Isua—davida Leh Solomona Ropui Zawk Chu I Ngaihlu Ang U

“Ngaiteh u, Solomona aia ropui zâwk hetah hian a awm asin.”—MT. 12:42.

1, 2. Mihring thlîrna aṭang chuan, lal atâna Davida hriak thih tûra Samuela tirh chu engvângin nge thil mak tak a nih?

LAL hmêl pawh a pu lo va. Zâwlnei Samuela tân phei chuan berâm vêngtu mipa naupang satliah mai niin a lang zâwk a ni. Chu bâkah, a pianna khua Bethlehem lah khaw langsâr a ni lo bawk nên. A khua chu “Juda rama sâng tam tak zînga telah tê hle” nia sawi a ni. (Mik. 5:2) Amaherawhchu, he khaw te naupang challang lo tak hi nakina Israel lal ni tûrin zâwlnei Samuela chuan hriak a thih dâwn a ni.

² Naupang Davida chu a pa Jesaia’n Samuela hriak thih atâna a tih hmasak ber a ni lo va; a pahnihna emaw, a pathumna emaw lah a ni hek lo. Jesaia fapa pariatte zînga a tê ber Davida phei chu Samuela’n lalber thlâktu tûr hriak thih tûra mi rinawm Jesaia in a va tlawh lai phei chuan inah pawh a lo awm lo va. Mahse, Davida chu Jehova thlan a ni a, chu chu thil pawimawh zâwk chu a ni.—1 Sam. 16:1-10.

3. (a) Jehova’n mite a bih chian hian eng nge a ngaih pawimawh ber? (b) Davida hriak thih a nih aṭang khân, a chungah eng nge lo thleng?

³ Jehova chuan Samuela hmuh theih loh chu a hmu a. Pathian chuan Davida thinlung chu a hria a, chu chu a lâwmzâwng tak a ni. Pathian tân chuan, pâwn lam lan dân ni lovin, chhûng lama nihna chu a pawimawh ber a ni. (1 Samuela 16:7 chhiar rawh.) Samuela chuan, Jehova’n Jesaia fapa upa lam pasarihte a thlang lo tih a han hriat chuan, berâm vênga awm a naupang ber chu hruai haw tûrin a ngên a. Thuziak chuan heti hian a sawi: “Chutichuan [Jesaia chuan] a va kohtîr a, [Davida] a rawn hruai a. . . . Tin, LALPA chuan, ‘Tho la, hriak thih rawh, hei ngei hi a ni e,’ a ti a. Chutichuan Samuela chuan hriak bâwm ki chu a la a, a unaute zîngah chuan amah chu hriak a thih a; tichuan LALPA thlarau chu chu mi nî aṭang chuan nasa takin Davida chungah a lo thleng ta a,” tiin.—1 Sam. 16:12, 13.

Davida’n Krista A Entîr Lâwk

4, 5. (a) Davida leh Isua inanna ṭhenkhat sawi rawh. (b) Engvângin nge Isua chu Davida Ropui Zâwk tia koh theih a nih?

⁴ Davida pian hnu kum 1,100 vêlah Isua pawh chu Bethlehem-ah a lo piang ve a. Mi tam tak mitah chuan Isua pawhin lal hmêl a pu ve lo. Chu chu Israel rama mi tam takin lal atâna an beisei ang a ni lo tihna a ni. Mahse, Davida angin, Jehova thlan a ni a; tin, Jehova duh tak a ni ve bawk. * (Lk. 3:22) Isua chungah pawh, ‘Jehova thlarau chu a lo thleng a ni.’

⁵ Davida leh Isua inanna dang a la awm a. Entîr nân, Davida chu a thurâwn petu Ahithophela’n a phatsan a, Isua pawh a tirhkoh Juda Iskariota’n a phatsan a ni. (Sâm 41:9; Joh. 13:18) Davida leh Isua chuan Jehova biakna hmun atân ṭhahnemngaihna nasa tak an nei ve ve a. (Sâm 27:4; 69:9; Joh. 2:17) Isua chu Davida thlah a ni bawk. A pian hma khân, vântirhkoh chuan a nu hnênah: “Lal Pathianin a hnênah a thlahtu Davida ṭhutphah chu a pe ang,” a ti. (Lk. 1:32; Mt. 1:1) Amaherawhchu, Messia chungchânga thutiam zawng zawngte chu Isuaa a thlen famkim dâwn avângin, ani chu Davida aiin a ropui zâwk hle a. Ani chu Davida Ropui Zâwk, Messia Lal atâna mite’n hun rei tak chhûng an lo nghah tawha chu a ni.—Joh. 7:42.

Berâm Vêngtu Lal Chu Zui Rawh

6. Eng kawngin nge Davida chu berâm vêngtu ṭha a nih?

⁶ Isua pawh berâm vêngtu a ni a. Berâm vêngtu  ṭha miziate chu eng nge ni? A berâmte chu rinawm tak leh huaisen takin a enkawl a, a châwm a; tin, a vênghim bawk a ni. (Sâm 23:2-4) Davida chuan a naupan lai chuan berâm vêngtu hna a thawk a, a pa berâmte chu ṭha takin a enkawl a. Berâmte chu sakeibaknei leh savawm laka chhanhim nân huaisen taka a nun thâpin a vênghim a ni.—1 Sam. 17:34, 35.

7. (a) Lal mawhphurhna la thei tûrin Davida chu engin nge chher chho? (b) Engtin nge Isua chuan Berâm Vêngtu Ṭha a nihzia a târ lan?

⁷ Berâmte enkawla mual leh tlânga hun a hman ralna chuan Davida chu Israel hnamte berâm anga enkawl tûra mawhphurhna rit tak chelh thei tûrin a chher chho a ni. * (Sâm 78:70, 71) Isua pawhin, berâm vêngtu entawn tlâk a nihzia a târ lang a. “Pâwl tlêmte” leh “berâm dang” a vênna kawngah, Jehova chuan a tichhakin, a kaihruai a ni. (Lk. 12:32; Joh. 10:16) Chuvângin, Isua chu Berâm Vêngtu Ṭha a ni. A berâmte chu a hriat chian êm avângin an hming ṭheuhvin a ko va. Anni chu a hmangaih êm avângin, leia a awm lai khân an tân inhuam takin a nun a pe a ni. (Joh. 10:3, 11, 14, 15) Berâm Vêngtu Ṭha a nih angin, Isua chuan Davida tihtheih miah loh tûr thil engemaw tak chu a ti a. Chu chu a tlanna inthawina chuan mihringte tân thihna ata chhan chhuahna kawng a hawng hi a ni. Vâna thi thei lo nunna chang tûra “pâwl tlêmte” enkawl lo tûr leh chinghnia ang hmêlmate awm tawh lohna felna khawvêl thara chatuan nunna chang tûra “berâm dang” te hruai lût lo tûrin ani chu engmahin a dang lo vang.—Johana 10:27-29 chhiar rawh.

Hnehtu Lal Chu Zui Rawh

8. Engvângin nge Davida chu hnehtu lal tia kan sawi theih?

⁸ Lal a nih angin, Davida chu Pathian mite ram vênghimtu sipai huaisen tak a ni a, “LALPAN Davida chu a kalna apiangah a hnehtîr zêl a.” Davida rorêlna hnuaiah chuan, an ram chu Aigupta lui aṭangin Euphrates lui thlenga zauh a ni. (2 Sam. 8:1-14) Jehova chaknain, rorêltu lal thiltithei ber a ni a. Bible chuan: “Ram tinah Davida hming chu a lo thang ta a; LALPAN hnam tin amah a ṭihtîr ta a,” a ti.—1 Chro. 14:17.

9. Lal Ruat a nih angin Isua chu hnehtu a nih dân sawifiah rawh.

⁹ Lal Davida ang bawkin, Isua pawh chu mi huaisen tak a ni a. Lal Ruat a nih angin, a thuneihna chu ramhuaite chungah a târ lang a, ramhuai tihbuaia awmte chu a chhan chhuak a ni. (Mk. 5:2, 6-13; Lk. 4:36) Hmêlma lian ber, Diabol-Setana meuh pawhin a chungah thu a nei ve lo. Jehova ṭanpuinain, Isua chuan Setana thununna hnuaia awm khawvêl chu a ngam a ni.—Joh. 14:30; 16:33; 1 Joh. 5:19.

10, 11. Vâna Lal leh Sipai Huaisen a nihna anga Isua chanvo chu eng nge ni?

¹⁰ Isua a thih a, a thawhleh a, vâna a lâwn hnu kum 60 vêlah chuan, tirhkoh Johana chuan Isua chu vâna Lal leh Sipai Huaisen a nihna târ langtu inlârna a dawng a. Johana chuan: “Ngai teh, sakawr vâr ka hmu a; a chunga chuang chuanin thalngul a keng a, tin, a hnênah chuan lallukhum an pe a; tin, hneh chung leh hneh zêl tûrin a chhuak ta a,” tiin a ziak a ni. (Thup. 6:2) Sakawr vâr chunga chuang chu Isua a ni a. Vân Rama Lal anga a ṭhut hun 1914-ah “a hnênah chuan lallukhum an pe a.” Chu mi hnu chuan, ‘hneh chungin a chhuak’ a ni. Ni e, Davida angin, Isua chu hnehtu lal a ni a. Pathian Rama Lala siam a nih hnu lawk khân, Setana chu indonaah a hneh a, amah leh a ramhuaihote nên lam leiah a paih thla a ni. (Thup. 12:7-9) Setana khawvêl suaksual a tihboral ṭhak hun thlengin “hneh zêl tûrin a chhuak” ang.—Thu Puan 19:11, 19-21 chhiar rawh.

¹¹ Mahse, Davida angin Isua chu lal khawngaihna ngah tak a ni a, “mipui tam tak” chu Armageddon an paltlang thlengin a vênghim zêl ang. (Thup. 7:9, 14) Chu bâkah, Isua leh a roluahpui tho leh 1,44,000-te rorêlna hnuaiah chuan, “mi felte leh fel lote thawhlehna a awm ang.” (Tirh. 24:15) Leia tho lehte chuan chatuana nun beiseina an nei dâwn a ni. An nakin hun tûr chu a va ropui tak êm! Lei hi Davida Ropui Zâwk rorêlna hnuaia mi fel leh hlim taktea a khah huna kan nun ve theihna tûrin ‘thil ṭha tih’ reng chu i tum ṭheuh vang u.—Sâm 37:27-29.

 Finna Dîla Solomona Ṭawngṭaina Chu Chhânsak A Ni

12. Solomona’n eng nge a dîl?

¹² Davida Fapa Solomona pawh chuan Isua a entîr lâwk a. * Solomona a lal ṭan chuan a mumangah Jehova a inlâr a, a dîl apiang pêk a tiam a ni. Solomona chuan hausakna te, thiltihtheihna te, a nih loh leh dam reina chu a dîl thei reng a. Mahse, chûng ai chuan mahni hmasial lo takin Jehova hnênah: “Hêng mipuiho hmaa lût leh chhuaka ka awm theih nân finna leh hriatna mi han pe ang che; i mi hetizozai hi tunge rorêlsak thei ang le?,” tiin a dîl ta zâwk a. (2 Chro. 1:7-10) Jehova chuan Solomona ṭawngṭaina chu a chhânsak a ni.—2 Chronicles 1:11, 12 chhiar rawh.

13. Engtin nge Solomona finna chu tuman an tluk loh va, a finna lo Chhuahna chu eng nge ni?

¹³ Jehova chunga Solomona a rinawm chhûng zâwng chuan, a dam rualpuite zîngah amah anga thu fing tak sawi thei an awm lo. Solomona chuan “thufing sângthum” a sawi a ni. (1 Lal. 4:30, 32, 34) Hêng thufingte zînga tam tak chu ziah chhuah a ni a, finna zawngtute chuan tûn thlengin an hlut hle a ni. Seba lalnu chuan “thu khirh tak taka” Solomona finna fiah tûrin mêl 1500 vêla hlaah a zin vang vang a. Solomona thusawi leh a ram hausaknate chuan Seba lalnu rilru chu a khawih hle a ni. (1 Lal. 10:1-9) Bible chuan: “Pathianin a thinlunga finna thu a dahsak chu ngaithla tûrin khawvêla mi zawng zawngte chuan Solomona chu an rawn pan huai huai ṭhîn,” tia sawiin, Solomona finna lo Chhuahna chu a târ lang a ni.—1 Lal. 10:24.

Lal Fing Chu Zui Rawh

14. Eng kawngtein nge Isua chu “Solomona aia ropui zâwk” a nih?

¹⁴ Solomona finna khûmtu mi pakhat chauh a awm a. Chu chu Isua Krista a ni a, ani chu “Solomona aia ropui zâwk” tiin a insawi. (Mt. 12:42) “Chatuana nunna thu” chu a sawi a ni. (Joh. 6:68) Entîr nân, Tlâng Chunga Thusawiah Isua chuan Solomona thufingte belhchhahtu leh min hriatthiamtîrtu thu bul tam tak a sawi a. Solomona chuan Jehova betute hlimna petu thil engemaw zât a sawi a ni. (Thuf. 3:13; 8:32, 33; 14:21; 16:20) Isua chuan hlimna dik tak chu Jehova biakna leh a thutiamte thlen famkimna nêna inkûngkaih thilte aṭang chauhvin a neih theih tih a sawi uar a. Ani chuan: “Mahni thlarau lam mamawh ngaihven mite chu an eng a thâwl e, vân ram an ta a ni si a,” a ti a ni. (Mt. 5:3, NW) Isua zirtîrnaa awm thu bul nunpuitute chuan “nunna tuikhur,” a nih lo leh nunna lo chhuahna Pathian Jehova chu an hnaih a ni. (Sâm 36:9; Thuf. 22:11; Mt. 5:8) Krista chuan “Pathian finna” ai a awh a. (1 Kor. 1:24, 30) Messia Lal a nih angin, Isua Krista chuan “finna . . . thlarau” a nei a ni.—Is. 11:2.

15. Engtin nge Pathian finna chu kan hlâwkpui theih ang?

¹⁵ Solomona Ropui Zâwk hnungzuitute kan nih angin, engtin nge Pathian finna chu kan hlâwkpui theih? Jehova finna chu a Thua târ lan a nih avângin, chu mi zawng hmu tûr chuan Bible, a bîk takin Isua thusawite chu ṭha taka kan zir leh kan thu chhiarte ngun taka ngaihtuah tûrin theih tâwp kan chhuah tûr a ni. (Thuf. 2:1-5) Chu bâkah, Pathian hnênah finna kan dîl fan fan tûr a ni bawk. Pathian Thu chuan ṭanpuina dîla tih tak zeta kan ṭawngṭaina chu chhân a ni ang tih min tiam a ni. (Jak. 1:5) Thlarau thianghlim ṭanpuina nên chuan, harsatnate hmachhawn tûr leh thutlûkna fing siam tûra min ṭanpui theitu Pathian Thua finna thu hlu takte chu kan hmu ngei ang. (Lk. 11:13) Solomona chu ‘mite hriatna zirtîrtu’ “thuhriltu” tia hriat a ni a. (Thur. 12:9, 10) Kristian kohhran Lû a nih angin, Isua pawh a mite tâna thuhriltu a ni bawk. (Joh. 10:16; Kol. 1:18) Chuvângin, a ‘zirtîra’ kan awmna, kohhran inkhâwmahte chuan kan tel tûr a ni.

16. Solomona leh Isua inannate chu engte nge ni?

¹⁶ Solomona chuan thil tam tak a hlen chhuak a. A ram pumah in sakna hna chu a ruahman a, lal in ropui tak tak te, kawngpui te, tui dah khâwlna khua te, tawlailîr dahna khua te, leh sakawr chung chuang mi dahna khua te siamna chu a huaihawt a ni. (1 Lal. 9:17-19) A hnathawh chu a ram pumin a hlâwkpui a ni. Isua pawh in satu a ni a. A kohhran chu “lungpui” chungah a rem, a nih loh leh a sa a. (Mt. 16:18) Khawvêl thara thawh tûr in sakna hna pawh a huaihawt bawk ang.—Is. 65:21, 22.

 Remna Lal Chu Zui Rawh

17. (a) Solomona rorêlna chu eng atâna hriat lâr nge ni? (b) Solomona’n eng nge a hlen chhuah theih loh?

¹⁷ Solomona tih hming hi “remna” tih awmze nei thu mal aṭanga lo chhuak a ni a. Lal Solomona chuan Jerusalem aṭangin ro a rêl a, chu khaw hming awmzia chu “Remna Thuah Hnih Neitu” tihna a ni. Israel rama kum 40 a lal chhûng chuan remna namên lo a awm a. Bible chuan chûng kumte chungchângah: “Solomona dam chhûng zawng chuan Juda-ho leh Israel-ho chu Dan aṭanga Beer-seba khaw thlengin mi tin mahni grêp hrui bulah leh mahni theipui bulah chuan thlamuang takin an awm ṭheuh va,” tiin a sawi a ni. (1 Lal. 4:25) Chuti chung chuan, Solomona chuan a finna zawng zawng nên pawh, a khua leh tuite chu natna, sualna, leh thihna aṭangin a tizalên thei chuang lo. Mahse, Solomona Ropui Zâwk chuan chûng zawng zawng ata chu a khua leh tuite a tizalên ang.—Rom 8:19-20 chhiar rawh.

18. Kristian kohhranah, eng dinhmun nge kan neih?

¹⁸ Tûnah ngei pawh hian Kristian kohhran chhûngah remna kan nei a. Thlarau lam paradis dik tak chu kan chên tak meuh a ni. Pathian leh mi dangte nên kan inrem a. Tûn laia kan dinhmun chungchânga Isaia thu hrilh lâwk hi lo chhinchhiah rawh: “A khandaihte chu leilehna hmâwr zumahte an chher ang a, an feite chu theikung ahchhumna chem kawmahte an chher ang: hnam dangin hnam dang chungah khandaih an lek tawh lo vang a, indo dân pawh an zir tawh hek lo vang,” tih chu. (Is. 2:3, 4) Pathian thlarau kaihhruaina mila thil tiin, thlarau lam paradis mawina chu kan belhchhah a ni.

19, 20. Engvângin nge kan hlim ang?

¹⁹ Amaherawhchu, nakin hun chu a la ṭha chho zêl zâwk ang a. Isua rorêlna hnuaiah thuâwih mihringte’n tûn hmaa la thleng ngai lo remna nasa tak chu an chen rual rualin, mihring ṭha famkim an nih thlengin zawi zawiin “chhiatna bâwih ata tihchhuahin an awm ang.” (Rom 8:21) Kum Sâng Rorêlna tâwpa fiahna hnuhnûng ber an pal tlang hnuah chuan, “thuhnuairawlhte . . . chuan ram hi an luah ang a: remna chênin an hmuingîl ang.” (Sâm 37:11; Thup. 20:7-10) Dik takin, Krista Isua rorêlna chuan tûna kan suangtuah phâk bâkin Solomona rorêlna chu a khûm ang!

²⁰ Israelte kha Mosia, Davida, leh Solomona te enkawlna hnuaia an hlim angin, Krista rorêlna hnuaiah chuan kan hlim lehzual dâwn a ni. (1 Lal. 8:66) Jehova’n Mosia, Davida, leh Solomona Ropui Zâwk, a fapa mal neih chhun a rawn tirh avângin kan va lâwm tak êm! (w09 4/15)

[Footnote-te]

Kan Hrilhfiah Thei Em?

• Engtin nge Isua chu Davida Ropui Zâwk a nih?

• Engtin nge Isua chu Solomona Ropui Zâwk a nih?

• Davida Ropui Zâwk leh Solomona Ropui Zâwk ni bawk chungchângah eng nge i ngaihhlut?

[Zirlai Atâna Zawhnate]

[Phêk 32-naa milem]

Isua rorêlna chuan tûna kan suangtuah phâk bâkin Solomona leh Davida rorêlna chu a khûm ang!