Upperneq suua?

OQAASEQ ‘upperneq’ illit qanoq nassuiassagaluarpiuk? Inuit ilaasa upperneq uppianerlu assigiissittarpaat. Atuakkiortup tusagassiortullu nersugaasup H.L. Menckenip upperneq “uppernarluanngitsut piunerannik silaqassutsimut akerliusumik upperinninnertut” allaatigaa.

Biibilimili upperneq uppianertut silaqassutsimulluunniit akerliusutut allaatigineqanngilaq. Guutip oqaasiani ima allassimasoqarpoq: “Upperneq tassaavoq neriugisamik tatiginnilluinnarneq, takunngisamik qularuteqannginneq.” — Hebræerit 11:1.

Inuit upperneq pillugu assigiinngitsunik paasinnittaaseqarmata apeqqutit uku misissoriartigit:

• Inuppassuit upperneq pillugu eqqartuigaangamik eqqarsaatigisartagaat Biibilimi nassuiaatigineqartumit qanoq allaassuteqarpat?

• Biibilimi allaatigineqartutut uppilerumalluni iliuuseqarnissaq sooq pingaaruteqarpa?

• Qanoq ililluni upperluarnermik ineriartortitsisoqarsinnaava?

Qularnaveeqqutaallunilu uppernarsaataasoq

Taamani Hebræerinut allakkat Biibilimiittut allanneqarmata, oqaaseq grækerisooq matumani “tatiginnilluinnarneq”-mik nutserneqarsimasoq atorneqarajuppoq. Oqaaseq taanna niuernermut uppernarsaatini atorneqarajuppoq pisisullu arlaannik aalajangersimasumik piginnilerumaarneranik qularnaveeqqutinut tunngatillugu atorneqartarluni. Taamaattumik qinerlerfissiat ilaat naapertorlugu Hebræerinut allakkat 11:1 ima nutserneqarsinnaavoq: “Upperneq tassaavoq neriugisanut uppernarsaat.”

Niuertarfimmi tusaamasaalluartumi arlaannik pisisimaguit pisiavillu ilinnut aanneqarnissaa utaqqisimagukku taamatut uppersimassaatit. Pisinermut uppernarsaat ilinnut tunniunneqartoq pissutigalugu pisiavit tigunissaata qularutiginnginnissaanut pissutissaqarputit. Oqartoqarsinnaavoq pisinermut uppernarsaat pisiavit tigunissaanut qularnaveeqqutaasoq. Pisinermut uppernarsaat tammarsimagukku igissimagukkuluunniit, pisiavit piginera uppernarsarsinnaassanngikkaluarpat. Tamatumunnga assingusumik Guutip neriorsuutiminik eqqortitsiumaarneranik upperinnittut neriuutigisamik pinissaanut qularnaveeqquteqarput. Uppinngitsulli upperunnaartulluunniit Guutip neriuutissiissutaanik pinissamut piginnaatitaanngillat. — Jaaku 1:5-8.

Oqaatsit aappaat Hebræerinut allakkani 11:1-imiittoq “qularuteqannginneq”-mik nutserneqartoq suup taamaappasissorinaraluartup taamaannginneranut uppernarsaammik isumaqarpoq. Assersuutigalugu seqineq nunarsuarmik kaaveerpasissinnaavoq, kangianiit nuisarluni, qilammi ingerlaarluni kitaanullu tarrittarluni. Ullorissanilli ilisimatusarnermi matematikkimilu uppernarsarneqarsimavoq seqernup nunarsuaq kaavinngikkaa. Uppernarsaatit taakku misissorluareerlugit akuerigukkit nunarsuup seqinermik kaaviinera upperilissavat — takusinnaasatit allatut ippasikkaluartut. Upperneq taamaassorinninnerinnaanngilaq. Uppernerli pissutigalugu pissutsit pissusiviattut paasisinnaalissavatit.

Upperluarnissaq qanoq pingaaruteqartigaa?

Taamatut uppernissaq Biibilimi kajumissaarutigineqarpoq — upperluarneq uppernarsaatinik tunngavilik, aamma upperisanik allanngortitsisariaqaraluaraanniluunniit. Taamatut upperneq pingaaruteqarluinnarpoq, apustilimi Paulusi ima allappoq: “[Uppersuseqarnani] Guutimit iluarisaaneq ajornaqaaq, Guutimummi pisup upperisariaqarpaa taanna tassaareersoq ujarlersinilu akissarsisissagai.” — Hebræerit 11:6.

Upperluarnermik ineriartortitsinissannut sapernartunngortitsisinnaasut amerlaqaat. Iliuuserineqartariaqartulli sisamat quppernerni tulliuttuni sammineqartut iliuuserigukkit upperluarneq ineriartortissinnaavat.