1 Biibili tutsuigileruk

“Allakkat Illernartut tamarmik Guutimit isumassarsiarititaapput iluaqutaallutillu ajoqersuinermut, oqaaqqissaarinermut, naqqiinermut.” — 2 Timotheusi 3:16, NV.

SOOQ TAMANNA SAPERNARPA? Inuppassuit Biibili inuit ilisimassusiannik tunngaveqaannarnerarpaat. Ilaat isumaqarput oqaluttuarisaanermut tunngatillugu eqqoqqissaanngitsoq. Allat isumaqarput siunnersuutit Biibilimiittut nalitsinnut naleqqutinngitsut inuunermilu atorneqarsinnaanngitsut.

QANOQ ILILLUTIT TUTSUIGILERSINNAAVIUK? Biibilip tutsuiginassusianik ullumikkulluunniit atorsinnaassusianik apeqqusiisartut amerlanertigut misissuisimaneq ajorput. Allat oqaaserisimasaat oqaatigeqqiinnartarpaat. Biibilimili ima mianersoqqussuteqarpoq: “Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.” — Ussatit 14:15.

Allat oqaaserisimasaat upperiinnarnagit soormi Berøami, maanna Grækenlandiusumi, kristumiut siulliit pisimanerattut ilioruit? Taakku arlaannik oqaluttuunneqaraangamik akuersaaginnarneq ajorput. Ilisimaneqaatigaalli ‘ullut tamaasa Allakkanik misissuisarnertik paasiniarlugu ilumut taamaannersut’. (Apustilit Suliaat 17:11) Biibili tassaavoq Guutip oqaasia isumassarsiarititaasoq. Illit Biibilimik tutsuiginninnissannut pissutissaalluartut marluk sammeriartigit.

Biibili oqaluttuarisaanikkut eqqorpoq. Qulartut inuit aqqinut sumiiffinnullu Biibilimi eqqaaneqartunut tunngatillugu Biibilip eqqorluartuuneranik ukiut ingerlanerini apeqqusiisarput sulilu apeqqusiisarlutik. Uppernarsaatinilli taamatut qularinninnissamut pissutissaqartoqannginneranik Biibilimilu oqaluttuarineqartut uppernarnerannik ersersitsisunik nassaartoqartuarpoq.

Assersuutigalugu ilisimatuut qularutigisimavaat Assyriap kunngiata Sargonip, Esaja 20:1-imi eqqaaneqartup, inuusimanera. 1840-kkunnili itsarnisarsiuut kunngip taassuma illussaarsuarisimasaani assaalersimapput. Maanna Sargoni Assyriap kunngiisa ilisimaneqarnerpaartaannut ilaavoq.

Aamma isornartorsiuisartut Pontiusi-Pilatusip, Romamiut naalagaatitaata Jiisusip toqunneqarnissaanik peqqussuteqartup, inuusimanera qularisimavaat. (Matthæusi 27:1, 22-24) 1961-imili illoqarfiup Cæsareap Israelimiittup eqqaani ujarak nassaarineqarpoq Pilatusip aqqanik qanorlu akimatigineranik kigartuiffigineqarsimasoq.

Atuagassiami U.S.News & World Report-imi 25. oktobari 1999-imoortumi Biibilip oqaluttuarisaanermut tunngatillugu eqqoqqissaarnera ima allaatigineqarpoq: “Ullumikkut itsarnisarsiornermi maluginiarnartumik uppernarsarneqarsimavoq Testamentitoqqap Testamentitaallu taakkunani pingaarnersanut tunngatillugu oqaluttuarisaanikkut eqqoqqissaarnera — Israelikkut ataataanerpaartaannik, Israelikkut Egyptenimit aninerannik, Daavikkut kunngeqarfiinik Jiisusillu inuuneranik pissutsinillu taassuma nalaani atuuttunik oqaluttuat pingaarnerusortaasa ilumuussusiat aalajangersumik oqaatigineqarlutik.” Nassaat itsarnitsat Biibilimik tutsuiginninnissamut aalajangiisuunngikkaluartut, Biibilip oqaluttuarisaanikkut eqqoqqissaartuunera pissutigalugu atuakkap Guutimit isumassarsiarititaanera naatsorsuutigineqarsinnaavoq.

Ilisimassuseq atoriaannaasoq Biibilimiittoq inunnut assigiinngilluinnartunik tunuliaqutalinnut  iluaqutaavoq. Tappiorannartut piunerannut nappaatillu tunillaassuuttarnerannut tunngatillugu paasinnittoqaqqajanngitsorli eqqiluisaarnissaq pillugu Biibilimi malittarisassiisoqarpoq ullumikkut suli atorluarsinnaasunik. (3 Mosesi 11:32-40; 5 Mosesi 23:13, 14) Ilaqutariit imminnut qanoq pisarnissaat pillugu siunnersuutinik Biibilimiittunik malinnittut pilluarnerupput. Assersuutigalugu Biibilimi aappariinnut ima siunnersuuteqarpoq: “Tamassi immikkut nuliasi immissisut asasussaavasi, nuliaasullu uini mianerisussaavaa.” Meeqqallu ima kajumissarneqarput: “‘Ataatat anaanallu ataqqikkit!’ Tassa inassut neriorsuutitalik siulleq: ‘atugarissaaqqullutit inuummersoqqullutillu nunami.’” (Efesosimiut 5:28–6:4) Najoqqutassiat Biibilimiittut maleruarlugit inuusoq akisussaaffimminik ilaginnaajumannginnerussallunilu sulisitsisutut ingasaassisuunnginnerussaaq. Assersuutigalugu Biibilimi ima allassimavoq: “Tillittartoq tillissaarli, ilungersorlunili suliniarli assani atorlugit sulinermigut ajunngitsunik naammassisaqarniarluni ajorsartunut tunniussassaqarsinnaajumalluni.” (Efesosimiut 4:28; 6:5-9) Aamma najoqqutassiat Biibilimiittut naapertorlugit inuuneq eqqarsartaatsikkut peqqissutsimut iluaqutaavoq. Najoqqutassiat ilaat imaappoq: “Silatusaarneq timip inuuneraa, sinngatuuneq saarnit aseruuttoorneraat.” (Ussatit 14:30; Efesosimiut 4:31, 32; Kolossemiut 3:8-10) Siunnersuutit atoriaannaat tamakku Pinngortitsisumeersuunerat naatsorsuutigineqarsinnaavoq.

QANOQ ILUAQUTAASSAVA? Ilisimassuseq Biibilimiittoq misilittagakitsunik ilisimasunngortitsisarpoq. (Tussiaat 19:8) Aamma Biibili tutsuigilersimagutsigu, tamanna upperlualerumalluni iliuuserineqartussap tulliuttup iliuuserinissaanut atuakkanit allanit tamanit iluaqutiginerpaassavarput.

Paasisaqarnerorusukkuit takuuk kapitali 2, “Bibelen — en bog fra Gud”, atuakkami Hvad er det Bibelen virkelig lærer?-imi *

[Quppernerup ataani ilanngussaq]