3 Ammuem ti Kinapudno Maipapan ken Jesus

“Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

ANIA TI LAPPED? Adda dagiti agkuna a saan a pulos a nagbiag ni Jesus. Adda met dagiti mamati a nagbiag ni Jesus ngem ipapilitda nga isu ket maysa la nga ordinario a tao a nabayagen a natay.

KASANOM A MAPAGBALLIGIAN TI LAPPED? Tuladem ti adalan a ni Natanael. * Imbaga kenkuana ti gayyemna a ni Felipe a nasarakannan ti Mesias​—“ni Jesus, ti anak ni Jose, a taga Nazaret.” Ngem saan a gapu ta imbaga dayta ni Felipe ket basta namatin ni Natanael. Kinapudnona, kinuna ni Natanael: “Mabalin aya a tumaud manipud Nazaret ti aniaman a banag a naimbag?” Nupay kasta, pinatganna ti awis ni Felipe nga ‘umayna kitaen’ a mismo. (Juan 1:43-51) Magunggonaanka met no usigem a mismo ti pammaneknek maipapan ken Jesus. Ania ti mabalinmo nga aramiden?

Usigem ti pammaneknek ti historia a ni Jesus ket pudno a persona. Ti dua a di Kristiano a mararaem a historiador idi umuna a siglo a da Josephus ken Tacitus dinakamatda ni Jesu-Kristo kas tao a pudno a nagbiag idi. Iti panangdeskribirna no kasano a pinabasol ni Romano nga Emperador Nero dagiti Kristiano iti napasamak nga uram idiay Roma idi 64 K.P., insurat ni Tacitus: “Ti uram ket impabasol ni Nero iti maysa a grupo dagiti tattao a naawagan iti Kristiano, a kagurgura dagiti Romano gapu kadagiti Nakristianuan nga aramidda. Kasta unay ti panangparigatna kadakuada. Ni Kristo a nakaalaan ti naganda a Kristiano, sinagabana ti kakaruan a dusa kadagiti ima ti maysa kadagiti prokuradortayo a ni Poncio Pilato bayat ti panagturay ni Tiberio.”

No mainaig kadagiti panangdakamat dagiti historiador idi umuna a siglo maipapan ken Jesus ken dagiti nagkauna a Kristiano, kastoy ti kuna ti Encyclopædia Britannica, 2002 nga Edision: “Dagitoy a nagduduma a reperensia paneknekanda nga uray idi un-unana, dagiti bumusbusor iti Kristianidad namatida a talaga a nagbiag ni Jesus, a makueskuestionaran iti immuna a gundaway ken kadagiti di umiso a rason idi ngudo ti maika-18 a siglo agingga idi rugrugi ti maika-20 a siglo.” Idi 2002, kinuna ti maysa nga editorial iti The Wall Street Journal: “Malaksid iti sumagmamano nga ateista, patienen ti kaaduan nga eskolar a pudno a nagbiag idi ni Jesus a Nazareno.”

Usigem ti pammaneknek a ni Jesus ket napagungar. Idi a ni Jesus ket inaresto dagiti  bumusbusor kenkuana, pinanawan dagiti kasisingedan a gagayyemna, nawarawara dagiti pasurotna, ken inlibak pay ketdi ti gayyemna a ni Pedro gapu iti buteng. (Mateo 26:31, 55, 56, 69-75) Kalpasan dayta, dagus a nagbalin nga aktibo unay dagiti adalanna. Situtured a sinango da Pedro ken Juan dagiti mismo a nagkukumplot a mangipapatay ken Jesus. Naparegta unay dagiti adalan ni Jesus ta uray la inkasabada ti pannursurona iti intero nga Imperio ti Roma ken kinaykayatda pay ti matay ngem ti mangikompromiso kadagiti patpatienda.

Ania ti maysa a makagapu iti daytoy a dakkel a panagbalbaliw iti kababalinda? Inlawlawag ni apostol Pablo a ni Jesus ket napagungar ken “nagparang ken Cefas [ni Pedro], kalpasanna iti sangapulo ket dua.” Innayon ni Pablo: “Kalpasan dayta nagparang iti nasurok a lima gasut a kakabsat iti maymaysa a gundaway.” Idi insurat dayta ni Pablo, sibibiag pay ti kaaduan kadagiti nakasaksi iti dayta a pasamak. (1 Corinto 15:3-7) Ti testimonia ti maysa wenno dua a saksi ket mabalin a nalaka nga ibasura dagiti managduadua. (Lucas 24:1-11) Ngem ti testimonia ti nasurok a lima gasut a nakasaksi ket nabileg nga ebidensia a ni Jesus ket napagungar.

ANIA TI GUNGGONA? Dagidiay mamati ken Jesus ken agtulnog kenkuana ket mabalin a mapakawan ti basbasolda ken maaddaanda iti nadalus a konsiensia. (Marcos 2:5-12; 1 Timoteo 1:19; 1 Pedro 3:16-22) No matayda, inkari ni Jesus a pagungarenna ida “iti kamaudianan nga aldaw.”​—Juan 6:40.

Para iti ad-adu pay nga impormasion, kitaem ti kapitulo 4 a “Siasino ni Jesu-Kristo?” ken kapitulo 5 a “Ti Subbot​—Kapatgan a Sagut ti Dios” iti libro nga Ania a Talaga ti Isursuro ti Biblia? *

[Footnotes]

[Ladawan iti panid 7]

Kas ken Natanael, usigem dagiti pammaneknek maipapan ken Jesus