Khititix Davitat sipansa Salomonat sipansa jilïrïki ukan luratanakapax wali askiwa
Khititix Davitat sipansa Salomonat sipansa jilïrïki ukan luratanakapax wali askiwa
“Salomonatsa jukʼampïkis ukaw akanki.” (MAT. 12:42.)
1, 2. Samuelun Davitar apnaqirjam ajllitapaxa, ¿kunatsa jaqinakatakix muspharañjamäna?
DAVITAX aliq uwij awatir wawakïkaspasa ukat janis marka apnaqiritakix khusäkaspa ukhamwa Samuel profetax amuyäna. Ukampis Belén markanakwa jakasirakïna, uka markax “Judá uraqinkir markanakatxa jiskʼakï[nwa]” (Miq. 5:2). Ukampis Samuel profetax uka jan yäqañjam waynitur Israel marka apnaqañapatakix niya ajlliñampïskäna.
2 Jehová Diosax janiw Davitar apnaqirïñapatak ajllkaspati sasaw Samuelux amuyäna. Kunapachatï marka apnaqiri ajlliñataki Isaí tatan utapar purïna ukhaxa, janiw Davitax ukankkänti, paqallq jilanakapakiw ukankapxäna. Ukampis Jehová Diosax Davitaruw ajllïna, kuna laykutix juparuw wali askit uñjäna (1 Sam. 16:1-10).
3. 1) ¿Kunsa Jehová Diosax jaqinakat sipansa uñji? 2) ¿Davitax apnaqirïñataki ajllitäxäna ukat qhiparux kunas jupxankäna?
3 Chiqansa, kuntï Samuelux jan amuykäna ukwa Jehová Diosax sum amuyäna. Davitax kunjam chuymanïnsa uk sum yatïna, ukaw Jupatakix wali askïnxa (1 Samuel 16:7 liytʼasiñapawa). Ukhamasti, Jehová Diosax janiw Isaí tatan jilïr yuqanakapar ajllkänti, jan ukasti sullka yuqaparuw ajllïna, ukatwa Samuelux sullkïrit jisktʼasin awatïwit irptayanïna. Ukat Bibliax akham siwa: “Uka sullkïristi suma wila ajanunïnwa, wali suma uñnaqtʼaniraki. Ukat Tatitux Samuelurux sarakïna: ‘Akapï reyitaki ajllitäñapäki ukaxa. Jichhax sartasim, ukatsti juparux reyïñapataki yaqhachxam’ sasa. Ukat Samuelux jankʼakiw aceiten waxra aptasinxa, jilanakap nayraqatanwa uka waynarux reyïñapataki yaqhachxana, jupasti David satänwa. Ukat uksarusti Tatitun ajayupaw jupxankäna” sasa (1 Sam. 16:12, 13).
Kuns Davitax Cristot uñachtʼayäna
4, 5. 1) Kuna tuqinakatsa Davitax Jesusjamäna ukanak mä qhawqha qhanañchtʼma. 2) ¿Kunatsa Jesusax Davitat sipansa jilïriw sissnaxa?
4 Waranq pataka maranak qhipatxa, Jesusax Davitjamarakiw Belén markan yurïna. Ukatxa janirakiw apnaqiritakjam uñjapkänti. Mä suma apnaqirsa suyapkchïnxa, janiw sum katuqapkänti. Ukampis Jehová Diosaw jupar ajllitayna kunjamtï Davitar ajllkäna ukhama. Davitjam wali munatarakïnwa (Luc. 3:22). * Ukat “Tatitun ajayupaw jupxan[karakï]na”.
5 Kunatsa Davitax Jesusjamänaw saraksna ukanak uñjaskakiñäni. Davitarux Ahitofel sat iwxtʼiripaw jan wal luratayna, ukat Jesusarusti Judas Iscariote sat mä apostolapaw aljantarakitayna (Sal. 41:9; Juan 13:18). Ukat Jesusas Davitas walpun Jehová Diosar yupaychañäki uka chiqanakxa arxatapxäna (Sal. 27:4; 69:9; Juan 2:17). Davitatwa Jesusax apnaqäwi katuqarakitayna. Jesusax janïr yurkäna ukhaxa, akham sasaw mä angelax Mariar satayna: “Tatituw juparux reyit uttʼayani nayra Davidarjama” sasa (Luc. 1:32; Mat. 1:1). Ukhamasti, ¿kunjamatsa Jesusax Davitat sipansa jilïrixa? Kunattix Mesías tuqit parlir taqi profecianakax Jesusanwa phuqasiwayi, ukatwa Davitat sipansa jilïriw sasax sissna. Mesiasaw jutani sasax juparuw walja tiempo suyapxäna (Juan 7:42).
Awatirisar jan ukax Apnaqirisar arkapxañäni
6. ¿Kunatsa Davitax suma awatirïnwa sasax sissna?
6 Jesusax Davitjam awatirirakiwa. Wali suma awatiriwa. Ukampis ¿mä suma awatirix kunsa lurañapa? Taqi chuymaw uwijanakapar sum uñjañapa, jan walinakat jarkʼaqañapa ukat manqʼsa tiempoparuw churañaparaki (Sal. 23:2-4). Davitax waynitükasinxa, wali sumwa awkipan uwijanakap uñjäna. Aycha manqʼani animalanakatsa jan axsartʼasaw uwijanakap jarkʼaqäna, niya jakañsa aptʼasirjamaw leonampit osompit uwij aparasirïna (1 Sam. 17:34, 35).
7. 1) ¿Kunjamatsa Davitax Israel markar apnaqañatakix wakichasïna? 2) ¿Kunjamatsa Jesusax wali Suma Awatirïtap uñachtʼayäna?
7 Davitax walja maranakaw qullu parkinakan uwija awatirïna, ukhamatwa Israel marka apnaqañatakix wakichasïna (Sal. 78:70, 71). * Ukat Jesusax niya ukhamarakiw Diosan uwijanakap uñjäna. ‘Jiskʼa tamar’ ukat ‘yaqha uwijanakar’ uñjañatakix Diosaw jupar chʼam churasin yanaptʼi (Luc. 12:32; Juan 10:16). Ukat Jesusax wali sumwa uwijanakap uñtʼasi, sutitwa sapa maynirus jawsi. Aka Uraqinkkasax jupanak laykux wal chʼamachasïna ukat uwijanakapar wal munasïna, ukhamasti wali Suma Awatirïnwa (Juan 10:3, 11, 14, 15). Chiqansa, jupax Davitat sipansa jukʼampinak luräna. Jakañ aptʼasisaw jaqinakarus jiwañat qhispiyawayi. Ukat ‘jiskʼa tamapxa’ wali sum uñjaski, ukhamatwa uka munat arkirinakapax alaxpachan wiñay wiñaya jakapxani. Maysa tuqitsti, ‘yaqha uwijanakjam’ uñtʼatäpki ukanakaxa aka Uraqinwa wiñay jakapxarakini, ukanxa taqi kunas wali sumäxaniwa, janiw qamaqinakar uñtat ñanqha chuymaninakax utjxaniti (Juan 10:27-29 liytʼasiñapawa).
Atipir Apnaqiriru arkapxañäni
8. ¿Kunatsa Davitax wali atipir apnaqirïnwa sasax sissna?
8 Davitax chʼaxwäwinakan nuwasir jaqjamas jan ukax marka apnaqirjamas taqi chʼamaw Diosan markapar arxatäna, ukat “Tatiturakiw Davidarux atipjaña churarakitaynaxa”. Ukhamatwa Israel markan uraqipas jachʼaptarakïna, Egipto jawirat Eufrates jawirkamaw purïna (2 Sam. 8:1-14). Chiqansa, Jehová Diosan yanaptʼataw wali chʼamani apnaqirjam sum apnaqäna. Bibliax akham siwa: “[Luratanakapatsti] taqi uraqpachanwa yatisïna, Tatiturakiwa ukham luraskarakïna taqi markanakan jupar axsarapxañapataki” sasa (1 Cró. 14:17).
9. Kunjamsa Jesusax apnaqirjamax atipjawayi uk qhanañchtʼma.
9 Aka Uraqinkkasaxa, jan axsartʼasarakiw Jesusax Diosan arunakapat yatichäna. Ukat apnaqirjam uttʼasxäna ukhaxa, saxranakxarus chʼamanïtapwa uñachtʼayäna, uka ñanqhanakan tʼaqhisiyatanakarus qhispiyänwa (Mar. 5:2, 6-13; Luc. 4:36). Ukat Supayas janiw jupxar chʼamanïkänti. Ukhamaw Jesusax Jehová Diosan yanaptʼatax Supayan aka jan wali pachapar atipjäna (Juan 14:30; 16:33; 1 Juan 5:19).
10, 11. ¿Jesusax chʼaxwäwinakan atipjir Apnaqirjamax kunsa alaxpachan luri?
10 Ukat Jesusax kunsa chʼaxwäwinakan atipir Apnaqirjamax alaxpachan luraski ukwa Juan sat mä apostolapax mä unañchäwin uñjarakitayna. Jesusan alaxpachar saratapat niya 60 maranak qhipatxa, akham sasaw qillqatayna: “Mä janqʼu caballo uñjarakta. Caballor latʼxatatäkän ukasti mä arco aptʼatänwa. Mä coronraki churapxäna, ukatsti mä atipjirjamaw mistuwayäna jukʼampi atipjäwinaka atipjañapataki” sasa (Apo. 6:2). Janqʼu caballor latʼxatatäki ukax Jesusawa. Kunapachatï 1914 marana, alaxpachan mä Apnaqirjam quntʼasïna ukhaw ‘mä corona’ katuqäna. “Ukatsti mä atipjirjamaw mistuwayäna.” Jesusax Davitjamaw chʼaxwäwinakan atipjarakïna. Ukat Apnaqirjam uttʼasxäna uka qhipatxa, Supayaruw atipjawayi, ukat saxranakapamppacharuw aka Uraqir jaquqaniwayi (Apo. 12:7-9). Ukampis kunapachatï Supayan apnaqat akapachar qʼal tukjani ukaw sumpach ‘atipjani’ (Apocalipsis 19:11, 19-21 liytʼasiñapawa).
11 Ukat Jesusax Davitjam khuyaptʼayasir suma Apnaqirirakiwa, ukatwa ‘walja jaqinakar’ uñjaskani, ukhamata Armagedón pasapxañapataki (Apo. 7:9, 14). Ukat alaxpachana 144.000 ajllitanakamp apnaqxani ukhaw aka Uraqinxa, aski jaqinakas jan aski jaqinakasa jaktanipxarakini (Hech. 24:15, MT). Ukampis sum sarnaqapxani ukhaxa, wiñayaw jakasipxani, taqi kunas chiqapäxaniwa. ¡Wali askipunïniwa! Ukhamasti, kunatï askïki uk lurañataki wal chʼamachasiñasawa. Ukhamatwa Davitat sipansa jilïrïki ukan apnaqatax aka Uraqin Diosan luqtirinakapamp chikax wali sum jakasiñäni (Sal. 37:27-29).
Mayitaparjamaw Diosax Salomonar yatiñkankañ churäna
12. ¿Kunsa Salomonax Jehová Diosar mayïna?
12 Kuntï Jesusax lurañapäkäna ukanakwa Davitan Salomón yuqapax lurarakitayna. * Kunapachatï apnaqirjam uttʼasïna ukhaxa, kuntï maykitäta ukwa churäma sasaw Jehová Diosax Salomanar mä samkan satayna. Inas yänaka, munañanïña jan ukax walja tiempo jakañ maychispäna. Ukampis akham sasaw mayisïna: “Jichhasti yatiñ kankañampi, ukhamarak chʼikhi chuymampi churita aka markar apnaqañaxataki; ¿khitis aka jachʼa markamarux apnaqaspaxa?” sasa (2 Cró. 1:7-10). Iyaw sasaw Jehová Diosax Salomonar yatiñkankañ churäna (2 Crónicas 1:11, 12 liytʼasiñapawa).
13. Janiw khitis Salomonjam yatiñanïkänti sasaxa, ¿kunatsa sissna, ukat khitis yatiñkankañ jupar churäna?
13 Jehová Diosar luqtaskäna ukhaxa, Salomonax wali yatiñanipunïnwa, janipuniw khitis jupjam yatiñanïkänti. “Kimsa waranqa säwi arunakwa arsüna” (1 Rey. 4:30, 32, 34). Ukat uka säwi arunakapatxa waljaw qillqasiwayi. Yatiñkankañ thaqhirinakatakix ukax wali askiwa. Amtañäni, Sabá tuqinkir reinax “wali chʼama jisktʼanakampi” yantʼiriw Salomonan ukar 2.400 kilometronak saratayna. Ukat Salomonan arunakapatsa qamirkankañapatsa wal muspharäna (1 Rey. 10:1-9). Ukampis ¿kunjamatsa Salomonax wali yatiñanïna? Bibliax akham siwa: “Taqi jaqinakawa jupar uñjaña munapxäna, ukhamarak istʼaña munapxarakïna Diosax yatiñ kankaña churkana uka” sasa (1 Rey. 10:24).
Wali yatiñan Apnaqiriru arkapxañäni
14. ¿Kuna tuqinakatsa Jesusax Salomonat sipansa jilïrïnxa?
14 Chiqansa, mayni sapakiw aka Uraqinxa Salomonat sipansa jukʼamp yatiñanix utjäna, Jesucristünwa. Ukatwa jupa pachpat akham säna: “Salomonatsa jukʼampïkis ukaw akanki” sasa (Mat. 12:42). Jïsa, Jesusax “wiñay jakañ” churir arunak parläna (Juan 6:68). Wali Uñtʼat Arstʼäwipanxa Salomonan säwinakapat sipansa jukʼampinak parläna. Sañäni, kunjamatsa Jehová Diosan yupaychirinakapax kusisit jakasipxaspa ukanakatwa Salomonax parläna (Pro. 3:13; 8:32, 33; 14:21; 16:20). Ukampis chiqpach kusisiñax Jehová Diosar yupaychañata ukat Diosan munañap phuqañatwa juti sasaw Jesusax sum qhanañchäna. Akham sänwa: “Kusisiñanïpxiw khitinakatix ajay tuqin aynachtʼatäpxatap amuyasipxi ukanakaxa, Diosan reinopax jupanakankarakiwa” sasa (Mat. 5:3). Ukhamasti Jesusan yatichäwinakaparjam sarnaqirinakax jakañ churiri Jehová Diosaruw jakʼachasipxi (Sal. 36:9, NM; Pro. 22:11; Mat. 5:8). Jesucristox ‘Diosan pachpa yatiñ kankañapäkaspas’ ukhamawa (1 Cor. 1:24, 30). Kuna laykutix Diosan ‘ajayupaw jupxanki’ (Isa. 11:2).
15. ¿Kunjamatsa Diosan yatiñkankañap jikxatsna?
15 Ukat jilïr Salomonan arkirinakapjamaxa, ¿kunjamatsa Diosan yatiñkankañap jikxatsna? Niyakixay Jehová Diosan yatiñapax Arupan qillqatächixa, wali amuyumpi yatxatañasawa ukat yatiqatarjam lupʼiñasarakiwa, ukatsti Jesusan yatichäwinakapsa sum yatxatañasaraki (Pro. 2:1-5). Ukat yatiñkankañ Jehová Diosar taqi chuym mayiñäni ukhaxa, yanaptʼistaniwa sasaw Bibliax yatichistu (Sant. 1:5). Ukhamasti, qullan ajayun yanaptʼataw Diosan Arupatxa wali suma yatichäwinak jikxatañäni, uka yatichäwinakaw suma amtanakar puriñsa yanaptʼistani, ukhamata jan walinakar saykatañataki (Luc. 11:13). Ukat Salomonax ‘yatiyiri’ jan ukax tantachiri satarakïnwa, juparakiw “yatiñxa jaqinakar yati[chäna]” (Ecl. 12:9, 10). Ukat Jesusax niyakixay cristiano tamxar pʼiqïchixa, jupaw tamapar tantacharaki, ukhamata Jehová Diosar yupaychapxañapataki (Juan 10:16; Col. 1:18). Ukhamasti tantachäwinakan sum istʼañax wali askiwa, ukanwa jukʼamp yatiqtanxa.
16. ¿Kuna tuqinakatsa Salomonampi Jesusampix kikpakïpxi?
16 Salomonax wali qʼapha apnaqirïnwa. Thakinaka, estanquenaka, manqʼa imañ utanaka ukat wali jachʼa utanak lurañatakiw markpachar wakichäna ukat jupa pachparakiw uka luräwinak pʼiqtʼäna. Ukatxa, chʼaxwäwir sarañataki carronaksa caballot saririnaksa ukhamarakiw tam tama sum uttʼayäna (1 Rey. 9:17-19). Chiqansa, uka luräwinakax markpachatak askïnwa. Ukat Jesusax ukham qʼapha Apnaqirirakiwa. Mä jachʼa ‘qalxaruwa’, mä arunxa, jupxaruw cristiano tamxa uttʼayawayi (Mat. 16:18). Ukatxa kunatï machaq uraqin luraskani ukxa juparakiw pʼiqtʼani (Isa. 65:21, 22).
Sumankayir Apnaqirir arkapxañäni
17. 1) Salomonax apnaqkäna ukhaxa, ¿kunjamas Israel markan jakasipxäna? 2) ¿Kunsa Salomonax jan lurirjamäkäna?
17 Salomón sutixa, “sumankaña” siski uka arutwa juti. Ukat Salomonax Jerusalén markatwa apnaqarakïna, uka markan sutipax “mä ukhat mä ukhampi sumankaña” sañ muni. Salomonax pusi tunka maranaka apnaqkäna ukhaxa, wali sumaw Israel markanxa jakasipxäna. Uka urunakatxa akham sasaw Bibliax qhanañchi: “Judá, Israel jaqinakaxa, Dan ukata Beerseba ukkhakamaxa samaratakiw jakapxäna uva alinak thiyana, ukhamarak higo alinak thiyana” sasa (1 Rey. 4:25). Ukampis Salomonax wali yatiñanïkchïnsa, janiw markachirinakarux juchampita usunakampita ukat jiwañampit qhispiykänti. Ukxa khititix jupat sipansa jilïrïki ukakiw lurani (Romanos 8:19-21 liytʼasiñapawa).
18. ¿Kunjamas cristiano taman sarnaqastanxa?
18 Aka urunakansa wali sumaw cristiano tamanxa sarnaqastanxa, janiw kuna chʼaxwañas utjkiti. Diosar yupaychasax Jupampis ukat maynit maynikamas wali sumaw apastanxa. Kunjamas Diosan markapax aka urunakan jikxatasiñapäna uka tuqitxa akham sasaw Isaías profetax qillqatayna: “Uka markanakasti espadanakapxa qhulliñ faradoruw tukuyxapxani, lansanakapsti yawthapiñ hocenakaruraki. Janirakiw kawkïr markas yaqha markampix nuwasiñatak sartkaniti. Janirakiw guerran nuwasiñatakis yatichäwinakxa katuqapkaniti” sasa (Isa. 2:3, 4). Jïsa, kunapachatï Diosan yatichäwinakaparjam sarnaqktan ukhaxa, wali sumaw mayninakampix Diosan markapan apastanxa.
19, 20. ¿Kuna askinaksa katuqañäni?
19 Ukampis jutïrinxa jukʼamp sumaw jakasiñäni. Jesusax aka Uraqi apnaqxani ukhaxa, istʼasir jaqinakax wali sumaw jakasxapxani. Juchas jukʼat jukʼatwa chʼaqtxarakini, jaqinakax ‘qhispiyataw jakasxapxani’ (Rom. 8:21). Ukat Jesusax waranq maranaka apnaqañ tukuyxani ukhaxa, mä yantʼampiw utjani. Ukat uk pasiri “llampʼu chuymaninakasti uraq katuqapxani, jilarkir sumankañampiw kusisipxarakini” (Sal. 37:11; Apo. 20:7-10). Jïsa, Jesusax Salomonat sipansa jukʼamp askinakwa churistani. Chiqansa, janiw jichhax uk sumpachpun amuyksnati.
20 Kunjamatï israelitanakax Moisés, David ukat Salomón chachanakan pʼiqtʼatax sum jakasipkänxa, ukhamarakiw jiwasax Jesucriston apnaqatax wali sum jakasiñäni (1 Rey. 8:66). Uka suma jakasiñx Jehová Diosaw churistani, Jupaw khititix Moisés, David ukat Salomón chachanakat jilïrïki ukar jiwas layku khitanitayna, mä arunxa, Diosaw wali munat jilïr Yuqapar jiwas layku khitanitayna, ukatwa Jupar wal yuspärtanxa.
[Qhanañchäwinaka]
^ Inas David sutix “munata” sañ munchi. Ukat amtañäni, kunapachatï Jesusax bautisaskäna ukhasa, ukat may kutimpi alaxpachat arsunïna ukhaxa, akham sasaw Jehová Diosax Jesusat säna: “Akawa munat Wawaxaxa” sasa (Mat. 3:17; 17:5).
^ Ukat Davitax Awatiriparjamaw Jehová Diosar taqi chuym atinisirakïna. Yanap munasas jan ukax yatichayasiñ munasas Jehová Diosarupuniw jakʼachasirïna. “Tatituw awatirixaxa, janiw kunats tʼaqhiskäti” sasaw säna (Sal. 23:1). Ukat Jesusax ‘Diosan Corderopawa’ sasaw Bautisir Juanax sarakïna (Juan 1:29).
^ Salomonan payïr sutipax Jedidías satänwa, uka sutixa “Jehová Diosan munata” sañ muni (2 Sam. 12:24, 25).
¿Qhanañchtʼasmati?
• ¿Kuna tuqinsa Jesusax Davitat sipansa jilïrixa?
• ¿Kuna tuqinsa Jesusax Salomonat sipansa jilïrixa?
• ¿Kunatsa jumax jilïr Davitarus ukat jilïr Salomonarus wali askit uñjta?
[Jisktʼanaka]
[31 janan fotopa]
Salomonax Diosat yatiñkankañ katuqkäna ukaxa, Jesusan yatiñkankañapwa uñachtʼayäna
[32 janan fotopa]
Jesusan Apnaqäwipax Davitan ukat Salomonan apnaqäwipat sipansa jukʼamp sumäniwa, janiw uk sum amuyksnati