moʼoj, yuʼun oy to yantik loʼiletik ta Vivlia ti chalbe lek skʼoplal xkuxlejal xtoke, li kʼusitik taje xuʼ me stsatsubtasutik ta mantal. Jech kʼuchaʼal liʼe, li sloʼil xkuxlejal junantik tukʼil viniketik ti jaʼ baʼyel kuxiike tskoltautik ta yaʼibel lek smelolal li yabtel Jesús sventa xkʼot ta pasel li kʼusi tskʼan tspas Diose. Jkʼelbetik skʼoplal junantik.
Tukʼil viniketik ti laj yakʼik ta ilel kʼusi tspas li Cristoe
4, 5. ¿Buchʼutik laj yakʼik ta ilel li kʼusi tspas Jesuse, xchiʼuk kʼu yelan?
4 Li chanib Evanjelioe chal ti Moisés, David xchiʼuk Salomone laj yakʼik ta ilel kʼusi tspas li Jesuse, ti Tʼujbil yuʼun Jeovae xchiʼuk jaʼ li Ajvalil vaʼanbil ta sventa li Ajvalilal yuʼun Diose. ¿Kʼuxi xkoʼolajik xchiʼuk Cristo li tukʼil krixchanoetik ta voʼne taje? ¿Xchiʼuk kʼusi xuʼ jchantik li ta sloʼilal xkuxlejalike?
5 Li Vivliae chal ti jaʼ jun j-alkʼop echʼ li Moisese, jun jkʼopojel xchiʼuk jun jkoltavanej, taje jaʼ jech xuʼ xkaltik ta sventa li Jesús eke. Li Davide jaʼ jun jchabi chij echʼ xchiʼuk jun ajvalil ti ep ta velta la stsal yajkontratake, jaʼ jech li Jesús eke chchabi li steklumal Diose xchiʼuk jaʼ jun ajvalil ti tspas kanale (Eze. 37:24, 25). Kʼalal tukʼ laj yakʼ sba ta stojolal Dios li Salomone lek pʼij ajvalilaj, vaʼun jaʼ jech ta lekilal kuxi li Israele (1 Rey. 4:25, 29). Li Jesús eke toj echʼ xa noʼox pʼij xchiʼuk jun li sbi ta skotol taje jaʼ «Jʼacʼ-Jun-Oʼntonal» (Isa. 9:6). Jech kʼuchaʼal chkiltike ep kʼusitik xkoʼolaj-o xchiʼuk li yajtuneltak Dios ta voʼnee, pe li yabtel sventa chkʼot ta pasel li kʼusi tskʼan tspas Diose mas to toj tsots skʼoplal. Jkʼeltik baʼyel kʼusi xkoʼolaj-o li Jesús xchiʼuk Moisese. Yuʼun me jaʼ jech xuʼ oy mas sbalil xkiltik li yabtel xNichʼon Diose.
Li Moisese jaʼ baʼyel echʼ ta chʼiel yuʼun li Jesuse
6. ¿Kʼuxi laj yal Pedro ti tsots skʼoplal skʼan xkichʼbetik ta mukʼ li kʼusi chal Jesuse?
6 Jkʼeltik jun albil kʼop yuʼun Moisés ti laj yal jtakbol Pedro ti jaʼ skʼoplal Jesucristoe, laj yal ta stojolal epal judioetik ti jaʼo te oyik ta chʼulnae. Taje jaʼo kʼot ta pasel kʼalal jutuk toʼox yechʼel li Pentecostés ta sjabilal 33, jaʼo ti kʼalal la xpoxtaik jun jkʼan limuxna vinik li Pedro xchiʼuk Juane, li vinik taje alubem yakan ivokʼ. Kʼalal lik xanavuke chʼayal to kʼot yoʼonton li krixchanoetike, «toj labal sba laj yilic», vaʼun bat skʼelik ta anil li jtakboletik sventa snaʼik ti kʼuxi kʼot ta pasele. Laj une li Pedroe laj yalbe smelolal ti jaʼ ta xchʼul espiritu Jeova li skʼelobil juʼelal taje, ti akʼbil yuʼun Jeova ta stojolal Jesucristoe. Vaʼun lik yal jun albil kʼop ta Tsʼibetik ta Hebreo Kʼop xchiʼuk laj yal ti jaʼ skʼoplal Jesucristoe. Xi laj yale: «Li Moisese jech laj yalbe li jmoltotactic ta voʼonee: “Li Mucʼul Dios cuʼuntique ta to xacʼ locʼuc jun jʼalcʼop te ta atojolic, jech chac cʼu chaʼal la stʼujun li vuʼune. Xavichʼbeic me ta mucʼ li cʼusi chayalboxuque”» (Hech. 3:11, 22, 23; kʼelo Deuteronomio 18:15, 18, 19).
7. ¿Kʼu yuʼun xojtikinik lek li kʼusi laj yal Pedro li buchʼutik te chaʼiik li kʼusi chale?
7 Li buchʼutik yakal chaʼiik li kʼusi chal Pedroe xojtikinik van lek li albil kʼop taje. Ta skoj ti jaʼ judioetik li krixchanoetike, stsakojik lek ta mukʼ li Moisese xchiʼuk ta sjunul yoʼonton smalaojik li j-alkʼop ti albil skʼoplale, ti jaʼ mas bankilal yuʼun Moisese (Deu. 34:10). Ti xkaltike jaʼ mesías echʼ li Moisese, yuʼun jaʼ ti laj yichʼ tʼujel yuʼun Diose. Pe li j-alkʼop ta mas tsʼakale maʼuk noʼox jech chichʼ tʼujel kʼuchaʼal li Moisese, moʼoj, yuʼun jaʼ Mesías, «jaʼ Cristo ti tʼujbil yuʼun Diose» (Luc. 23:35; Heb. 11:26).
Kʼuxi xkoʼolaj xchiʼuk Moisés li Jesuse
8. ¿Kʼusitik xkoʼolaj-o xchiʼuk Moisés li Jesuse?
8 Ep kʼusi xkoʼolaj-o xkuxlejal Jesús li xkuxlejal Moisese. Jech kʼuchaʼal liʼe, kʼalal neneʼik toʼoxe jutuk xa mukʼ xchamik ta skʼob jun simaron ajvalil (Éxo. 1:22–2:10; Mat. 2:7-14). Jech xtok, ta smantal Dios lokʼ ta Egipto xchaʼvoʼalik. Xi la stsʼiba kʼusi yaloj Jeova li j-alkʼop Osease: «Cʼalal biqʼuit toʼox li Israele, toj lec jcʼanoj. Cʼalal te oy ta Egipto li jnichʼone, laj quicʼ loqʼuel tal» (Ose. 11:1). Ti vaʼ yelan laj yale jaʼ skʼoplal ti kʼalal laj yikʼ lokʼel xnichʼon li Jeovae, jaʼ li steklumal Israel kʼalal lokʼ ta Egipto ti jaʼ jbabe echʼel yuʼunik li Moisese, jaʼ li yajtunel svaʼanoje (Éxo. 4:22, 23; 12:29-37). Akʼo mi jech, li kʼusi laj yal Osease maʼuk noʼox te tsuts-o skʼoplal, yuʼun oy to kʼusi chkʼot ta pasel ta tsʼakal: jaʼ ti lokʼik ta Egipto xchiʼuk Jesús li José xchiʼuk María kʼalal cham xaʼox li ajvalil Herodese (Mat. 2:15, 19-23).
9. 1) ¿Kʼusi skʼelobiltak juʼelal la spasik li Moisés xchiʼuk Jesuse? 2) ¿Kʼusitik yan xkoʼolajik-o? (kʼelo li rekuadro «Yan kʼusitik xkoʼolajik-o li Moisés xchiʼuk Jesuse», ta pajina 26.)
9 Li Moisés xchiʼuk Jesuse la spasik skʼelobiltak juʼelal, jaʼ jech laj yakʼik ta ilel ti koltabilik yuʼun Jeovae. Jech kʼuchaʼal chal li sKʼop Diose, li Moisese jaʼ li baʼyel krixchano ti jech la spase (Éxo. 4:1-9). Oy jayib li skʼelobiltak juʼelal la spase jaʼ ta sventa voʼ. Jech kʼuchaʼal liʼe, ta skoltaobba Jeova la skʼatajes ta chʼichʼ li ukʼum Niloe xchiʼuk li bu tsʼanajtike, la xchʼak sba yuʼun li Tsajal Nabe xchiʼuk la slokʼes voʼ ta chʼen ta taki xokol balumil (Éxo. 7:19-21; 14:21; 17:5-7). Ep la spas skʼelobiltak juʼelal ta voʼ ek li Jesuse. Jech, li baʼyel skʼelobil juʼelal la spase jaʼ ti la skʼatajes ta yaʼlel tsʼusub li voʼ ta jun skʼinal nupunele (Juan 2:1-11). Jech xtok, la spajes li yukʼlajetel nab ta Galileae xchiʼuk xanav ta ba voʼ (Mat. 8:23-27; 14:23-25). Li ta rekuadro ta yan pajinae te chkiltik yan kʼusitik xkoʼolajik-o li Moisés xchiʼuk Jesuse, li Bankilal Moisese.
Li j-alkʼop Jesuse
10. 1) ¿Kʼusi yabtel la spas li j-alkʼopetike? 2) ¿Kʼu yuʼun xuʼ xkaltik ti jaʼ jun j-alkʼop echʼ li Moisese?
10 Mas ep li krixchanoetik ti tsnopik ti jaʼ noʼox chalik kʼusi chkʼot ta pasel ta mas tsʼakal li j-alkʼopetike, pe ti kʼusie maʼuk noʼox yabtelik taje. Li j-alkʼopetike jaʼ jkʼopojeletik yuʼun Jeova xchiʼuk ti chalik echʼel «li cʼusitic toj labal sba tspas li Diose» (Hech. 2:11, 16, 17). Maʼuk noʼox chalik li kʼusi chkʼot ta pasel ta mas tsʼakale, yuʼun chalik echʼel ep ta tos li kʼusi tskʼan tspas Diose xchiʼuk chakʼik ta ojtikinel li chapanel chakʼe. Jaʼ jech echʼ li Moisese. Li stuke kak laj yalbe skʼoplal li jujutos vokolil tsnuptan Egiptoe. Jaʼ la sjelubtas li trato la spas Jeova xchiʼuk j-israeletik ta vits Sinaie xchiʼuk laj yakʼbe yil kʼusi tskʼan yoʼonton li Diose. Akʼo mi jech, te to chtal maʼ li bankilal j-alkʼope.
11. ¿Kʼu yuʼun chkaltik ti jaʼ mas bankilal j-alkʼop yuʼun Moisés li Jesuse?
11 Li ta baʼyel siglo kʼalal skʼan toʼox jkʼakʼaliltike, li Zacarías ti jaʼ stot li Juan J-akʼvanej ta voʼe, tun ta j-alkʼop kʼalal laj yalbe skʼoplal li skereme xchiʼuk ti laj yalbe skʼoplal li kʼusi tskʼan Dios ta sventae (Luc. 1:76). Jech li Juan J-akʼvanej ta voʼ eke, laj yalbe skʼoplal li j-alkʼop ti malabil tajek ti albil skʼoplal yuʼun Moisese: jaʼ li Jesucristoe (Juan 1:23-36). Jech li Jesús eke tun ta j-alkʼop, yuʼun ep kʼusitik laj yalbe skʼoplal. Jech kʼuchaʼal liʼe, laj yalbe skʼoplal li slajele, bu chcham, kʼuxi chcham xchiʼuk buchʼutik ti chmilvanike (Mat. 20:17-19). Jech xtok, laj yalbe skʼoplal ti chichʼ jinesel li Jerusalén xchiʼuk li chʼulna tee, toj labal to laj yaʼiik li buchʼutik te chaʼiike (Mar. 13:1, 2). Xchiʼuk yakal chkʼot ta pasel ta jkʼakʼaliltik jlom li kʼusitik kak yalojbe skʼoplale (Mat. 24:3-41).
12. 1) ¿Kʼuxi la slikes Jesús li abtelal ti kʼotem xa ta spʼejel Balumile? 2) ¿Kʼuxi xuʼ jchanbetik stalelal li Jesuse?
12 Maʼuk noʼox laj yalbe skʼoplal kʼusitik chkʼot ta pasel li Jesuse, moʼoj, yuʼun la xchol mantal xchiʼuk chanubtasvan. Mu kʼusi xkoʼolaj-o ti ta sjunul yoʼonton la xchol li lekil aʼyeje xchiʼuk laj yalbe skʼoplal li Ajvalilal yuʼun Diose (Luc. 4:16-21, 43). Jech mu kʼusi xkoʼolaj-o xtok ti kʼuyelan chanubtasvane. Jaʼ yuʼun, oy buchʼutik xi laj yalik ta stojolale: «Me junuc cristiano muʼyuc bochʼo jech chloʼilaj jech chac cʼu chaʼal li vinic leʼe» (Juan 7:46). Toj xkuxet noʼox yoʼonton la xchol li lekil aʼyej sventa Ajvalilal yuʼun Diose xchiʼuk jaʼ jech xkuxet noʼox yoʼonton la xcholik mantal ek li yajtsʼaklomtake. Jaʼ jech lik spas talel li abtelal ta chol mantal ti kʼotem xa ta spʼejel Balumile xchiʼuk ti yakal-o chichʼ pasel ta jkʼakʼaliltike (Mat. 28:18-20; Hech. 5:42). Te van vukubuk miyon krixchanoetik la xcholik mantal 1,500 miyon ora li echʼ jabile xchiʼuk la xchanubtasik ta Vivlia li krixchanoetike. ¿Mi ta sjunul avoʼonton yakal cha pas li abtelal liʼe?
13. ¿Kʼusi tskoltautik sventa lekuk vikʼil jsatik?
13 Jamal lek xvinaj ti kʼot ta pasel yuʼun Jeova li kʼusi yaloje, ti la svaʼan jun j-alkʼop ti xkoʼolaj kʼuchaʼal Moisese. ¿Kʼusi cha nop ta sventa taje? ¿Mi mu jaʼuk mas cha pat-o avoʼonton yaʼel li albil kʼopetik ti poʼot xa xkʼot ta pasele? ¡Jaʼ ta melel! Mi ta jnopbetik lek skʼoplal li Bankilal Moisese, jaʼ me tskoltautik ti vikʼiluk jsatike, ti pʼijukutik leke xchiʼuk ti oy lek ta jol koʼontontik li kʼusi poʼot xa spas Diose (1 Tes. 5:2, 6).
Jaʼ jkʼopojel kuʼuntik li Cristoe
14. ¿Kʼuxi kʼot ta jelubtasej trato li Moisés ti la spas Jeova xchiʼuk j-israeletike?
14 Jaʼ jkʼopojeletik echʼ li Jesús xchiʼuk Moisese. Li yabtel jun jkʼopojele jaʼ ti chetʼes kʼope. Jaʼ Moisés la sjelubtas li trato la spas Jeova xchiʼuk j-israeletike, jaʼ tun ta jkʼopojel. Li j-israeletik taje jaʼ chkʼotik ta steklumal Dios ti stuk noʼox jech mi chchʼunbeik li smantaltak Diose, chkʼotik ta stsobobbail (Éxo. 19:3-8). Li trato taje lik skʼoplal ta sjabilal 1513 kʼalal maʼuk toʼox jkʼakʼaliltike, jaʼ to te kʼot ta tsutsel ta baʼyel siglo ta jkʼakʼaliltik.
15. ¿Kʼu yuʼun chkaltik ti jaʼ mas to x-echʼ skʼoplal ta jkʼopojel li Jesús ti jaʼ mu sta li Moisese?
15 Li ta sjabilal 33 ta jkʼakʼaliltike la spas trato xchiʼuk jun achʼ jteklum li Jeovae, li «Israel [...] ta sventa Diose», taje kʼot ta stsobobbail ta spʼejel Balumil yajtsʼaklomtak Cristo ti yichʼojik tʼujele (Gál. 6:16). Li baʼyel trato la spas Jeovae —ti jaʼ jkʼopojel echʼ li Moisese— te tsakal tal skʼoplal mantaletik ti ta ton tsʼibabile. Pe li achʼ tratoe —ti jaʼ jkʼopojel li Jesuse— jaʼ mas to toj tsots skʼoplal, yuʼun li mantaletike ta oʼontonal la stsʼiba li Diose (kʼelo 1 Timoteo 2:5 xchiʼuk Hebreos 8:10). Li «Israel [...] ta sventa Diose» jaʼ xa yuʼun Dios ti stuk noʼox jeche, yuʼun lek stukʼulanojbeik skʼoplal li Ajvalilal yuʼun Mesiase (Mat. 21:43). Li buchʼutik te skʼoplalik ta achʼ tratoe jaʼ li buchʼutik te skʼoplalik ta «Israel [...] ta sventa Diose», pe taje maʼuk noʼox tstabeik sbalil: tstabeik sbalil yantik epal krixchanoetik xchiʼuk ta smiyonal noʼox tstabeik sbalil ek li buchʼutik chamemike, yuʼun tstaik epal bendisionetik sbatel osil ta skoj li trato laj kaltik ti stuk noʼox jeche.
Jaʼ Jpojvanej kuʼuntik li Jesuse
16. 1) ¿Kʼusi ora la stunes Moisés li Jeova sventa tspoj li steklumale? 2) Jech kʼuchaʼal chal Éxodo 14:13, ¿buchʼu skʼan stojbeik ta vokol yajtuneltak Dios li pojelale?
16 Kʼalal slajeb xaʼox akʼobal te kom ta Egipto li Israele, laj yichʼ albel jun anjel ti akʼo smilbe skotol li sba xnichʼnabtak krixchanoetik li ta lum taje, jaʼ yuʼun li xnichʼnabtak j-israeletike oyik ta vokolil. Li Jeovae laj yalbe steklumal ta stojolal Moisés ti jaʼ noʼox ta xkolik mi la sbonbeik xchʼichʼel chʼiom tot chij ta sventa kʼin Koltael li smarkoal stiʼ snaike (Éxo. 12:1-13, 21-23). Li j-israeletike la xchʼunik li mantale, jaʼ yuʼun kol li yalab xnichʼnabike. Kʼalal lokʼik xaʼox li ta lume mu xa snaʼ kʼusi tspasik, yuʼun te makik ta Tsajal Nab xchiʼuk ti te xa xtal li soltaroetik ti nutsvanemik tale. Jaʼ yuʼun pojatik yan velta yuʼun Jeova ta stojolal Moisés xtok, ta skʼelobil juʼelal la xchʼak li nabe (Éxo. 14:13, 21).
17, 18. ¿Kʼu yuʼun xuʼ xkaltik ti jaʼ mas mukʼta jkoltavanej kuʼuntik li Jesús ti jaʼ mu sta li Moisese?
17 Akʼo mi toj labal xa noʼox sba ti kʼuyelan kolik taje, pe mi jaʼuk xkoʼolaj ti kʼuchaʼal koltavan li Jeova ta stojolal xNichʼone. Jaʼ ta stojolal Jesús ti laj yichʼik pojel lokʼel ta mulil li jchʼunej mantal krixchanoetike (Rom. 5:12, 18). «Jʼechʼel la smanutic o.» (Heb. 9:11, 12.) Jech onoʼox, li sbi Jesuse jaʼ skʼan xal «Jaʼ Chpojvan li Jeovae, [NM]». Li Cristo ti jaʼ Jpojvanej kuʼuntike maʼuk noʼox la skoltautik ta xkuchel li alal ikatsil ta skoj li kʼusi chopol jpasojtike, yuʼun skoltaojutik xtok sventa jkʼupintik lek li kuxlejal ta mas tsʼakale. Kʼalal la skoltautik lokʼel ta mulil li Jesuse, la skoltautik lokʼel li ta skʼakʼal yoʼonton Dios xtoke xchiʼuk ti lekuk xkil jbatik xchiʼuke (Mat. 1:21).
18 Li pojel ta skoj jmultike jaʼ skʼan xal ti laj kichʼtik pojel lokʼel li ta chamele xchiʼuk li ta lajele, jaʼ ti kʼusi chkʼot ta pasel yuʼun li mulile. Sventa jnaʼtik lek li kʼusi ta jtatik kʼalal mi kʼot ta pasel yuʼun Dios li kʼusi xchapanoj xae, nopo avaʼi kʼusi kʼot ta pasel kʼalal ay ta sna Jairo li Jesuse, yuʼun li stseb ti yichʼoj lajcheb jabile naka toʼox cham. Xi albat ta melel li Jairoe: «Mu xavat avoʼnton. Jaʼ noʼox tscʼan oy xchʼunojel avoʼnton, ta xcol li atsebe» (Luc. 8:41, 42, 49, 50). Kʼot ta pasel li kʼusi laj yale, yuʼun la xchaʼkuxes li tsebe. ¿Mi xnop xa noʼox avuʼun yaʼel ti kʼu to yelan muyubaj li stot smeʼe? Mi jeche xuʼ me xnop kuʼuntik li mukʼta muyubajel chkaʼitik kʼalal mi laj yaʼibeik yechʼomal ye Jesús xchiʼuk ti chchaʼkuxi «scotol li bochʼotic oyic ta smuquinalique» (Juan 5:28, 29). Ta melel, li Jesuse jaʼ Jpojvanej xchiʼuk Jkoltavanej kuʼuntik (kʼelo Hechos 5:31; Tito 1:4; Apo. 7:10).
19, 20. 1) ¿Kʼuxi ta jtabetik sbalil mi ta jnopbetik skʼoplal li yabtel Jesús, li Bankilal Moisese? 2) ¿Kʼusi chkalbetik skʼoplal li ta yan xchanobile?
19 Xuʼ jkoltatik li krixchanoetik sventa stabeik sbalil ti kʼuyelan pojvan li Jesuse; jaʼ yuʼun ta jcholtik li mantale xchiʼuk ti chi jchanubtasvane (Isa. 61:1-3). Jnoptik li yabtel Jesús —li Bankilal Moisese— sventa xkʼot ta pasel li kʼusi tskʼan tspas Diose; yuʼun me jaʼ jech ta jpat-o lek koʼontontik ti jaʼ tspojutik kʼalal mi la slajes li chopol balumil liʼe (Mat. 25:31-34, 41, 46; Apo. 7:9, 14, Ch).
20 Li Jesuse ep tajek kʼusi labalik sba la spas ti mu jaʼuk onoʼox bu spas yuʼun Moisese; jech oxal ta jbiiltastik ta Bankilal Moisés. Li albil kʼopetik yuʼune xchiʼuk li yabtel la spas ta jkʼopojele staojbe sbalil skotol li krixchanoetike. Li pojelal laj yakʼbutik xtoke maʼuk noʼox sventa jayib jabil, moʼoj, yuʼun jaʼ sventa sbatel osil. Pe oy to yantik yajtuneltak Dios ta voʼne ti ep kʼusi xuʼ xchanubtasutik ta sventa Jesuse. Li ta yan xchanobile te chchap kaʼitik kʼu yuʼun xuʼ jbiiltastik ta Bankilal David xchiʼuk ta Bankilal Salomón li Jesuse.
¿Mi xuʼ xavalbe smelolal?
¿Kʼu yuʼun chkaltik ti jaʼ...
• ... jun bankilal j-alkʼop li Jesús ti jaʼ mu sta li Moisese?
• ... mas to x-echʼ skʼoplal ta jkʼopojel li Jesús ti jaʼ mu sta li Moisese?
• ... mas mukʼta jkoltavanej kuʼuntik li Jesús ti jaʼ mu sta li Moisese?
[Sjakʼobiltak sventa xchanobil]
[Rekuadro ta pajina 26]
YAN KʼUSITIK XKOʼOLAJIK-O LI Moisés xchiʼuk Jesuse
◻ Lek mukʼ yabtel laj yiktaik sventa chtunik ta stojolal Jeova xchiʼuk ta stojolal li steklumale (2 Cor. 8:9; Fili. 2:5-8; Heb. 11:24-26)
◻ Laj yichʼik tʼujel o kʼotik ta «cristo», jaʼ xkaltik, tʼujatik yuʼun Jeova (Mar. 14:61, 62; Juan 4:25, 26; Heb. 11:26)
◻ Ta sbi Jeova kʼopojik (Éxo. 3:13-16; Juan 5:43; 17:4, 6, 26)
◻ Manxo echʼik (Núm. 12:3; Mat. 11:28-30)
◻ Li Jeovae ep la smakʼlin krixchanoetik ta stojolalik (Éxo. 16:12; Juan 6:48-51)
◻ Tunik ta jchapanvanejetik xchiʼuk ta j-akʼ mantaletik (Éxo. 18:13; Mal. 4:4; Juan 5:22, 23; 15:10)
◻ La sventainbeik sna li Diose (Núm. 12:7; Heb. 3:2-6)
◻ Tukʼil yajrextiko Jeova echʼik (Heb. 11:24-29; 12:1; Apo. 1:5)
◻ Jaʼ la sbain stuk Jeova sventa muʼyuk buchʼu xtabat sbekʼtalik kʼalal chamike (Deu. 34:5, 6; Luc. 24:1-3; Hech. 2:31; 1 Cor. 15:50; Jud. 9)