1 Tall-y bas-yard ne Biiblã

“Gʋlsg Sõamyã zãng yaa Wẽnnaam n kõ tõndo: La a bee bark zãmsg yĩnga, la tɩ wilg ned a kongre, la saglg yĩnga.”—2 Tɩmote 3:16.

BÕE N KƖT TƖ PA NANA? Neb kẽer yetame tɩ yaa ninsaalb n tags bal n gʋls Biiblã. Sãnda tẽedame tɩ kibay nins sẽn be a pʋgẽ wã pa sɩd ye. Neb a taab me yetame t’a saglsã pa tõe n tũ, bɩ pa le tar yõod ne tõnd ye.

BÕE LA Y SEGD N MAANE? Naoor wʋsgo, neb nins sẽn yet tɩ Biiblã goam pa sɩd bɩ pa tar yõodã pa bao n bãng Biiblã sẽn sɩd yet bũmb ningã b toor ye. Yaa b sẽn wʋm neb a taab nengẽ bal la b yeta. La Biiblã yeta woto: “Zɩt deegda a sẽn wʋmd bũmb ninga fãa. La nin-yẽeseng [bɩ yam soab] gũusda ne a sẽn maand bũmb ningã.”—Yelbũna 14:15.

Y pa segd n tẽ bũmb ning neb a taabã sẽn yetã zond yaar ye. Y segd n maana wala Beere kiris-nebã. B pa sak n deeg b sẽn togs-b bũmb ningã woto bal ye. B “baoo Gʋlsg Sõamyã pʋgẽ daar fãa tɩ bãng bũmb nins b sẽn yet bãmbã sã n yaa tɩrga.” (Tʋʋma 17:11) Bɩ d ges bʋʋm a yiib sẽn kɩt tɩ y segd n tall bas-yard tɩ Biiblã yaa Wẽnnaam n kɩt tɩ b gʋlse.

Biiblã pʋgẽ kibayã sɩd zĩndame. Yʋʋm wʋsg pʋgẽ, neb n kɩɩs tɩ neb la zĩis kẽer yell Biiblã sẽn gomdã pa sɩd zĩnd ye. La naoor wʋsgo, b yãta kaset sẽn wilgd tɩ kɩɩsdbã tudgame, la tɩ Biiblã zemsa ne bas-yardo.

Wala makre, bãngdb kẽer ra kɩɩsame tɩ Asiri rĩm a Sargõ yell b sẽn gomd Ezai 20:1 pʋgẽ wã pa yɩ ned sẽn sɩd zĩnd ye. La yʋʋmd 1840 poore, tẽn-vaeesdbã tuume n buk rĩmã na-yirã. Masã, neb wʋsg miime t’a Sargõ yɩɩ Asiri rĩm a ye sẽn sɩd zĩndi.

Neb me n kɩɩs tɩ Rom guvɛrneer a Põns Pɩlat sẽn kõ noor tɩ b kʋ a Zezi wã pa yɩ ned sẽn sɩd zĩnd ye. (Matɩe 27:1, 22-24) La yʋʋmd 1961 wã pʋgẽ, b yãa kugr b sẽn gʋls a Pɩlat yʋʋr ne naam ning a sẽn da tarã zĩig sẽn pa zãr ne Sezaare Israɛll soolmã pʋgẽ.

Kibay nins sẽn be Biiblã pʋgẽ wã wɛɛngẽ, zʋrnall a ye (U.S.News & World Report) yeela yʋʋmd 1999 zĩ-likr kiuug rasem 25 wã woto: “Rũndã-rũndã, tẽn-vaeesgã kɩtame tɩ b bãng vẽeneg tɩ kibay nins sẽn be Kãab-paalgã la Kãab-kʋdgã pʋgẽ wã sɩd zĩndame. Wala makre, Israɛll nebã yaab rãmbã kibare, b Ezipt yiibã, a Davɩɩd ne a kambã la a yagensã naamã kibare, la vɩɩmã sẽn da yaa to-to a Zezi wakatẽ wã.” Baa ne sẽn pa tẽn-vaeesdbã sẽn yã bũmb ninsã n segd n kɩt tɩ ned tall bas-yard ne Biiblã, yãmb gũudame tɩ sebr sẽn yaa Wẽnnaam Gomd togs kibay sẽn yaa sɩd woto.

 Sagls nins sẽn be Biiblã pʋgẽ wã nafda neb buud fãa. Nand tɩ logtoɛɛmbã wa bãng tɩ rẽgdã wata ne bãase, Biiblã ra pĩnd n kõo sagls yɩlemdã wɛɛngẽ, la sagl-kãens ket n tara yõod rũndã-rũndã. (Maankʋʋre 11:32-40; Tõodo 23:13, 14) Zagsã pʋsẽ, neb nins sẽn tũud Biiblã saglsã b manesmã ne taabã pʋgẽ wã paamda sũ-noog n paasdẽ. (Efɛɛz rãmba 5:28-6:4) Neb nins sẽn tũud Biiblã saglsã lebgda tʋm-tʋmdb sẽn tʋmd sõma, bɩ tʋʋm taoor dãmb sẽn yaa nin-sõmse. (Efɛɛz rãmba 4:28; 6:5-9) Biiblã sagls tũub kõta yĩns laafɩ me. (Yelbũna 14:30; Efɛɛz rãmba 4:31, 32; Kolos rãmba 3:8-10) Tõnd gũudame tɩ sagls sẽn yit d naandã nengẽ sɩd tall yõod woto.

A NAFRÃ YAA BÕE? Sagls nins sẽn be Biiblã pʋgẽ wã kõta zɩɩlem soab yam. (Yɩɩl Sõamyã 19:8) Sẽn paase, d sã n tar bas-yard ne Biiblã, tõe n sõnga tõnd tɩ d tũ saglg ning sẽn be sõsg ning sẽn pʋgdã pʋgẽ wã n paam tẽeb sẽn tar pãnga, la sebr a to kae n tõe n sõng tõnd woto ye.

Y sã n dat kibay n paase, bɩ y ges Biiblã sɩd yetame tɩ bõe? * sebrã sak a 2 soabã: “Biiblã yaa Wẽnnaam sebre.”

[Tẽngr note]