Nuhe Jesu Plọn Mí

Gando “Opodo” Go

Opodo etẹ tọn?

Devi Jesu tọn lẹ kanse e dọmọ: “Etẹwẹ na yin ohia tintin tofi towe tọn po vivọnu titonu lọ tọn po?” (Matiu 24:3, NW) To whenue Jesu na gblọndo na kanbiọ enẹ, e ma dọ dọ aigba he ji mí te na yin vivasudo gba. Jẹnukọnna nujijọ enẹ, e ko dọho gando “owhenu” kavi titonu ehe go bo yí hogbe lọ zan nado dlẹnalọdo tito tonudidọ, ajọwiwa po sinsẹ̀n tọn he gbẹtọvi lẹ doai lẹpo po, ehe tin to anademẹ Satani tọn glọ. (Matiu 13:39, 40, 49) Enẹwutu, titonu enẹ wẹ e tindo to ayiha mẹ to whenuena e dọmọ: “opodo na wá.”—Matiu 24:14.

Nawẹ Jesu basi zẹẹmẹ opodo lọ tọn gbọn?

“Wẹndagbe” de wẹ opodo titonu ylankan ehe tọn yin. Jesu dọmọ: ‘Yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.’ Jesu basi zẹẹmẹ opodo titonu ehe tọn dọmọ: “Nukunbibia daho na tin, ehe nkọ ma ko tin sọn whẹwhẹwhenu aihọn tọn kakajẹ dinvie, lala, mọnkọtọn ma to na tin gbede. Adavo le yè ko sán azán nẹlẹ dogli, mẹhe na sọgan lùn in tọ́n de ma tin.”—Matiu 24:14, 21, 22.

Mẹnu lẹ wẹ na yin vivasudo?

Mẹhe ma yiwanna Jehovah po Jesu po bo ma nọ wadevizọn na yé lẹ kẹdẹ wẹ na yin vivasudo. Omẹ mọnkọtọn lẹ ma nọ setonuna Jiwheyẹwhe. Jesu dọmọ: “Le azán Noa tọn te, mọkẹdẹ wẹ [tintin tofi] Ovi gbẹtọ tọn na nọ̀. Na di to azán nẹlẹ mẹ he tin to singigọ lọ nukọn . . . yé masọ yọnẹn kaka singigọ do wá, bo plọ́ yemẹpo yì.” (Matiu 24:36-39)  Jesu dọ dọ mẹsusu wẹ tin to aliho de ji he planmẹ yì dindọn mẹ. Ṣigba, e hẹn mí deji dọ ‘ali bibó de tin he hẹnmẹ yì ogbẹ̀ mẹ.’—Matiu 7:13, 14.

Whetẹnu wẹ titonu ehe na wá opodo?

To whenue devi lẹ kanhose Jesu gando ohia tintin tofi etọn po ‘vivọnu titonu lọ tọn’ po go, e gblọn dọmọ: “Akọta na fọ́n do akọta ji, ahọludu do ahọludu ji; huvẹ po azọ̀nylankan po, po aigba sisọsisọ po na tin to fisusu . . . podọ na ylanwa na sudeji wutu, owanyi mẹsusu tọn na lẹzun mimiọn.” (Matiu 24:3-12) Enẹwutu, owẹ̀n ylankan he mí nọ sè to egbehe lẹpo tindo zẹẹmẹ tulinamẹ tọn de—enẹ wẹ yindọ Ahọluduta Jiwheyẹwhe tọn na hẹn jijọho wá na gbẹtọvi tonusetọ lẹ to madẹnmẹ. Jesu dọmọ: “Whenuena mì mọ onú helẹ to jijọ, mì ni yọnẹn dọ ahọludu Jiwheyẹwhe tọn tin sẹpọ.”—Luku 21:31.

Etẹwẹ hiẹ dona wà?

Jesu dọ dọ Jiwheyẹwhe “yí Ovi detọ́n etọn dopo akàn namẹ, na mẹdepope he yí i sè ma nado dọ̀n, ṣigba e nido tindo ogbẹ̀ madopodo.” (Johanu 3:16) Nado sọgan yí Jiwheyẹwhe po Ovi etọn po sè, hiẹ dona yọ́n yé ganji. Enẹwutu, Jesu dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.”—Johanu 17:3.

A dike magbọjẹ po nuhahun lẹ po glọnalina we nado plọn lehe hiẹ sọgan dohia dọ a yiwanna Jiwheyẹwhe gbọn blo. Jesu dọmọ: “Mì ni payi mìde go, vlavo ayiha mìtọn nikaa yin yíyí gigọfla do doagbànna po [magbọjẹ gbẹ̀mẹ tọn lẹ] po, bọ azán lọ nado wá mì ji ajiji di omọ̀ de. Na . . . e na wá.” Eyin hiẹ payi avase Jesu tọn go, a na “yínuglo nado họ̀ngán sọn onú he lẹpo mẹ he to na wá jọ.”—Luku 21:34-36.

Na nudọnamẹ dogọ, pọ́n hosọ lọ “Be ‘Azán Godo Tọn lẹ’ mẹ Wẹ Mí to Gbẹnọ Te Ya?” to weta 9 owe Etẹwẹ Biblu Plọn Mí Taun? a tọn mẹ.

[Nudọnamẹ Odò tọn]