Apresyaen si Jesus​—Say Mas Matalonggaring a David tan Solomon

“Nia! sakey a babaleg nen si Solomon so wadia.”​—MAT. 12:42.

1, 2. Diad panmoria na too, akin a makapakelaw a say niganggan a lanaan nen Samuel bilang ari et si David?

AGTO itsuray ari, tan diad pakanengneng nen propetan Samuel et sikatoy sakey labat ya ugaw a pastol. Niarum ni, say Betlehem a nianakan to et aliwan bantog a baley. Adeskribe itan bilang ‘melag ed saray nilibo na Juda.’ (Miq. 5:2) Anggaman ontan, sayan singa or-ordinaryon balolaki a nanlapud melag a baley et magano lan lanaan nen propetan Samuel pian magmaliw ya ari na Israel.

² Sayan balolaki et si David, a bolirek ed waloran anak nen Jesse. Ag-inisip nen Samuel a sikato so pilien nen Jehova bilang ontumbok ya ari. Sikatoy anggapo ni ingen ed abung sanen linmay Samuel pian lanaan so sakey ed saray anak na matoor a lakin si Jesse. Balet ta si David so pinili nen Jehova tan satan so importante.​—1 Sam. 16:1-10.

3. (a) Anto so sankaimportantian ed si Jehova sano onnenengneng ed sakey a too? (b) Sanen si David so nilanaan, anto so linma ed sikato?

 ³ Walay anengneng nen Jehova ya agnanengneng nen Samuel. Anengneng Toy walad puso nen David tan makapaliket itan ed Sikato. No diad Dios, aliwa labat lan say itsura so importante, noag say peteg ya inkatoo na sakey. (Basaen so 1 Samuel 16:7.) Kanian sanen naamtaan nen Samuel ya anggapo’d saramay pitoran mas papanguloan ya anak Jesse so pinili nen Jehova, impatawag toy sankayugtanan da, a diad saman et manpapastol. Oniay inkuan na salaysay: “Et nambaki [si Jesse], tan [si David] so inyakar to. Bang sikato so ambalanga, tan marakep a lupa, tan mabmabig ed nengneng. Et si Jehova inkuan to: ‘Onalagey ka, sikato so lanaan mo; ta sikato ya.’ Diad saman, si Samuel inala to so saklor na larak, tan sikato so nilanaan to dia ed pegley na saray agagi to: Et say espiritu nen Jehova linma a sankamakapanyarian ed David nanlapu ed saman ya agew tan kayari to.”​—1 Sam. 16:12, 13.

Inlitrato nen David si Kristo

4, 5. (a) Salambiten pa so pigaran pampadparaan nen David tan Jesus. (b) Akin a mas matalonggaring si Jesus nen si David?

⁴ Singa si David, si Jesus et nianak ed Betlehem, manga 1,100 taon kayari inkianak nen David. Para met ed karaklan, si Jesus et agto nengneng so ari ta aliwan sikato’may klase na ari ya iilaloan na maslak ed Israel. Ingen, singa si David, si Jesus so pinili nen Jehova. Tan singa met si David, sikatoy inad-aro nen Jehova. * (Luc. 3:22) Sakey ni, say ‘espiritu nen Jehova et linma’ met ed si Jesus.

⁵ Dakel ni pampadparaan nen David tan Jesus. Singa bilang, si David et trinaidor na managsimbawa ton si Ahitopel, tan si Jesus et trinaidor met na apostol ton si Judas Iscariote. (Sal. 41:9; Juan 13:18) Si Jesus tan si David et namparan angiyansakit a maong ed pasen a panagdayewan ed si Jehova. (Sal. 27:4; 69:9; Juan 2:17) Sakey ni, si Jesus et mananawir nen David. Sakbay na inkianak nen Jesus, inkuan na anghel ed ina to: “Iter na Dios a Katawan ed sikato so trono nen David ya ama to.” (Luc. 1:32; Mat. 1:1) Balet, lapud say amin a Mesianikon sipan et nasumpal ed kinen Jesus, say Mesianikon Ari ya abayag a tinaltalaranan, sikatoy aminpigapigan mas matalonggaring nen si David.​—Juan 7:42.

Tumboken so Ari a Pastol

6. Akin et nibagan maong a pastol si David?

⁶ Si Jesus et sakey met a pastol. Anto ta’ray kualidad na maong a pastol? Say maong a pastol et matoor tan sipapakpel ton aasikasoen, tataganoen, tan babantayan so pulok to. (Sal. 23:2-4) Sanen wala ni’d kalangweran, si David et sakey a pastol tan inasikaso ton maong iray karnero nen ama to. Makmakpel ton inrisgay bilay to pian naprotektaan so pulok sanen inataki itan na leon tan oso.​—1 Sam. 17:34, 35.

7. (a) Panon a niparaan si David ed saray kimey to bilang ari? (b) Akin a nibagan si Jesus imay Maong a Pastol?

⁷ Lapud saray taon na impanayam nen David ed uma tan kapukdolan pian asikasoen iray karnero, sikatoy niparaan ed ambelat a kimey tan responsabilidad a pastolan so nasyon na Israel. * (Sal. 78:70, 71) Si Jesus et pinaneknekan to met a sikatoy napanuliranan a pastol. Sikatoy iikday biskeg tan iwawanwan nen Jehova legan ton papastolan so “melag a pulok” tan say ‘arum a karnero.’ (Luc. 12:32, NW; Juan 10:16) Sirin, si Jesus imay Maong a Pastol. Talagan kabkabat toray karnero to, a tatawagen to nira ed ngaran da. Tan ontan lay impangaro to ed saray karnero to, ta sanen wadiad dalin et mabulbulos ton inter so bilay to parad sikara. (Juan 10:3, 11, 14, 15) Bilang Maong a Pastol, walay agawaan nen Jesus ya agbalot nagawaan nen David. Lapud dondon  bagat to, awalaan iray totoo na pankanawnawan makaliktar ed ipapatey. Anggapoy makapuger ed sikaton mamastol ed “melag a pulok” anggad nagamoran day imortal a bilay diad tawen, ni diad pangiwawanwan to’d saray ‘arum a karnero’ anggad nagamoran day maandon bilay diad matunong a mundo, a ditan et anggapo laray singa oson managsibar.​—Basaen so Juan 10:27-29.

Tumboken so Mananalon Ari

8. Akin a nibagan si David et mananalon ari?

⁸ Bilang ari, si David et sakey a makpel a bumabakal ya analimbeng ed dalin na totooy Dios, tan lawas ‘inikdan nen Jehova na pananalo inerman so laen to.’ Diad panangidaulo nen David, inmawang so sakop na nasyon da, manlapud ilog na Ehipto anggad ilog Eufrates. (2 Sam. 8:1-14) Diad biskeg nen Jehova, sikatoy nagmaliw a sankamakapanyarian a manuley. Oniay inkuan na Biblia: “Say dayew nen David pinmaway ed saray amin a dalin; et si Jehova inyakar to so katatakot ed sikato ed saray amin a nasyon.”​—1 Awa. 14:17.

9. Akin a nibagan si Jesus, bilang Aturon Manari, et sakey a mananalo?

⁹ Singa si Arin David, impatnag met nen Jesus so inkakpel sanen wadiad dalin. Bilang Aturon Manari, impanengneng ton sarag ton patuloken iray demonyo, a pinapapaway to ra ed saray sinelepan da. (Mar. 5:2, 6-13; Luc. 4:36) Anggan say manunan kalaban a si Satanas a Diablo et andian na pakayari ed sikato. Diad tulong nen Jehova et adaeg nen Jesus so mundo, a walad pakayari nen Satanas.​—Juan 14:30; 16:33; 1 Juan 5:19.

10, 11. Anto so betang nen Jesus bilang Arin Bumabakal diad tawen?

¹⁰ Kalabas na manga 60 taon kayari impatey nen Jesus tan inkioli to ed tawen, akaawat si apostol Juan na pasingawey a mangipropropesiya ed magmaliw a betang nen Jesus bilang Arin Bumabakal diad tawen. Oniay insulat nen Juan: “Nia, so sakey a kabayo ya amputi, tan say wala a manyurong ed tapew to wala so sakey a pana to; tan niiter ed sikato so sakey a balanget: tan pinmaway ya analtalo, tan pian manalo.” (Apo. 6:2) Samay akalugan ed kabayon amputi et si Jesus. “Niiter ed sikato so sakey a balanget” nen 1914 sanen nitrono bilang Ari ed tawen. Kayari na satan, sikatoy “pinmaway ya analtalo.” On, singa si David, si Jesus et sakey a mananalon ari. Ag-abayag kayari na inkitrono to bilang Ari ed Panarian na Dios, tinalo toy Satanas tan saray demonyo, tan imbasileng To ra ed dalin. (Apo. 12:7-9) Sikatoy ag-ontunda anggad sigpot lan “manalo,” sano deralen to lay interon marelmeng a sistema nen Satanas.​—Basaen so Apocalipsis 19:11, 19-21.

¹¹ Anggaman ontan, singa si David, si Jesus et maabagey ya ari tan salimbengan toy “baleg ya ulop” diad Armagedon. (Apo. 7:9, 14) Niarum ni, diad uley nen Jesus tan saray kakaiba ton mananawir, salanti, saray pinaolin 144,000, “wala naani kioli ed bilay na saray matunong tan agmatunong.” (Gawa 24:15) Saramay napaoli diad dalin et nawalaan na pankanawnawan manbilay na andi-anggaan. Alay abig ya ilalo so manatalaran ed sikara! Komon ta determinado itayon amin a mantultuloy a ‘manggawa na maong,’ pian wadman itayo sano say dalin et napano lay matunong tan maliket iran sakop na Mas Matalonggaring a David.​—Sal. 37:27-29.

Naebatan so Pikakasi nen Solomon Parad Kakabatan

12. Anto so impikasi nen Solomon?

¹² Say anak nen David a si Solomon et angilitrato met ed si Jesus. * Sanen nagmaliw ya ari si Solomon, nampanengneng si Jehova ed sikato diad kugip tan nankuan ya iter To so anggan anton kerewen to. Sarag komon nen Solomon so onkerew na mas dakel nin kayamanan, pakayari, odino andukey a bilay. Balet ta oniay andi-siblet a kerew to’d si Jehova: “Ikdan mo ak natan komon na kakabatan tan pakatalos, pian makapaway ak tan makaloob ak ed arap na saya a baley; ta siopa so makayari a mangukom ed saya a baley mo, a sikato so ontan lan kabaleg?” (2 Awa. 1:7-10) Inebatan nen Jehova so  pikakasi nen Solomon.​—Basaen so 2 Awaran 1:11, 12.

13. Akin a nibagan anggapoy makapipara ed kakabatan nen Solomon, tan siopay Lapuan na satan?

¹³ Sanen si Solomon et manmamatoor ni ed si Jehova, anggapo’d saray kapanaonan to so makapipara ed saray makabat a salita to. “Talonlibo ya uliran” so sinalita nen Solomon. (1 Ara. 4:30, 32, 34) Dakel ed saraya so nisulat tan siansia nin papablien na saramay manaanap na kakabatan. Say reyna na Seba et nambaroy ni ingen na 2,400 a kilometro pian suboken so kakabatan nen Solomon panamegley na “saray mairap a tepet.” Nandindinayewan toray ebat nen Solomon tan say inkaaligwas na panarian to. (1 Ara. 10:1-9) Imbaga na Biblia no siopay Lapuan na kakabatan nen Solomon: “Amin a dalin sineetan da a nengnengen so imato’nen Solomon, pian denglen da so kakabatan to, a say Dios inyan to ed puso to.”​—1 Ara. 10:24.

Tumboken so Makabat ya Ari

14. Akin et mas matalonggaring si Jesus nen si Solomon?

¹⁴ Saksakey so toon malinlinew ya akapalumbas ed kakabatan nen Solomon. Satan et si Jesu-Kristo, ya indeskribe toy inkasikaton “sakey a babaleg [odino mas matalonggaring] nen si Solomon.” (Mat. 12:42) Sinalita nen Jesus iray “salita na maando a bilay.” (Juan 6:68) Alimbawa, pinalaknab na Sermon ed Palandey so pigara ed saray uliran nen Solomon. Walaray indeskribe nen Solomon a makapangitarok na liket ed sakey a managdayew nen Jehova. (Uli. 3:13; 8:32, 33; 14:21; 16:20) Si Jesus balet et indanet to a say lapuan na tuan liket et saray bengatlan misiglaotan ed panagdayew ed si Jehova tan say kasumpal na sipasipan na Dios. Inkuan to: “Maliket iramay manonot ed espiritual a pankaukolan da, ta parad sikara so panarian na katawenan.” (Mat. 5:3, NW) Saramay iyaaplika day prinsipyo na bangabangat nen Jesus et napapaapit ed kinen Jehova, say “subol na bilay.” (Sal. 36:9; Uli. 22:11; Mat. 5:8) Si Kristo so personipikasyon na “karunongan na Dios.” (1 Cor. 1:24, 30) Bilang Mesianikon Ari, walad si Jesu-Kristo so “espiritu na kakabatan.”​—Isa. 11:2.

15. Panon itayon nagunggonaan ed kakabatan na Dios?

¹⁵ Bilang papatumbok na Mas Matalonggaring a Solomon, panon itayon nagunggonaan ed kakabatan a manlalapud Dios? Say kakabatan nen Jehova et niparungtal ed Salita to, kanian gawaen tayoy anggaay nayarian tayon anapen itan diad mapetepet a panaral ed Biblia, partikular laray salita nen Jesus, tan diad pandalepdep ed saray nababasa tayo. (Uli. 2:1-5) Sakey ni, kaukolan a mantultuloy tayon onkerew ed Dios na kakabatan. Ipapaseguro ed sikatayo na Salitay Dios a saray masimoon a pikakasi tayo parad tulong et naebatan. (Sant. 1:5) Diad tulong na masanton espiritu, naromog tayoray mabmablin kakabatan ed Salita na Dios ya ontulong ed sikatayon talonaan iray problema tan makapanggawa na makabat iran desisyon. (Luc. 11:13) Si Solomon et atawag met a “managpulong [odino managtipon]” ya ‘imbangat to ed baley so pikakabat.’ (Ecl. 12:9, 10) Si Jesus et sakey met a managtipon lapud sikatoy Ulo na Kristianon kongregasyon. (Juan 10:16; Col. 1:18) Sirin, maabig no atendian tayo iray pantitipon na kongregasyon a ditan et mantutultuloy itayon ‘nababangatan.’

16. Anto so pampadparaan nen Solomon tan Jesus?

¹⁶ Si Solomon et sakey ya arin dakdakel so agawaan to. Inyuksoy toy kimey a panagpaalagey diad interon nasyon. Indaulo toy panagpaalagey na saray palasyo, syudad a panagsimpenan, syudad a parad saray kabalyero tan karwahe, impanggawa  na saray karsada tan irigasyon. (1 Ara. 9:17-19) Agunggonaan so interon panarian ed sarayan ginawa to. Si Jesus et sakey met a managpaalagey. Impaalagey toy kongregasyon to ed “baton dampay.” (Mat. 16:18) Idaulo to met so kimey a panagpaalagey a nagawa diad balon mundo.​—Isa. 65:21, 22.

Tumboken so Ari na Kareenan

17. (a) Anto so makatantanda ed uley nen Solomon? (b) Anto so agnagawaan nen Solomon?

¹⁷ Say ngaran a Solomon et nanlapud terminon mankabaliksay “kareenan.” Say kawalaan na trono to et diad Jerusalem, a kabaliksan toy “Pakawalaay Doblin Kareenan.” Diad 40 taon ya impanuley to ed Israel et awalaan iray agnaparaan a kareenan. Oniay inkuan na Biblia nipaakar ed saraman a taon: “Say Juda tan say Israel manayam a matalek, balang sakey a too ed silongan na ubasan to tan higos to, manlapu ed Dan angga ed Beerseba, ed saray amin ya agew nen Solomon.” (1 Ara. 4:25) Balet, anggan ontan lay inkadunong nen Solomon, agto nibulos iray sakop to manlapud panangaripen na sakit, kasalanan, tan ipapatey. Ingen, say Mas Matalonggaring a Solomon et ibulos to iray sakop to manlapud amin na saratan.​—Basaen so Roma 8:19-21.

18. Diad loob na Kristianon kongregasyon, antoran bendisyon so panggagayagaan tayo?

¹⁸ Anggan natan, diad loob na Kristianon Kongregasyon et walaan itayoy kareenan. On, panggagayagaan tayo so tuan espiritual a paraiso. Walaan itayoy kareenan ed Dios tan ed kaparan too. Imanoen pay impropesiya nen Isaias nipaakar ed saray bendisyon a nagagamoran tayo natan: “Pitpiten da naani so saray kampilan da a pagmaliwen da a dingding na lukoy, tan saray gayang da a komkompay. Say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.” (Isa. 2:3, 4) No onkikiwas itayo unong ed espiritu na Dios, lalo tayon napaparakep so espiritual a paraiso.

19, 20. Antoray rason tayo pian manliket?

¹⁹ Ingen, mas maabig ni nagawa ed arapen. Legan a panggagayagaan na saray matulok a totoo so agnaparaan a kareenan diad uley nen Jesus, kalkalna iran “niliktar ed inkaaripen na kabulokan” anggad magmaliw laran perpekto. (Roma 8:21) Sano alampasan da lay unor a subok diad sampot na Sanlibon Taon ya Uley, “saray mauyamo tawiren da naani dalin tan manliket ira a dili ed inkadaakan na kareenan.” (Sal. 37:11; Apo. 20:7-10) Petepeteg a napalumbasan na uley nen Kristo Jesus so uley nen Solomon diad paraan ya agtayon balot naisip natan!

²⁰ No nanggayagaan na Israel so impangidaulo di Moises, David, tan Solomon, mas panggayagaan tayoy uley nen Kristo. (1 Ara. 8:66) Sirin, pisalamatan tayoy Jehova ta inter toy bogbogtong ya Anak to​—say Mas Matalonggaring a Moises, David, tan Solomon!

[Saray paimano ed leksab]

Kasin Nipaliwawam?

• Akin a nibagan si Jesus et Mas Matalonggaring nen si David?

• Akin a nibagan si Jesus et Mas Matalonggaring a Solomon?

• Akin ya aapresyaen mo si Jesus, say Mas Matalonggaring a David tan Solomon?

[Tepetepet Parad Panagaral]

[Litrato ed pahina 31]

Inlitrato na kakabatan ya inter na Dios ed si Solomon so kakabatan na Mas Matalonggaring a Solomon

[Litrato ed pahina 32]

Palumbasan na uley nen Jesus so uley di Solomon tan David diad paraan ya agtayon balot naisip natan!