Seo re Ithutago Sona go Jesu

Mabapi le “Bofelo”

Ke’ng seo se tlago go fedišwa?

Barutiwa ba Jesu ba ile ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba eng?” (Mateo 24:3) Ge a araba potšišo yeo, Jesu ga se a bolela gore lefase la kgonthe le tla fedišwa. Pejana o ile a bolela ka “tshepedišo ya dilo” gomme o ile a diriša polelwana ye e le ge a bolela ka tshepedišo ka moka ya tša dipolitiki, ya tša kgwebo le ya bodumedi yeo e laolwago ke Sathane. (Mateo 13:22, 40, 49) Ka gona, yeo e be e le tshepedišo yeo a bego a nagana ka yona ge a be a bolela gore: “Bofelo bo tla tla.”—Mateo 24:14.

Jesu o hlalositše bofelo bjang?

Bofelo bja tshepedišo ye yeo e sa lokago ke “ditaba tše dibotse.” Jesu o itše: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” Jesu o hlalositše bofelo bja tshepedišo ya gona bjale ya dilo ka tsela ye: “Go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape. Ge e le gabotse, ka ntle le ge matšatši ao a be a ka fokotšwa, go be go ka se be le nama ye e bego e tla phologa.”—Mateo 24:14, 21, 22.

Ke bomang bao ba tlago go fedišwa?

Bao ba sa ratego e bile ba sa hlankelego Jehofa le Jesu ke bona feela bao ba tlago go fedišwa. Batho ba bjalo ga ba kwe Modimo. Jesu o itše: ‘Go etša feela kamoo mehla ya Noa e bego e le ka gona, le go ba gona ga Morwa wa motho go tla ba bjalo. Gobane go etša ge ba be ba le bjalo mehleng yeo ya pele ga meetse-fula, ga se ba ela hloko go fihla meetse-fula a e-tla a ba gogola ka moka.’ (Mateo 24:36-39) Jesu o itše ba bantši ba tseleng yeo e lebišago tshenyegong.  Lega go le bjalo, o ile a nea kholofetšo ya gore go na le ‘tsela e pitlaganego e išago bophelong.’—Mateo 7:13, 14.

Tshepedišo ye ya dilo e tla fela neng?

Ge a botšišwa mabapi le pontšho ya go ba gona ga gagwe “le ya bofelo bja tshepedišo ya dilo,” Jesu o arabile ka gore: “Gobane setšhaba se tla tsogela setšhaba, mmušo wa tsogela mmušo, gomme go tla ba le tlhaelelo ya dijo le ditšhišinyego tša lefase . . . gomme ka baka la go oketšega ga go hloka molao lerato la ba bantši le tla fola.” (Mateo 24:3-12) Ka gona, ditaba ka moka tše di nyamišago tša lehono di na le se se kgothatšago seo di se bolelago—kgaufsinyane pušo ya Mmušo wa Modimo e tla tliša khutšo go batho ka moka bao ba kwago. Jesu o itše: “Ge le bona dilo tše di direga, le tsebe gore mmušo wa Modimo o batametše.”—Luka 21:31.

O swanetše go dira’ng?

Jesu o boletše gore Modimo “o gafile Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Gore o bontšhe tumelo go Modimo le go Morwa wa gagwe, o swanetše go ba tseba gabotse. Ka baka leo, Jesu o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.”—Johane 17:3.

Ela hloko gore dipelaelo le mathata di se go palediše go ithuta kamoo o ka bontšhago lerato la gago go Modimo. Jesu o itše: “Itlhokomeleng gore dipelo tša lena di se ke tša imelwa ke . . . dipelaelo tša bophelo, gomme ka tšhoganyetšo letšatši leo la le wela ka bjako go etša molaba. Gobane le tla [tla].” Ge o e-kwa temošo ya Jesu, o tla “[atlega] ka go phonyokga dilo tše ka moka tše di reretšwego go direga.”—Luka 21:34-36.

Bakeng sa tsebišo e oketšegilego, bona kgaolo 9, “Na re Phela ‘Mehleng ya Bofelo’?,” ka pukung ya Ke Eng Seo ge e le Gabotse Beibele e se Rutago? *

[Mongwalo wa tlase]